1, 2. Natudia haida idia ura edia mauri idia gwauhamatalaia bona bapatiso neganai, dahaka dainai tama sina idia daradara?

BAIBEL stadi taudia tausen momo be Iehova dekenai edia mauri idia gwauhamatalaia bona idia bapatiso. Momo be hereva momokani lalonai idia tubu daekau bona mauri dala namona idia abia hidi matamata taudia. (Sal. 1:1-3) Bema oi be Keristani tama o sina ta, oi be mai moale ida emu natuna mero o kekeni do ia bapatiso negana oi naria noho.​—⁠3 Ioane 4 sekea.

² To reana do oi daradara. Badina matamata taudia haida oi itaia idia bapatiso, to gabeai Dirava ena taravatu badinaia karana ena namo idia daradaralaia. Bona momo be hereva momokani idia rakatania. Reana oi daradara dika emu natuna be Keristani dala ia badinaia, to gabeai iena lalokau hereva momokani dekenai do ia keru. Bona Efeso kongrigeisen taudia bamona do ia kara, Iesu be idia dainai ia gwau: “Oi ese guna oi abia lalokauna oi rakatania  vadaeni.” (Apok. 2:4) Dahaka do oi karaia unai amo emu natuna oi gimaia bona durua diba hahemauri ia abia totona? (1 Pet. 2:2) Haere abia totona, mani Timoteo ita laloa.

3. (a) Edena dala ai Timoteo be Keristani tauna ai ia lao, bona ia dibaia gaudia be edena bamona ia laloa? (b) Paulo ese Timoteo dekenai dahaka gaudia toi ia gwauraia?

³ Lagani 47 C.E. ai, aposetolo Paulo be Lusitera ia vadivadi henia neganai, Timoteo be Keristani dalana ia dibaia. Ena be unai nega ai Timoteo be mero matamata sibona, to ia dibaia gaudia ia badinaia namonamo. Lagani rua murinai, aposetolo Paulo ia bamoa matamaia. Lagani 16 murinai, Paulo be Timoteo ia tore henia, ia gwau: “Oi dibaia gaudia do oi badinaia noho, bona oi abia dae unai gaudia be momokani, badina oi diba daidia amo unai gaudia oi dibaia, oi beibi negana amo Toretore Helagadia [Heberu Toretoredia] oi diba, unai ese oi dekenai aonega ia henia bona Keriso Iesu abidadama henia karana amo hahemauri oi abia.” (2 Tim. 3:14, 15) Paulo ese inai gaudia toi ia herevalaia: (1) Toretore Helagadia dibaia karana, (2) do ia abia dae ia dibaia gaudia be momokani, bona (3) aonega ia henia bona Keriso Iesu abidadama henia karana amo hahemauri do ia abia.

4. Emu natudia oi hadibaia neganai, edena tulu oi gaukaralaia? (Laulau ginigunana herevalaia.)

⁴ Oi be Keristani tama o sina ta dainai, oi ura emu natuna be Toretore Helagadia ia diba, unai be Heberu Toretoredia bona Keristani Grik Toretoredia. Edia diba hegeregerena, natu maragidia danu be Baibel ese ia gwauraia taudia bona sivaraidia do idia dibaia. Iehova ena orea ese tulu idauidau idia hegaegaelaia bona tama sina ese unai idia gaukaralaia diba edia natudia idia durua totona. Emu gado ai idia noho vadaeni tulu haida oi laloa diba, a? Laloatao, natudia be Toretore Helagadia idia diba neganai, edia hetura karana Iehova ida be do ia goada.

5. (a) “Oi abia dae unai gaudia be momokani” ena anina be dahaka? (b) Edena bamona ita diba Timoteo be Iesu ena sivarai namona ia abia dae momokani?

