1-2. (a) Mose be edena bamona tauna, bona dahaka ia karaia? (b) Dahaka hagoadaia herevana ese ita ia durua manau karana ita hahedinaraia totona?

BAIBEL ese Mose be inai bamona ia gwauraia, ia be “tanobada taudia ibounai edia huanai ia sibona be manau herea.” (Num. 12:3) Unai ese ia hahedinaraia ia be ia manoka, abia hidi karaia totona ia gari bona ma haida ese idia inai henia neganai ia gini goada lasi, a? Reana haida ese ia manoka tauna be unai bamona do idia laloa. To unai bamona lalohadai be kerere. Mose be ia gari lasi, abia hidi ia karaia diba bona ia be Dirava ena hesiai tauna goadana. Iehova ena heduru dainai ia ese Aigupito ena lohia tauna vairanai ia gini, tano gagaena ai reana taunimanima 3,000,000 ia gunalaia bona Israela besena ia durua edia inai taudia idia tuari henia totona.

² Ita be Mose ese ia davaria hekwakwanai ita davaria lasi. To dina ta ta ai taunimanima edia kara o hereva ese iseda manau karana idia tohoa diba, unai bamona negadiai ita haheauka be namo. To, manau karana ita hahedinaraia totona hagoadaia herevana ta ia noho. Iehova ia gwauhamata “manau taudia ese noho gabuna tano do idia abia.” (Sal. 37:11) Oi sibona oi gwauraia diba oi be manau tauna, a? Ma haida ese unai bamona oi do idia gwauraia danu, a? Unai mai anina bada henanadai ita do haerelaia lasi neganai, manau karana ena anina ita diba guna be namo.

3-4. (a) Manau karana be dahaka ida ita hahegeregerea diba? (b) Edena kara toi ese ita do ia durua ita manau totona, bona dahaka dainai?

³ Manau * karana be idia penia laulau namo hereana ta bamona.  Edena dala ai? Laulau penia tauna ese kala idauidau ia gaukaralaia laulau namo hereana ta ia penia hegeregerena, ita manau totona, kara namodia ma haida ita hahedinaraia be namo. Unai kara haida be, Dirava badinaia karana, manau, bona gari lasi karana. Iehova ita hamoalea totona dahaka dainai unai kara ita hahedinaraia be namo?

⁴ Dirava idia badinaia taudia be idia manau. Dirava ia ura ita manau be namo. (Mat. 5:5; Gal. 5:23) Dirava ena ura ita karaia neganai, Satani be ia badu dikadika. Unai dainai herevana ita manau to Satani ena tanobada lalonai idia noho taudia ese ita idia badu henia. (Ioa. 15:18, 19) Unai dainai Satani ita dadaraia totona ita gari lasi be namo.

5-6. (a) Dahaka dainai Satani ese manau taudia ia inai henia? (b) Edena henanadai do ita haerelaia?

⁵ Ia manau lasi tauna be ia hekokoroku, ena badu ia biagua lasi bona Iehova ia badinaia lasi. Satani be unai bamona tauna. Unai dainai idia manau taudia ia inai henia! Badina idia ese iena kara idia gwauraia hedinarai. Bona Satani idia gwauraia koikoi tauna. Dahaka dainai? Badina herevana dahaka ia gwauraia o dahaka ia karaia, ia ese manau taudia do ia koua diba lasi Iehova idia hesiai henia totona!​—Iobu 2:3-5.

⁶ Edena bamona nega ai ia auka manau karana ita hahedinaraia totona? Bona dahaka dainai manau karana ita hahedinaraia noho be namo? Unai henanadai ita haerelaia totona ita ese Mose, Babulonia dekenai idia abia lao Heberu memero toi bona Iesu ena haheitalai do ita herevalaia.

7-8. Mose be ma haida ese ia idia matauraia lasi neganai edena bamona ia kara?

⁷ Maduna o dagi ita abia neganai ita manau: Nega haida ia auka maduna o dagi idia abia taudia ese manau karana idia hahedinaraia totona, badina idia henunai idia gaukara taudia ese idia matauraia lasi o ia karaia abia hidi dekenai idia lalotamona lasi. Oi dekenai unai bamona ia vara, a? Bema emu ruma bese ai ta be unai bamona ia kara, dahaka do oi karaia? Mose ese unai bamona hekwakwanai ia hanaia dalana mani ita herevalaia.

