1. Davida ese Iehova ena manau karana be edena bamona ia herevalaia?

ITA GWAU diba Iehova be manau Diravana, a? Oibe. Davida ia gwau: “Oi ese lau dekenai emu hamauria kesi oi henia, bona emu manau karana dainai ladana bada lau abia.” (2 Sam. 22:36, NWT; Sal. 18:35) Reana Davida be peroveta tauna Samuela ese iena tamana ena ruma dekenai ia lao, bona vaira negai Israela ena king ai do ia lao tauna ia horoa dinana ia laloa. Natuna ibounai eit amo Davida be mero dokona; to Iehova ese ia abia hidi King Saulo ena gabu ia abia totona.​—⁠1 Sam. 16:1, 10-13.

2. Inai stadi ai dahaka do ita herevalaia?

² Davida be salamo torea tauna ese Iehova ia herevalaia karana ia abia dae, ia gwau: “Ia igo diho, guba bona tanobada ia itaia totona, ladana maragi taudia be tano ena kahu amo ia abia isi. Ia ese ogogami tauna . . . ia abia isi, unai amo ia be lohia taudia ida do ia helai.” (Sal. 113:6-8, NWT) Inai stadi ai, Iehova ese manau karana ia hahedinaraia daladia do ita herevalaia. Danu, King Saulo, peroveta tauna Daniela, bona Iesu edia haheitalai amo manau karana do ita dibaia.

3. Iehova ese ita be edena bamona ia kara henia, bona unai ese dahaka ia hamomokania?

³ Iehova ese ia idia tomadiho henia goevadae lasi taudia ia kara henidia dalana amo ia hahedinaraia ia be manau Diravana. Iseda tomadiho karana ia abia dae bona ita be iena turana bamona ia laloa danu. (Sal. 25:14) Iehova ese iena Natuna ia bouboulaia karana amo dala ia kehoa iseda kara dika ia gwauatao bona iena turana ai ita lao totona. Iehova be hebogahisi bada Diravana!

4. Iehova be ita dekenai dahaka ia henia bona dahaka dainai?

⁴ Mani Iehova ena manau karana ma ta ita laloa. Iehova be  Havaraia Tauna dainai, bema ia ura, sibona eda mauri lalonai abia hidi ita karaia ena maduna be ita dekenai do ia henia lasi. To unai ia karaia lasi. Ita be iena toana hegeregerena ia karaia bona ura kwalimu ia henia. Herevana ita be taunimanima sibona, to ia ura ia do ita hesiai henia, badina ia ita lalokau henia bona ita laloparara ia ita kamonai henia karana be mai ena namo. (Deu. 10:12; Isa. 48:17, 18) Iehova ena manau karana dainai ia do ita tanikiu henia!

5. Edena dala ai Iehova ese ita dekenai manau karana ia hadibaia? (Rau 1 ena laulau itaia.)

⁵ Iehova ese ita ia kara henia dalana amo ita ia hadibaia ita manau totona. Tanobada bona guba ai Iehova be aonega bada Tauna. Ena be ta ese Dirava dekenai sisiba do ia henia lasi, to ia be mai moale ida ma haida edia lalohadai ia abia dae. Hegeregere, Iehova ese ena Natuna ena heduru ia abia dae gau ibounai idia karaia totona. (Aon. 8:27-30; Kol. 1:15, 16) Bona ena be Iehova be Siahu Ibounai Diravana, to ma haida dekenai maduna ia henia. Hegeregere, ia ese Iesu ia abia hidi Basileia ena King ai do ia lao, bona Iesu ida do idia lohia 144,000 taudia dekenai maduna haida ia henia danu. (Luka 12:32) Momokani, Iehova ese Iesu dekenai King bona Hahelaga Tauna Badana edia gaukara ia hadibaia. (Heb. 5:8, 9) Danu Iehova be Iesu ida do idia lohia taudia dekenai treinini ia henia, to edia gaukara karaia dalana ia biagua lasi. Badina ia diba momokani iena ura do idia karaia.​—⁠Apok. 5:10.

