1. Lalomanoka ese edena dala ai ita ia hamanokaia diba?

DINA ta ta ai hekwakwanai idauidau ita davaria bona ita hekwarahi ita hanaia totona. To ita lalomanoka neganai, ia auka iseda hekwakwanai ita hamaoromaoroa totona. Unai dainai, do ita laloatao lalomanoka ese iseda abidadama, lalogoada, bona moale ia hadikaia diba. Aonega Herevadia 24:10 ia gwau: “Bema hekwakwanai neganai oi manoka . . . oiemu goada be maragimaragi momokani.” Oibe, ita lalomanoka neganai, ita mamia ita be goada lasi bona ita hegeregere lasi iseda hekwakwanai ita haheaukalaia totona.

2. Dahaka gaudia dainai ita lalomanoka diba, bona inai stadi lalonai dahaka do ita herevalaia?

² Gau momo dainai ita lalomanoka diba, hegeregere, ita abia lalohadai kereredia, iseda manoka gaudia, bona gorere. Eiava ita ura henia asainmen ta ita abia lasi eiava iseda teritori ai ta be sivarai namona ia kamonai lasi. Inai stadi ai, lalomanoka ita hanaia totona ita karaia diba gaudia do ita herevalaia.

3. Iseda kerere dainai ita laloa ita be anina lasi neganai dahaka ese ita durua diba?

³ Sibona ita laloa maragi bona ita karaia kara dika dainai ita lalomanoka diba. Unai kerere dainai ita laloa Iehova ese paradaiso lalonai ita do ita abia vareai lasi. Unai lalohadai be mai ena dika. Vadaeni, iseda kerere be edena bamona ita laloa be maoro? Baibel ese ia hahedinaraia Iesu Keriso sibona be goevadae tauna, to taunimanima ibounai be idia “kara dika vadaeni.” (Roma 3:23) To, Iehova be iseda kerere sibona ia itaia lasi bona ia laloa lasi gau ibounai do ita karaia goevagoeva. To, ia be lalokau Tamana bona ia ura ita ia  durua, danu ia be haheauka Diravana. Ia diba kara maoromaoro ita badinaia be mai ena hekwarahi, bona ita laloa ita be anina lasi, to ia noho hegaegae ita ia durua totona.​—Roma 7:18, 19.

4-5. Edena dala ai 1 Ioane 3:19, 20 ese taihu rua ia durua lalomanoka idia hanaia totona?

⁴ Mani Deborah bona Maria edia sivarai ita laloa. * Deborah ia maragi neganai ena ruma bese taudia ese lalokau lasi dalanai ia idia kara henia dainai, ia mamia ia be anina lasi. Ena gaukara namodia dainai ia idia hanamoa lasi. Unai dainai ia bada neganai sibona ia laloa maragi. Kerere maragidia ia karaia neganai, ia mamia ia be anina lasi. Maria danu be unai bamona. Ena varavara taudia ese idia hahemaraia. Unai dainai ia mamia ia be anina lasi. Ia bapatiso murinai, ia mamia ia hegeregere lasi Iehova ena Witnes hahinena ai do ia lao.

⁵ To inai taihu rua be Iehova badinaia karana idia hadokoa lasi. Dahaka dainai? Badina mai lalona ibounai ida guriguri amo Iehova dekenai edia lalohekwarahi idia negea lao. (Sal. 55:22) Idia abia dae iseda lalokau guba Tamana ia laloparara, guna ita dekenai idia vara gaudia dainai do ita laloa ita be anina lasi. Ena be ita laloa ita dekenai kara namodia be lasi, to Iehova be iseda kudouna ai idia noho kara namodia ia itaia.​—1 Ioane 3:19, 20 duahia.

6. Ta be ia manadalaia kara dikana ia karaia lou neganai, dahaka do ia laloa?

⁶ Ta be ia hekwarahi ia manadalaia kara dikana ta ia dadaraia totona, to unai kara dika ia karaia lou dainai ia lalomanoka diba. Momokani, ita kara dika neganai iseda hemami ia dika. (2 Kor. 7:10) To namo lasi iseda kerere dainai ita laloa: ‘Lau be anina lasi bona Iehova ese lau do ia gwauatao lasi.’ Unai be lalohadai maorona lasi, badina unai ese ita ia koia diba Iehova ita rakatania totona. Aonega Herevadia 24:10 ena hereva do ita laloatao, ia gwau bema ita lalomanoka, iseda goada do ia ore. To, namona be guriguri amo Iehova ida “ita hereva hebou” bona ita noia ita ia gwauatao totona. (Isa. 1:18) Iehova ia itaia oi helalo-kerehai momokani neganai, oi do ia gwauatao. Ma danu, elda taudia oi hereva henidia. Idia be mai haheauka ida oi do idia durua emu hetura karana Iehova ida ia goada lou totona.​—Iam. 5:14, 15.

