1-2. (a) Iubili be dahaka? (Maua ladana “Iubili be Dahaka”? itaia.) (b) Luka 4:16-18 ai, Iesu be dahaka ia herevalaia?

TANO haida ai, king eiava kwini ta ena lohia lagani be 50 ia abia neganai, aria ta idia karaia. Unai lagani namba 50 be idia gwauraia, pavapava ena iubili lagani. Unai aria be dina ta, wiki ta, eiava nega daudau lalonai idia moalelaia diba, to ia ore neganai taunimanima ese idia laloaboio haraga.

² Ita ese iubili namona ta do ita herevalaia, bona unai ese idaunegai Israela taudia be lagani 50 ia abia negadia ta ta ai idia karaia aria ia hereaia. Unai idaunegai Iubili ese Israela taudia ia ruhaia. Dahaka dainai hari ita dekenai ia be mai anina bada? Badina Israela taudia edia Iubili laganina amo hari inai negai Iehova ese ita ia ruhaia momokani karana do ita dibaia, bona Iesu ese unai ia herevalaia.​—⁠Luka 4:16-18 duahia.

3. Levitiko 25:8-12 ena hereva bamona, Israela taudia be edena dala ai Iubili amo namo idia abia?

³ Iesu ese ruhaia karana ia herevalaia ena anina ita lalopararalaia totona, namona be Dirava ese ena taunimanima totona ia hegaegaelaia Iubili ita herevalaia guna. Iehova ese Israela taudia ia hamaoroa: “Inai dala dekenai umui ese lagani namba 50 do umui hahelagaia. Unai lagani lalonai, emui tano lalonai noho guia taudia ibounai, be do umui ruhaia. Inai lagani ena lalonai danu taunimanima ibounai ese edia tano korikori, bona edia iduhu korikori dekenai do idia giroa lou. Inai lagani ena ladana be Iubili.” (Levitiko 25:8-12 duahia.) Stadi atikol 49 ai, Israela taudia ese wiki ena Sabati amo namo idia abia dalana ita herevalaia. To, Israela taudia be edena dala ai Iubili  amo namo idia abia? Mani oi laloa, reana Israela tauna ta ena abitorehai be bada, unai dainai ena tano ia hoihoilaia ena abitorehai davana ia karaia totona. Iubili ena lagani ai, iena tano do ia abia lou. Unai amo ia be ena “tano korikori” dekenai do ia giroa lou, bona ena natudia be vaira negai edia tano do idia noholaia. Nega ma haida ai, mai ena abitorehai tauna be reana ena natuna ta​—⁠eiava ia sibona do ia henia​—⁠ma haida ese hesiai tauna bamona idia hoia, unai amo ena abitorehai davana ia karaia. Iubili laganina ai, hesiai tauna be ena ‘iduhu korikori dekenai do ia giroa lou.’ Unai ese ia hahedinaraia hesiai tauna be gabeai idia ruhaia diba! Oibe, Iehova ese ena taunimanima ia laloa bada!

4-5. Dahaka dainai Iubili ena anina ita dibaia be namo?

⁴ Iubili ena namo ma ta be dahaka? Iehova ia gwau: “[Iehova] emui Dirava ese umui dekenai ia henia noho tano dekenai umui do ia hanamoa bada. Unai dainai tau ta be do ia ogogami lasi emui huana dekenai.” (Deu. 15:4) To, hari tanobada dekenai unai ia vara lasi, badina taga taudia be edia taga idia habadaia noho bona ogogami taudia be momo!

⁵ Ita Keristani taudia be Mose ena Taravatu henunai ita noho lasi. Anina be ita ese Iubili negana ai idia karaia gaudia, hegeregere hesiai taudia idia ruhaia, abitorehai davana idia henia lou, bona tano idia henia lou karana, ita badinaia lasi. (Roma 7:4; 10:4; Efe. 2:15) To, Iubili ena anina ita dibaia be namo. Dahaka dainai? Badina ruhaia karana amo namo ita abia diba, bona ita ia durua Iehova ese Israela taudia totona ia hegaegaelaia gauna ita laloa lou totona.

6. Taunimanima be dahaka amo idia ruhaia be namo?

⁶ Ta ese ita ibounai ia ruhaia be namo, badina ita be kara dika ena igui hesiai taudia. Momokani, ita be kara dika taudia dainai ita buruka, gorere bona mase. Momo be galasi dekenai sibona idia itaia eiava gorere dainai doketa dekenai idia lao neganai, unai idia hamomokania. Danu, kara dika ita karaia neganai ita lalohisihisi. Aposetolo Paulo ia gwau ia be “kara dika ena taravatu ese igui hesiai tauna bamona” ia hakaua. Danu ia gwau: “Lau madi o! Inai tauanina, egu mase do ia  havaraia gauna amo daika ese lau ia hamauria diba?”​—⁠Roma 7:23, 24.