⁸ Iehova ese Mose ia abia hidi Israela taudia ia gunalaia bona ia dekenai maoro ia henia unai bese gimaia taravatu ibounai ia torea totona. Unai ese ia hahedinaraia Iehova ese  Mose ia durua. To unai negai Mose ena kakana bona taihuna, Miriama bona Arona be Mose dekenai idia maumau badina ia ese idau bese hahinena ia adavaia. Bema ta be Mose bamona, reana do ia badu bona kara ta do ia karaia​—to Mose be unai bamona ia karaia lasi. Ia badu haraga lasi. To Mose be Iehova ia noia Miriama ena lepera gorere ia hanamoa totona. (Num. 12:1-13) Dahaka dainai Mose be unai bamona ia kara?

9-10. (a) Iehova ia ura Mose be edena bamona tauna ai do ia lao? (b) Ruma bese ena kwarana bona elda taudia be Mose ena haheitalai amo dahaka idia dibaia?

⁹ Mose be ia manau dainai Iehova ese ia hadibaia. Lagani 40 gunanai, Aigupito ena lohia ena ruma ai ia noho neganai ia manau lasi. Ia badu haraga dainai mai kerere ida ia hahemaoro tauna ia alaia mase. Mose ia laloa ia karaia karana be Iehova ese ia moalelaia. Iehova ese lagani 40 lalonai Mose ia durua unai amo do ia laloparara gari lasi karana sibona be hegeregere lasi, to ia manau be namo unai amo Israela taudia ia gunalaia diba. Bona ia manau totona, namona be Dirava ia badinaia bona ia gari lasi. Dirava ese ia hadibaia gaudia amo ia laloparara bona gunalaia tauna namona ai ia lao.​—Eso. 2:11, 12; Kara 7:21-30, 36.

¹⁰ Hari inai negai, ruma bese kwarana bona elda taudia ese Mose ena haheitalai idia tohotohoa. Bema haida be mai hemataurai lasi ida oi idia kara henia, oi badu haraga lasi. Mai manau ida emu kerere oi gwauraia hedinarai. (Had. 7:9, 20) Hekwakwanai oi hamaoromaoroa totona, Iehova ena hakaua daladia oi badinaia. Bona mai hebogahisi ida ma haida oi hereva henia. (Aon. 15:1) Bema ruma bese kwarana bona elda taudia be unai dala idia badinaia maino do idia havaraia. Bona Iehova do idia hamoalea bona manau karana dekenai haheitalai namona idia hahedinaraia diba.

11-13. Ita totona Heberu memero toi ese dahaka haheitalai idia hahedinaraia?

¹¹ Ita idia dagedage henia neganai, ita manau be namo: Idaunegai amo ema bona hari tanobada idia gunalaia taudia ese Iehova ena taunimanima idia dagedage henidia. Dala idauidau ai ita idia gwauraia dika, to iseda lalona ita hadaia Dirava be eda ‘lohia tauna dainai ia ita kamonai henia be namo, to taunimanima lasi.’ (Kara 5:29) Ita do idia kirikirilaia, dibura dekenai ita idia atoa, o ita idia botaia. To, Iehova ena heduru dainai edia dika ena davana do ita henia lasi to ita manau be namo.

¹² Babulonia dekenai idia abia lao Heberu memero toi​—Hananaia Misaela, bona Asaraia edia haheitalai mani ita laloa. * Babulonia ena  king ese ia haganidia golo amo idia karaia kaivakuku badana dekenai idia tui diho totona. Unai Heberu memero toi ese king dekenai kaivakuku idia tomadiho henia lasi ena badina be mai manau ida idia gwauraia hedinarai. Ena be king ena hagaria herevana lahi siahu hereana lalonai idia do ia negea vareai, to idia be Dirava idia badinaia. Ena be Iehova ese karaharaga idia do ia hamauria eiava lasi, to unai Heberu memero toi be unai golo kaivakuku idia tomadiho henia lasi. (Dan. 3:1, 8-28) Unai ese ia hamomokania manau taudia be idia gari lasi. Unai dainai king ta, hagaria herevadia, bona panisi karana ta ese ‘Lohiabada iseda Dirava’ Iehova tomadiho henia karana do ia hadikaia lasi.​—Eso. 20:4, 5.

¹³ Bema Dirava badinaia karana dekenai hahetoho ita davaria, edena dala ai Heberu memero toi edia haheitalai ita tohotohoa diba? Mai manau ida ita abia dae Iehova ese ita do ia naria. (Sal. 118:6, 7) Ita idia gwauraia dika taudia dekenai mai manau bona hemataurai ida ita haere. (1 Pet. 3:15) Ita ura lasi iseda guba lalokau Tamana ida eda hetura karana do ia hadikaia gauna ta ita karaia.

