Guba ai Iesu be kara namodia ia dibaia, unai ese ia durua tanobada ai ia idia bamoa taudia ida ia gaukara namonamo totona. Iesu ena haheitalai ese edena dala ai ita ia durua diba? Ena haheitalai ita stadilaia neganai point toi do ita dibaia, bona unai ese ita do ia durua haida ida ita gaukara namonamo totona. Unai point toi ese ita do ia durua mai lalotamona ida iseda tadikaka taihu danu do ita gaukara.

Ma haida ida ia gaukara namonamo tauna be ia manau bona ena gaukara turadia ia laloa bada, to ena diba dainai ia heagi lasi. Iesu ese unai manau karana be iena Tamana amo ia dibaia. Ena be Iehova sibona be Havaraia Tauna, to ia ura ma haida idia diba iena Natuna be gaukara namona ia karaia danu. Dirava ena hereva amo unai ita dibaia, ia gwau: “Namona be taunimanima ita karaia iseda toana hegeregerena.” (Gen. 1:26) Iehova ena hereva amo, Iesu ia laloparara ena Tamana be manau tauna.​—Sal. 18:35.

Iesu be tanobada ai ia noho neganai, unai bamona manau karana ia hahedinaraia danu. Gaukara namona ia karaia dainai idia hanamoa neganai, ia be Iehova ia hanamoa. (Mar. 10:17, 18; Ioa. 7:15, 16) Iesu be iena hahediba taudia ida ia gaukara neganai, maino ia hahedinaraia bona idia ia laloa tura namodia bamona, to hesiai taudia bamona ia kara henia lasi. (Ioa. 15:15) Ia ese edia aena ia huria badina ia ura manau karana ia  hadibaia. (Ioa. 13:5, 12-14) Iesu bamona, ita danu ese iseda gaukara turadia do ita matauraia, bona sibona iseda namo do ita atoa guna lasi. ‘Ta ta ita matauraia’ neganai, do ita laloa momo lasi daika ese hanamoa do ia abia, to iseda gaukara do ita karaia namonamo bona hagugurua.​—Roma 12:10.

Manau tauna ia laloparara danu, bema “sisiba henia taudia be momo neganai, do [ia] kwalimu.” (Aon. 15:22) Herevana iseda diba o aonega be bada, to namona be ita laloatao taunimanima be gau ibounai idia diba lasi. Iesu danu be ia gwau gau haida ia diba lasi. (Mat. 24:36) Danu, ena be iena hahediba taudia be goevadae lasi, to ia ura edia lalohadai ia kamonai. (Mat. 16:13-16) Unai dainai, ena gaukara turadia be ia hereva henia totona idia gari lasi! Unai hegeregerena, bema mai manau ida ita abia dae iseda diba be bada lasi, bona haida edia lalohadai ita kamonai, idia ida maino ai do ita gaukara bona ita “kwalimu.”

Elda taudia idia gaukara hebou neganai, gau badana be Iesu ena manau karana idia tohotohoa. Namona be elda taudia idia laloatao edia hebou ai, lauma helaga ese elda ta ia hakaua diba, unai amo do ia gwauraia gauna ese idia ia durua disisen maorona idia karaia totona. Bema edia hebou lalonai, elda taudia be mai gari lasi ida edia lalohadai idia gwauraia, kongrigeisen ena namo totona disisen maorodia do idia karaia.

Tau ta be ma haida ida ia gaukara namonamo neganai, laloa maoromaoro dalana ai idia kara henia. Ia be ena lalohadai ia haidaua bona ma haida edia lalohadai ia abia dae. Iesu be lagani momo lalonai ena Tamana ena laloa maoromaoro karana ia itaia. Hegeregere, ena be taunimanima idia mase be maoro, to Iehova ese Iesu ia siaia kara dika taudia be mase amo ia hamauria totona.​—Ioa. 3:16.

Iesu be nega haida ma haida edia lalohadai ia abia dae. Laloatao, ena be Dirava ese Iesu be Israela besena sibona dekenai ia siaia, to Iesu ese Poinikia hahinena ia durua danu. (Mat. 15:22-28) Ena hahediba taudia dekenai laloa maoromaoro karana ia hahedinaraia danu. Iesu ena turana Petero be hutuma vairanai ia gwau ia diba lasi Iesu, to Iesu ese ia gwauatao. Gabeai, Iesu ese Petero dekenai gaukara badana ia henia. (Luka 22:32; Ioa. 21:17; Kara 2:14; 8:14-17; 10:44, 45) Iesu ena haheitalai ese ita ia hadibaia danu ma haida edia lalohadai ita abia dae be namo, unai amo  “taunimanima ibounai ese [iseda] laloa maoromaoro karana idia itaia.”​—Fili. 4:5.