7. Isaia ese ruhaia karana be edena bamona ia herevalaia?

⁷ Ita moale badina Dirava ese dala ia karaia kara dika amo ita ia ruhaia totona. Iesu amo unai ia karaia. Lagani 700 mai kahana gunanai, Iesu be tanobada dekenai ia do mai lasi neganai, peroveta tauna Isaia ia gwau, vaira negai ruhaia karana badana ta do ia vara. Unai ruhaia karana badana ese Israela taudia ese Iubili ena lagani ai ia vara gauna ia hereaia. Isaia ia gwau: “Lohiabada Dirava ena Lauma be lauegu latanai ia noho. Badina be [Iehova] ese, lau ia abia hidi vadaeni, bona lau ia siaia vadaeni, ogogami taudia dekenai Sivarai Namona do lau haroro henia totona. [Iehova] ese lau ia siaia vadaeni, kudouna idia makohia taudia do lau hanamoa lou, bona idia guia vadaeni taudia do lau ruhaia.” (Isa. 61:1) Unai peroveta herevana ese daidia ia herevalaia?

8. Isaia ena peroveta herevana ese daika ia herevalaia?

⁸ Unai mai anina bada peroveta herevana be Iesu ese ena haroro gaukara ia karaia matamaia murinai ia guguru. Iesu be ena hanua Nasareta dekenai ia lao neganai, dubu helaga ai idia haboua Iuda taudia dekenai Isaia ena peroveta herevana ia duahia. Iesu be unai peroveta herevana amo sibona ia herevalaia, ia gwau: “Iehova ena lauma be lau latanai ia noho, badina lau ia horoa, ogogami taudia dekenai sivarai namona do lau gwauraia, lau ia siaia idia guia taudia ruhaia sivaraina do lau harorolaia bona matakepulu taudia edia matana do lau kehoa, idia hahisia taudia do lau ruhaia, bona Iehova ena lalonamo negana do lau harorolaia.” (Luka 4:16-19) Edena dala ai Iesu ese unai peroveta herevana ia hagugurua?

9. Iesu ena negai, momo idia ura dahaka amo idia ruhaia?

⁹ Ruhaia karana dekenai Iesu ese ia duahia Isaia ena peroveta herevana, be Keristani taudia ginigunadia edia negai ia guguru matamaia. Iesu ese unai ia hamomokania totona, ia gwau: “Umui kamonai sirina be hari dina ia guguru.” (Luka 4:21) Iesu ena hereva idia kamonai taudia momo be reana idia laloa politikol dalanai gau haida idia idau neganai, Roma ena gavamani ena siahu henunai do idia noho lasi. Edia lalohadai be tatau rua edia lalohadai bamona, unai tatau idia gwau: “Ai laloa inai tauna ese Israela do ia hamauria.” (Luka 24: 13, 21) Ita diba Iesu ese ia murinai idia raka taudia ia hadibaia lasi, Roma gavamani edia taravatu aukadia dainai idia gwau-edeede. To, idia ia hadibaia “Kaisara ena gaudia be Kaisara dekenai umui henia.” (Mat. 22:21) So unai negai Iesu ese edena dala ai taunimanima ia ruhaia?

10. Iesu ese edena dala ai taunimanima ia ruhaia?

¹⁰ Dirava ena Natuna ese dala rua amo taunimanima ia ruhaia. Dala ginigunana be, Iesu ese taunimanima ia durua tomadiho gunalaia taudia edia hahediba koikoi idia dadaraia totona. Unai negai Iuda taudia momo idia doria taunimanima edia kastom bona koikoi herevadia idia abia dae totona. (Mat. 5:31-37; 15:1-11) Tomadiho gunalaia taudia idia laloa idia ese Dirava ena Hereva amo taunimanima idia durua noho, to idia be matakepulu taudia bamona. Idia ese Mesia bona ia hadibaia hereva momokani idia dadaraia dainai, matakepulu taudia bamona idia noho bona edia dika ia gwauatao lasi. (Ioa. 9:1, 14-16, 35-41) Iesu be hereva momokani ia hadibaia bona haheitalai namona ia hahedinaraia dainai, manau taudia dekenai tomadiho koikoi dadaraia karana ia hadibaia.​—⁠Mar. 1:22; 2:23–3:5.

11. Edena dala iharuana ai Iesu ese ruhaia karana ia hahedinaraia?

¹¹ Dala iharuana be, Iesu ese dala ia kehoa taunimanima be kara dika ena igui amo ia ruhaia totona. Iesu ena mauri davana idia abidadama henia taudia be Dirava ese edia dika do ia gwauatao. (Heb. 10:12-18) Iesu ia gwau: “Bema Natuna ese umui ia ruhaia, umui do ia ruhaia momokani.” (Ioa. 8:36) Unai ese Israela taudia edia negai, Iubili laganina ai idia abia hahenamo ia hereaia! Hegeregere, Iubili laganina ai idia ruhaia tauna be reana gabeai igui hesiai tauna ai do ia lao, eiava ia mase diba.

