Ta ena dika oi gwauatao ena anina be ena kerere oi laloatao lasi bona oi badu henia noho lasi. Herevana ta ena dika oi gwauatao, to ena kerere oi hamaragia lasi eiava oi gwau lasi hekwakwanai ia vara lasi.

BAIBEL ENA HAKAUA HEREVA: “Bema ta be badina ta dainai ma ta dekenai ia maumau, ta ta emui kara do umui haheaukalaia noho bona mai kudouna ibounai ida do umui gwauatao heheni.”​—Kolose 3:13.

“Ta oi lalokau henia neganai, ena kerere oi laloa noho lasi, to ena kara namodia oi laloa.”​—Aaron.

Ta oi badu henia noho neganai, unai ese ia hadikaia diba gau haida be emu tauanina, lalohadai, bona headava.

“Nega ta ai, ia vara gauna ta ese egu lalona ia hahisia neganai, egu adavana be sori herevana ia gwauraia. Iena dika lau gwauatao be ia auka. Gabeai, iena dika lau gwauatao, to lau lalohisihisi badina unai lau karaia haraga lasi. Unai ese emai herevahereva o hetura karana ia hadikaia.”​—Julia.

OI SIBONA OI NANADAIA

Emu adavana ena kara o hereva ta dainai oi lalohisihisi neganai, oi sibona oi nanadaia:

• Lau badu haraga, a?

• Unai be kerere badana dainai, egu adavana ese lau ia sori henia be namo, eiava ena kerere lau laloaboio be namo?

EMU ADAVANA IDA OI HEREVALAIA HENANADAI

• Miniti hida o hora hida murinai dika ai gwauatao heheni be namo?

• Dahaka ai karaia diba, unai amo dika ai gwauatao haraga?

Dala Ma Haida

• Oi badu neganai, namo lasi emu adavana ena kerere maragidia oi gwauraia hedinarai.

• Oi laloatao “ita ibounai be nega momo ita kerere,” bona emu adavana ia kerere danu.​—Iamesi 3:2.

“Ai ruaosi ai kerere neganai, dika gwauatao be ia auka lasi, to tamona ia kerere neganai, dika gwauatao be ia auka. Sori hereva abia dae bona dika gwauatao be manau karana korikorina.”​—Kimberly.

BAIBEL ENA HAKAUA HEREVA: “Oi ia samania tauna ida emui hekwakwanai umui hamaoromaoroa haraga.”​—Mataio 5:25.