TAUNIMANIMA be idia ura idia moale. To inai dina gabediai, ibounai be idia davaria hekwakwanai ese idia “hahekwarahia bada.” (2 Tim. 3:1) Haida be edia moale idia haboioa, badina haida ese idia kara gageva henidia, idia gorere, idia moni gaukara lasi, edia lalokau tauna ia mase, o idia dekenai idia vara gau ma haida dainai idia lalohisihisi. Dirava ena hesiai taudia danu be idia lalomanoka neganai, edia moale idia haboioa diba. Bema oi dekenai unai ia vara, dahaka ese oi ia hamoalea diba?

Unai henanadai haerelaia totona, namona be moale korikori ena anina ita lalopararalaia bona edena dala ai haida be edia moale idia haboioa lasi, herevana hahetoho idia davaria. Bena do ita diba dahaka ita karaia diba ita moale noho totona.

Namo lasi ita laloa moale bona kiri edia anina be tamona. Haheitalai: Ta be kekero muramura momo ia inua murinai, ia be do ia kiri momo. To ia kekero lasi neganai, do ia kiri lasi bona reana ena mauri ai ia davaria hisihisi bona hekwakwanai sibona do ia laloa. Unai nega sisina lalonai ia mamia moalena be moale korikorina lasi.​—⁠Aon. 14:13.

To, moale be kudouna amo ia daekau karana ta. Moale be “ta ese ia abia hemami namona, bema ia diba ia be gau namona ta do ia abia eiava ia naria noho.” Moale be nega namodia o dikadia ai ita hahedinaraia karana ta. (1 Tes. 1:6) Momokani, ena be ta be gau ta dainai ia lalohisihisi, to ia moale noho diba. Hegeregere, aposetolo taudia be Keriso idia herevalaia dainai idia dadabadia. To, idia be “Sanhedrin idia rakatania bena idia lao. Bona idia moale, badina Dirava ia laloa idia hegeregere Iesu ena ladana dainai hemarai idia abia totona.” (Kara 5:41) Idia moale badina idia be hisihisi idia abia, a? Lasi, idia moale badina Dirava idia badinaia.

Ita vara neganai, moale hemamina be ita dekenai ia noho lasi; bona ia be ia vara kava hemamina lasi. Dahaka dainai? Badina moale korikorina be lauma helaga ena huahua ta. Dirava ena lauma ena heduru amo, ita ese “kara matamata,” moale danu ita hahedinaraia diba. (Efe. 4:24; Gal. 5:22) Bona bema ita dekenai moale ia noho, mauri ena hekwakwanai ita haheaukalaia diba.

Iehova ia ura tanobada ai gau namodia idia vara, hari ita itaia gau dikadia lasi. To, taunimanima edia kara dikadia dainai, Iehova be ena moale ia haboioa lasi. Baibel ia gwau: “Iena Dubu Helaga lalonai, iena goada bona iena moale idia noho momokani.” (1 Siv. 16:27) Ma danu, iena hesiai taudia ese idia hagugurua gau namodia dainai, ia “moale.”​—⁠Aon. 27:11.

Iehova bamona, bema iseda ura hegeregerena gau ta ia vara lasi, ita lalohekwarahi bada lasi. Bona iseda moale ita haboioa lasi,  to hari ita dekenai idia vara gau namodia ita laloa bona vaira nega ai do idia vara gau namodia ita naria. *

Hahetoho negadiai idia moale noho taudia momo edia sivarai be Baibel lalonai idia noho. Idia ta be Aberahamo, nega momo kahirakahira ena mauri ia haboioa bona ma haida ese idia hahisia danu. (Gen. 12:10-20; 14:8-16; 16:4, 5; 20:1-18; 21:8, 9) Ena be unai hekwakwanai ia davaria, to Aberahamo be ia moale noho. Edena bamona unai ia karaia? Ia ese Mesia ena lohia henunai do ia vara tanobada matamata ai ia noho karana ia laloa. (Gen. 22:15-18; Heb. 11:10) Iesu ia gwau: “Emui tamana Aberahamo be ia moale bada egu dina ia itaia totona.” (Ioa. 8:56) Aberahamo ita tohotohoa bona vaira nega ai do ita moalelaia gaudia ita laloa.​—⁠Roma 8:21.

Aberahamo hegeregerena, aposetolo Paulo bona ena bamona Sila be Dirava ena gwauhamata idia laloa bada. Edia abidadama be ia goada, bona idia moale noho, herevana dagedage idia davaria. Hegeregere, idia dadabadia bona dibura ruma ai idia atodia murinai, “hanuaboi momokani ai, Paulo bona Sila idia guriguri bona Dirava hanamoa anedia idia abia.” (Kara 16:23-25) Edia helaro sibona ese idia ia hagoadaia lasi, to idia moale badina Keriso ena ladana dainai hisihisi idia abia. Paulo bona Sila hegeregerena, namona be Dirava hesiai henia karana amo ita abia gau namodia ita laloa bada.​—⁠Fili. 1:12-14.

Hari inai negai danu, iseda tadikaka oreana lalonai haida be hahetoho badadia idia davaria, to idia moale noho. Hegeregere, November 2013 ai, Philippines ai lai gubana (Typhoon Haiyan) ia vara neganai, Witnes taudia 1,000 mai kahana edia ruma ia hadikaia. George be Tacloban siti ai ia noho, bona ena ruma be unai lai gubana ese ia hadikaia momokani, ia gwau: “Ena be unai ia vara, to tadikaka taihu be idia moale. Ai mamia moalena lau gwauraia be auka.” Hekwakwanai badadia ita davaria neganai, do ita moale noho bema Iehova ese ita totona ia karaia gaudia ita laloa dobu. Ita moale noho totona, Iehova be dahaka gau ma haida ia henia?

