1. (a) Hahemaoro Tauna Iapeta bona Hana be dahaka idia karaia? (Laulau ginigunana herevalaia.) (b) Inai stadi ai edena henanadai do ita haerelaidia?

IAPETA be mai lalogoada ida ena taunimanima ia hakaua, bona mai gari lasi ida ia tuari. Hana be manau hahinena bona ruma gaukara idauidau ia naria. Idia ruaosi be Iehova idia tomadiho henia sibona lasi, to dahaka idia karaia danu? Iapeta bona Hana be Dirava dekenai gwauhamata ta idia karaia, bona mai abidadama ida unai gwauhamata idia hamomokania. Hari Iehova dekenai idia ura gwauhamata taudia dekenai idia ruaosi be haheitalai namona. To henanadai be inai: Gwauhamata ena anina be dahaka? Dirava dekenai ita karaia gwauhamatana be mai anina bada, a? Iapeta bona Hana amo dahaka ita dibaia?

2, 3. (a) Gwauhamata ena anina be dahaka? (b) Dirava dekenai ita karaia gwauhamata be Baibel ese edena bamona ia herevalaia?

² Baibel ese ia hahedinaraia, Dirava dekenai ita karaia gwauhamatana be mai anina bada. Hegeregere, reana ta be Iehova dekenai ia gwauhamata kara ta do ia karaia, boubou gaudia do ia henia, ful-taim hesiai gaukarana do ia karaia, eiava gau haida do ia dadaraia. Ta be sibona ena ura kwalimu ia gaukaralaia diba gwauhamata ta ia karaia totona. To, gwauhamata ta ia karaia neganai, Dirava ena matanai unai be gwauhamata metauna bona ia be mai  anina bada, unai dainai ia badinaia be namo. (Gen. 14:22, 23; Heb. 6:16, 17) Baibel ese edena dala ai Dirava dekenai ita karaia gwauhamata ia herevalaia?

³ Mose ena Taravatu ia gwau: “Bema tau ta ese Lohiabada dekenai ia gwauhamata, . . . unai tau ese iena gwauhamata do ia karaia momokani, iena gwauhamata do ia makohia lasi.” (Num. 30:2) Gabeai Solomona ia gwau: “Dirava dekenai oi gwauhamata neganai, gwauhamata ena anina do oi karaia haraga, badina be ia ese kavakava taudia ia moalelaia lasi. Oiemu gwauhamata ena anina do oi karaia.” (Had. 5:4) Iesu ese ia hamomokania ita karaia gwauhamata be mai anina bada, ia gwau: “Idaunegai idia gwau: ‘Namo lasi emu gwauhamata oi makohia. To namona be Iehova dekenai emu gwauhamata oi hamomokania.’”—Mat. 5:33.

4. (a) Dahaka dainai Dirava dekenai ita karaia gwauhamata be mai anina bada? (b) Iapeta bona Hana amo dahaka ita dibaia?

⁴ Ia hedinarai goevagoeva Dirava dekenai ita karaia gwauhamata be mai anina bada. Unai dainai bema iseda gwauhamata ita badinaia, iseda hetura karana Iehova ida be do ia goada. Davida ia gwau: “Daika ese Lohiabada ena ororo, dekenai do ia daekau lao? Daika ese iena gabu helagana lalonai do ia gini? . . . Dirava koikoi idia tomadiho henia lasi, bona idia gwauhamata koikoi lasi taudia ese.” (Sal. 24:3, 4) Iapeta bona Hana idia gwauhamata dahaka do idia karaia, bona unai gwauhamata idia badinaia be auka, a?

5. Iapeta be dahaka gwauhamata ia karaia, bona dahaka ia vara?

⁵ Iapeta be Amono taudia tuari henia totona ia lao neganai, Iehova dekenai gwauhamata ta ia karaia. Unai bese taudia be Dirava ena taunimanima idia inai henia. (Gun. 10:7-9) Iapeta ia ura bada do ia kwalimu dainai, ia gwauhamata: “Bema oi ese Amono taudia dekena amo kwalimu lau dekenai do oi henia . . . bona tuari dekena amo egu ruma dekenai lau giroa mai neganai, egu ruma ena iduara dekena amo lau dekenai do ia raka mai guna tauna, be Lohiabada ena.” Dahaka ia vara? Amono taudia idia halusidia bona idia giroa neganai, Iapeta ena lalokau natuna kekeni be idia hedavari henia totona ia raka-lasi. Ia be “Lohiabada ena.” (Gun. 11:30-34) Iapeta ena natuna be dahaka ia karaia?