⁵ Toretore helagadia oi diba be mai anina bada. To, natudia dekenai Baibel ese ia gwauraia taudia bona sivarai sibona ita hadibaia be hegeregere lasi. Timoteo be ia “abia dae unai gaudia be momokani.” Grik gado ai, unai hereva ena anina be ta ia “diba momokani” o ia “daradara lasi, to ia diba ia abia dae gaudia be momokani.” Timoteo be ia beibi negana amo Heberu Toretoredia ia diba. Gabeai, ia abia dae momokani Iesu be Mesia. Oibe, ia dibaia gaudia ia abidadama henia. Momokani, Timoteo ese sivarai namona ia abia dae dainai, ia bapatiso bona Paulo ena misinari gaukara lalonai ia bamoa.

6. Edena bamona emu natudia do oi durua, unai amo Baibel amo idia dibaia gaudia idia abidadama henia diba?

⁶ Edena dala ai emu natudia edia abidadama oi hagoadaia diba, unai amo do idia abia dae idia dibaia gaudia be momokani, Timoteo bamona? Gau ginigunana be oi haheauka. Edia abidadama be do ia goada haraga lasi; bona ena be oi be mai emu abidadama, to unai ese ia hahedinaraia lasi emu natuna danu be do ia abidadama. Natudia ta ta be sibodia edia “darana” do idia gaukaralaia, bema idia ura Baibel ena hereva momokani idia abidadama henia. (Roma 12:1 duahia.) Oi be tama o sina ta dainai, emu natudia oi durua dalana ta be oi noho hegaegae edia  henanadai oi haerelaia totona. Haheitalai ta mani ita laloa.

7, 8. (a) Tama ta be edena dala ai haheauka ia hahedinaraia? (b) Edena bamona nega ai oi haheauka be namo?

⁷ Thomas, ena natuna kekeni ena mauri lagani be 11, ia gwau: “Reana egu natuna do ia henanadai, ‘Iehova ese tanobada ai idia noho mauri gaudia be evolusen amo ia havaraia, a?’ o, ‘Dahaka dainai iseda komiuniti ita durua lasi, hegeregere eleksen dekenai?’ Nega haida lau hekwarahi bada haere maorona lau henia totona. Momokani, ta ena abidadama ia goada totona, ia be hereva momokani tamona sibona ia dibaia lasi. To hamomokania gaudia ma haida ia dibaia danu be namo.”

⁸ Thomas ia diba, iena natuna ia hadibaia neganai, namona be ia haheauka. Oibe, Keristani taudia ibounai idia haheauka be namo. (Kol. 3:12) Thomas ia laloparara nega bada lalonai ena natuna ia hadibaia be namo. Bona Baibel do ia herevalaia namonamo, unai amo ena natuna be ia dibaia gaudia ia abidadama henia diba. Ia gwau: “Lau bona egu adavana ai ura diba bema emai natuna be ia dibaia gaudia ia abidadama henia bona ia lalopararalaia. Bema ia be mai ena henanadai haida, unai be namo. To bema ia henanadai lasi, do lau laloa momo.”

9. Edena dala ai emu natudia dekenai Dirava ena Hereva oi hadibaia diba?

⁹ Tama sina be mai haheauka ida natudia idia hadibaia neganai, natudia be metairametaira abidadama “ena lababa, ena lata, ena atai, bona ena dobu” do idia lalopararalaia. (Efe. 3:18) Edia mauri lagani bona laloparara hegeregerena idia ita hadibaia. Idia dibaia gaudia idia abidadama henia neganai, edia sikuli turadia bona ma haida vairanai edia abidadama idia gwauraia hedinarai diba. (1 Pet. 3:15) Hegeregere, emu natudia ese mase taudia dekenai ia vara gauna be Baibel amo idia hahedinaraia diba, a? Baibel ese gau ta ia hahedinaraia dalana idia lalopararalaia, a? * Oibe, emu natuna dekenai Dirava ena Hereva oi hadibaia neganai, oi haheauka be namo, bona unai be mai ena namo.​—⁠Deu. 6:6, 7.