6-7. Edena dala ai ruma bese kwaradia, elda taudia bona tama sina be Iehova idia tohotohoa diba?

⁶ Bema iseda guba Tamana, ta amo heduru ia abia lasi tauna, be ma haida dekenai maduna ia henia, ita danu be unai bamona ita karaia be namo! Hegeregere oi be ruma bese kwarana ta eiava kongrigeisen ena elda ta, a? Namona be Iehova ena haheitalai oi tohotohoa bona haida dekenai  maduna oi henia, to edia gaukara karaia dalana do oi biagua auka lasi. Iehova oi tohotohoa neganai, gaukara do oi hagugurua sibona lasi, to ma haida dekenai treinini oi henia bona oi hadibadia edia gaukara idia karaia namonamo totona. (Isa. 41:10) Maduna idia huaia taudia be Iehova amo dahaka gaudia ma haida idia dibaia?

⁷ Baibel ese ia hahedinaraia Iehova be iena aneru natudia edia lalohadai ia laloa bada. (1 Kin. 22:19-22) Tama sina e, edena dala ai Iehova ena haheitalai umui tohotohoa diba? Bema ia hegeregere, gaukara ta karaia totona emui natudia edia lalohadai umui noia diba. Bona bema edia lalohadai be namo, umui badinaia diba.

8. Edena dala ai Iehova be mai haheauka ida Aberahamo bona Sara ia kara henidia?

⁸ Iehova ena haheauka karana ese iena manau karana ia hahedinaraia danu. Hegeregere, iena hesiai taudia be mai hemataurai ida iena disisen ta dainai idia henanadai neganai, Iehova ese haheauka karana ia hahedinaraia. Aberahamo ia gwau Dirava ese Sodoma bona Gomora do ia hadikaia ore be maoro lasi neganai, Iehova ia kamonai. (Gen. 18:22-33) Bona mani Iehova ese Aberahamo ena adavana Sara ia kara henia dalana ita laloa. Sara be ia buruka vadaeni bona Iehova ia gwauhamata do ia rogorogo neganai, Sara ia kiri. To, Iehova ese Sara ia badu henia lasi to mai hemataurai ida ia kara henia.​—⁠Gen. 18:10-14.

9. Tama sina bona elda taudia ese Iehova ena haheitalai amo dahaka idia dibaia diba?

⁹ Tama sina bona elda taudia e, Iehova ena haheitalai amo dahaka umui dibaia? Mani oi laloa, emu siahu henunai idia noho taudia be emu disisen idia abia dae lasi neganai, dahaka oi karaia? Maoromaoro oi hamaorodia idia be kerere, a? Eiava oi ura edia lalohadai oi lalopararalaia? Mai edia maduna taudia be Iehova idia tohotohoa neganai, ruma bese bona kongrigeisen be namo idia davaria. Ita ese Iehova ena haheitalai amo manau karana ita dibaia daladia ita herevalaia vadaeni. Hari, Baibel ese ia sivarailaia taudia edia haheitalai amo manau karana do ita dibaia daladia do ita herevalaia.

10. Edena dala ai Iehova ese ma haida edia haheitalai amo ita ia hadibaia?

¹⁰ Iehova be iseda “Hadibaia Tauna” Badana dainai, Baibel lalonai sivarai haida ia torea ita ia hadibaia totona. (Isa. 30:20, 21) Dirava ia ura henia karadia bona manau karana idia hahedinaraia taudia bona kara namo idia hahedinaraia lasi taudia edia sivarai be Baibel lalonai idia torea. Unai taudia edia kara dainai idia davaria hahenamo eiava dika ita laloa dobu karana ese ita ia durua diba.​—⁠Sal. 37:37; 1 Kor. 10:11.