7. Dahaka dainai ita lalomanoka lasi, bema kara dika ta rakatania totona ita do hekwarahi noho?

⁷ France ai elda ta ladana, Jean-Luc, ese idia manadalaia kara dika ta idia rakatania totona idia hekwarahi noho taudia ia hamaorodia, ia gwau: “Iehova ena matana  ai, kara maoromaoro tauna be goevadae tauna lasi, to ia be ena kerere dainai ia sori bona hanaihanai ia helalo-kerehai tauna.” (Roma 7:21-25) Unai dainai bema emu kara dika rakatania totona oi hekwarahi noho, namo lasi oi laloa oi be anina lasi. Ita ibounai be kerere ita karaia dainai, Iehova ena hebogahisi ita abia be gau badana, bona unai be Iesu ena boubou gauna amo ia hahedinaraia.​—Efe. 1:7; 1 Ioa. 4:10.

8. Ita lalomanoka neganai, daika amo heduru ita noia diba?

⁸ Heduru totona kongrigeisen tadikaka bona taihu dekenai ita lao diba! Idia ita hereva henia neganai, do idia kamonai bona hagoadaia herevadia idia gwauraia diba ita idia durua totona. (Aon. 12:25; 1 Tes. 5:14) Nigeria ai taihu ta ladana Joy ia lalomanoka neganai, ia gwau: “Lau haheauka noho badina tadikaka bona taihu ese lau idia durua. Egu tadikaka bona taihu edia heduru ese ia hamomokania Iehova be egu guriguri ia haerelaia. Edia haheitalai amo lau ese idia lalomanoka taudia ma haida do lau durua dalana lau dibaia.” To, namona be ita laloatao, eda tadikaka taihu be do idia laloparara lasi bema ita be heduru ita ura eiava lasi. Unai dainai, lo tadikaka o taihu ta dekenai ita lao bona ena heduru totona do ita noia.

9. Salamo 41:3 bona 94:19 ese edena dala ai ita ia hagoadaia?

⁹ Iehova ena heduru oi noia. Bema ita be nega daudau lalonai ita gorere, lalohadai maorona ita abia be auka. Ena be hari Iehova ese hoa dalanai eda gorere ia kokia lasi, to ita ia hagoadaia bona goada ia henia ita haheauka totona. (Salamo 41:3; 94:19 duahia.) Hegeregere, ia ese iseda Keristani tadikaka taihu ia gaukaralaia diba, eda ruma gaukara idia karaia o sitoa idia lao totona. Iseda Keristani tadikaka do ia gaukaralaia ita ida idia guriguri totona. Eiava ita ia durua Baibel amo hereva namodia, hegeregere tanobada matamatana ai gorere bona hisihisi be lasi ena helaro namona ita laloatao totona.​—Roma 15:4.

10. Isang be aksiden ia davaria murinai, dahaka dainai ia lalometau noho lasi?

¹⁰ Nigeria ai, tadikaka ta ladana Isang be aksiden badana ta ia abia. Bona ena doketa ese ia hamaoroa do ia raka lou diba lasi. Isang ia gwau: “Lau lalohisihisi bona lalometau bada.” To ia lalometau noho, a? Lasi! Dahaka ese ia durua? Isang ia gwau: “Lau bona egu hahine be Iehova guriguri henia bona ena hereva stadilaia karana ai hadokoa lasi. Danu, emai lalona ai hadaia hahenamo namodia, hegeregere Dirava ena tanobada matamatana ese do ia mailaia helaro namodia ai laloa totona.”

