Inai lagani ena Gima Kohorona idauidau oi duahia namonamo vadaeni, a? Mani ita itaia bema inai henanadai oi haerelaidia diba:

Horoa taudia be edena bamona ita kara henidia be namo?

Edia abidadama karana ita laloa bada, to namo lasi idia sibona ita abia isi. Namo lasi idia sibona “edia kara ita moalelaia.” (Iuda 16, ftn NWT.) Idia abia helaro dainai, edia hemami do ia hadikaia henanadai ita henia lasi.​—w20.01, rau 29.

Dahaka dainai oi abia dae Iehova be oi ia laloa?

Baibel ia hahedinaraia oi do vara lasi neganai Iehova ese oi ia itaia vadaeni. Oi gwauraia guriguri ta ta ia kamonai. Emu kudouna ai idia noho gaudia bona emu lalohadai ia diba, bona emu kara ese Iehova ia hamoalea o ia hahisia diba. (1 Siv. 28:9; Aon. 27:11) Ia sibona ese oi ia boiria ia dekenai oi lao totona.​—w20.02, rau 12.

Edena nega ai ita hereva diba bona edena negai do ita hereva lasi?

Mai moale ida Iehova ita herevalaia. Bema ita itaia ta be dala kererena ia badinaia matamaia, ita hereva henia be namo. Bema heduru ia abia be maoro, elda taudia ese idia sisiba henia diba. Ita hereva lasi, bema inai taudia be eda haroro gaukara idia taravatua gabudia ai eda gaukara idia ura diba. Kongrigeisen ena hunia herevadia be ma haida dekenai ita herevalaia lasi.​—w20.03, rau 20-21.

Ioela karoa 2 bona Apokalupo karoa 9 ese idia herevalaia kwadi oreana edia idau be dahaka?

Ioela 2:20-29 ia gwau Dirava ese kwadi ia luludia bona ia gwauhamata idia ania ore aniani ena davana do ia henia. Unai murinai, Dirava ese iena lauma helaga ia bubua. Unai gaudia be Babulonia ese Israela ia tuari henia neganai idia guguru, bona ma gabeai do idia guguru lou. Apokalupo 9:1-11 ena kwadi be Iehova ena horoa hesiai taudia ia herevalaia. Idia ese inai nega oromana dikana lalonai Dirava ena hahemaoro herevadia idia harorolaia noho, bona tanobada idia ura henia taudia idia moale lasi.​—w20.04, rau 3-6.

Hari Not kahana ena king be daika?

Russia bona ena durua tanodia. Idia ese Dirava ena taunimanima idia kara auka henidia, edia haroro gaukara idia taravatua bona idia inai henidia. Not kahana ena king bona saut kahana ena king be idia kara helulu noho.​—w20.05, rau 13.

Galatia 5:22, 23 ese ia herevalaia karadia sibona be “lauma helaga ena huahua,” a?

Lasi. Lauma helaga ese ita ia durua kara namodia ma haida hegeregere, kara maoromaoro ita hahedinaraia totona. (Efe. 5:8, 9)​—w20.06, rau 17.

Social media ai sibona iseda laulau atoa karana ena dika be dahaka?

Social media ai oi atoa gaudia ese idia hahedinaraia diba oi be manau lasi, to hekokoroku tauna.​—w20.07, rau 6-7.

Keristani haroro taudia be haoda taudia amo dahaka idia dibaia?

Nega maorona ai bona gwarume idia noho gabudia dekenai idia haoda. Tulu maorodia gaukaralaia dalana idia dibaia. Bona mai gari lasi ida nega namodia bona nega dikadia ai idia haoda. Iseda haroro gaukara ai unai bamona ita karaia diba.​—w20.09, rau 5.

Edena dala haida ai stiuden ita durudia Iehova idia lalokau henia totona?

Idia ita hagoadaia dina ta ta ai Baibel idia duahia bona idia laloa dobu. Bona idia dekenai guriguri dalana ita hadibaia.​—w20.11, rau 4.

Inai hereva “Keriso amo taunimanima ibounai be mauri do idia abia” be daidia ia herevalaia?​—1 Kor. 15:22.

Paulo ena revareva be Korinto ai idia noho horoa Keristani taudia dekenai ia torea, idia be do idia toreisi lou bona guba dekenai do idia noho. Unai Keristani taudia be Dirava ese ‘ia hahelagaia bona Keriso Iesu ida idia hakapua.’ (1 Kor. 1:2; 15:18)​—w20.12, rau 5-6.

Horoa taudia be ‘kibi dokona idia hiriria neganai, matana hakapua bona kehoa haraga bamona do idia idau’ murinai, dahaka do idia karaia?​—1 Kor. 15:51-53.

Idia be Keriso ida auri itotohi amo taunimanima do idia lohiaia. (Apok. 2:26, 27)​—w20.12, rau 12-13.