ARIMATEA TAUNA IOSEPA be ia diba lasi edena dala ai mai lalogoada ida Roma ena gavana, Pontio Pilato, do ia hereva henia. Pontio Pilato be kara auka tauna. To bema Iesu ena mase tauanina be gabu namona ta ai do idia guria, namona be ta ese Pilato amo gwaumaoro ia abia, Iesu ena mase tauanina idia abia totona. Iosepa ia laloa Pilato ese ena noinoi do ia abia dae lasi. To Pilato ese unai noinoi herevana ia abia dae, badina iena ami ofesa ta ese ia hamomokania Iesu be ia mase vadaeni. Herevana Iosepa ena lalona ia do metau noho, to karaharaga Iesu idia hamasea gabuna dekenai ia heau lao.​—⁠Mar. 15:42-45.

• Arimatea Tauna Iosepa be daika?

• Ia be Iesu ena varavara ta, a?

• Bona dahaka dainai iena sivarai oi dibaia be namo?

Mareko ena Evanelia bukana ese Iosepa ia gwauraia, “ladana namona Kaunsolo tauna.” Kaunsolo taudia be Sanhedrin taudia ia herevalaia, idia be Iuda taudia edia kota badana bona Iuda taudia, edia gavamani, bona tomadiho idia naria. (Mar. 15:1, 43) Iosepa be unai orea ena gunalaia tauna ta dainai, ia be mai ena maoro Roma ena gavana ida ia hebou. Baibel ese danu ia hahedinaraia Iosepa be taga tauna ta.​—⁠Mat. 27:57.

Sanhedrin taudia ibounai be Iesu idia inai henia. Ia idia hamasea totona palani idia karaia. To, Iosepa be “tau namona bona kara maoromaoro tauna.” (Luka 23:50) Ia be Sanhedrin taudia ma haida bamona lasi, kara momokani ia badinaia, kara goevana ia hahedinaraia, bona ia hekwarahi Dirava ena taravatu ia badinaia totona. Danu, ia be “Dirava ena Basileia ia naria noho,” unai dainai ia be Iesu ena hahediba tauna ta ai ia lao. (Mar. 15:43; Mat. 27:57) Reana Iesu ena sivarai ia ura henia, badina ia dekenai kara momokani bona kota maoromaoro karana be mai anina bada.

Ioane 19:38 ese ia hahedinaraia, Iosepa be “Iesu ena hahediba tauna ta, to Iuda taudia dekenai ia gari dainai, unai ia gwauraia lasi.” Dahaka dainai Iosepa ia gari? Badina ia diba Iuda taudia be Iesu idia inai henia bona sinagoga ai bema ta be Iesu ia gwauraia hedinarai, unai tauna do idia lulua. (Ioa. 7:45-49; 9:22) Sinagoga amo idia lulua ena anina be, ia do idia hahemaraia, dadaraia, bona Iuda tauna lasi bamona do idia kara henia. Iosepa ia gari dainai, ia ura lasi ia gwauraia hedinarai ia be Iesu ia abidadama henia. To bema unai ia karaia, iena dagi do ia haboioa bona iena ladana namona do ia hadikaia.

Iosepa sibona lasi, to ma haida danu be unai hekwakwanai idia haheaukalaia. Ioane 12:42 ia gwau, “lohia taudia momo ese [Iesu] idia abidadama henia danu, to Farisea taudia dainai ia idia gwauraia hedinarai lasi, badina sinagoga amo idia luludia garina.” Unai bamona hekwakwanai ia davaria tauna ta be, Nikodemo, ia danu be Sanhedrin tauna ta.​—⁠Ioa. 3:1-10; 7:50-52.

Ena be Iosepa be hahediba tauna ta, to sibona iena abidadama ia gwauraia hedinarai lasi. Unai be hekwakwanai badana, to Iesu ia gwau: “Taunimanima vairanai lau ia gwauraia hedinarai tauna, be egu Tamana guba ai ia noho, ena vairanai do lau gwauraia hedinarai danu. To taunimanima vairanai lau ia gwauraia hedinarai lasi tauna, be egu Tamana guba ai ia noho, ena vairanai do lau gwauraia hedinarai lasi.” (Mat. 10:32, 33) Iosepa ese Iesu ia dadaraia lasi, to ia gari dainai Iesu ia gwauraia hedinarai lasi. Oi danu be unai bamona, a?

To Iosepa be kara namona ia karaia, Baibel ese ia hahedinaraia ia be Sanhedrin taudia edia palani, Iesu hamasea totona, ia durua lasi. (Luka 23:51) Haida idia gwau, Iesu  idia kota henia neganai, Iosepa ia noho lasi. Ena be, Iosepa ese unai kota maoromaoro lasi karana ia lalohisihisilaia bada, to gau ta do ia karaia diba lasi!