10. Emu hahediba karana lalonai, dahaka be mai anina bada?

¹⁰ Oibe, emu natudia edia abidadama oi hagoadaia totona, emu haheitalai danu be mai anina bada. Stephanie ena natudia kekeni be toi, ia gwau: “Egu natudia be idia maragi negana amo, sibona lau nanadaia, ‘Egu natudia dekenai Iehova ia noho, iena lalokau, bona ena kara maoromaoro daladia lau abidadama henia ena badina lau herevalaia, a? Egu natudia idia itaia lau be Iehova lau lalokau henia, a?’ Bema lau ura egu natudia edia abidadama ia goada, egu kara amo unai lau hahedinaraia be mai anina bada.”

11, 12. Aonega ena anina be dahaka, bona edena bamona ita diba ia be ta ena mauri lagani dainai lasi?

¹¹ Ita itaia bamona, Timoteo be (1) Toretore Helagadia ia dibaia bona (2) ia dibaia gaudia ia abidadama henia. Paulo ia gwau Toretore Helagadia ese Timoteo dekenai “aonega ia henia . . . hahemauri [ia] abia” totona. Ena hereva ena anina be dahaka?

¹² Insight on the Scriptures, Volium 2, ia gwau, Baibel lalonai, aonega ena anina be “diba bona laloparara ita gaukaralaia namonamo hekwakwanai idauidau ita hamaoromaoroa  totona, dika ita dadaraia o koua, tahua gaudia haida ita hagugurua, eiava ma haida ita hagoadaia unai idia karaia totona. Ia be kavakava karana amo ia idau.” Baibel ia gwau: “Natuna maragidia ibounai ese kavakava idia karaia noho.” (Aon. 22:15) Momokani, aonega be lo tauna ena kara. Ta be lo Keristani tauna ai ia lao diba, bema Iehova ia gari henia bona ena hahegani ia badinaia, to ena mauri lagani dainai lasi.​—Salamo 111:10 duahia.

13. Edena dala ai matamata tauna do ia hahedinaraia ia be ia aonega hahemauri abia totona?

¹³ Edia abidadama ia goada Keristani matamata taudia be “hurehure ese ia doria lao doria mai” lasi, bona edia ura eiava turadia edia laloani herevadia ese idia “ia odaia lao” lasi. (Efe. 4:14) To “edia darana idia gaukaralaia karana amo, sibodia idia hadibaia, unai amo maoro bona kerere edia idau idia dibaia diba.” (Heb. 5:14) Idia hahedinaraia idia be lo Keristani taudia ai idia ura lao, bema abia hidi maorodia idia karaia​—⁠herevana edia tama sina o ma haida be idia noho lasi. (Fili. 2:12) Unai bamona aonega ese ta ia hamauria diba. (Aonega Herevadia 24:14 duahia.) Edena bamona emu natudia oi durua diba aonega idia abia totona? Gau ginigunana be Baibel lalonai oi abia dae gaudia be emu natudia dekenai oi hadibaia. Emu hereva bona kara amo oi hahedinaraia, Dirava ena Hereva lalonai idia noho herevadia be oi abia dae momokani.​—Roma 2:21-23.

14, 15. (a) Ia ura bapatiso matamata tauna be dahaka ia laloa dobu be namo? (b) Edena dala ai emu natudia do oi durua, Dirava ena taravatu badinaia karana amo idia abia hahenamo idia laloa dobu totona?

¹⁴ Emu natudia dekenai dahaka be namo bona dika oi hadibaia sibona be hegeregere lasi. Namona be oi durudia inai henanadai idia haerelaia totona: ‘Dahaka dainai Baibel ese tauanina ena ura gaudia haida ia taravatua? Dahaka dainai lau abia dae momokani Baibel ena taravatu be egu namo totona?’​—Isa. 48:17, 18.

¹⁵ Bema emu natuna ia ura bapatiso, namona be ia oi durua Keristani tauna ena maduna idauidau ia lalopararalaia totona. Unai  ena namo be dahaka? Dahaka hekwakwanai do ia davaria? Edena dala ai do ia abia hahenamo ese ia davaria hekwakwanai ia hereaia? (Mar. 10:29, 30) Ta ia do bapatiso lasi neganai, unai gaudia ia laloa dobu be namo. Danu, emu natudia oi durua kamonai karana ena namo bona kamonai lasi karana ena dika idia laloa dobu totona, unai amo do idia abia dae Baibel ena taravatu badinaia karana ese hanaihanai namo ia havaraia.​—Deu. 30:19, 20.

