Lagani 1950 bamona lalonai, John ena tamana be India ena taoni maragina, Gujarati ai ia bapatiso bona Iehova ena Witnes tauna ai ia lao. John, iena tadikaka rua, taihudia toi, bona edia sinana be Katolik dubu idia lao bona nega momo edia tamana ena abidadama karana dekenai idia lalotamona lasi.

Dina ta ai, John ena tamana ese John dekenai revareva ta ia henia bona ia hadibaia kongrigeisen tadikaka ta dekenai do ia abia lao. To unai daba ai, John be ruma ai gaukara haida ia karaia noho lalonai iena ima kwakikwakina ia utua. To ia ura unai revareva ia abia lao, unai dainai dabua ta amo unai bero ia kumia bona ia lao.

John be tadikaka ena ruma dekenai ia ginidae neganai, unai tadikaka ena adavana ese John amo unai revareva ia abia, ia be Iehova ena Witnes. Bena John ena bero ia itaia bona ia ura durua. Iena first-aid maua ia abia bona muramura amo John ena bero ia hagoevaia bena dabua goevana ta amo ia kumia namonamo. Unai murinai, John totona ti siahuna ia karaia bona ia dekenai Baibel ia herevalaia.

Unai negai, John ena lalohadai kererena Witnes taudia dekenai ia idau matamaia, unai dainai ena tamana ese ia abia dae gaudia rua dibaia totona, taihu ia nanadaia, Iesu be Dirava eiava? Bona Keristani taudia be Maria dekenai idia guriguri be maoro, a? Taihu be John ena gado, Gujarati gado, ia diba dainai, unai gado amo iena henanadai be Baibel amo ia haerelaia bona ia dekenai “Basileia Ena Sivarai Namona” buklet ia henia.

Gabeai, John be unai buklet ia duahia murinai, ia mamia unai be iena nega ginigunana Baibel ena hereva momokani ia kamonai. Iena dubu ena pris tauna dekenai ia lao bona unai henanadai rua ia henia. Pris tauna be unai henanadai rua dainai ia badu dikadika bona John dekenai Baibel ta ia negea lao, bona mai boiboi ida ia gwau: “Oi be Satani ai oi lao vadaeni! Baibel amo lau dekenai oi hahedinaraia, edena siri ese idia hamomokania Iesu be Dirava lasi bona Maria do ita tomadiho henia lasi. Oi hahedinaraia!” John be pris ena kara dainai ia hoa bada, unai dainai pris dekenai ia gwau, “Lau be Katolik dubu ta dekenai do lau vareai diba lasi.” Bona unai ia karaia!

John be Witnes taudia ida Baibel ia stadilaia matamaia, tomadiho momokani ia abia dae bona Iehova ia hesiai henia. Gabeai, iena famili ma haida be unai idia itaia neganai, idia danu be Iehova ena Witnes taudia ai idia lao. John ena ima kwakikwakina ai ia davaria bero ena maka be hari ia do noho. Unai maka ia itaia neganai, unai taihu ese ia dekenai ia hahedinaraia Keristani kara namona ia laloatao, badina unai kara dainai ia be tomadiho momokani ia dibaia.​—⁠2 Kor. 6:4, 6.