11. Saulo ena haheitalai dikana amo dahaka ita dibaia?

¹¹ Mani King Saulo dekenai ia vara gauna ita laloa. Ia matamata neganai ia be manau tauna. Danu, ia laloparara iena diba bona goada be hegeregere lasi, bona ia ura lasi maduna ma haida ia abia. (1 Sam. 9:21; 10:20-22) To gabeai, Saulo be ia hekokoroku bona ia be maoro lasi do ia karaia gaukara haida ia karaia. King ai ia lao murinai, unai kara dikana ia hahedinaraia. Dina ta, King Saulo be peroveta tauna Samuela ia naria noho lalonai, ia haheauka lasi. Saulo be mai manau ida Iehova ese iena taunimanima do ia hamauria karana ia naria lasi, to boubou gauna ia gabua ena be unai be iena maduna lasi. Unai dainai, Saulo ese Iehova ena lalonamo ia haboioa bona Iehova ese ena king dagina amo ia kokia. (1 Sam. 13:8-14) Oibe, unai haheitalai dikana amo ita diba, bema  gaukara ta be iseda maduna lasi, namo lasi mai hekokoroku ida unai gaukara ita karaia.

12. Edena dala ai Daniela be manau karana ia hahedinaraia?

¹² Saulo be haheitalai dikana, to mani peroveta tauna Daniela ena haheitalai namona ita itaia. Daniela be ena mauri ibounai lalonai, mai manau ida Iehova ia hesiai henia bona hanaihanai iena hakaua dalana ia tahua. Hegeregere, Iehova ese Daniela ia gaukaralaia Nebukanesa ena nihi ena anina do ia gwauraia hedinarai neganai, Daniela ia gwau lasi ia be sibona ena diba amo unai ia karaia. To, mai manau ida hanamoa ibounai be Iehova dekenai ia henia. (Dan. 2:26-28) Unai amo dahaka ita dibaia? Laloatao, bema tadikaka taihu be iseda tok idia moalelaia, eiava haroro gaukara ai ekspiriens namona ita davaria, namona be hanamoa ibounai be Iehova dekenai ita henia. Mai manau ida do ita gwau Iehova ena heduru amo unai gaudia ita karaia. (Fili. 4:13) Unai bamona ita karaia neganai, ita be Iesu ena haheitalai namona ita tohotohoa unai. Edena dala ai?

13. Ioane 5:19, 30 ai, Iesu ena hereva amo manau karana dekenai dahaka ita dibaia?

¹³ Ena be Iesu be Dirava ena Natuna goevadaena, to ia be Iehova dekenai ia tabekau. (Ioane 5:19, 30 duahia.) Kara ta ia karaia lasi iena guba Tamana ena dagi ia dadia totona. Filipi 2:6 ia gwau, Iesu ‘ia laloa lasi ia be dagi do ia abia, Dirava ida do ia hegeregere’ totona. Iesu be ena Tamana henunai ia noho dainai, ia diba ena siahu be mai ena hetoana bona ena Tamana ena dagi ia matauraia.

14. Iesu be maoro lasi do ia karaia gaukarana ta totona ma haida ese idia noia neganai, edena bamona ia haere?

¹⁴ Iesu ena hahediba taudia Iamesi bona Ioane be edia sinana ida Iesu dekenai idia lao, bona idia noia hahenamo ta do ia henidia, to Iesu be maoro lasi unai ia karaia totona. Mani Iesu ena haere ita laloa. Iesu be ia daradara lasi to maoromaoro ia hamaorodia, ena guba Tamana sibona be mai ena maoro abia hidi ia karaia, guba Basileia dekenai daika be ena laurina bona daika be ena idibana kahanai do ia helai totona. (Mat. 20:20-23) Iesu be ia manau, badina ia hahedinaraia iena siahu be mai ena hetoana bona unai ia abia dae. Iesu be Iehova ese ia henia hahegani hegeregerena ia karaia bona unai ia hanaia lasi. (Ioa. 12:49) Edena dala ai Iesu ena haheitalai namona ita tohotohoa diba?

15-16. Edena dala ai Baibel ena sisiba 1 Korinto 4:6 ai ita badinaia diba?