6. (a) Iapeta bona ena natuna kekeni ese edia gwauhamata idia badinaia be auka, a? (b) Deuteronomi 23:21, 23 bona Salamo 15:4 amo dahaka ita dibaia?

⁶ Iapeta ena natuna ese ena tamana ena gwauhamata ia hagugurua totona, ia be dubu helaga dekenai Iehova do ia hesiai henia. Iapeta be ia laloa namonamo lasi bena unai gwauhamata ia karaia, a? Lasi, reana ia diba ia hedavari henia totona do ia raka-lasi tauna ginigunana be iena natuna kekeni. Herevana unai ia diba eiava lasi, to ia auka momokani ia bona ena natuna kekeni ese unai gwauhamata idia badinaia totona. Iapeta ese ena natuna ia itaia neganai, “iena dabua ia darea” bona ia gwau ena natuna kekeni ese ena kudouna ia makohia. Iena natuna ia taitai, ‘badina be nega ta ia be do ia headava lasi, rami hebou do ia mase.’ Dahaka dainai? Iapeta be natuna mero lasi, bona ena natuna kekeni tamona be do ia headava lasi bona ia totona tubudia do ia havaraia lasi. Bona iena famili ladana be do ia boio. To Iapeta be unai ia laloa bada lasi. Ia gwau: “Lohiabada dekenai gwauhamata lau karaia vadaeni, lau makohia diba lasi.” Bona ena natuna kekeni ia gwau: “Oiemu hereva gauna lau dekenai do oi karaia.” (Gun. 11:35-39) Iapeta bona ena natuna be Dirava badinaia taudia, unai dainai Atai Momokani Diravana dekenai idia karaia gwauhamata idia makohia lasi, ena be ia auka unai idia karaia totona.—Deuteronomi 23:21, 23; Salamo 15:4 duahia.

7. (a) Hana be dahaka gwauhamata ia karaia, bona dahaka dainai? Bona dahaka ia vara? (b) Hana ena gwauhamata ena anina Samuela dekenai be dahaka? (Futnout itaia.)

 ⁷ Hana danu be ia lalohisihisi bada negana ai, Iehova dekenai gwauhamata ta ia karaia. Ia lalohisihisi badina ia be ia gabani bona unai dainai ia idia hevasehalaia momo. (1 Sam. 1:4-7, 10, 16) Iena hemami be Dirava dekenai ia gwauraia bona ia gwauhamata: “Siahu Ibounai Lohiabada e, lau, oiemu hesiai hahine, lauegu hisihisi bada mani do oi itaia, lau do oi laloa, lau do oi laloaboio lasi, to lau dekenai natuna mero do oi henia. Bema lau dekenai oi henia neganai, lau ese oi Lohiabada dekenai do lau henia lou, bona iena huina do lau utua lasi, iena mauri dinadia ibounai lalonai.” * (1 Sam. 1:11) Hana be ena guriguri ena haere ia abia, bona ena natuna mero roboana ia havaraia. Hana ia moale bada herea! To Dirava dekenai ia karaia gwauhamatana ia laloaboio lasi. Iena natuna mero ia havaraia neganai, ia gwau: “Lau ese Lohiabada dekena amo lau noia.”—1 Sam. 1:20.

8. (a) Hana ese ena gwauhamata ia badinaia be auka, a? (b) Salamo 61 ese edena bamona oi ia durua Hana ena kara oi laloa totona?

