TAUNIMANIMA

Baibel ia gwau: Dirava ese tanobada “ia karaia kava lasi, to taunimanima ese idia noholaia totona ia karaia.” ​—ISAIA 45:18.

ITA NOHOLAIA TANOBADANA

Baibel ia gwau: “Uru ta ia boio bona uru ta ia vara, to tanobada be ia noho hanaihanai.”​—HADIBAIA TAUNA 1:4.

ANINA BE DAHAKA: Baibel ena hereva hegeregerena, tanobada be do ia ore lasi bona taunimanima ese do idia noholaia ela bona hanaihanai. Vadaeni, tanoba do ia ore herevana ena anina be dahaka?

INAI OI LALOA: Baibel ese inai tanobada ena dokona be Noa ena nega ai ia vara gaudia ida ia hahegeregerea. Unai nega ai, “tanobada be dagedage karadia amo ia honu.” (Genese 6:13) To, Noa be kara maoromaoro tauna. Unai dainai, Dirava ese kara dika taudia be abata amo ia haorea neganai, Noa bona ena ruma bese ia hamauria. Baibel be unai negai idia vara gaudia dekenai ia gwau: “Ranu ese unai nega ai ia noho tanobadana ia hadikaia ore.” (2 Petero 3:6) Unai be tanobada ta ena dokona. To, dahaka ia ore momokani? Tanobada lasi, to taunimanima dikadia sibona. Unai dainai Baibel ese tanobada dokona ia herevalaia neganai, ia gwau lasi ita noholaia tanobadana be do ia ore. To ena anina be, taunimanima dikadia bona idia havaraia tanobada dikana ena oromana be do ia ore.

HEKWAKWANAI BONA KARA DIKADIA

Baibel ia gwau: “Nega daudau lasi murinai, kara dika taudia do idia noho lasi. Idia noho gabuna dekenai do oi tahua, to idia do oi davaria lasi. To manau taudia ese tanobada do idia abia, bona do idia moale bada, badina gabu ibounai dekenai maino do ia noho.” ​—SALAMO 37:10, 11.

ANINA BE DAHAKA: Ena be Noa ena nega ai ia vara abata ese kara dika ia haorea, to abata murinai, taunimanima dikadia ese taunimanima ibounai edia mauri idia hadikaia lou. To kahirakahira, Dirava ese kara dika do ia haorea momokani. Salamo torea tauna ia gwau: “Kara dika taudia do idia noho lasi.” Dirava ese iena Basileia​—unai be iena gavamani amo kara dika ibounai do ia haorea momokani. Unai gavamani be guba amo kara maoromaoro taudia ibounai do ia lohiaia.

INAI OI LALOA: Oi laloa hari tanobada idia lohiaia taudia ese Dirava ena Basileia do idia abia dae, a? Baibel ese ia hahedinaraia do idia abia dae lasi. Aonega lasi taudia bamona Dirava ena Basileia do idia inai henia. (Salamo 2:2) Dokona ai dahaka do ia vara? Dirava ena Basileia ese taunimanima edia gavamani ibounai edia gabu do ia abia bona “ia sibona do ia gini ela bona hanaihanai.” (Daniela 2:44) To dahaka dainai taunimanima edia gavamani ibounai do idia ore be namo?

Baibel ia gwau: “Tau ta be ia hegeregere lasi sibona ia hakaua totona.”​—IEREMIA 10:23.

ANINA BE DAHAKA: Dirava ese taunimanima ia havaraia neganai, sibodia idia lohiaia ena maoro ia henia lasi. Taunimanima be edia lohia gaukarana idia karaia namonamo lasi bona edia hekwakwanai idauidau idia hamaoromaoroa diba lasi.

INAI OI LALOA: Britannica Academic ese gavamani ibounai ia herevalaia neganai, ia gwau, “taunimanima ibounai idia hadikaia gaudia, hegeregere ogogami, hitolo, gorere, disasta, tuari, bona dagedage idia koua diba lasi.” Ma ia gwau: “Haida idia laloa . . . bema gavamani tamona sibona ese tanobada ia lohiaia neganai, reana unai gau dikadia do ia haorea.” Ena be taunimanima edia gavamani ibounai idia lalotamona, to lohia taudia be goevadae lasi dainai, do idia hegeregere lasi ataiai ita gwauraia gaudia idia haorea totona. Gavamani tamona, Dirava ena Basileia sibona, be mai ena siahu tanobada ena hekwakwanai ibounai ia haorea totona.

Unai dainai Baibel ena hereva hegeregerena, tanobada dokona​—hari inai nega ena oromana dikana ena dokona​—dainai taunimanima namodia idia gari lasi. To, mai moale ida unai idia naria noho, badina Dirava ena tanobada matamatana ese inai tanobada ena nega oromana dikana ena gabu do ia abia!

Edena negai unai do ia vara? Atikol ma ta ese Baibel ena haere do ia herevalaia.