Iesu ena Pasova aria ginigabena be mai anina bada. Iesu be kahirakahira do ia mase neganai, palani ia karaia ena aposetolo taudia ida Pasova ariana idia ania totona, bona dala matamana ia herevalaia, unai be lagani ta ta ai Lohiabada Ena Anibou do idia karaia. Ioane bona Petero ia siaia daiutu idia hegaegaelaia totona. (Lu 22:7-13; rau 1 ena laulau itaia.) Unai ese ita ia hadibaia March 27 ai, Memorial totona ita hegaegae. Hegeregere Kongrigeisen be dala do idia karaia tok henia tadikaka, wain bona paraoa, bona gau ma haida idia hegaegaelaia. To ita ta ta be Memorial totona edena bamona do ita hegaegae?

Emu kudouna oi hegaegaelaia. Memorial Baibel duahiduahi oi karaia bona oi laloa dobu. Memorial Baibel duahiduahi ena sediual be Dina Iboudiai Buka Helaga Tahua dekenai ia noho. Bona Dirava Ena Hereva Stadilaia buklet ena karoa 16 ai, unai sediual ia noho danu. (Iseda Haroro Bona Mauri Dalana Ena Hebou Pepana April 2020 gauna, itaia danu.) Famili ta ta be edia ruma bese tomadiho lalonai mauri davana ena namo idia herevalaia totona, inai buka Watch Tower Publications Index o Iehova Ena Witnes Taudia Edia Stadi Indeks idia itaia diba.

Ma haida oi invait. Invateisen hariharilaia kempein oi durua. Do oi invait taudia oi laloa hegeregere, emu lou henia, Baibel stiuden gunadia, turadia, bona emu varavara. Elda taudia ese idia manoka taudia idia invait be namo. Bona laloatao bema ta be oi noho gabuna ai ia noho lasi, ia noho gabuna ai memorial ena deit oi diba totona, oi lao jw.org ena home page bona AI KARAIA GAUDIA oi klik bena “Memorial.”

Dahaka gau ma haida ita karaia diba ita hegaegae totona?