11. Cindy ia gorere neganai, edena dala ai moale ia davaria?

¹¹ Mexico ai, taihu ta ladana Cindy be doketa ese ia hamaoroa ena gorere ese ia hamasea diba. Ia haheauka totona dahaka ia karaia? Medikol heduru ia abia neganai, palani ia karaia dina ta ta ai taunimanima do ia haroro henia. Ia gwau: “Unai ese lau ia durua ma haida lau laloa bada, bona egu opereisen, hisihisi o gorere lau laloa momo lasi. Egu palani be doketa o nesi lau hereva henidia neganai, edia ruma bese totona do lau henanadai. Bena do lau nanadaia dahaka dainai inai gaukara aukana idia abia hidi. Unai murinai do lau diba edena topik idia laloa bada. Idia  haida idia gwau, gorere taudia momo be idia henanadai lasi, ‘Oi namo, a?’ Bona lau henanadai dainai, momo be lau idia tanikiu henia. Haida be edia adres bona telefon namba idia henia. Unai nega aukana ai, Iehova ese lau dekenai moale ia henia bona lau ese unai lau hoalaia danu!”​—Aon. 15:15.

12-13. Gorere taudia bona ruma sibona ai idia noho taudia be edena dala ai idia haroro bona dahaka namo idia davaria?

¹² Idia gorere o tauanina idia goada lasi taudia be idia haroro momo lasi dainai, idia lalomanoka diba. To, idia momo be dala idauidau idia tahua idia haroro totona. United States ai taihu ta ladana Laurel be lagani 37 lalonai ia hahodi diba totona masini ta lalonai ia noho. Ia be kensa gorere ia abia, opereisen momo ia abia bona kopina ai gorere haida idia vara. To, unai hekwakwanai badadia ese ena haroro gaukara idia koua lasi. Ena ruma dekenai idia mai nesi bona taunimanima haida ia haroro henidia. Bena dahaka ia vara? Ia ese taunimanima 17 ia durua Iehova ena Witnes taudia ai idia lao totona! *

¹³ France ai, elda tauna ta ladana Richard be idia gorere bona ruma sibona ai idia noho taudia ia durua, ia gwau: “Namona be teibolo ta ai buka bona magasin idia atoa. Unai amo idia raka hanai taudia ese do idia itaia bona idia henanadai. Unai ese ruma-ta-ruma-ta gaukara idia karaia diba lasi tadikaka taihu ia hagoadaia diba.” Ruma sibona ai idia noho taudia be revareva idia torea eiava telefon amo taunimanima idia haroro henidia diba.

14. King Davida be dahaka haheitalai namona ia hahedinaraia?

¹⁴ Haida be idia buruka, gorere o hekwakwanai ma ta dainai, kongrigeisen o sekit lalonai maduna ta idia abia lasi. Bema ita be unai bamona hekwakwanai ita davaria, King Davida ena sivarai amo gau haida ita dibaia diba. Davida ia ura dikadika dubu helaga do ia haginia, to Dirava ese ia hamaoroa ia be dubu helaga do ia haginia lasi. Ena be unai ia vara, to Davida be Dirava ese ia abia hidi tauna ia durua bona golo bona siliva momo ia henia unai gaukara ia karaia totona. Unai be haheitalai namona ita tohotohoa totona!​—2 Sam. 7:12, 13; 1 Siv. 29:1, 3-5.

15. Edena dala ai Hugues be lalomanoka ia hanaia?

¹⁵ France ai, tadikaka ta ladana Hugues be gorere dainai ena elda maduna ia rakatania, danu ia hegeregere lasi ena ruma  ai gaukara maragidia ia karaia totona. Ia gwau: “Matamanai, lau mamia lau be anina lasi bona lau lalomanoka. To gabeai, lau laloparara namona be lau karaia diba lasi gaudia dainai do lau lalometau lasi. Bona Iehova ena hesiai gaukara lalonai lau karaia diba gaudia lau karaia bona lau moale. Egu lalona lau hadaia do lau hesiku lasi. Gideona bona ena tatau 300 be idia hesiku, to idia tuari noho hegeregerena, lau danu do lau tuari noho!”​—Gun. 8:4.

16. Aneru edia haheitalai amo dahaka ita dibaia?

¹⁶ Dirava idia badinaia aneru be haheitalai namodia. King Ahaba ia lohia neganai, Iehova ese aneru ia boiridia unai king dikana koia totona edia lalohadai do idia gwauraia. Aneru haida be edia lalohadai idia gwauraia. To Dirava ese aneru tamona ia abia hidi bona ia hamaoroa ena lalohadai be do ia gaukara. (1 Ki. 22:19-22) To aneru haida be idia lalomanoka, a? Reana idia gwau: ‘Dahaka dainai egu nega lau haorea kava egu lalohadai lau gwauraia totona?’ Lasi, unai bamona idia hereva lasi. Aneru ibounai be idia manau bona idia ura hanamoa ibounai be Iehova dekenai idia henia.​—Gun. 13:16-18; Apok. 19:10.