16. Bema ia bapatiso vadaeni matamata tauna be hereva momokani ia daradaralaia, tama sina be dahaka do idia karaia?

¹⁶ Dahaka do oi karaia bema emu natuna ia bapatiso murinai, hereva momokani ia daradaralaia matamaia? Hegeregere, emu natuna be tanobada gaudia do ia laloa matamaia, eiava do ia daradara bema Baibel ena hakaua herevadia badinaia karana be mauri dala namona. (Sal. 73:1-3, 12, 13) Oi be tama o sina ta dainai, emu natuna oi kara henia dalana ese ena abidadama do ia hagoadaia eiava ia hamanokaia diba. Namo lasi emu natuna ena kara dainai ia ida oi hepapahuahu, herevana ia be maragi eiava ia be matamata. To, gau badana be ia oi durua iena abidadama ia hagoadaia totona.

17, 18. Bema matamata tauna ta ia daradara, edena dala ai tama sina ese ia do idia durua?

¹⁷ Ia bapatiso matamata tauna be Iehova dekenai ena mauri ia gwauhamatalaia. Oibe, ia gwauhamata Dirava do ia lalokau henia bona ena ura do ia atoa guna. (Mareko 12:30 duahia.) Iehova ese unai gwauhamata ia laloa bada, bona unai gwauhamata ia karaia tauna be unai ia laloa bada danu be namo. (Had. 5:4, 5) Nega maorona bona dala namona ai, emu natudia dekenai unai oi herevalaia. To unai oi do karaia lasi neganai, namona be Iehova ena orea ese tama sina totona ia hegaegaelaia tulu idauidau oi gaukaralaia namonamo. Bema unai oi karaia, emu natuna do ia laloparara Iehova dekenai ena mauri ia gwauhamatalaia bona ia bapatiso karana be mai anina bada bona ena hahenamo be momo.

¹⁸ Hegeregere, heduru daladia haida be Questions Young People Ask​—Answers That Work, Volium 1 ena apendiks ladana “Questions Parents Ask,” dekenai oi davaria diba. Ia gwau: “Namo lasi oi laloa emu natuna be hereva momokani ia dadaraia. Nega momo, badina ta dainai idia be unai bamona idia kara.” Reana ia be turadia edia laloani karadia. Eiava sibona idia noho o idia itaia Keristani matamata taudia haida be edia hesiai gaukara idia goadalaia, to ia be lasi. Apendiks ma ia gwau: “To, unai ese ia hahedinaraia lasi emu natuna be hereva momokani ia dadaraia. Reana idia be gau haida idia lalohekwarahilaia dainai, unai bamona idia kara.” Bena apendiks ese Keristani tama o sina ese do ia karaia gaudia haida ia gwauraia.

19. Edena dala ai tama sina ese edia natudia do idia durua idia aonega bona hahemauri idia abia totona?

¹⁹ Oi be tama o sina ta dainai, emu maduna badana bona hahenamo be emu natudia “idia tubu noho lalonai, Iehova ena matahakani bona sisiba amo idia [oi] hadibaia be namo.” (Efe. 6:4) Ita dibaia bamona, idia dekenai Baibel ena hereva sibona ita hadibaia lasi, to idia ita durua idia dibaia gaudia idia abidadama henia totona. Oibe, namona be idia dibaia gaudia idia abidadama henia momokani, unai amo Iehova dekenai edia mauri idia gwauhamatalaia bona mai kudouna ibounai ida ia idia hesiai henia diba. Namona be Iehova ena Hereva, iena lauma helaga, bona umui tama sina emui hekwarahi ese emui natudia do ia durua idia aonega bona hahemauri idia abia totona.