Inai atikol ena kahana ta ta amo, ita ese dala idauidau ai inai henanadai, Dirava be Daika? ena haere ita davaria. Matamanai ita itaia, Baibel lalonai iena ladana be Iehova bona iena kara badana be lalokau. Danu ia be taunimanima ibounai edia namo totona ia karaia gaudia bona do ia karaia gaudia ita herevalaia. Gau momo dainai Dirava do ita dibaia noho, to reana do oi laloa unai oi karaia neganai dahaka namo do oi abia?

Iehova ia gwauhamata bema Ia “oi tahua, ia ese oi do ia abia dae.” (1 Sivarai 28:9) Mani oi laloa Dirava oi dibaia karana amo harihari gauna namona ta do oi abia​—‘iena turana namona’ ai oi lao diba! (Salamo 25:14, NWT) Unai hetura karana amo dahaka namo do oi davaria?

Moale korikori. Baibel ese Iehova ia gwauraia “moale Diravana.” (1 Timoteo 1:11) Dirava kahirakahira oi lao bona iena dala oi badinaia neganai moale korikori do oi davaria, unai amo emu hemami, lalohadai bona mauri dalana do ia namo. (Salamo 33:12) Emu mauri oi moalelaia totona, Dirava ese oi do ia durua mauri dala dikadia bona miro karadia oi dadaraia, bona ma haida ida hetura kara namona oi moalelaia. Reana Salamo torea tauna ena hereva do oi laloa, ia gwau: “Dirava badibadinai lau noho. Inai be namo herea momokani.”​—Salamo 73:28.

Naria karana. Iehova ese ena hesiai taudia ia gwauhamata henidia, ia gwau: “Lau ese oi do lau hakaua, bona sisiba oi dekenai do lau henia.” (Salamo 32:8) Anina be Iehova ese ena hesiai taudia ta ta be edia dabu gaudia hegeregerena ia durudia. (Salamo 139:1, 2) Emu hetura karana Iehova ida oi hagoadaia neganai, ia ese oi do ia rakatania lasi.

Vaira nega namona. Iehova Dirava ia ura hari mauri namona oi moalelaia, to danu ia ese dala ia kehoa vaira nega namona do oi moalelaia totona. (Isaia 48:17, 18) Baibel ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.” (Ioane 17:3) Inai nega dikadia ai, Dirava ese ia henia helaro be dogo (o anchor) bamona ita do ia durua, ia be “ia momokani bona ia goada.”​—Heberu 6:19.

Unai badina momo amo ita diba, namona be Dirava ita dibaia namonamo bona ia ida hetura karana namona ita moalelaia. Diba ma haida oi abia totona, Iehova ena Witnes ta oi hereva henia eiava emai websait jw.org oi sekea diba.