12. Daidia be Iesu ese ia gwauraia ruhaia karana amo hahenamo idia abia taudia ginigunadia?

¹² Pentekoste 33 C.E. ai, Iehova ese lauma helaga amo aposetolo taudia bona abidadama tatau bona hahine ma haida ia horoa. Idia ia abia hidi ena natudia ai idia lao dainai, vaira negai idia toreisi lou bona Iesu ida guba dekenai idia lohia. (Roma 8:2, 15-17) Idia be Iesu ese Nasareta ena dubu helaga ai ia gwauraia ruhaia karana amo hahenamo idia abia taudia ginigunadia. Unai tatau bona hahine be Iuda tomadiho gunalaia taudia edia hahediba koikoi bona Baibel ena taravatu utua karadia ena igui amo idia ruhaia. Danu, kara dika ese ia havaraia mase amo Dirava ese idia ia ruhaia. Lagani 33 C.E. ai, laulau dalanai  Keriso ena murinai idia raka taudia ia horoa karana ena Iubili be Iesu ena Lagani 1,000 Lohia Negana ena dokonai do ia ore. Hari ia lao bona unai negai, dahaka gau namodia do idia vara?

13-14. Daidia danu be Iesu ese ia gwauraia ruhaia karana amo namo idia abia diba?

¹³ Hari, kudou maoro taudia milioni momo be bese idauidau amo idia mai “mamoe ma haida.” (Ioa. 10:16) Dirava ese idia ia abia hidi lasi Iesu ida guba dekenai idia lohia totona. To, idia be Baibel ese ia herevalaia mauri hanaihanai ena helaro tanobada dekenai do idia abia. Unai be emu helaro danu, a?

¹⁴ Hari danu, Dirava ena guba Basileia do idia lohiaia taudia ese idia abia hahenamo haida oi moalelaia noho. Iesu ena boubou gauna oi abidadama henia dainai Dirava oi noia diba emu kara dika ia gwauatao totona. Unai amo Dirava ena lalonamo oi abia bona emu lalomamina be do ia goeva. (Efe. 1:7; Apok. 7:14, 15) Hahediba koikoi herevadia oi dadaraia karana amo oi abia hahenamo idauidau mani oi laloa. Iesu ia gwau: “Umui be hereva momokani do umui diba, bona hereva momokani ese umui do ia ruhaia.” (Ioa. 8:32) Hereva momokani ita dibaia dainai ita moale!

15. Kahirakahira, dahaka hahenamo do idia vara?

¹⁵ Hahenamo momo do idia vara. Kahirakahira, Iesu ese tomadiho koikoi bona tanobada  ena gavamani ibounai do ia hadikaia ore. Dirava ese ia idia hesiai henia “hutuma bada” taudia do ia gimaia, bena tanobada paradaisona ai hahenamo momo do idia moalelaia. (Apok. 7:9, 14) Taunimanima momo herea be do idia toreisi lou bona Adamu ena dika ese ia havaraia hisihisi idauidau amo idia do ia ruhaia.​—Kara 24:15.

16. Vaira negai, taunimanima ese dahaka hahenamo do idia moalelaia?

¹⁶ Lagani 1,000 Lohia Negana ai, Iesu bona ia ida idia lohia taudia be taunimanima do idia durua goevadae taudia ai idia lao, bona Dirava idia tura henia diba. Unai nega be Israela ai Iubili dinana bamona. Anina be tanobada dekenai mai abidadama ida Iehova idia hesiai henia taudia ibounai be do idia goevadae bona do idia kara dika lou lasi.

17. Isaia 65:21-23 ese Dirava ena taunimanima totona dahaka ia perovetalaia? (Rau 1 ena laulau itaia.)

¹⁷ Isaia 65:21-23 ena peroveta herevana ese tanobada ai do idia vara gaudia ia hahedinaraia. (Duahia.) Do ita hesiku lasi, to gau momo do ita karaia. Baibel ia gwau, unai negai Dirava ena taunimanima be gaukara namodia do idia karaia. Ita diba momokani, Keriso ena Lagani 1,000 Lohia Negana ena dokonai, “Dirava ese ia havaraia gaudia ibounai be dika ena igui amo do ia ruhadia, bona Dirava ena natudia edia ura kwalimu hereadaena do idia abia.”​—⁠Roma 8:21.

18. Dahaka dainai ita gwau diba vaira negai do ita moale bada?

¹⁸ Iehova ese Israela taudia ia durua unai amo edia gaukara bona laga-ani karana idia moalelaia, unai hegeregerena Keriso ena Lagani 1,000 Lohia Negana ai iena taunimanima ese unai do idia moalelaia. Nega bada do ia noho dainai Dirava idia tomadiho henia diba. Hari inai negai Dirava Tomadiho Henia karana ese moale ia havaraia, bona tanobada matamatana ai unai do ia vara. Oibe, ita moale bada badina vaira negai Keriso ena Lagani 1,000 Lohia Negana ai, gaukara namodia do ita karaia bona Dirava do ita hesiai henia.