17. Dahaka ita karaia diba bema asainmen ta ita abia lasi dainai ita lalomanoka?

¹⁷ Do ita laloatao Dirava ena ladana ita abia bona ena Basileia ita harorolaia be hahenamo badana. Herevana asainmen ta ita abia bona ita haboioa, to Dirava matanai ita be dava bada gaudia bamona. To bema ita manau, Iehova bona eda tadikaka taihu ese ita do idia lalokau henia. Unai dainai, Iehova oi noia oi do ia durua oi manau totona. Namona be Baibel lalonai idia noho manau taudia edia sivarai ita laloa dobu. Namona be mai emu lalona ibounai ida emu tadikaka taihu oi durua.​—Sal. 138:6; 1 Pet. 5:5.

18-19. Herevana teritori ai taunimanima idia kamonai lasi, to oi moale noho totona dahaka oi karaia diba?

¹⁸ Teritori ai taunimanima idia kamonai lasi eiava ruma ai idia noho lasi neganai, oi lalomanoka, a? Unai ia vara neganai, dahaka oi karaia diba oi moale noho totona? Heduru herevadia haida be maua ladana “ Emu Haroro Gaukara Hanamoa Daladia” dekenai oi itaia diba. Danu haroro  gaukara totona lalohadai maorona oi abia be mai anina bada. Unai ena anina be dahaka?

¹⁹ Namona be ita laloatao ita haroro ena badina be taunimanima dekenai Dirava ena ladana bona ena Basileia ita hadibaia. Iesu ia hahedinaraia haida sibona ese mauri dalana do idia davaria. (Mat. 7:13, 14) Haroro gaukara ita karaia neganai, ita be Iehova, Iesu bona aneru ida ita gaukara hebou. (Mat. 28:19, 20; 1 Kor. 3:9; Apok. 14:6, 7) Iehova be idia ura ia idia tomadiho henia taudia ia tahua noho. (Ioa. 6:44) Unai dainai, bema nega ginigunana ruma tauna ia ura lasi sivarai namona ia kamonai, reana nega ma ta ai do ia kamonai.

20. Lalomanoka ita hanaia totona Ieremia 20:8, 9 amo dahaka ita dibaia?

²⁰ Peroveta tauna Ieremia amo gau haida ita dibaia diba. Ia haroro henia taudia be idia ura lasi kamonai. Dina ibounai lalonai taunimanima ese idia gwauraia dika bona idia kirikirilaia. (Ieremia 20:8, 9 duahia.) Nega ta ia lalomanoka dainai, ia ura haroro gaukara do ia hadokoa. To dahaka dainai unai ia karaia lasi? Ieremia ena kudouna ai ‘Iehova ena hereva’ be lahi bamona ia araia noho bona ia koua diba lasi! Ita dekenai unai ia vara diba bema dina ta ta ai Dirava ena Hereva ita stadilaia bona laloa dobu. Unai ita karaia neganai, iseda haroro gaukara do ita moalelaia bona taunimanima momo do idia kamonai.​—Ier. 15:16.

21. Edena dala ai lalomanoka ita hanaia diba?

²¹ Deborah, ia gwau: “Lalomanoka be Satani ese ia gaukaralaia tuari kohu dikana.” To Iehova Dirava dekenai Satani ena tuari kohudia be siahu lasi. Unai dainai, gau ta dekenai oi lalomanoka neganai, Iehova oi noia oi ia durua totona. Emu lalohadai kereredia bona manoka gaudia oi hanaia totona, Iehova ena heduru oi noia. Oi gorere negadiai oi do ia hagoadaia. Oi do ia durua emu asainmen dekenai lalohadai maorona oi abia totona. Bona oi do ia durua haroro gaukara dekenai lalohadai maorona oi abia totona. Ma danu, emu guba Tamana dekenai emu lalohekwarahi ibounai oi hamaoroa. Iena heduru amo, lalomanoka oi hanaia diba.