February 24, 2022 ai, Russia ese Ukraine ia tuari henia. Unai ese dika bada ia havaraia dainai taunimanima milioni be edia tano idia rakatania haraga. a

 “Bomu momo idia hapoua. Unai be gari gauna momokani. Ai kamonai taunimanima be trein amo idia heau neganai, ai danu ai lao. Emai kohu ibounai ai rakatania, badina ta ta be baege tamona sibona idia abia be namo. Mai anina bada pepadia, muramura, ranu, bona aniani sisina ai abia. Emai gau ibounai ai rakatania bona bomu idia pou noho lalonai trein idia stopu gabuna dekenai ai lao.”​—⁠Nataliia, Kharkiv, Ukraine amo.

 “Lau naria noho, badina lau laloa tuari do ia vara lasi. Bena siti lalodiai rege badadia lau kamonai bona egu uindo idia hamarerea danu. Unai dainai, mai anina gaudia sibona lau abia bona dabai 8:00 o’klok ai, ruma lau rakatania. Trein amo Lviv dekenai lau lao bena basi amo Poland dekenai lau lao.”​—⁠Nadija, Kharkiv, Ukraine amo.

Inai atikol lalonai

•  Dahaka badina korikoridia dainai refiuji idia vara?

•  Refiuji taudia be edeseniai heduru idia abia diba?

•  Hari iseda nega ai, Baibel ese refiuji taudia ia durua diba, a?

 Dahaka badina korikoridia dainai refiuji idia vara?

 Russia ese Ukraine ia tuari henia matamaia neganai, refiuji idia vara. To, Baibel ese unai bamona refiuji hekwakwanai ibounai edia badina korikori ia hahedinaraia:

•   Tanobada Gavamanidia be idia hegeregere lasi taunimanima edia ura gaudia ibounai idia henia totona. Gavamani taudia be nega momo edia siahu idia gaukaralaia taunimanima idia biagua auka totona.​—⁠Hadibaia Tauna 4:1; 8:9.

•   Satani Diabolo, “tanobada ena lohia,” ese taunimanima momo ia biagua dainai, Baibel ia gwau: “Tanobada ibounai be Dika Tauna ena siahu lalonai ia noho.”​—⁠Ioane 14:30; 1 Ioane 5:19.

•   Lagani momo lalonai taunimanima be hekwakwanai idauidau idia davaria. Hari ita be Baibel ese ia perovetalaia negana lalonai ita noho: “Dina gabedia ai nega aukadia do idia vara, unai ese taunimanima do idia hametaua bada.” (2 Timoteo 3:1) Danu, tuari, disasta idauidau, hitolo, bona gorere idauidau ese dina gabedia ena toa idia hahedinaraia. Unai gaudia dainai taunimanima be edia gabu idia rakatania.​—⁠Luka 21:10, 11.

 Refiuji taudia be edeseniai heduru idia abia diba?

 Baibel ese ia hahedinaraia iseda Havaraia Tauna, Iehova, b be refiuji bona edia ruma idia rakatania taudia ia lalokau henia bona idia dekenai hebogahisi karana ia hahedinaraia. (Deuteronomi 10:18) Iehova ia gwauhamata ena guba gavamanina ese refiuji taudia edia hekwakwanai ibounai do ia haorea, unai gavamani be Dirava ena Basileia, ia ese taunimanima edia gavamani ibounai edia gabu do ia abia. (Daniela 2:44; Mataio 6:10) Iehova ese ena Basileia do ia gaukaralaia Satani Diabolo ia kokia totona. (Roma 16:20) Unai Basileia ese tanobada ibounai do ia lohiaia, bona ia ese bese idia hapararaia gaudia ibounai do ia kokia. Tanobada ibounai dekenai taunimanima be ruma bese tamona bamona lalotamona ai do idia noho. Nega ta do ia mai ta be ena ruma eiava gabu do ia rakatania lou lasi, badina Baibel ia gwauhamata: “Idia ta ta be edia vain bona fig au henunai do idia helai, bona tau ta ese idia do ia hagaria lasi, badina tuari oreadia edia Iehova ese unai ia gwauraia.”​—⁠Mika 4:4.

 Dirava ena Basileia sibona ese refiuji maurina ia bada karana do ia hanamoa. Iehova ese ena Basileia do ia gaukaralaia hekwakwanai ibounai do ia haorea. Mani haheitalai haida ita laloa:

•   Tuari. “[Iehova] ese tanobada ibounai lalonai tuari ia haorea.” (Salamo 46:9) Dirava ese hekwakwanai do ia haorea dalana oi diba totona, inai atikol ladana “Peace on Earth​—⁠How Will It Come?” oi duahia.

•   Hisihisi bona dagedage karadia. “[Iehova] ese hisihisi bona dagedage karadia amo idia do ia hamauria.” (Salamo 72:14) Taunimanima be edia kara aukadia idia haidaua dalana oi lalopararalaia totona, inai atikol ladana “Inai Henia Karana Ita Hadokoa” oi duahia.

•   Ogogami. “[Iehova] ese heduru totona idia noinoi ogogami taudia do ia hamauria.” (Salamo 72:12) Dirava ese ogogami maurina do ia haorea dalana oi diba totona, inai atikol ladana “Is a Fair Economic System Possible?” oi duahia.

•   Hitolo. “Tanobada ai aniani be do ia momo herea.” (Salamo 72:16) Dirava ese hitolo do ia haorea dalana oi diba totona, inai atikol ladana “A World Without Hunger?” oi duahia.

 Hari iseda nega ai, Baibel ese refiuji taudia ia durua diba, a?

 Oibe. Baibel ese Refiuji taudia dekenai vaira nega ena helaro ia gwauhamatalaia sibona lasi, to danu hari idia ia durua diba edia hekwakwanai idia haheaukalaia totona.

 Baibel ia gwau: “Namo lasi gau ta umui lalohekwarahilaia, to gau ibounai lalonai do umui guriguri bona noinoi goadagoada mai tanikiu ida, emui noinoi herevadia be Dirava dekenai do umui gwauraia hedinarai bona Dirava ena maino, laloparara ibounai ia hereaia gauna . . . ese emui kudouna bona lalona do ia gimaia.”​—⁠Filipi 4:6, 7.

 Ena Anina: Ena be emu mauri ai dahaka ia vara, to Dirava oi noia oi dekenai lalomaino ia henai totona. Inai atikol ladana “Philippians 4:6, 7​—⁠‘Do Not Be Anxious About Anything’” itaia.