HEADAVA TAUDIA
1: Noho Namonamo
ANINA BE DAHAKA?
Headava lalonai idia noho namonamo taudia (tau bona hahine) idia laloa, edia headava do ia noho hanaihanai dainai, edia headava idia gimaia. Tau o hahine ia abia dae, ena adavana be headava lalonai do ia noho namonamo, ena be hekwakwanai idia vara.
Headava taudia haida idia gwau, ‘Ai noho hebou badina emai turadia bona famili idia ura lasi ai divos.’ To, gau badana be inai: Headava taudia idia noho hebou badina idia lalokau heheni bona matauraia heheni.
BAIBEL ENA HAKAUA HEREVA: “Namo lasi tau ese ena adavana ia rakatania.”—1 Korinto 7:11.
“Bema emu headava lalonai oi noho namonamo, do oi badu haraga lasi. To ma ta ena dika do oi gwauatao haraga bona sori hereva do oi gwauraia haraga. Oi diba hekwakwanai ese headava ia hadikaia diba, bona namo lasi hekwakwanai idia noho daudau ela bona oi divos.”—Micah.
DAHAKA DAINAI NOHO NAMONAMO BE GAU BADANA?
Hekwakwanai negadiai, idia noho namonamo lasi headava taudia be reana do idia gwau, ‘Ai be ai headava kava,’ bena dala do idia tahua idia parara totona.
“Momo idia headava neganai, idia laloa bema headava ia heau namonamo lasi, vadaeni idia divos diba. Unai bamona lalohadai idia abia taudia be, edia headava dinana amo do idia noho namonamo lasi.”—Jean.
DAHAKA OI KARAIA DIBA?
OI SIBONA OI NANADAIA
Hepapahuahu ia vara neganai . . .
-
Oi lalohisihisi badina oi laloa adavana kererena oi adavaia, a?
-
Oi laloa, adavana matamata ma ta oi tahua be namo, a?
-
Oi gwauraia herevadia be hegeregere, “Oi do lau rakatania” eiava “Tau (o hahine) namona ma ta do lau tahua?”
Bema unai henanadai tamona o toiosi dekenai emu haere be ‘Oibe,’ vadaeni harihari dala oi tahua emu adavana ida oi noho hebou namonamo totona.
EMU ADAVANA IDA INAI HENANADAI UMUI HEREVALAIA
-
Iseda headava lalonai ita noho namonamo eiava lasi? Bema lasi, vadaeni dahaka dainai?
-
Harihari dahaka ita karaia diba eda headava lalonai ita noho namonamo totona?
DALA MA HAIDA
-
Nega haida reana lalokau revareva ta be emu adavana dekenai oi siaia
-
Gaukara gabunai, emu teibolo (o desk) latanai emu adavana ena foto oi atoa, unai amo oi hahedinaraia oi ura emu adavana ida oi noho namonamo
-
Gaukara gabunai o emu adavana ida oi noho lasi negadia ai, emu adavana oi rini henia be namo
BAIBEL ENA HAKAUA HEREVA: “Unai dainai Dirava ese ia hakapua taudia be ta ese do ia hapararaia lasi be namo.”—Mataio 19:6.
