TAUNIMANIMA be mai edia lalohadai idauidau mauri bona mase dekenai. Haida idia laloa mase murinai do idia mauri noho, reana mauri gauna ma ta bamona do idia vara lou eiava gabu ma ta ai do idia noho. Ma haida idia laloa do idia vara lou bona mauri matamatana do idia noholaia. To ma haida idia gwau mase be gau ibounai ena dokona.

To oi danu be hereva haida oi abia dae, reana oi maragi neganai oi idia hadibaia gaudia eiava emu kastom karadia oi abia dae. Mase dekenai lalohadai be idauidau dainai, tau ta eiava gabu ta dekenai oi lao diba unai henanadai ena haere oi diba totona, a?

Lagani handred momo lalonai, dubu gunalaia taudia ese mase diba lasi soulina ena hahediba herevana idia hadibaia. Dubu badadia momo hegeregere Keristani tomadiho, Hindu, Iuda tomadiho, Muslim bona ma tomadiho haida ese mase diba lasi soulina ena hadibaia herevana idia abia dae, idia gwau bema ta ia mase ena souli be lauma gabuna ta dekenai ia mauri. To Buddhist taudia idia abia dae, ta be ia vara loulou murinai, ia lalonai ia noho siahuna be gabu namona ladana Nirvana dekenai ia lao.

Unai bamona hadibaia herevadia dainai, taunimanima momo tanobada hegegemadai idia abia dae bema ta ia mase, unai be mauri ena dokona lasi, mase be hegeregere iduara ia kehoa mauri ma ta dekenai. Unai dainai momo idia laloa mase be mai anina bada ta ena mauri lalonai, bona idia dekenai unai be Dirava ena ura. To Baibel be dahaka ia gwau? Mani murina atikol oi duahia. Ena haere dainai reana do oi hoa.