Taunimanima milioni momo amo, weda dikana ese emu mauri ia hadikaia danu, a? Weda dikana be dala idauidau ai ia vara. Hegeregere, lai gubana, typhoon, ia giroagiroa lai dikana, unai ese abata ia havaraia, eiava lai ese gau momo ia hadikaia. Medu bada ese tano ia kokia oho bona lai gubana dainai kevaru ese uda bada ia gabua. Weda dikana dainai medu be lasi, dina ia siahu momokani, sinou ida lai gubana ese dika bada ia havaraia diba.

 Tanobada ena gabu momo ai, weda dikana ia vara loulou bona dika bada ia havaraia noho. International Federation of Red Cross and Red Crescent Societies ia gwau, “disasta dainai hisihisi idia abia taudia edia namba danu be ia bada daekau. Taunimanima momo be abata, lai gubadia, bona medu lasi negana dainai idia mase, edia mauri dalana ia auka, bona lagani ta ta ai milioni momo be ruma lasi.”

 Unai gaudia idia vara neganai, taunimanima be tauanina bona hemami dalanai hisihisi idia abia. Unai idia mamia badina edia kohu, ruma bona edia lalokau taudia idia haboioa danu.

 Bema weda dikana dainai hisihisi oi davaria, Baibel ese oi ia durua diba oi haheauka totona. Baibel ese weda dikadia dainai hisihisi idia abia taudia momo dekenai goada, helaro, bona aonega sisiba ia henia. (Roma 15:4) Baibel ese inai henanadai badana danu ia haerelaia: Dahaka dainai Dirava ese inai dika ia koua lasi—lau ia panisia noho, a?

 Baibel ia hahedinaraia Dirava ese taunimanima idia davaria hisihisi ia havaraia lasi. Baibel ia gwau, “ta ese dika gaudia amo Dirava ia tohoa diba lasi, bona Dirava ese dika gaudia amo ta ia tohoa lasi.” (Iamesi 1:13) Unai ena anina be hari ena weda dikadia be Dirava ese ia havaraia lasi.

 Baibel ia hahedinaraia, guna Dirava ese medu bona lai ia gaukaralaia taunimanima dikadia ia panisia totona. To, unai gaudia be hari idia vara weda dikadia bamona lasi. Hadibaia hereva be lasi bona taunimanima namodia bona dikadia idia hadikaia. Baibel ia hahedinaraia Dirava ese nega ibounai kerere lasi taudia ia gimaia totona, hadibaia hereva ia henia guna, bona ena kara ena badina ia gwauraia hedinarai. Hegeregere, Noa ena nega ai, abata badana ia havaraia ena badina ia gwauraia totona, hadibaia hereva ia henia guna bona Noa, iena ruma bese ida ia gimaia.​—Genese 6:13; 2 Petero 2:5.

 Hari idia vara disasta be Dirava ena panisi karana lasi, diba ma haida oi abia totona inai atikol “What Does the Bible Say About Natural Disasters?” oi itaia.

 Baibel ia hahedinaraia Iehova a Dirava ese taunimanima laloa bada bona hebogahisi henia. Inai hagoadaia siridia itaia.

•   Isaia 63:9: “Edia lalometau negadia ibounai lalonai, [Dirava] danu ia lalometau.”

   Anina be: Iehova be hisihisi idia abia taudia dainai ia lalohisihisi bada.

•   1 Petero 5:7: “Ia be umui ia laloa bada.”

   Anina be: Iehova be emu namo ia laloa.

 Iehova be oi ia laloa bada bona hebogahisi hena dainai, kara ta ia karaia. Baibel lalonai aonega sisiba ia henia bona vaira nega totona helaro ia henia, weda dikadika ese disasta do ia havaraia lasi.​—2 Korinto 1:3, 4.

 Baibel ese Iehova ena gwauhamata ia hahedinaraia, ia gwau, “vaira nega ai noho namo do umui davaria.” (Ieremia 29:11) Ia ura taunimanima be weda dainai do idia gari lasi, to tanobada paradaiso ai mauri namona do idia moalelaia.​—Genese 1:28; 2:15; Isaia 32:18.

 Dirava ese ena Basileia amo vaira nega ena hahenamo do ia havaraia. Bona Iesu be unai guba gavamanina ia gunalaia tauna. (Mataio 6:10) Iesu be mai ena aonega bona siahu disasta idauidau ia koua totona. Iesu be tanobada dekenai ia noho neganai, ia hahedinaraia ia be mai ena siahu weda dikana ia koua totona. (Mareko 4:37-41) Ia be mai ena laloparara bona aonega ida do ia lohia, bona tanobada naria namonamo dalana be taunimanima dekenai do ia hadibaia. (Isaia 11:2) Iesu ena lohia henunai, weda dikadia dainai taunimanima be hisihisi do ia abia lou lasi.

 Reana oi henanadai, ‘Edena negai Iesu ese iena siahu do ia gaukaralaia weda dikadia ia koua totona?’ Unai haere diba totona, inai atikol “Edena Negai Dirava Ena Basileia ese Tanobada Do Ia Lohiaia?” itaia.

 Baibel ena aonega sisiba ese weda dikana ia do vara lasi neganai, ia vara lalonai, bona ia vara murinai oi ia durua diba.

•   Ia do vara lasi neganai: Oi hegaegae kara ta oi karaia haraga totona.

   Baibel ena hereva: “Aonega tauna ese dika ia itaia bona ia raka siri, to diba bada lasi tauna be ia lao noho bona dika ia davaria.”​—Aonega Herevadia 22:3.

   Anina be: Do idia vara disasta oi laloa, unai amo kara ta oi karaia haraga bona emu ruma bese oi gimaia diba.

   Ekspiriens: “Ai be ai hegaegae dainai uda ai lahi bada ia vara neganai, ai heau mauri. Ai be mai emai disasta baege. Emai muramura bona emai dabua ai abia danu. Taunimanima idia gari bona idia laloa namonamo lasi. To, ai be gau ta dekenai ai dabu lasi, unai dainai lau tanikiu!”​—Tamara, California, U.S.A.

•   Ia vara lalonai: Mai anina bada gauna oi laloa.

   Baibel ena hereva: “Ena be tau ta ena kohu be momo, to ena kohu ese ia dekenai mauri do ia henia lasi.”​—Luka 12:15.

   Anina be: Mauri be mai anina bada to kohu lasi.

   Ekspiriens: “Typhoon ladana Lawin b ese emai ruma ia hadikaia neganai, lau diba lasi dahaka do lau karaia. To mai momokani ida Iehova Dirava lau guriguri henia. Bona lau laloparara emai kohu sibona ai haboioa to emai mauri ai haboioa lasi.”​—Leslie, Philippines.

•   Ia vara murinai: Hari dina oi laloa, to kerukeru lasi.

   Baibel ena hereva: “Kerukeru totona umui lalohekwarahi lasi, badina kerukeru danu be mai ena lalohekwarahi gaudia.”​—Mataio 6:34.

   Anina be: Gabeai do idia vara hekwakwanai dainai laloa momo lasi.

   Ekspiriens: “Lai-gubana ladana Irma dainai egu ruma be abata ese ia hadikaia murinai, disisen momo lau karaia be namo. Lau lalohekwarahi bada. Lau hekwarahi Baibel ena aonega sisiba lau badinaia, unai amo hari dina sibona lau laloa, to kerukeru lasi. Iehova ena heduru amo gau momo lau haheaukalaia.”​—Sally, Florida, U.S.A.

 Heduru haida totona inai atikol “When Disaster Strikes—Steps That Can Save Lives” itaia.