Ta ena kara ita dibaia neganai, unai tauna ita diba namonamo, bona iseda hetura karana ia goada diba. Unai hegeregerena, Iehova, bona ena kara ita dibaia namonamo neganai, iseda hetura karana ia ida ia goada diba. Dirava ena kara badadia ibounai amo, inai kara foa be mai anina bada: iena siahu, aonega, hahemaoro goeva, bona lalokau.

“[Iehova] Dirava e, oi ese guba bona tanobada be oiemu siahu badana bona oiemu goada herea dekena amo oi karaia.”​—IEREMIA 32:17.

Dirava ena siahu be ia havaraia gaudia amo ia hedinarai. Hegeregere, dina ena diari dekenai oi gini neganai, emu kopina dekenai dahaka oi mamia? Dina ena siahu. Momokani, oi be Iehova ena havaraia siahuna amo ia hedinarai gauna ta oi mamia noho. Dina ena siahu ena bada be edena bamona? Ena lalona momokani dekenai, ena siahu ena bada be 15,000,000 degrees Celsius. Sekeni ibounai lalonai, dina ese ia havaraia siahuna be hegeregere niuklia bomu milioni momo idia pou bamona.

To, iunives lalonai idia noho hisiu milioni momo amo dina be maragi. Saiens taudia idia laloa hisiu badana ta, ladana UY Scuti be bada herea dainai, dina ena gabu ia abia neganai, tanobada do ia koua bona planeti ladana Jupiter ia hanaia danu. Unai ese ita ia durua Ieremia ia gwauraia herevana ita lalopararalaia totona, Iehova Dirava ese ena siahu amo guba bona tanobada​—iunives ia karaia.

Edena dala ai Dirava ena siahu amo namo ita abia? Dirava ese ia karaia gaudia, hegeregere dina bona tanobada lalonai idia noho gau namodia ibounai ese iseda mauri idia durua noho. Danu, Dirava ese ena siahu ia gaukaralaia ita ta ta ia durua totona. Edena dala ai? Aposetolo edia negai, Dirava ese Iesu dekenai siahu ia henia hoa karadia  ia karaia totona. Baibel ia gwau: “Matakepulu taudia be idia itaia lou, aena dika taudia be idia raka, lepera taudia be idia namo lou, taia kudima taudia be idia kamonai, mase taudia idia toreisi lou.” (Mataio 11:5) To hari be edena bamona? Baibel ia gwau: “Manoka bona hesiku taudia be [Iehova] ese ia hagoadaia noho,” ma ia gwau: “[Iehova] dekenai idia abidadama henia taudia ese, edia goada do idia hamatamataia lou.” (Isaia 40:29, 31) Dirava ese ita dekenai “taunimanima edia siahu ia hereaia gauna” ia henia diba, iseda mauri lalonai ita davaria hekwakwanai eiava hahetoho ita hanaia totona. (2 Korinto 4:7) Oi ura mai lalokau ida ita totona ena siahu ia gaukaralaia Diravana kahirakahira oi lao, a?

“[Iehova] e, oi ese gau ibounai oi karaia vadaeni. Mai oiemu aonega bada danu idia ibounai oi karaia.”​—SALAMO 104:24.

Dirava ese ia karaia gaudia ita stadilaia neganai, ena aonega dekenai do ita hoa bada. To, saiens taudia be inai stadi ladana biomimetics eiava biomimicry amo, Iehova ese ia karaia gaudia idia stadilaia bona idia tohotohoa, unai amo gau haida idia karaia. Hegeregere, kamera ena lens o peleini idia karaia dalana amo ita itaia.

Dirava ese taunimanima ia havaraia dalana amo ena aonega ia hahedinaraia. Hegeregere, beibi ta ena tubu dalana mani ita laloa. Iena tubu dalana be sel tamona amo ia matamaia, bona unai sel lalonai beibi ena tubu dalana ibounai ia noho. Unai sel tamona amo sel idauidau idia vara, to edia toana be tamona. To nega ta ai, unai sel ta ta be sel idauidau 200 bamona ai idia parara, hegeregere rara ena sel, tauanina varovaro edia sel, bona turia edia sel. Bona daudau lasi tauanina ena kahana idauidau idia hedinarai bona idia gaukara matamaia. Bena hua nain lalonai, unai sel tamona amo sel bilioni momo idia vara bena beibi ta ai ia lao. Unai bamona aonega ese momo ia durua Baibel torea tauna ena hereva idia abia dae, ia gwau: “Oi lau tanikiu henia, badina mai hoa danu lau oi karaia.”​—Salamo 139:14.

Edena dala ai Dirava ena aonega amo namo ita abia? Iseda Havaraia Tauna ia diba dahaka gaudia ese ita do ia hamoalea. Iena diba bona laloparara be bada dainai iena Hereva, Baibel amo sisiba namodia ia henia. Hegeregere, ia gwau: “Mai kudouna ibounai ida do umui gwauatao heheni.” (Kolose 3:13) Unai be sisiba namona, a? Oibe. Doketa taudia idia davaria dika gwauatao karana ese ta do ia durua ia mahuta namonamo bona ena blood pressure ia hamaragia diba. Danu lalometau bona gorere ma haida ia hamaragia diba. Dirava be aonega bona tura namona ta bamona, nega ibounai ita durua totona sisiba namodia ia henia. (2 Timoteo 3:16, 17) Oi be unai bamona tura namona ta oi ura, a?

“[Iehova] ese, kara maoromaoro ia ura henia noho.”​—SALAMO 37:28.

