APOSETOLO PAULO ese lauma helaga ena heduru amo kara ibounai 9 ia herevalaia. (Gal. 5:22, 23) Ia ese unai kara namodia ia gwauraia “lauma helaga ena huahua.” * Unai kara ibounai 9 be Keristani taudia ese idia badinaia “mauri matamata.” (Kol. 3:10) Au ta ese huahua namodia ia havaraia totona, ranu momo ia abia be namo, unai hegeregerena bema lauma helaga be ta ena mauri lalonai ia gaukara, unai tauna be lauma helaga ena huahua do ia hahedinaraia.​—⁠Sal. 1:1-3.

Paulo ese ia herevalaia kara ginigunana be lalokau. Dahaka dainai lalokau be mai anina bada? Paulo ia gwau, bema ‘ia dekenai lalokau be lasi, ia be anina lasi.’ (1 Kor. 13:2) To lalokau be dahaka, bona edena dala ai iseda dina ta ta maurina ai ita hahedinaraia diba?

Ena be lalokau ena anina korikorina ita gwauraia hedinarai diba lasi, to Baibel ese lalokau tauna ena laloa dalana bona kara ia hahedinaraia. Hegeregere, lalokau tauna be ia “boga-auka, bona ia hebogahisi.” Danu, “hereva momokani ia moalelaia” bona “gau ibounai dekenai ia gini goada, gau ibounai ia abidadama henia, gau ibounai lalonai ia be mai ena helaro, bona gau ibounai ia haheaukalaia.” Ia be ma haida ia lalokau henia bona ia laloa bada, bona ia be tura namona. To bema ta dekenai lalokau be lasi, ia be do ia mama, hekokoroku, ma ta do ia lalodika henia kava, sibona ena namo do ia tahua, bona dika do ia gwauatao lasi. Ita ura lasi unai bamona ita karaia, to ita ura ma haida ita lalokau henia, unai bamona lalokau be “sibona ena namo ia tahua lasi.”​—⁠1 Kor. 13:4-8.

“Dirava be lalokau.” Oibe, Iehova be lalokau ena badina. (1 Ioa. 4:8) Ia havaraia gaudia ibounai bona ena kara ese unai idia hahedinaraia. Iena lalokau kara hereadaena be tanobada dekenai Iesu ia siaia mai bona ita totona hisihisi ia abia bona ia mase. Aposetolo Ioane ia gwau: “Dirava ena lalokau ita dekenai be inai dala ai ia hahedinaraia, Dirava ese ena Natuna korikorina be tanobada dekenai ia siaia mai, ia amo mauri do ita abia totona. Lalokau ena anina be inai, ita ese Dirava ita lalokau henia dainai lasi, to ia ese ita ia lalokau henia bona ena Natuna ia siaia iseda kara dika ia koua boubouna ia henia totona, unai amo ita bona Dirava huanai maino ia karaia.” (1 Ioa. 4:9, 10) Dirava ena lalokau dainai, iseda dika ia gwauatao, bona helaro bona mauri ita abia diba.

Iesu ese iena mauri ia bouboulaia, Dirava ena ura ia karaia totona, unai amo ia hahedinaraia ia ese taunimanima ia lalokau henia. Paulo ia gwau: “[Iesu ia] gwau: ‘Lau mai oiemu ura lau karaia totona.’ . . . Bona unai ‘ura’ amo ita be ita helaga, badina Iesu Keriso ese nega tamona sibona ena tauanina ia bouboulaia.” (Heb. 10:9, 10) Taunimanima ta be unai bamona lalokau hereadaena ia hahedinaraia diba lasi. Iesu ia gwau: “Lalokau karana hereadaena be inai, tau ta ese ena turadia totona ena mauri ia atoa diho.” (Ioa. 15:13) Ita goevadae lasi taudia be Iehova bona Iesu ese idia hahedinaraia  lalokauna ita tohotoho diba, a? Oibe! Unai ita karaia daladia mani ita itaia.

