1. Dahaka dainai Iesu ese ena murinai idia raka taudia be mamoe ida ia hahegeregerea?

IESU ese ia bona ena murinai idia raka taudia edia hetura karana be mamoe naria tauna bona mamoe edia hetura karana ida ia hahegeregerea. (Ioa. 10:14) Unai be maoro, badina mamoe be edia mamoe naria tauna idia diba bona ena gadona idia kamonai. Turist ta be unai ia itaia bona ia gwau: “Ai ura mamoe haida edia laulau ai abia dainai, mamoe ai boiridia mai. To idia mai lasi badina emai gadona idia diba lasi. Bena mamoe naria merona ta ia mai bona idia ia boiria neganai, karaharaga idia badinaia.”

2-3. (a) Edena dala ai Iesu ena murinai idia raka taudia ese iena gadona idia kamonai noho? (b) Inai atikol bona atikol 51 ai dahaka do ita herevalaia?

² Unai turist tauna ena sivarai amo Iesu ese ena mamoe, ena hahediba taudia unai, ia herevalaia dalana ita laloa. Ia gwau: “Egu gadona do idia kamonai.” (Ioa. 10:16) To, Iesu be guba dekenai ia noho dainai, edena bamona ia ita kamonai henia diba? Iseda Biaguna ita kamonai henia dalana ta be iseda mauri lalonai ena hahediba herevadia do ita badinaia.​—Mat. 7:24, 25.

³ Inai atikol bona atikol 51 ai, Iesu ena hahediba herevadia haida do ita stadilaia. Do ita itaia, Iesu ese ita ia hadibaia gau haida do ita karaia lasi bona gau ma haida ita karaia be namo. Mamoe naria tauna namona ese ita ia hadibaia do ita karaia lasi gaudia rua mani ita herevalaia.

4. Luka 12:29 hegeregerena, dahaka ese ‘lalohekwarahi’ ia havaraia diba?

⁴ Luka 12:29 duahia. Iesu ese ena murinai idia raka taudia ia hamaoroa idia ania eiava inua gaudia do idia “lalohekwarahilaia lasi.” Ita diba Iesu ena sisiba herevadia be hanaihanai idia maoro bona ita idia durua diba. Ita ura unai ita badinaia, to nega haida ia auka. Dahaka dainai?

5. Dahaka dainai haida be tauanina durua gaudia totona idia lalohekwarahi?

 ⁵ Reana haida be tauanina durua gaudia hegeregere, aniani, dabua, bona ruma totona idia lalohekwarahi. Idia be reana ogogami tanodia ai idia noho bona idia hekwarahi moni gaukara idia davaria totona. Edia famili naria totona moni be hegeregere lasi. Eiava famili lalonai moni gaukara ia karaia tauna ia mase dainai, ia auka edia dabu gaudia idia hoia totona. Bona COVID-19 gorerena dainai, momo be edia moni gaukara idia haboioa. (Had. 9:11) Bema ita be unai hekwakwanai eiava hekwakwanai ma haida ita davaria, edena dala ai Iesu ena hakaua herevana do ita badinaia bona ita lalohekwarahi lasi?

6. Mani aposetolo Petero dekenai ia vara gauna oi herevalaia.

⁶ Nega ta, aposetolo Petero bona aposetolo taudia ma haida be Galilea gohuna ai bouti dekenai idia noho neganai, lai gubana ia toa bona Iesu idia itaia davara latanai ia raka lao. Petero ia gwau: “Lohiabada e, bema inai be oi, lau oi hamaoroa ranu latanai oi dekenai do lau raka mai.” Iesu ese ia hamaoroa “oi mai,” bena Petero be bouti amo ia diho bona “ranu latanai Iesu dekenai ia raka lao.” Bena dahaka ia vara? “Hurehure badadia ia itaia dainai ia gari. Bona ia mutu matamaia neganai, ia  boiboi: ‘Lohiabada e, lau oi hamauria!’” Iesu ese ena imana ia toia roro bona Petero ia hamauria. Mani inai ita laloatao, Petero be ranu latanai ia raka noho totona, gau badana be Iesu do ia itaia noho. To, Petero be hurehure badadia ia itaia neganai, ia gari bona daradara bona ia mutu matamaia.​—Mat. 14:24-31.