Dirava be nega ibounai ia kara maoromaoro. Oibe, “Dirava be nega ta do ia kara dika diba lasi.  Siahu Ibounai Dirava be do ia kerere lasi, lasi bona lasi momokani.” (Iobu 34:10) Iena hahemaoro be maoromaoro, Salamo torea tauna ese Iehova be inai bamona ia gwauraia: “Oi ese tanobada taudia oi kota henia noho, mai maoromaoro bona momokani danu.” (Salamo 67:4) Badina “[Iehova] ese tau ena kudouna ia itaia,” ta ese ia koia diba lasi, to nega ibounai hereva momokani ia tahua bona kota maoromaoro ia karaia. (1 Samuela 16:7) Danu, Dirava be tanobada ai idia vara kara gageva bona kara koikoi ia diba, bona ia gwauhamata kahirakahira “kara dika taudia be tano dekena amo . . . . do ia abidia siri.”​—Aonega Herevadia 2:22.

To, Dirava be hahemaoro tauna aukana lasi bona ia ura lasi taunimanima ia panisia. Ia be hebogahisi ia hahedinaraia danu. Baibel ia gwau: “[Iehova] be mai ena bogahisihisi, bona mai ena hariharibada,” kara dika taudia dekenai bema idia helalo-kerehai. Unai be kota maoromaoro, ani?​—Salamo 103:8; 2 Petero 3:9.

Edena dala ai Dirava ena kota maoromaoro karana amo namo ita abia? Aposetolo Paulo ia gwau: “Dirava be taunimanima edia toana ia laloa lasi, to bese ibounai lalonai ia idia gari henia bona kara maoromaoro idia karaia taudia be ia ese ia abia dae.” (Kara 10:34, 35) Dirava ena kota maoromaoro karana amo namo ita abia badina ia be ta ena toana ia laloa lasi eiava haida sibona ia kara namo henia lasi. Dirava ese ita do ia abia dae bona ia ita tomadiho henia diba, herevana ita be bese idauidau amo, sikuli bada taudia, eiava iseda noho daladia be idauidau.

Dirava ia ura ena kota maoromaoro ita lalopararalaia bona namo ita abia, unai dainai ita dekenai lalomamina ia henia. Baibel ese ia hahedinaraia, lalomamina be taravatu ta bamona ‘iseda kudouna ai ia noho,’ bona iseda kara be maoro eiava kerere do ia hahedinaraia. (Roma 2:15) Edena dala ai namo ita abia? Iseda lalomamina ita treinia namonamo karana ese ita ia durua dika gaudia eiava maoro lasi karadia ita dadaraia totona. Bona bema  kerere ta ita karaia, ita do ia durua ita helalo-kerehai bona dala maorona ita badinaia. Oibe, Dirava ena kota maoromaoro dalana ese ita ia durua bona ia kahirakahira ita lao diba!

“Dirava be lalokau.”​—1 IOANE 4:8.

Dirava be siahu, aonega bona kota maoromaoro ia hahedinaraia, to Baibel ia gwau lasi Dirava be siahu, aonega eiava kota maoromaoro. Ia gwau ia be lalokau. Dahaka dainai? Badina Dirava be mai ena siahu dainai ia hegeregere kara ta ia karaia, bona ena kota maoromaoro bona aonega ese ena kara idia biagua. To Iehova be lalokau dainai gau ibounai ia karaia.

Ena be Iehova be gau ta dekenai ia dabu lasi, to iena lalokau dainai guba ai aneru ia havaraia bona tanobada ai taunimanima ia havaraia, unai amo idia ia lalokau henia bona naria diba. Ia be mai lalokau ida tanobada ia karaia taunimanima ese idia noholaia totona. Bona taunimanima dekenai lalokau ia hahedinaraia noho “badina ia ese kara dika taudia bona kara namo taudia latanai dina ena diari ia henia noho. Bona medu danu be kara maoromaoro bona kara maoromaoro lasi taudia latanai ia siaia diho.”​—Mataio 5:45.

Danu, “Iehova be lalokau bada bona hebogahisi Diravana.” (Iamesi 5:11) Iehova be mai ura ida ia idia dibaia taudia bona ia kahirakahira idia lao taudia ia lalokau henia. Dirava be unai bamona taudia ia abia dae. Oibe, ‘oi ia laloa bada.’​—1 Petero 5:7.

Edena dala ai Dirava ena lalokau amo namo ita abia? Ita ese dina ia diho ena hairai ita moalelaia. Beibi ena kiri regena ese ita ia hamoalea. Iseda famili memba ta ena lalokau karana ita laloa bada. Reana unai gaudia be anina bada lasi, to iseda mauri idia hanamoa diba.

Ita be Dirava ese ia hahedinaraia lalokauna ma ta amo namo ita abia, unai be guriguri karana. Baibel ia gwau: “Namo lasi gau ta umui lalohekwarahilaia, to gau ibounai lalonai do umui guriguri bona noinoi goadagoada, bona mai tanikiu ida Dirava dekenai emui noinoi herevadia do umui gwauraia hedinarai.” Lalokau tamana ta bamona, ia ura iseda lalona ai idia noho gaudia be guriguri amo ia dekenai ita gwauraia hedinarai. Bena Iehova be mai lalokau ida “Dirava ena maino, laloparara ibounai ia hereaia gauna” do ia henia.​—Filipi 4:6, 7.

Hari ita herevalaia Dirava ena kara badadia​—hegeregere siahu, aonega, kota maoromaoro, bona lalokau​—ese oi ia durua Dirava oi dibaia namonamo totona, a? Emu lalokau Dirava dekenai oi habadaia totona, oi ai noia emu namo totona ia karaia vadaeni gaudia bona do ia karaia gaudia oi dibaia.