⁸ Samuela ena mauri lagani be 3 bamona neganai, Hana be Dirava dekenai ia karaia gwauhamata hegeregerena ia kara. Silo ai ia noho dubu helaga dekenai Samuela ia abia lao, bena Hahelaga Tauna Badana Eli dekenai ia gwau: “Inai mero do lau abia totona Lohiabada dekenai lau noinoi, bona lau noinoi gauna ia ese lau dekenai ia henia vadaeni. Unai dainai harihari Lohiabada dekenai lau henia. Iena mauri dinadia ibounai lalonai ia be Lohiabada ena.” (1 Sam. 1:24-28) Unuseniai, “Samuela be Lohiabada ena vairana dekenai ia tubu namonamo.” (1 Sam. 2:21) To Hana dekenai unai ena anina be dahaka? Ia be ena natuna mero maragina ia lalokau henia bada, to dina ta ta ai ia ese ena natuna do ia itaia lasi. Mani oi laloa, ena natuna ia tubu daekau noho lalonai, do ia ura dikadika ia rosia, ia ida ia gadara, bona ia naria—lalokau sina ta ese ena natuna dekenai ia karaia bamona. Ena be unai do ia reaia, to Hana ese ena gwauhamata Dirava dekenai ia badinaia. Ia be Iehova dekenai ia moale.—1 Sam. 2:1, 2: Salamo 61:1, 5, 8 duahia.

9. Edena henanadai do ita haerelaidia?

⁹ Momokani, Dirava dekenai ita karaia gwauhamata ibounai be mai anina bada, mani inai henanadai rua ita laloa: Ita ese edena bamona gwauhamata ita karaia diba? Bona dahaka dainai ita karaia gwauhamata ita badinaia be namo?

10. Keristani tauna ese dahaka mai anina bada gwauhamata ia karaia diba, bona unai ena anina be dahaka?

¹⁰ Keristani tauna ese ia karaia mai anina bada gwauhamatana be Iehova dekenai ena mauri ia henia. Dahaka dainai? Badina sibona ena guriguri lalonai, ia ese Iehova ia gwauhamata henia ena mauri ibounai lalonai Dirava do ia hesiai henia ela bona hanaihanai, herevana dahaka ia vara. Iesu ia gwau ta be “sibona ena ura ia dadaraia” bona ia gwauhamata ena mauri ibounai lalonai Dirava ena ura do ia atoa guna. (Mat. 16:24) Unai dina amo, ia “be Iehova ena.” (Roma 14:8) Bema ta be bapatiso gwauhamatana ia karaia, namona be unai ia laloa bada, salamo torea tauna ese Dirava dekenai ia karadia gwauhamata ia herevalaia bamona, ia gwau: “Lohiabada dekenai dahaka do lau henia, iena hariharibada ibounai lau dekenai ena davana? Egu gwauhamata ena anina do lau karaia, Lohiabada dekenai do lau henia, iena bese taudia ibounai edia hebou lalonai, idia edia vairana dekenai.”—Sal. 116:12, 14.

11. Emu bapatiso dinana ai dahaka ia vara?

 ¹¹ Iehova dekenai emu mauri oi gwauhamatalaia bona ranu lalonai oi bapatiso vadaeni, a? Bema oibe, unai be namo herea! Mani oi laloa, emu bapatiso dinana ai, oi be tadikaka taihu vairanai oi gini, bona oi idia nanadaia bema Iehova dekenai emu mauri oi gwauhamatalaia vadaeni bona oi laloparara “emu gwauhamata bona bapatiso ese ia hahedinaraia, hari dina ai oi be Iehova ena Witnes ta ai oi lao bona Dirava ena lauma helaga ese ia hakaua oreana be oi ese do oi bamoa.” Emu haere ese do ia hahedinaraia oi be oi hegeregere bapatiso oi abia totona bona Iehova ena hesiai tauna ai oi lao. Unai dina ai reana Iehova oi hamoalea bada!

12. (a) Sibona dekenai edena henanadai do ita henia? (b) Petero ia gwau edena bamona kara ita hahedinaraia be namo?

¹² Bapatiso be Dirava hesiai henia karana ena matamana sibona. Unai dainai ita ura iseda gwauhamata ita badinaia bona Dirava ita hesiai henia noho. Reana sibona ita nanadaia: ‘Egu bapatiso negana amo egu hetura karana Iehova ida be edena bamona? Mai kudouna ibounai ida Iehova lau hesiai henia noho, a? (Kol. 3:23) Lau guriguri, Baibel lau duahia, kongrigeisen heboudia dekenai lau lao, bona haroro gaukara lau goadalaia, a? Eiava hari unai gaudia lau goadalaia lasi?’ Aposetolo Petero ia gwau ita abidadama sibona lasi, to diba ita abia, ita haheauka,  bona Dirava ita badinaia neganai, iseda hesiai gaukara dekenai do ita manoka lasi.—2 Petero 1:5-8 duahia.