7. Petero ena haheitalai amo dahaka ita dibaia?

⁷ Petero ena haheitalai amo gau ta ita dibaia. Petero be davara latanai ia raka neganai, ia laloa lasi hurehure dekenai do ia gari bona do ia mutu. Ia ura ranu latanai ia raka noho ela bona Iesu ida ia hedavari. To ia be hurehure ia laloa momo dainai, Iesu ia raraia lasi. Momokani, ita be ranu latanai ita raka lasi, to hekwakwanai ita hanaia totona ita abidadama noho be gau badana. Bema Iehova bona ena gwauhamata ita laloa bada lasi, eda abidadama ia manoka diba. Ena be hahetoho badadia ita davaria, to namona be Iehova ita raraia noho bona ita abia dae ita do ia durua. Edena dala ai unai ita karaia diba?

8. Dahaka ese ita do ia durua diba iseda dabu gaudia ita laloa momo lasi totona?

⁸ Iseda hekwakwanai ita laloa momo lasi, to Iehova ita abidadama henia noho be namo. Laloatao, iseda lalokau Tamana, Iehova ia gwauhamata iseda tauanina durua gaudia do ia henia, bema Dirava tomadiho henia karadia ita atoa guna. (Mat. 6:32, 33) Iehova be hanaihanai ena gwauhamata ia hagugurudia. (Deu. 8:4, 15, 16; Sal. 37:25) Bema Iehova be manu bona flaoaflaoa ia naria, vadaeni namo lasi aniani bona dabua totona ita lalohekwarahi! (Mat. 6:26-30; Fili. 4:6, 7) Lalokau dainai tama sina be edia natudia edia dabu gaudia idia henia, unai hegeregerena lalokau ese iseda guba Tamana ia doria ena taunimanima edia dabu gaudia ia henia totona. Oibe, ita abia dae momokani Iehova be ita do ia naria!

9. Tadikaka ta bona ena adavana edia ekspiriens amo dahaka oi dibaia?

⁹ Mani ekspiriens ta ita laloa, ia hamomokania Iehova ese iseda dabu gaudia ia henia diba. Ful-taim hesiai gaukara idia karaia tadikaka bona ena adavana be edia motuka gunana amo hora tamona lalonai refiuji kamepa ta dekenai idia lao. Unuseniai, taihu haida idia udaia Keristani hebou dekenai idia lao totona. Tadikaka ia gwau: “Hebou murinai, unai taihu ai boiridia aniani totona, to gabeai ai laloparara ai dekenai aniani be lasi.” Bena dahaka ia vara? Tadikaka ma ia gwau: “Ruma dekenai ai ginidae neganai, emai iduara badinai baege badadia rua mai aniani idia noho. Ai diba lasi daika ese unai gaudia ia atoa. Iehova ese ai ia naria.” Gabeai, edia motuka ia dika. Edia haroro gaukara ai unai motuka ese idia ia durua, to idia be moni lasi hanamoa totona. Motuka hanamoa gabuna dekenai idia abia lao neganai, tau ta ia mai bona ia henanadai: “Unai be daika ena motuka?” Tadikaka ia gwau unai be iena bona ia ura idia hanamoa. Unai tau ia gwau: “Unai be gau ta lasi. Egu adavana be inai bamona motuka bona ena kala ia ura henia. Ena davana be hida?” Tadikaka ese ena motuka ia hoihoilaia, bona ena davana be ia hegeregere motuka ma ta ia hoia totona. Ia gwau: “Ai moale bada bona ai diba unai be ia vara kava lasi. Iehova ese ai ia durua.”