Laloa maoromaoro karana ese ita ia durua iseda kara ita haidaua totona, unai amo maino ai taunimanima idauidau ida ita gaukara diba. Iesu be taunimanima ia kara namo henia dainai, ena inai taudia idia gwau ia be “takisi gogoa taudia bona kara dika taudia edia turana.” (Mat. 11:19) Iesu bamona, ita danu be taunimanima idauidau ida ita gaukara namonamo diba, a? Tadikaka Louis be guna sekit gaukara bona Betele ai taunimanima idauidau ida ia gaukara hebou, ia gwau: “Goevadae lasi taudia ida lau gaukara hebou be hegeregere toana idauidau nadi amo haba ta lau haginia bamona. Nadi edia toana be idauidau, to oi atoa namonamo neganai, haba maorona oi haginia diba. Lau sibona ese egu kara haida lau haidaua danu, unai amo taunimanima idauidau ida maino ai lau gaukara bona emai gaukara ai hagugurua.” Unai be lalohadai maorona!

Edena nega ai kongrigeisen lalonai laloa maoromaoro karana ita hahedinaraia diba? Iseda haroro grup danu ita gaukara neganai, unai ita karaia diba. Reana ita gaukara hebou pablisa ta ena ruma bese maduna be idauidau eiava ia be matamata o buruka tauna. Unai bamona taudia ida ita gaukara hebou neganai, edia goada ita laloa bona unai hegeregerena ita gaukara, unai ese idia do ia durua haroro gaukara idia moalelaia totona.

Haida ida ia gaukara namonamo tauna be ‘hariharibada karana ia hahedinaraia.’ (1 Tim. 6:18) Iesu be Tamana ida ia gaukara neganai, ia itaia Iehova be gau ta ia hunia lasi. Iehova be “guba ia karaia neganai,” Iesu be ia “noho” bona gau momo ia dibaia. (Aon. 8:27) Gabeai, Iesu be mai moale ida iena hahediba taudia dekenai, Tamana ‘amo ia kamonai gaudia ibounai’ ia gwauraia hedinarai. (Ioa. 15:15) Namona be Iehova ena haheitalai ita tohotohoa, bona tadikaka taihu dekenai iseda aonega bona ita dibaia gaudia ita hahedinaraia. Namo lasi iseda gaukara turadia ita biagua totona, idia diba be namo heduru herevadia ita hunia. To, ma haida ida ia gaukara namonamo tauna be mai moale ida idia dekenai unai gaudia ia hadibaia.

Namona be iseda gaukara turadia dekenai hagoadaia herevadia ita gwauraia danu. Bema oi karaia gaukara namona dainai ta ese oi ia hanamoa, oi moale, ani? Iesu be iena gaukara turadia edia gaukara namona dainai ia hanamodia. (Mataio 25:19-23; Luka 10:17-20 hahegeregerea.) Iesu ese idia ia hamaoroa do idia “karaia gaukaradia ese [ia] karaia gaukaradia do idia hereaia.” (Ioa. 14:12) Hanuaboi ginigabena ai Iesu ese iena abidadama aposetolo taudia ia hanamoa, ia gwau: “Hahetoho lau davaria negadiai, umui be lau umui rakatania lasi.” (Luka 22:28) Mani oi laloa ena hereva ese edia lalona ia hagoadaia gaukara namona idia karaia totona! Bema nega ita atoa iseda gaukara turadia ita hanamodia, do idia moale bona edia gaukara do idia karaia namonamo.

Tadikaka Kayode ia gwau: “Ma haida ida ia gaukara namonamo tauna be ia goevadae lasi, to ena gaukara turadia ia hamoalea bona edia gaukara ia hametaua lasi.” Oi be unai bamona tauna, a? Reana emu Keristani gaukara turadia oi noia edia lalohadai, oi be edena bamona gaukara tauna idia gwauraia hedinarai totona. Bema oi ida edia gaukara idia moalelaia, hahediba taudia be Iesu ida idia gaukara hebou karana idia moalelaia hegeregerena, vadaeni aposetolo Paulo ena hereva oi gwauraia diba: “Emui moale totona umui ida ai gaukara hebou.”​—2 Kor. 1:24.