13. Ia bapatiso vadaeni Keristani tauna be dahaka ia laloatao be namo?

¹³ Dirava dekenai bapatiso gwauhamatana ita karaia neganai, do ita haidaua diba lasi. Bema ta ia hesiku Iehova ia hesiai henia eiava Keristani maurina ia badinaia totona, do ia gwau lasi ia be ena mauri ia gwauhamatalaia lasi bona ena bapatiso be anina lasi. * Ta ia bapatiso neganai, ena mauri ibounai be Dirava dekenai ia gwauhamatalaia. Unai dainai bema kara dika badana ta ia karaia, Iehova bona kongrigeisen ese ia do idia hahemaoro henia. (Roma 14:12) Namo lasi ma haida idia gwau ‘ita ese guna ita abia lalokauna ita rakatania vadaeni.’ To ita ura Iesu be ita dekenai ia gwau: “Oiemu kara, emu lalokau, emu abidadama, emu hesiai gaukara, bona emu haheauka lau diba. Lau diba danu, hari oi karaia noho karadia ese guna oi karaia karadia idia hereaia.” (Apok. 2:4, 19) Oibe, namona be ita hekwarahi iseda bapatiso gwauhamata ita badinaia totona bona Iehova be do ia moale.

14. Tau ta ese do ia karaia mai anina bada gwauhamata iharuana be dahaka, bona dahaka dainai?

¹⁴ Tau ta ese do ia karaia mai anina bada gwauhamata iharuana be iena headava ena gwauhamata. Dahaka dainai? Badina headava be helaga. Idia headava tau bona hahine be Dirava bona taunimanima vairanai edia headava ena gwauhamata idia gwauraia. Nega momo idia gwauhamata ta ta do idia lalokau henia, naria, bona matauraia, edia “mauri dinadia iboudiai lalodiai, bona unai bamona do [idia] karaia Baibel lalonai Dirava ese taravatu Keristani (tatau/hahine) dekenai ia henia hegeregerena.” Haida be reana unai hereva do idia gwauraia lasi, to idia ese Dirava dekenai gwauhamata idia karaia. Bona hari idia be headava tau bona hahine, bona edia headava be do ia noho hanaihanai gauna. (Gen. 2:24; 1 Kor. 7:39) Iesu ia gwau: “Unai dainai Dirava ese ia hakapua taudia be ta ese do ia hapararaia lasi be namo.” Namo lasi idia ura headava taudia idia laloa, bema edia headava ia namo lasi, edia headava idia hadokoa diba.—Mar. 10:9.

15. Dahaka dainai Keristani taudia ese tanobada taudia edia kara idia tohotohoa lasi?

¹⁵ Momokani, namo lasi ita laloa headava lalonai hekwakwanai do idia vara lasi. Headava ibounai lalonai goevadae lasi taudia rua idia noho. Unai dainai Baibel ia gwau nega haida headava taudia be “tauanina ai hisihisi do idia abia.” (1 Kor. 7:28) To inai tanobada ai, momo be edia headava idia laloa bada lasi. Edia headava lalonai hekwakwanai ta ia vara neganai, idia hesiku haraga bona edia adavana idia rakatania. Unai be Keristani karana lasi. Bema ta ese ena headava ena gwauhamatana ia makohia, unai be hegeregere ia be Dirava dekenai ia koikoi bona Dirava be koikoi taudia ia inai henia! (Lev. 19:12; Aon. 6:16-19) Aposetolo Paulo ia gwau: “Oi be mai emu hahine, a? Vadaeni namo lasi dala oi tahua ia amo oi parara totona.” (1 Kor. 7:27) Paulo be unai bamona ia hereva, badina ia diba Iehova be koikoi dalanai headava hadokoa karana ia inai henia.—Mal. 2:13-16.

