Namona be headava Keristani taudia ese hetahu idia karaia bona Baibel ena hakaua herevadia idia stadilaia. Unai murinai abia hidi idia karaia, unai amo Dirava vairanai edia lalomamina be do ia goeva.

Iehova ese Adamu bona Heva, bona gabeai Noa ia hagania, ia gwau: “Emui bese do umui havaraia, do umui momo herea.” (Gen. 1:28; 9:1) Baibel ia gwau lasi Keristani taudia ese unai hahegani do idia badinaia. Unai dainai, headava taudia ta ta ese do idia abia hidi dahaka gaudia do idia gaukaralaia, unai amo natudia momo do idia havaraia lasi eiava edena nega ai natuna ta do idia havaraia. Dahaka gaudia idia laloa be namo?

Namona be Keristani taudia ese Baibel ena hakaua herevadia hegeregerena, rogorogo koua gaudia idia abia hidi. Keristani taudia ese natuna be bogana lalonai hamasea karana do idia dadaraia. Bema ta be bogana lalonai natuna ia hamasea, ia be Baibel ena hereva mauri matauraia karana dekenai ia utua. Badina bogana lalonai ia noho natuna be gabeai taunimanima ai do ia lao. (Eso. 20:13; 21:22, 23; Sal. 139:16; Ier. 1:5) IUD gaukaralaia karana be edena bamona?

May 15, 1979 ena Watchtower, rau 30-31 ese unai ia herevalaia. Unai nega ai, idia gaukaralaia IUD be plastik gaudia, bona ta ena bogana lalonai idia atoa, bema ia ura lasi ia rogorogo. To Watchtower ia gwau IUD ena gaukara dalana be doketa idia diba namonamo lasi. Saiens taudia momo idia gwau, IUD ese hahine ena bogana ia koua, unai amo vesi be hahine ena gatoi ida ia hakapua lasi. Bema unai ia vara, beibi be do ia vara lasi.

 To, tahua gaukara haida ese idia hahedinaraia vesi be gatoi ida ia hakapua diba. Reana gatoi matamata be Fallopian tube dekenai do ia tubu (unai idia gwauraia ectopic pregnancy) eiava hahine ena beibi pusena lalonai ia vareai diba. Bema unai ia vara, IUD ese unai gatoi do ia koua, bena hahine be do ia rogorogo lasi. Bogana lalonai ia matamaia maurina hadokoa karana be natuna hamasea karana danu. Unai Watchtower ia gwau: “IUD ia ura gaukaralaia Keristani tauna be Baibel ena hakaua herevadia ia tahua be namo, unai amo do ia hahedinaraia ia be mauri ia matauraia.”​—Sal. 36:9.

Lagani 1979 ai, unai magasin idia halasia murinai, saiens bona medikol dalanai gau haida idia idau, a?

Hari IUD idaudia rua idia noho. Idia ta be kopa gauna, bona lagani 1988 ai, United States dekenai idia gaukaralaia matamaia. Bona IUD ma ta be hormone ta ia halasia, bona lagani 2001 ai unai idia gaukaralaia matamaia. Unai IUD rua be edena dala ai idia gaukara?

Kopa: Matamanai ita herevalaia bamona, IUD ese vesi ia koua bona bogana lalonai ia noho gatoi ida ia hakapua lasi. Ma danu, kopa IUD ese vesi ia hadikaia o hamasea diba. * Bona haida idia gwau kopa IUD ese hahine ena bogana ena tissue ia hamaragia danu.

Hormone: IUD be idauidau, bona idia lalonai hormone ta ia noho, natuna havaraia dalana ia koua muramura bamona. Inai IUD ese bogana lalonai unai hormone ia halasia. Unai bamona IUD dainai, hahine haida edia bogana lalonai gatoi ia vara lasi. Oibe, bema gatoi ia vara lasi, beibi ta ia vara diba lasi. Unai IUD ese bogana ena tissue ia hamaragia diba. * Danu, kuru ia habadaia bona vesi be bogana lalona ia vareai lasi. IUD idia gaukaralaia taudia dekenai unai ia vara.

Matamanai ita herevalaia bamona, unai IUD rua ese bogana ena tissue idia hamaragia. To bema gatoi ta amo beibi ia vara be edena bamona? Reana gatoi be bogana lalonai do ia vareai, to beibi pusena lalonai ia vara lasi. Bena beibi ia do tubu lasi neganai ia mase. To saiens taudia idia gwau, unai be nega ta ta sibona ia vara, natuna koua ena muramura idia abia taudia dekenai danu.

Unai dainai, ta ia gwau diba lasi, kopa eiava hormone ia havaraia IUD amo gatoi ta be beibi ia havaraia diba lasi. Saiens taudia idia gwau edia tahua gaukara ese ia hahedinaraia, unai bamona IUD ese hahine momo ia durua dainai, idia be idia rogorogo lasi.

Bema Keristani headava taudia idia ura IUD idia gaukaralaia, namona be unai ena namo bona dika be edia doketa ida idia herevalaia. Namo lasi tau ta eiava doketa be idia totona abia hidi ia karaia. (Roma 14:12; Gal. 6:4, 5) Idia sibona ese abia hidi do idia karaia. Edia tahua gauna badana be Dirava idia hamoalea bona edia lalomamina be do ia goeva.​—1 Timoteo 1:18, 19; 2 Timoteo 1:3 sekea.