“Unai dainai, do umui gima noho, badina dina eiava hora be umui diba lasi.” ​—MATAIO 25:13.

“Umui gima noho bona umui noga noho, badina Dirava ese ia abia hidi negana be umui diba lasi.”​—MAREKO 13:33.

Unai dainai, tanobada ai ia noho tauna ta ia diba lasi edena nega ai inai nega oromana dikana do ia ore. To dokona do ia ginidae ena “abia hidi negana”​—eiava “dina bona hora”​—be Dirava ese ia abia hidi vadaeni. (Mataio 24:36) Oi laloa unai ena anina be ita be dala lasi dokona do ia ginidae negana ita dibaia totona, a? Lasi, dala ia noho ita diba totona. Iesu ese ena hahediba taudia ia hamaoroa idia itaia toa idauidau ese do ia hahedinaraia dokona be kahirakahira do ia ginidae.

Do idia vara gaudia idauidau be “inai nega oromana ena dokona” ena toana. Iesu ia gwau: “Bese ta do ia toreisi bese ta do ia tuari henia, bona basileia ta ese basileia ta do ia tuari henia, bona gabu momo ai hitolo bada bona tano mareremarere do idia vara.” (Mataio 24:3, 7) Danu, ia gwau “daihanai goreredia”​—pandemic do idia vara. (Luka 21:11) Iesu ese ia perovetalaia toa idauidau be hari oi itaia noho, a?

Hari iseda nega ai dika ia havaraia tuaridia, hitolo, bona tano mareremarere, danu ia doko diba lasi gorere idauidau ese tanobada ia hadikaia. Hegeregere lagani 2004 ai, Indian Ocean ai tano maremarere badana ia vara bona tsunami ese taunimanima 225,000 ia hamasedia. Lagani toi lalonai, COVID-19 pandemic dainai taunimanima 6.9 milioni idia mase. Iesu ia gwau unai bamona gaudia ese idia hahedinaraia nega oromana ena dokona be ia kahirakahira.

Baibel ese nega dokona ia gwauraia, “dina gabedia.” (2 Petero 3:3, 4) Danu, Timoteo iharuana 3:1-5 ese ia hahedinaraia dina gabedia ai taunimanima edia kara do ia dika ia lao. (Maua ladana, “ Tanobada Dokona be Kahirakahira Neganai” itaia.) Sibona idia laloa bada taudia, mataganigani taudia, dagedage taudia bona lalokau idia hahedinaraia lasi taudia oi itaia, a? Unai ese ia hahedinaraia, ita be kahirakahira momokani tanobada ena dokona ai ita noho.

Dina gabedia ena daudau be edena bamona? Baibel ia gwau unai “nega be ia kwadogi.” Bena, Dirava ese “tanobada idia hadikaia taudia” do ia hadikaia ore.​—Apokalupo 11:15-18; 12:12.

Dirava ese hari ia noho nega oromana dikana do ia haorea dinana bona hora ia abia hidi vadaeni. (Mataio 24:36) To, sivarai namona ma ta be​—Dirava “ia ura lasi tau ta ia mase.” (2 Petero 3:9) Ia be nega ia henia taunimanima be ena ura idia dibaia bona ena taravatu idia badinaia. Dahaka dainai? Badina ia ura tanobada dokona amo ita roho mauri bona ena tanobada matamata ai do ita noho, unai nega ai tanobada be paradaiso ai do ia lao.

Dirava be dala ia karaia, unai amo tanobada ibounai ai ia hadibaia gaukarana amo, taunimanima ese ena tanobada matamatana ena Basileia henunai idia noho dalana do idia dibaia. Iesu ia gwau, Basileia ena sivarai namona be “tanobada ibounai dekenai” do idia harorolaia. (Mataio 24:14) Tanobada ibounai dekenai, Iehova ena Witnes taudia ese hora bilioni momo idia gaukaralaia taunimanima dekenai Baibel ena helaro idia harorolaia bona hadibaia totona. Iesu ia gwau unai haroro gaukara be tanobada ibounai dekenai do idia karaia murinai dokona do ia mai.

Taunimanima edia lohia negana be kahirakahira do ia ore. To sivarai namona be, tanobada ena dokona amo ita roho mauri diba, bona Dirava ese ia gwauhamatalaia tanobada Paradaisona ai ita noho diba. Atikol ma ta ese tanobada matamata lalonai do oi noho diba dalana do ia gwauraia hedinarai.