Atikol ginigunadia ese idia hahedinaraia kahirakahira Dirava ese kara dika taudia bona hekwakwanai ibounai do ia haorea. Ita diba momokani, unai do ia vara. Dahaka dainai? Badina Dirava ena Hereva, Baibel ese unai ia gwauhamatalaia:

“Tanobada be ia ore noho.”​—1 IOANE 2:17.

Ita diba haida do idia roho mauri badina ataiai ia noho Baibel siri ese unai ia gwauhamatalaia danu:

“Dirava ena ura ia karaia tauna be do ia noho hanaihanai.”

Unai dainai, ita roho mauri dalana be Dirava ena ura ita karaia. To Dirava ena ura ita diba totona, namona be ia ita dibaia namonamo.

Iesu ia gwau: “Mauri hanaihanai abia totona, namona be oi, Dirava momokanina tamona, do idia dibaia.” (Ioane 17:3) Nega dokona ai ita roho mauri bona mauri hanaihanai ita abia totona, ‘Dirava ita dibaia’ be namo. Anina be Dirava ia noho bona ena kara haida sibona oi dibaia be hegeregere lasi. Namona be Ia ita tura henia. Bema ita ura ta ida eda hetura karana ia goada, namona be nega ita atoa ia ita bamoa totona. Dirava ida iseda hetura karana danu be unai bamona. Dirava ita tura henia bona unai hetura karana ia goada totona, Baibel amo ita dibaia hereva momokanina ese ita do ia durua. Mani dala haida ita laloa.

Ita mauri noho totona, dina ibounai ita aniani. To Iesu ia gwau: “Taunimanima be paraoa sibona amo idia mauri lasi, to Iehova ena uduna amo idia mai hereva ibounai amo idia mauri.”​—Mataio 4:4.

Hari, Iehova ena hereva be Baibel lalonai ita davaria. Unai buka helagana oi stadilaia neganai, Dirava ese guna ia karaia gaudia, hari ia karaia noho gaudia bona vaira negai do ia karaia gaudia do oi dibaia.

Dahaka do oi karaia bema oi ura Dirava ena hakaua dalana oi badinaia bona oi hekwarahi noho ia taravatua gaudia oi dadaraia totona? Namona be Dirava do oi dibaia namonamo, unai ese oi do ia durua.

Mani matabodaga karadia ia karaia momo hahine ta ladana Sakura, ita laloa. Baibel ia stadilaia matamaia neganai, Dirava ena taravatu, “matabodaga karadia amo umui heau siri” ia dibaia. (1 Korinto 6:18) Sakura be goada ia abia totona Dirava ia guriguri henia bona unai ese ia durua unai kara dika ia hadokoa totona. To dina ta ta ai unai hedibagani hanaia totona do ia hekwarahi. Ia gwau: “lalohadai dikadia lau laloa neganai, mai momokani ida Iehova lau hereva henia, badina lau diba egu goada sibona amo unai lau hanaia diba lasi. Guriguri karana ese lau ia durua Iehova kahirakahira lau lao totona.” Sakura bamona, taunimanima milioni momo be Dirava idia dibaia noho. Ia ese goada ia henia, edia kara dikadia idia rakatania bona ia moalelaia mauri dalana idia badinaia totona.​—Filipi 4:13.

Dirava oi dibaia namonamo neganai, ‘Dirava be oi do ia diba,’ iena tura namona ta bamona. (Galatia 4:9; Salamo 25:14) Unai amo do oi hegeregere Dirava ena tanobada matamata lalonai oi noho. To tanobada matamata be edena bamona? Atikol ma ta ese unai do ia herevalaia.