Paulo ia gwau: “Dirava umui tohotohoa, badina umui be iena lalokau natudia. Bona lalokau ai do umui raka noho, Keriso ese umui ia lalokau henia bamona bona ia ese umui totona . . . sibona ia henia.” (Efe. 5:1, 2) “Lalokau ai do [ita] raka noho,” bema nega ibounai lalokau ita hahedinaraia. Oibe, iseda kara amo unai ita hahedinaraia diba. Ioane ia gwau: “Lalokau natudia e, namona be iseda lalokau be hereva eiava uduna sibona amo lasi, to mai momokani ida iseda kara amo ita hahedinaraia.” (1 Ioa. 3:18) Hegeregere, “Basileia ena sivarai namona” ita harorolaia, badina Dirava bona iseda dekena taudia ita lalokau henia. (Mat. 24:14; Luka 10:27) Danu, “lalokau ai do [ita] raka noho,” bema ita boga-auka, hebogahisi ita hahedinaraia, bona dika ita gwauatao. Baibel be ita ia sisiba henia, ia gwau: “Iehova ese mai kudouna ibounai ida umui ia gwauatao hegeregerena, namona be umui danu be unai bamona do umui karaia.”​—⁠Kol. 3:13.

To, bema ma haida ita sisiba henia o hamaoromaoroa, namo lasi ita laloa ita be idia ita inai henia. Mani oi laloa, bema sina o tama ta ia ura ena natuna ena taitai ia hadokoa, nega momo natuna ia ura gauna ia henia. To, lalokau tama o sina be mai hebogahisi ida ena natu do ia kara henia. Unai hegeregerena, ena be Dirava be lalokau, to “ia lalokau henia tauna ia matahakani henia.” (Heb. 12:6) Unai dainai ma ta dekenai sisiba maorona ita henia be lalokau karana. (Aon. 3:11, 12) To laloatao, ita ibounai be goevadae lasi dainai, nega haida lalokau ita hahedinaraia lasi. Unai dainai, namona be ita hekwarahi unai kara ita hahedinaraia totona. Edena dala ai unai ita karaia diba? Dala toi mani ita herevalaia?

Dala ginigunana, Dirava oi noia lauma helaga ia henia totona, unai ese lalokau ia havaraia. Iesu ia gwau, Iehova ese “lauma helaga be idia noinoi taudia dekenai do ia henia.” (Luka 11:13) Bema lauma helaga totona ita guriguri bona ita hekwarahi “lauma helaga ena dala hegeregerena [ita] raka noho,” lalokau karadia do ita hahedinaraia. (Gal. 5:16) Hegeregere, bema oi be elda ta, lauma helaga ena heduru oi noia diba, unai amo Baibel amo ma haida oi sisiba henia neganai, lalokau dalanai do oi karaia. Eiava bema oi be tama o sina ta, lauma helaga ena heduru oi noia diba danu, unai amo mai badu ida lasi, to lalokau dalanai emu natudia do oi sisiba henia.

Iharuana, Iesu ena kara ita laloa dobu, ena be ia idia gwauraia dika, to lalokau ia hahedinaraia. (1 Pet. 2:21, 23) Ta ese emu lalona ia hahisia eiava kara dika henia neganai, sibona oi nanadaia, ‘Iesu be dahaka do ia karaia?’ Taihu ta ladana Leigh ia davaria, sibona dekenai unai henanadai ia henia karana ese ia durua ia laloa namonamo guna totona. Ia gwau: “Nega ta, ai gaukara hebou hahine ta ese emai gaukara turadia ma haida dekenai e-mail ia siaia, bona lau ia gwauraia dika. Unai ese egu lalona ia hahisia bada. To sibona lau nanadaia, ‘Edena dala ai Iesu ena kara lau tohotohoa diba?’ Iesu ese do ia karaia karana lau lalohadailaia murinai, ia vara gauna lau laloaboio sibona, bona kara ta lau karaia lasi. Gabeai, lau laloparara egu gaukara turana be mai ena gorere badana ta bona unai ia lalohisihisilaia. Unai dainai lau abia dae ia be ia laloa namonamo lasi bona unai hereva ia siaia. Ena be Iesu idia gwauraia dika, to lalokau ia hahedinaraia noho, lau ura unai bamona lalokau be egu gaukara turana dekenai lau hahedinaraia danu.” Oibe, bema Iesu ita tohotohoa, lalokau do ita hahedinaraia noho.