14-15. (a) Ita lalohekwarahi negadiai, dahaka ia vara diba? (b) Isaia 53:7, 10 bamona, dahaka dainai ita gwau diba Iesu be ia lalohekwarahi negadiai, manau karana dekenai haheitalai hereadaena ia hahedinaraia?

¹⁴ Ita lalohekwarahi neganai, ita manau be namo: Badina idauidau dainai ita lalohekwarahi. Sikuli dekenai test ta ita karaia eiava gaukara gabuna ai gaukara badana ta ita karaia totona reana ita lalohekwarahi diba. Eiava ita gorere dainai medikol heduru daladia idauidau ita lalohekwarahilaia. Bema unai ia vara ita manau be auka. Ita laloa momo lasi gaudia be nega haida ita idia hahekwakwanaia diba. Bena hereva kereredia do ita gwauraia bona mai badu ida ma haida do ita kara henia. Bema unai be oi dekenai ia vara, mani Iesu ena haheitalai oi laloa.

¹⁵ Tanobada ai ia noho hua ginigabedia ai, Iesu be ia lalohekwarahi bada. Ia diba hisihisi bada do ia abia bona ia do idia hamasea. (Ioa. 3:14, 15; Gal. 3:13) Hua haida ia do noho bena Iesu do ia mase neganai, ia gwau ia lalometau bada. (Luka 12:50) Dina haida ia do noho bena do ia mase neganai, Iesu ia gwau: “Lau lalohekwarahi bada.” Iena manau bona Dirava badinaia karana ita itaia diba, bona iena guriguri amo iena lalohekwarahi ibounai be Dirava dekenai ia gwauraia. Ia gwau: “Tamagu e, inai lalohekwarahi negana amo lau oi hamauria. To inai lalohekwarahi negana be do ia vara, unai badina dainai lau mai. Tamagu e, emu ladana oi hanamoa.” (Ioa. 12:27, 28) Iesu be mai gari lasi ida Dirava ena inai taudia dekenai sibona ia henia bona idia hahisia bada bona hemarai dalanai ia idia hamasea. Ena be Iesu dekenai unai ia vara, to ia be mai manau ida Dirava ena ura ia karaia. Unai amo ita diba momokani, Iesu be ia lalohekwarahi negadiai, manau karana dekenai haheitalai hereadaena ia hahedinaraia!​—Isaia 53:7, 10 duahia.

16-17. (a) Iesu ena tura korikoridia ese edena dala ai ia idia tohoa? (b) Edena dala ai Iesu ita tohotohoa diba?

¹⁶ Iesu ena hanuaboi ginigabena ai, iena tura korikoridia ese ia idia tohoa. Unai hanuaboi ai Iesu ena lalohekwarahi mani oi laloa. Ia be Iehova do ia abidadama henia ela bona ia mase, a? Bema Iesu be Dirava ia badinaia lasi, taunimanima bilioni momo be mauri do idia abia lasi. (Roma 5:18, 19) Danu iena kara ese iena Tamana ena ladana do ia hadikaia o ia hanamoa diba. (Iobu 2:4) Hanuaboi ginigabena ai Iesu be ena tura korikoridia iena aposetolo taudia unai, ida ia aniani hebou neganai, idia “hepapahuahu” daika be idia huanai ia bada. Iesu be unai hanuaboi ai ia vara hekwakwanai sibona lasi, to nega momo iena  turadia edia kara ia hamaoromaoroa. Iesu be edia kara dainai ia badu haraga lasi, to mai manau ida ia kara henidia. Iesu be mai manau ida idia ia hereva henia lou, namona be edia kara idia haidaua. Bona ia idia badinaia noho dainai, Iesu ese idia ia hanamoa.​—Luka 22:24-28; Ioa. 13:1-5, 12-15.

¹⁷ Bema unai be oi dekenai ia vara, dahaka do oi karaia? Ita lalohekwarahi neganai, Iesu ia karaia bamona ita manau be namo. Iehova ena hahegani ita badinaia, ‘ta ta iseda kara do ita haheaukalaia noho.’ (Kol. 3:13) Ita ese unai hahegani ita badinaia diba bema ita laloatao ita gwauraia herevadia bona ita karaia karadia ese haida do ia hahekwakwanaia. (Aon. 12:18; Iam. 3:2, 5) Bona nega ibounai haida edia kara namodia dainai idia oi hanamoa.​—Efe. 4:29.

