Tahua gaudia oi atoa badina oi ura hagugurua momokani​—idia be nihi sibona lasi. Unai bamona oi karaia totona, namona be palani oi karaia, oi hegaegae oi haidaua totona, bona oi hagugurua namonamo.

Emu tahua gaudia haida be dina o wiki haida lalonai oi hagugurua diba, bona ma haida be hua o lagani tamona lalonai oi hagugurua diba. To, lagani tamona gaudia oi hagugurua totona, namona be tahua gaudia maragidia oi hagugurua guna.

Emu tahua gaudia oi hagugurua neganai, unai ese emu abidadama, hetura karana, bona moale ia habadaia.

Abidadama: Tahua gaudia maragidia oi atoa bona hagugurua neganai, oi diba oi be hegeregere tahua gaudia badadia oi hagugurua totona. Danu, oi diba oi be hegeregere dina ta ta ai do idia vara hekwakwanai​—hegeregere turadia edia laloani ­herevadia o pressure​—oi hanaia diba.

Hetura karana: Taunimanima idia ura tahua gaudia namodia idia atoa taudia idia bamoa​—badina unai bamona taudia be idia ura gaudia idia diba bona idia gaukara goada idia hagugurua totona. Danu, emu hetura karana oi hagoadaia dalana ta be inai: Oi bamoa tauna oi durua ena tahua gaudia ia hagugurua totona, badina emu tahua gaudia be iena bamona.

Moale: Tahua gaudia oi atoa bona hagugurua neganai, oi mamia oi be hegeregere oi ura henia gaudia oi hagugurua totona.

“Lau ura tahua gaudia lau atoa. Unai amo lau bisi bona lau gaukara goada ela bona lau hagugurua. Bona unai bamona oi karaia neganai, unai ese oi ia durua oi laloa lou bona oi gwau: ‘Namo herea, lau karaia vadaeni! Egu tahua gauna lau hagugurua vadaeni.’ ”​—Christopher.

BAIBEL ENA HAKAUA HEREVA: “Bema oi noho kava, noho kava, ela bona lai bona medu idia namo neganai, oi be gau ta do oi hadoa lasi, bona tano ena anina ta do oi davaria lasi.”​—Hadibaia Tauna 11:4.

Inai dala oi badinaia, bona emu tahua gaudia do oi hagugurua.

Abia hidi. Oi hagugurua diba tahua gaudia ena lista ta oi karaia bona edia namba oi torea, bena unai oda hegeregerena oi badinaia, hegeregere namba 1, namba 2, namba 3 . . .

Palani. Tahua gaudia ta ta totona, inai dala oi badinaia:

• Tahua gauna hagugurua ena deit korikorina oi atoa.

• Do oi karaia gaudia oi palanilaia.

• Do idia vara hekwakwanai totona oi hegaegae, bona hanaia daladia oi laloa.

Karaia. Namo lasi oi naria, to emu lista ai gau ginigunana oi torea bona maoromaoro oi badinaia matamaia. Oi sibona oi nanadaia, ‘Dahaka do lau karaia guna ela bona egu tahua gauna lau hagugurua diba?’ Bena kara ta oi karaia. Emu lista ai oi torea gaudia ta ta oi badinaia noho lalonai, oi sekea dahaka gaudia oi hagugurua vadaeni.

BAIBEL ENA HAKAUA HEREVA: “Gaukara goadagoada tauna ena palani idia guguru.”​—Aonega Herevadia 21:​5, NWT.