10. Edena dala ai Salamo 37:5 ese ita ia hagoadaia iseda dabu gaudia ita lalohekwarahilaia lasi totona?

¹⁰ Bema mamoe naria tauna namona ita kamonai henia bona iseda dabu gaudia totona ita lalohekwarahi momo lasi, ita diba Iehova be unai gaudia do ia henia. (Salamo 37:5 duahia; 1 Pet. 5:7) Mani  paragraf 5 ai ita herevalaia hekwakwanai ita laloa. Reana Iehova ese famili kwarana eiava ita gaukara kampani amo ita ia durua eda dabu gaudia ita abia  totona. Bema hari famili kwarana be unai ia karaia diba lasi eiava iseda gaukara ita haboioa, Iehova be dala ma haida amo ita do ia naria. Ita diba momokani unai do ia karaia. Hari, mani mamoe naria tauna namona ia gwau do ita karaia lasi gauna ma ta ita herevalaia.

11. Mataio 7:1, 2 hegeregerena, Iesu ese ita ia hamaoroa dahaka do ita hadokoa totona, bona dahaka dainai unai be auka?

¹¹ Mataio 7:1, 2 duahia. Iesu ia diba iena kamonai taudia be goevadae lasi bona nega momo ma haida idia hahemaoro henia. Unai dainai ia gwau: “Ma haida hahemaoro henia karana umui hadokoa.” Ita gaukara goada tadikaka taihu ita hahemaoro henia lasi totona. To, nega haida unai ita karaia be ia auka. Bema nega haida ita be ma haida ita hahemaoro henia, dahaka ita karaia be namo? Iesu ita kamonai henia, bona ita hekwarahi ma haida hahemaoro henia karana ita hadokoa.

12-13. Iehova ena haheitalai ese edena dala ai ita ia durua ma haida ita hahemaoro henia lasi totona?

¹² Iehova ena haheitalai ita laloa dobu karana ese ita ia durua diba. Ia be taunimanima edia kara namodia sibona ia itaia. King Davida be kara dika badadia ia karaia neganai, Iehova ese ia kara henia dalana amo unai ita itaia. Hegeregere, Davida be Bataseba ida ia heudahanai bona ena tau ena mase dalana ia karaia. (2 Sam. 11:2-4, 14, 15, 24) Unai dainai, ia bona ena famili dekenai lalohisihisi ia havaraia. (2 Sam. 12:10, 11) Nega ma ta ai, Davida be Iehova ia abidadama henia lasi, to Israela ena tuari taudia edia namba ia duahia. Reana unai ia karaia badina ena tuari oreana ena bada dainai ia hekokoroku, bona ia laloa idia ese Israela besena do idia gimaia. Unai dainai dahaka ia vara? Israela taudia 70,000 be daihanai gorerena amo idia mase!​—2 Sam. 24:1-4, 10-15.

¹³ Bema unai nega ai oi noho, Davida be edena bamona do oi laloa? Do oi laloa Iehova ese ena dika ia gwauatao be maoro lasi, a? To, Iehova be unai bamona ia laloa lasi. Ia diba Davida ena mauri lalonai abidadama karana ia hahedinaraia, bona ia itaia ia helalo-kerehai momokani. Unai dainai, Davida ese ia karaia kara dika badadia ia gwauatao. Iehova ia diba Davida ese ia lalokau henia bada bona ia ura kara maorona ia karaia. Dirava be iseda kara namodia ia itaia dainai, ita moale ani?​—1 Kin. 9:4; 1 Siv. 29:10, 17.

14. Dahaka ese Keristani taudia ia durua ma haida idia hahemaoro henia lasi totona?

¹⁴ Iehova ia diba ita be goevadae lasi taudia, unai dainai namona be ita abia dae ma haida danu be goevadae lasi, bona kerere do idia karaia, to namona be edia kara namodia sibona ita itaia. Ia auka lasi ma haida edia kerere ita itaia bona idia ita gwauraia dika. To, lo Keristani tauna be ma haida ida ia gaukara namonamo, ena be edia kerere ia itaia. Idia hagoevaia lasi daimon nadi ena toana be ia hairai lasi, to aonega tauna ia diba idia utua bona polisia murinai, ia be dava bada nadi hairaina ai do ia lao. Iehova bona Iesu hegeregerena, namona be ita ese taunimanima edia toana ita laloa lasi, to edia kara namodia do ita laloa bada.