Ihatoina, sibona ena ura dadaraia lalokauna hahedinaraia noho. Unai be Iesu murinai idia raka taudia edia toana. (Ioa. 13:34, 35) Unai dainai Baibel ese ita ia hadibaia Iesu ena “laloa dalana” do ita tohotohoa. Ita dainai, ia ese guba bona “ia dekenai idia noho gaudia ibounai ia rakatania,” bona “kamonai karana ia hahedinaraia ela bona mase.” (Fili. 2:5-8) Iesu ese ia hahedinaraia lalokauna ita tohotohoa neganai, iseda lalohadai bona hemami be do  iena hegeregerena, bona ma haida edia namo do ita atoa guna. Lalokau hahedinaraia karana ese dahaka namo ma haida ia havaraia?

Lalokau ita hahedinaraia neganai, hahenamo momo ita davaria. Haheitalai rua mani ita itaia:

• TANOBADA IBOUNAI TADIKAKA OREANA: Ita be ta ta ita lalokau henia dainai, ita diba bema tano ma ta ai ia noho kongrigeisen dekenai ita lao, iseda tadikaka taihu ese ita do idia welkam henia. Ita moale badina iseda “tadikaka oreana tanobada hegegemadai” ese ita idia lalokau henia! (1 Pet. 5:9) Unai bamona lalokau karana be Dirava ena taunimanima huanai sibona ita davaria.

• MAINO: “Mai lalokau ida umui ta ta emui kara do umui haheaukalaia,” unai amo “maino ese umui do ia hatamonaia.” (Efe. 4:2, 3) Unai bamona maino be iseda kongrigeisen heboudia, hebouhebou maragidia bona badadia ai ita mamia. To, unai bamona maino be inai tanobada taudia huanai do oi mamia lasi, ani? (Sal. 119:165; Isa. 54:13) Bema ma haida ida maino ita karaia, ita hahedinaraia idia ita lalokau henia, bona unai ese iseda guba Tamana ia hamoalea.​—⁠Sal. 133:1-3; Mat. 5:9.

Paulo ia gwau: “Lalokau ese taunimanima ia hagoadaia.” (1 Kor. 8:1) Unai ena anina be dahaka? Korinto ginigunana ena karoa 13 ai, aposetolo Paulo be lalokau ese taunimanima ia hagoadaia dalana ia herevalaia. Ia hahedinaraia, lalokau be ma ta ena namo ia laloa. (1 Kor. 10:24; 13:5) Danu, lalokau be sibona ena namo ia tahua lasi, ia boga-auka, bona ia hebogahisi, ruma bese ia hagoadaia bona kongrigeisen taudia ia hatamonaia.​—⁠Kol. 3:14.

Dala idauidau ai ma haida dekenai lalokau ita hahedinaraia diba, to Dirava lalokau henia karana ese unai ibounai ia hereaia. Badina Dirava lalokau henia karana ese ita ia hatamonaia. Mauri dala idauidau taudia, bese bona gado idauidau taudia be Iehova idia tomadiho henia hebou diba, “mai edia lalona tamona.” (Sep. 3:9) Namona be iseda lalona ita hadaia, iseda dina ta ta maurina ai lauma helaga ena huahua ita hahedinaraia totona.