18. Iehova be edena dala ai manau taudia ia durua abia hidi maorodia idia karaia totona, to dahaka ita karaia guna be namo?

¹⁸ Bema ita manau, abia hidi maorodia do ita karaia. Bema iseda mauri lalonai ita diba lasi dahaka do ita karaia, to bema ita manau Iehova ese ita do ia durua abia hidi maorodia ita karaia totona. Ia gwauhamata ia ese ‘manau taudia edia noinoi, be do ia kamonai henia.’ (Sal. 10:17) Iseda guriguri do ia haerelaia sibona lasi, to gau haida do ia karaia ita ia durua totona. Baibel ia gwau: “Ia ese hekokoroku lasi taudia, be dala maoromaoro dekenai ia hakaudia noho. Ia ese manau taudia dekenai, iena dala ia hadibaia noho.” (Sal. 25:9) Iehova ese unai hakaua dalana be Baibel bona “hesiai tauna mai ena kamonai bona mai ena kara maoromaoro” ese idia printaia pablikeisen, * vidio bona hebou amo idia halasia. (Mat. 24:45-47) Namona be mai manau ida Iehova ese ia henia heduru ita abia dae. Bona orea ese ia halasia gaudia ita stadilaia, bona ita dibaia gaudia ita badinaia.

19-21. Kadesi ai Mose be dahaka kerere ia karaia, bona unai ese ita dekenai dahaka ia hadibaia?

¹⁹ Ita manau neganai, kerere do ita karaia loulou lasi. Mani Mose oi laloa lou. Ia be lagani momo lalonai ia manau bona Iehova ia hamoalea. To, Israela taudia be lagani 40 dokonai tano gagaena ai idia loaloa neganai, Mose be manau karana ia hahedinaraia lasi. Iena taihuna Miriama be ia mase neganai Kadesi ai ia idia guria. Bona Israela taudia be  idia maumau lou idia gwau ta ese idia ia laloa lasi. To Israela taudia be ranu lasi dainai “Mose dekenai idia maumau.” Ena be Iehova ese Mose dekenai siahu ia henia hoa karadia ia karaia bona Mose be mai ena ura bada ida lagani momo lalonai idia ia gunalaia. Ranu sibona totona idia maumau lasi, to Mose dekenai idia maumau, toana be iena kerere dainai idia ranu mase.​—⁠Num. 20:1-5, 9-11.

²⁰ Mose be ia badu dikadika dainai ia manau lasi. Ena be Iehova ese Mose ia hagania nadi do ia hereva henia, to Mose be mai badu ida Israela taudia ia hamaoroa ia be hoa karana ta do ia karaia. Bena, ia ese nega rua nadi ia botaia bona ranu ia raka-lasi. Ia badu bona hekokoroku dainai kerere badana ia karaia. (Sal. 106:32, 33) Mose be manau karana ia hahedinaraia lasi dainai, Gwauhamata Tanona ai ia vareai lasi.​—Num. 20:12.

²¹ Unai haheitalai amo mai anina bada gaudia ita dibaia. Gau ginigunana be, nega ibounai manau karana ita hahedinaraia noho be namo. Bema ita manau lasi, mai hekokoroku ida do ita hereva bona kara. Gau iharuana be, bema ita lalohekwarahi unai ese ita ia hamanokaia diba, unai dainai namona be ita hekwarahi ita manau totona.

22-23. (a) Dahaka dainai nega ibounai manau karana ita hahedinaraia noho be namo? (b) Sepanaia 2:3 ena hereva ena anina be dahaka?

²² Manau karana ese ita ia gimaia diba. Kahirakahira tanobada amo Iehova ese kara dika taudia ibounai do ia kokia, bona manau taudia sibona do idia noho. Bena, manau taudia sibona be tanobada ai mai maino ida do idia noho. (Sal. 37:10, 11) Oi ura unai manau taudia huanai oi noho, a? Idia huanai oi noho diba bema Iehova ese peroveta tauna Sepanaia amo ia henia hagoadaia herevana oi badinaia.​—Sepanaia 2:3 duahia.

²³ Dahaka dainai Sepanaia 2:3 ia gwau: “Sedira iena badu dinana dekenai”? Inai siri ia gwau lasi Iehova be ia hegeregere lasi ia idia hamoalea bona lalokau henia taudia ia naria totona. To, ia hahedinaraia gau ta ita karaia be namo. “Iena badu dinana” amo do ita roho mauri diba bona mauri hanaihanai do ita abia bema ita hekwarahi manau karana ita hahedinaraia bona Iehova ita hamoalea.