Iesu ia mase dinana ai, Iosepa be ena gari karana ia rakatania bona abia hidi ia karaia Iesu murinai idia raka taudia ia durua totona. Unai abia hidi be Mareko 15:43 ese ia hahedinaraia, ia gwau: “Mai gari lasi ida Pilato dekenai ia lao bona Iesu ena tauanina totona ia noia.”

Iesu ia mase neganai, reana Iosepa danu be unai nega ai ia noho. Unai dainai, ia diba Iesu be ia mase vadaeni, to Pilato be gabeai ia diba. Danu, Iosepa be Iesu ena tauanina totona ia noinoi neganai, gavana “ia ura diba bema Iesu ia mase vadaeni.” (Mar. 15:44) Iosepa ia itaia Iesu be hisihisi auna ai idia tauadae neganai, unai ese ena kudouna ia hamarerea dainai, iena lalomamina ia sekea bona mai gari lasi ida hereva momokani ia gwauraia hedinarai, a? Reana. Oibe, ia be mai gari lasi ida kara ta ia karaia. Hari do ia hahedinaraia ia be Iesu ena hahediba tauna ta.

Iuda taudia edia taravatu hegeregerena, au dekenai idia tauadae ela bona idia mase taudia be dina ia do diho lasi lalonai, idia guria be namo. (Deu. 21:22, 23) Roma taudia be unai taravatu idia laloa bada lasi, badina kerere karaia taudia be au ai idia tauadae ela bona idia mase neganai, edia tauanina be idia rakatania ia bodaga totona eiava mase gurina ta lalonai idia negea. To, Iosepa be Iesu ena mase tauanina dekenai unai  lalohadai ia abia lasi. Iesu idia tauadae gabuna kahirakahira ai, Iosepa ese guria gabuna matamatana ta ia hegaegaelaia bona unuseniai Iesu ia guria. Unai gabu ai, tau ta idia do guria lasi, unai ese ia hahedinaraia, Iosepa be vanegai sibona Arimatea * hanua amo ia mai bona Ierusalema dekenai ia noho bona ia ura unai gabu ia gaukaralaia ena varavara ia guria totona. (Luka 23:53; Ioa. 19:41) Iosepa ese unai gabu ai Iesu ia guria neganai, unai ese iena heabidae karana ia hahedinaraia bona Mesia totona idia perovetalaia herevana, “kohu momo taudia danu idia guria” herevana unai, ia hagugurua.​—⁠Isa. 53:5, 8, 9.

Evanelia bukadia 4 ese ia hahedinaraia, Iesu ena tauanina be hisihisi auna amo idia kokia murinai, Iosepa ese dava bada dabuana ta amo ia kumia bona guria gabu matamata dekenai ia atoa. (Mat. 27:59-61; Mar. 15:46, 47; Luka 23:53, 55; Ioa. 19:38-40) Baibel ese ia hahedinaraia, Nikodemo be bonana namona muramura ia abia bona ia lao Iosepa ia durua totona. Unai tatau rua be lohia taudia dainai, Iesu ena mase tauanina idia kokia totona, ma haida ese idia durudia danu. Unai dainai, edia hesiai taudia ese mase tauanina idia huaia bona idia guria. Herevana edia hesiai taudia idia gaukaralaia, to idia rua ese idia karaia gaukarana be mai anina bada. Bema tau ta ese mase tauna ena tauanina ia dogoatao, ia be do ia miro noho ela bona dina 7 idia ore, ia dogoatao gaudia ibounai be do idia miro. (Num. 19:11; Hag. 2:13) Bona bema Pasova boubou ena wiki ai unai ia vara, unai tauna be Pasova boubouna do ia reaia bona taunimanima amo do ia daudau. (Num. 9:6) Iosepa be Iesu ena guria gaukarana ia hegaegaelaia, to bema iena turadia be ia karaia karana idia diba, ia do idia inai henia. To ia be unai ia laloa lasi, badina ia ura mai hemataurai ida gabu namona ta ai Iesu ia guria bona taunimanima vairanai ia hahedinaraia ia be Keriso murinai ia raka tauna ta.

Iesu idia guria ena sivarai murinai, Baibel ese Arimatea tauna Iosepa ena sivarai ma haida ia gwauraia lasi, unai dainai inai henanadai ia vara: Ia dekenai dahaka ia vara? Haere ita diba lasi. Ita herevalaia gaudia amo ita dibaia gauna be inai: Iosepa be mai ura bada ida ia hahedinaraia ia be Keristani tauna ta. Herevana hekwakwanai bona hahetoho momo ia davaria, to unai ese iena abidadama ia hamanokaia lasi to ia hagoadaia bada. Bona unai be haheitalai namona.

Unai sivarai ese ita ta ta dekenai inai henanadai ia henia, ita laloa dobu totona: Ita be iseda dagi, moni gaukara, kohu, ruma bese laloa bada karana o iseda ura kwalimu dekenai nega bada ita negea o iseda hetura karana Iehova ida ita laloa bada?