Ita moale ena badina badana be Dirava ita tura henia, ani? Mani oi laloa: Ita be Guba bona Tanobada edia Lohia Badana ita diba. Ia be iseda Tamana, Dirava, bona Turana!​—⁠Sal. 71:17, 18.

Danu, ita moale badina hari ita mauri bona mauri ita moalelaia diba. (Had. 3:12, 13) Iehova ese ita ia boiria dainai, Dirava ena ura ita totona ita lalopararalaia. (Kol. 1:9, 10) Unai dainai, iseda mauri be mai anina bona do ita badinaia daladia ita diba. To, taunimanima momo be ita mauri ena badina idia diba lasi. Unai hahedinaraia totona, Paulo ia gwau: “‘Dirava ese ia idia lalokau henia taudia totona ia hegaegaelaia gaudia be matana ese ia itaia lasi bona taiana ese ia kamonai lasi, bona ta ese ena lalona ai ia laloa diba lasi.’ To Dirava ese ena lauma helaga amo ita dekenai unai ia hahedinaraia.” (1 Kor. 2:9, 10) Ita moale badina Iehova ena ura ita lalopararalaia, ani?

Iehova ese ena taunimanima totona ia karaia gau ma haida mani ita laloa. Ita moale badina Dirava ese iseda kara dika ia gwauatao diba, ani? (1 Ioa. 2:12) Dirava ena hebogahisi dainai, ita abia dae momokani kahirakahira tanobada matamata do ia vara. (Roma 12:12) Hari danu, Iehova ese ita dekenai tura namodia ia henia bona nega tamona ia ita tomadiho henia diba. (Sal. 133:1) Ma danu, Baibel amo ita diba Iehova ese ena taunimanima be Satani bona ena demoni amo ia gimaia. (Sal. 91:11) Bema Dirava amo ita abia hahenamo ibounai ita laloa dobu, iseda moale be do ia bada.​—⁠Fili. 4:4.

Keristani tauna be ena moale ia habadaia diba, a? Iesu ia gwau: “Umui dekenai inai gaudia lau herevalaia vadaeni, unai amo lau abia moalena be do umui mamia momokani.” (Ioa. 15:11) Unai ese ia hamomokania iseda moale be ita habadaia diba. Iseda moale be lahi ida ita hahegeregerea diba. Bema ita ura lahi ena siahu ita habadaia, au momo do ita atoa. Unai hegeregerena, bema ita ura iseda moale ita habadaia, namona be nega ibounai lauma helaga ena heduru ita noia. Laloatao: Moale be lauma helaga ena huahua ta. Bona Baibel ena hereva ita laloa dobu be namo, badina ia be lauma helaga ena siahu amo idia torea.​—⁠Sal. 1:1, 2; Luka 11:13.

Iseda moale ita habadaia dalana ma ta be, Iehova idia hamoalea gaukaradia dekenai ita bisi. (Sal. 35:27; 112:1) Dahaka dainai? Badina Dirava ese ita ia havaraia, unai amo ia ‘do ita gari henia, bona iena oda do ita badinaia, badina be taunimanima edia gaukara korikori be unai sibona.’ (Had. 12:13) Anina be Dirava ese ita ia havaraia iena ura ita karaia totona. Unai dainai Iehova ita hesiai henia neganai, iseda mauri do ita moalelaia. *

Iseda moale ita habadaia noho lalonai, hahenamo momo do ita abia. Hegeregere, iseda guba Tamana be ita dekenai do ia moale bada, bema mai moale ida ia ita hesiai henia, herevana hekwakwanai ita davaria. (Deu. 16:15; 1 Tes. 5:16-18) Danu, moale korikori ita abia neganai, kohu bona moni bada tahua karana do ita dadaraia bona Dirava ena Basileia dainai, sibona iseda ura do ita dadaraia. (Mat. 13:44) Unai ena namo ita itaia neganai, iseda moale be do ia bada, bona ma haida do ita hamoalea danu.​—⁠Kara 20:35; Fili. 1:3-5.

“Bema hari emu mauri oi moalelaia, vaira nega ai do oi gorere momo lasi.” United States ai, Nebraska ena University ai iseda helt ia stadilaia tauna ta ese unai ia gwauraia. Unai be Baibel ena hereva hegeregerena, ia gwau: “Iena kudouna ia moale tauna ese namo ia havaraia noho, muramura namona bamona.” (Aon. 17:22) Oibe, emu moale oi habadaia neganai, do oi gorere momo lasi.

Unai dainai ena be lalohekwarahi negadiai ita noho, to do ia noho hanaihanai moale korikorina ita hahedinaraia diba, bema lauma helaga ena heduru ita noia, stadi, bona Iehova ena Hereva ita laloa dobu. Danu, iseda moale ita habadaia diba bema hari ita abia noho hahenamo ita laloa, ma haida edia abidadama ita tohotohoa, bona Dirava ena ura ita karaia. Unai dala amo ita ese Salamo 64:10 ena hereva ita hamomokania, ia gwau: “Kara maoromaoro taudia ese, Lohiabada dainai do idia moale bada, bona idia ese Lohiabada dekenai do idia heau mauri.”