16. Baibel ese headava hadokoa bona hapararaia karana be edena bamona ia herevalaia?

¹⁶ Iesu ia gwau headava ena gwauhamata do idia utua ena badina tamona be Baibel ese ia gwauraia, unai be bema headava tau o hahine ia heudahanai bona ena adavana ia ura lasi ia ia gwauatao. (Mat. 19:9; Heb. 13:4) To bema tau eiava hahine be ena adavana  amo ia parara be edena bamona? Baibel ese unai ia hahedinaraia namonamo danu. (1 Korinto 7:10, 11 duahia.) Baibel ese headava hapararaia karana dekenai taravatu aukana ia henia lasi. To, headava Keristani taudia haida be badina haida dainai edia headava idia hapararaia diba, hegeregere edia mauri o Iehova tura henia karana idia haboioa diba, bema edia adavana ia dagedage bada eiava aposteit karadia ia karaia. *

17. Edena dala ai Keristani headava taudia ese edia headava idia moalelaia diba?

¹⁷ Bema headava lalonai hekwakwanai idia vara dainai, elda taudia edia heduru idia tahua, namona be elda taudia ese idia nanadaidia bema vidio ladana, Lalokau Korikorina be Dahaka? bona Emu Famili Ia Moale Diba buklet idia stadilaia hebou. Dahaka dainai? Badina unai tulu rua lalonai, Dirava ena hakaua hereva namodia idia noho bona unai ese momo ia durua edia headava idia hagoadaia totona. Headava tau bona hahine idia gwau: “Ai be unai buklet ai stadilaia noho dainai, emai headava ai moalelaia bada.” Lagani 22 lalonai idia headava taudia edia headava be kahirakahira ia doko, hahine ia gwau: “Ai ruaosi be ai bapatiso, to ai ruaosi emai lalohadai be idauidau. Unai vidio be nega korikori ai idia halasia! Hari emai headava ai moalelaia.” Oi be oi headava vadaeni, a? Namona be emu headava lalonai Iehova ena hakaua herevadia oi badinaia. Bema unai oi karaia, mai moale ida emu headava ena gwauhamatana do oi badinaia!

18, 19. (a) Keristani tama sina momo be dahaka idia karaia? (b) Ful-taim hesiai gaukara idia karaia taudia be edena bamona?

¹⁸ Iapeta bona Hana be edena dala ma haida ai idia hegeregere? Idia ruaosi edia gwauhamata dainai, Iapeta ena natuna kekeni bona Hana ena natuna mero be dubu helaga dekenai hesiai gaukara helagana idia karaia. Unai be mauri dala hereadaena. Hari, Keristani tama sina momo be edia natudia idia hagoadaia, ful-taim hesiai gaukara do idia karaia bona edia mauri lalonai Dirava hesiai henia karana do idia laloa bada. Unai bamona idia karaia taudia ita hanamodia be namo.—Gun. 11:40; Sal. 110:3.

¹⁹ Tanobada hegegemadai, hari Iehova ena Witnes taudia 67,000 bamona be ful-taim hesiai gaukara idia karaia. Idia haida be Betele ai idia gaukara, konstraksen o sekit gaukara idia durua, haida be tiokratik sikuli idauidau idia naria o idia spesel painia, ma haida be misinari taudia, Assembly Hall eiava Baibel sikuli idia karaia gabudia idia naria. Idia ibounai ta ta be gwauhamata ta idia karaia (“Vow of Obedience and Poverty”). Idia gwauhamata Iehova ena hesiai gaukara lalonai idia abia asainmen be mai kudouna ibounai ida do idia karaia, kohu momo do idia tahua lasi, bona moni gaukara do idia karaia lasi, to unai idia karaia diba bema gwaumaoro idia abia. Oibe, idia ta ta ese idia abia asainmen be mai anina bada. Idia laloparara ful-taim hesiai gaukara idia karaia noho lalonai, edia gwauhamata idia badinaia be mai anina bada.

20. “Dina ta ta ibounai” dahaka do ita karaia, bona dahaka dainai?

²⁰ Ita herevalaia gwauhamata ibounai amo, oi be gwauhamata hida oi karaia vadaeni—tamona, rua, eiava toi? Oi karaia gwauhamata oi laloa bada be namo. (Aon. 20:25) Bema ta be Iehova dekenai ia karaia gwauhamata ia badinaia lasi, dika bada ia davaria diba. (Had. 5:6) Unai dainai mai moale ida ‘ane dekenai, Iehova ena ladana do ita hanamoa, bona dina ta ta ibounai, iseda gwauhamata gaudia ia dekenai, be do ita karaia momokani.’—Sal. 61:8.