15. Taunimanima edia noho dalana ita laloa neganai, edena dala ai ita do ia durua idia ita hahemaoro henia lasi totona?

¹⁵ Dahaka gau ma ta ese ita ia durua, diba ma haida ita hahemaoro henia lasi totona? Namona be edia noho dalana do ita laloa. Mani inai haheitalai ita laloa. Nega ta dubu helaga lalonai, Iesu be ogogami vabu ta ia itaia koini maragidia rua be moni mauana lalonai ia udaia. Iesu ia henanadai lasi: “Dahaka  dainai ia be moni momo ia udaia lasi?” To, ia ese vabu ena noho dalana bona moni ia udaia ena badina ia laloa bada, bona Iesu ese ia hanamoa badina ia dekenai ia noho moni ibounai ia udaia.​—Luka 21:1-4.

16. Veronica ena ekspiriens amo dahaka oi dibaia?

¹⁶ Taihu Veronica ena ekspiriens amo do ita itaia ma haida edia noho dalana ita laloa be mai anina bada. Iena kongrigeisen lalonai taihu ta bona ena natuna mero idia noho. Veronica ia gwau: “Lau itaia idia be kongrigeisen hebou bona haroro gaukara idia mai momo lasi. Unai dainai, idia dekenai lalohadai kererena lau abia. To, nega ta unai taihu ida lau haroro hebou. Ia gwau iena natuna mero be mai ena gorere harana dekenai (autism) bona edia hekwakwanai ia herevalaia. Ia gaukara goada edia dabu gaudia idia abia bona edia hetura karana Iehova ida ia hagoadaia totona. Nega haida, ena natuna ena gorere dainai, kongrigeisen ma ta ena hebou dekenai idia lao.” Veronica ma ia gwau: “Lau laloparara lasi edia mauri be auka momokani. Hari unai taihu lau matauraia bona lalokau henia bada, badina ia gaukara goada Iehova ia hesiai henia totona.”

17. Iamesi 2:8 ese ita dekenai dahaka oda herevana ia henia, bona edena dala ai ita badinaia diba?

¹⁷ Bema ita laloparara ita ese tadikaka ma ta ita hahemaoro henia, dahaka do ita karaia? Laloatao, iseda tadikaka taihu ita lalokau henidia be gau badana. (Iamesi 2:8 duahia.) Danu Iehova ita noia goadagoada, ita  ia durua haida hahemaoro henia karana ita hadokoa totona. Bena iseda guriguri hegeregerena, namona be dala ita karaia ita hahemaoro henia tauna do ita tura henia, unai amo ia do ita diba namonamo. Reana ia ita noia haroro gaukara ai ita ia bamoa eiava ita aniani hebou totona. Iseda tadikaka ita diba namonamo neganai, Iehova bona Iesu edia haheitalai ita tohotohoa bona tadikaka ena kara namodia sibona do ita itaia. Unai amo, ita be mamoe naria tauna namona ena oda hereva ita kamonai, bona ma haida hahemaoro henia karana do ita hadokoa.

18. Edena dala ai ita hahedinaraia ita be mamoe naria tauna namona ena gadona ita kamonai noho?

¹⁸ Mamoe ese edia naria tauna ena gadona idia kamonai hegeregerena, Iesu ena murinai idia raka taudia ese iena gadona idia kamonai. Bema ita gaukara goada tauanina durua gaudia ita laloa momo lasi bona ma haida ita hahemaoro henia lasi, Iehova bona Iesu ese iseda hekwarahi do idia hanamoa. Herevana ita be “orea maragi” o “mamoe ma haida” taudia, to mamoe naria tauna namona ena gadona ita kamonai bona ita badinaia noho. (Luka 12:32; Ioa. 10:11, 14, 16) Atikol 51 ai, Iesu ena murinai idia raka taudia ese idia karaia gaudia rua do ita herevalaia.