HARI taunimanima idia noholaia mauri dalana be Dirava ena ura hegeregerena lasi. Bema inai tanobada ai Havaraia Tauna ena lohia siahuna idia matauraia taudia sibona idia noho, idia ese ena hakaua dalana amo namo do idia abia bona ena kara namodia haida do idia tohotohoa. Dirava ia ura mai moale ida do idia gaukara hebou, bese idia havaraia, gau matamatadia idia dibaia, bona tanobada ibounai be paradaiso ai idia halaoa totona.

• “Tuari be Dirava ese ia hadokoa noho, tanobada kahana ibounai dekenai.”​—Salamo 46:9.

• “Tanobada idia hadikaia taudia do oi hadikaia ore negana ia ginidae.” ​—Apokalupo 11:18.

• “Siona dekenai idia noho taudia ta ese do ia gwau lasi, ‘Lau be gorere.’” ​—Isaia 33:24.

• “Lauegu abia hidi taudia ese, edia imana gaukara dekenai idia karaia gaudia do idia moalelaia.”​—Isaia 65:22.

Edena dala ai unai peroveta herevadia be do idia guguru? Dirava ese ena Natuna, Iesu, ia abia hidi gavamani goevadaena ena King ai do ia lao, bona guba amo tanobada do ia lohiaia. Baibel ese inai ia gwauraia Dirava ena Basileia. (Daniela 2:44) Baibel ese Iesu be inai bamona ia herevalaia, ia gwau: “Dirava ese ia dekenai terona do ia henia,” bona do ia lohia.​—Luka 1:32, 33.

Iesu be tanobada ai ia noho neganai, hoa karadia momo ia karaia unai amo ia hahedinaraia King ai ia lao neganai, taunimanima edia mauri do ia hanamoa.

• Taunimanima edia gorere idauidau ia hanamoa karana amo ia hahedinaraia gorere idauidau do ia haorea momokani.​—Mataio 9:35.

• Davara ena hurehure ia hadokoa karana ese ia hahedinaraia lai bona medu bada ia biagua diba taunimanima ia gimaia totona.​—Mareko 4:36-39.

• Taunimanima tausen momo ia ubua karana ese ia hahedinaraia taunimanima edia dabu gaudia do ia henia.​—Mareko 6:41-44.

• Headava aria ta dekenai ranu be wain ai ia halaoa karana ese ia hahedinaraia taunimanima do ia durua mauri idia moalelaia totona.​—Ioane 2:7-11.

Edena dala ai Dirava ese ia idia lalokau henia taudia totona ia hegaegaelaia maurina do oi abia diba? Dala ta ia noho oi badinaia totona. Unai dala be Baibel ese ia gwauraia, “mauri ia lao henia dalana . . . Bona taunimanima haida sibona be unai dala idia davaria.”​—Mataio 7:14.

Mauri ia lao henia dalana ena anina be dahaka? Dirava ia gwau: “Lau inai [Iehova], emui Dirava. Emui namo habadaia dalana, be umui dekenai lau hadibaia noho. Emui raka dalana namona dekenai  umui lau hakaua noho.” (Isaia 48:17) Inai sisiba oi badinaia neganai emu mauri do ia namo.

Iesu ia gwau: “Dala be lau, hereva momokani be lau bona mauri be lau.” (Ioane 14:6) Anina be Iesu ia hadibaia gaudia ita abidadama henia bona ena haheitalai ita tohotohoa neganai, Dirava kahirakahira ita lao diba bona iseda mauri do ia namo.

Edena dala ai mauri ia lao henia dalana oi davaria diba? Tomadiho be momo, to Iesu ia gwau: “Lau dekenai idia gwau, ‘Lohiabada e, Lohiabada e,’ taudia ibounai be guba Basileia lalonai do idia vareai lasi, to egu Tamana guba ai ia noho ena ura ia karaia tauna sibona be do ia vareai.” (Mataio 7:21) Iesu ma ia gwau: “Edia huahua amo idia do umui diba.” (Mataio 7:16) Baibel ese oi ia durua diba tomadiho momokani bona tomadiho koikoi edia idau oi diba totona.​—Ioane 17:17.

Edena dala ai mauri ia lao henia dalana dekenai oi raka matamaia diba? Namona be mauri ia Henia Tauna dekenai diba do oi abia noho: Ia be daika? Ena ladana be daika? Iena kara be edena bamona? Ia be dahaka ia karaia noho? Ia ura dahaka do ita karaia? *

Dirava ena ura taunimanima totona be idia gaukara, aniani, gadara, bona bese havaraia karana sibona lasi, to gau ma haida idia karaia be namo. Iseda Havaraia Tauna ita dibaia bona iena turana ai ita lao diba. Iena ura ita karaia neganai, ita hahedinaraia ia ita lalokau henia. Iesu ia gwau: “Mauri hanaihanai abia totona, namona be idia ese oi, Dirava momokani tamona . . . . dekenai diba do idia abia noho.”​—Ioane 17:3.

Dirava ia ura henia gaudia ita dibaia neganai, reana iseda mauri ai senisi haida ita karaia diba. Ena be do ia auka unai ita karaia totona. To momokani, mauri ia lao henia dalana ita badinaia neganai, iseda mauri do ia namo. Bema Dirava dibaia henanadai badadia edia haere oi dibaia totona, Iehova ena Witnes taudia ese oi ura taim bona gabu ai davana lasi Baibel kosi ta idia karaia diba. Ai oi hereva henia totona emai websait www.dan124.com oi gaukaralaia diba.