 ¹⁵ Iesu ena haheitalai manau karana dekenai ita tohotohoa bema ita ese Baibel ena sisiba 1 Korinto 4:6 ai ita badinaia. Unai siri ia gwau: “Namona be Toretore Helagadia lalonai idia torea gaudia sibona do umui badinaia.” Unai dainai, bema ta be ita dekenai sisiba abia totona ia mai, ita ura lasi sibona eda lalohadai eiava iseda lalona dekenai ia daekau sisiba ita henia. To, namona be Baibel bona pablikeisen haida amo sisiba ita henia. Unai dala amo, ita hahedinaraia iseda aonega be mai ena hetoana. Mai manau ida Siahu Ibounai Diravana ena “taravatu maorodia” do ita hanamoa.​—Apok. 15:3, 4.

¹⁶ Manau karana ita hahedinaraia badina ita ura Iehova ita hanamoa, to badina ma haida danu idia noho. Edena dala ai manau hahedinaraia karana ese ita dekenai moale ia havaraia bona ita ia durua ma haida ida ita gaukara namonamo totona? Hari unai do ita herevalaia.

17. Dahaka dainai idia manau bona idia laloparara gau haida idia karaia diba lasi taudia be idia moale?

¹⁷ Bema ita manau bona ita laloparara gau haida ita karaia diba lasi, do ita moale. Dahaka dainai? Badina bema iseda diba ena hetoana ita lalopararalaia, haida edia heduru do ita abia dae bona do ita moale. Hegeregere, mani Iesu ese lepera gorere taudia 10 ia hanamoa negana oi laloa. Tau tamona sibona ia giroa mai bona Iesu ia tanikiu henia badina iena gorere dikana amo ia hanamoa. Unai manau tauna ia laloparara ia sibona ese ena gorere ia hanamoa diba lasi. Iesu ena heduru dainai ia moale bada bona Dirava ia hanamoa.​—Luka 17:11-19.

18. Manau karana ese edena dala ai ita ia durua ma haida ida ita gaukara hebou namonamo totona? (Roma 12:10)

 ¹⁸ Idia manau bona idia laloparara edia diba be mai ena hetoana taudia be taunimanima ma haida ida idia gaukara hebou namonamo diba bona tura namodia idia davaria diba. Dahaka dainai? Badina idia laloparara ma haida be mai edia kara namodia bona idia abidadama henidia. Manau taudia be ma haida ese idia karaia gaukara namona dainai idia moale bona hanamodia.​—Roma 12:10 duahia.

19. Dahaka dainai hekokoroku karana ita dadaraia be namo?

¹⁹ To hekokoroku taudia be idau. Idia ese ma haida idia hanamoa lasi, badina idia ura idia sibona ese hanamoa herevadia idia abia. Edia gaukara be ma haida edia gaukara ida idia hahegeregerea bona idia ura ma haida idia hereaia. Idia be ma haida dekenai treinini bona maduna idia henia lasi, to idia ura idia sibona ese gaukara ta do idia karaia, badina idia laloa ma haida ese unai gaukara do idia karaia namonamo lasi. Hekokoroku tauna be ia gaukara goadagoada ladana bada ia abia totona, bona ma haida idia kwalimu neganai, ia mama henidia. (Gal. 5:26) Unai bamona taudia be ma haida ida nega daudau lalonai idia hetura lasi. Bema ita itaia, ita be hekokoroku karana ita hahedinaraia, namona be Iehova ena heduru totona ita guriguri goadagoada, unai amo ‘iseda lalona do ita hamatamataia’ bona unai kara do ita dadaraia.​—Roma 12:2.

20. Dahaka dainai ita manau be namo?

²⁰ Ita moale badina Iehova be haheitalai namona ia hahedinaraia. Iena hesiai taudia ia kara henidia dalana amo iena manau karana ita itaia, bona ita ura ita tohotohoa. Ma danu ita ura Baibel ese ia gwauraidia mai manau ida Dirava ida idia raka haheitalai namodia do ita tohotohoa. Namona be hanaihanai Iehova dekenai hairai bona hemataurai ita henia, badina ia sibona dekenai unai ita karaia be maoro. (Apok. 4:11) Unai amo do ita hegeregere iseda guba Tamana ida ita raka totona, badina ia be manau taudia ia lalokau henia.