Idia hanaia lagani haida gunanai, namona be tama sina ese edia natudia mero o kekeni dekenai mahuta hebou karana idia herevalaia guna. Bona natudia edia mauri lagani hegeregerena unai gaudia idia herevalaia diba.

To hari be unai bamona lasi. The Lolita Effect bukana ia gwau: “Media ai mahuta hebou sivaraidia momo idia halasia dainai ia auka lasi natudia maragidia be unai dala amo mahuta hebou sivaraidia idia abia.” Unai ese natudia ia durua o ia hadikaia, a?

Mahuta hebou sivaraidia be momo herea. Deborah Roffman ena buka Talk to Me First lalonai ia gwau: “Herevahereva, advataismen, muvi, buka, ane herevadia, TV, mesiji, gadara, poster, fon, kompiuta ai mahuta hebou laulaudia, hereva bona lalohadai momo idia hahedinaraia dainai [matamata memero kekeni bona natudia maragidia] ese reana mahuta hebou karana . . . idia lalohadailaia momo.”

Bisinesi taudia be unai lalohadai idia durua. Advatais idia karaia taudia bona dabua turia taudia ese lebulebu dabua be natudia totona idia hoihoilaia, idia matamata negana amo idia hadibaia edia toana idia laloa bada totona. Buka ta ladana So Sexy So Soon ia gwau: “Bisinesi taudia idia diba natudia be edia turadia ese idia abia dae bona karaia gaudia idia ura henia, bona idia ese edia kohu amo natudia edia lalona idia veria. Unai dainai mahuta hebou laulaudia bona gau idauidau idia karaia badina idia ura edia kohu idia hoihoilaia, to matabodaga karadia totona lasi.”

Diba sibona be hegeregere lasi. Motuka ia gaukara dalana oi diba sibona be hegeregere lasi, to namona be motuka oi taria danu. Unai hegeregerena, mahuta hebou karana dekenai diba oi abia sibona be hegeregere lasi, to namona be unai diba oi gaukaralaia disisen maorodia oi karaia totona.

Gau badana be inai: Hari inai negai, emu natudia do oi durua be gau badana, unai amo “idia ese edia darana idia gaukaralaia karana amo, sibona idia hadibaia, unai amo maoro bona kerere edia idau idia dibaia diba.”​—Heberu 5:14.

Natudia hereva henidia. Ena be unai do oi herevalaia be auka, to emu natudia dekenai mahuta hebou karana oi herevalaia be emu maduna. Unai oi abia dae be namo.​—Baibel ena hakaua hereva: Aonega Herevadia 22:6.

Nega abia hidi umui kiki totona. Gau momo oi herevalaia lasi, to nega ta ta reana umui rua be motuka amo umui loaloa eiava ruma gaukara umui karaia hebou neganai umui herevahereva diba. Emu natuna ese ena lalohadai ia gwauraia totona, namo lasi inai bamona henanadai hegeregere; “Unai bamona advatais oi ura henia, a?” To oi gwau diba “Dahaka dainai bisinesi taudia ese unai bamona laulau idia gaukaralaia?” Emu natuna ia haere murinai, reana oi nanadaia diba, “Unai gaudia dekenai emu hemami be edena bamona?”​—Baibel ena hakaua hereva: Deuteronomi 6:6, 7.

Natudia edia mauri lagani hegeregerena. Idia do sikuli lasi natudia dekenai edia tauanina ena hehuni kahadia edia ladana maorodia oi hadibaia, bona oi hamaorodia ta ese unai kahadia ia dogoatao be maoro lasi. Natudia idia tubu daekau lalonai, idia dekenai beibi ia vara dalana oi herevalaia diba. Unai amo memero o kekeni badadia ai idia lao neganai, mahuta hebou ena taravatu maorodia idia lalopararalaia namonamo vadaeni.

Mai anina bada karadia hadibaia. Natuna ia maragi negana amo ia dekenai kara momokani, kara maoromaoro bona hemataurai karadia oi hadibaia. Bena, unai karadia ese ia do ia durua, mahuta hebou karana umui herevalaia totona. Danu, unai mai anina bada gaudia oi gwauraia hedinarai namonamo. Hegeregere, oi diba headava lasi taudia idia mahuta hebou be kerere, unai oi gwauraia hedinarai. Bona unai kara be kerere bona dika ia havaraia ena badina oi herevalaia. Buka ta Beyond the Big Talk ia gwau, “Matamata memero kekeni idia gwau, edia tama sina ese idia hamaoroa, matamata taudia idia mahuta hebou be maoro lasi, unai bamona natudia momo be mahuta hebou karadia do idia dadaraia.”

Haheitalai namona hahedinaraia. Emu hereva oi badinaia. Hegeregere, hevaseha hereva mirodia dainai oi kiri, lebulebu dabua oi karaia, ta oi hauraia kava, a? Unai bamona karadia dainai emu natudia be oi hadibaia gaudia do idia laloa maragi.​—Baibel ena hakaua hereva: Roma 2:21.

Lalohadai maorona oi hahedinaraia. Mahuta hebou karana be Dirava amo ia mai harihari gauna, bona unai be headava taudia sibona totona. (Aonega Herevadia 5:18, 19) Namona be emu natuna oi hadibaia nega maorona ai unai harihari gauna do ia moalelaia diba, unai amo ia be idia do headava lasi bona mahuta hebou karana idia karaia taudia ese idia davaria lalohisihisi bona lalohekwarahi karana do ia mamia lasi.​—1 Timoteo 1:18, 19.