Sinagoga be edena bamona ia matamaia?

INAI hereva sinagoga Grik gado ai ena anina be “hebou” o “taunimanima idia haboua” gabuna. Unai hereva ena anina be maoro badina Iuda taudia be unuseniai idia lao idia tomadiho bona hadibaia herevadia kamonai totona idia hebou. Heberu Revarevadia ese sinagoga ia herevalaia lasi, to Grik Revarevadia ese idia herevalaia badina aposetolo taudia edia negai unai hebou gabudia idia noho.

Diba bada taudia momo idia laloa Iuda taudia be Babulonia ai igui hesiai taudia bamona idia abidia lao neganai, sinagoga ia matamaia. Buka ta, Encyclopaedia Judaica ese unai ena badina ia gwauraia: “Iuda taudia be tano idauna ai idia noho dainai, herevana tomadiho gabuna be lasi, to ta ta idia hagoadaia totona, nega ibounai eiava Sabati dinadia ai idia haboua, bona Revareva Helagadia idia duahia.” Iuda taudia be Babulonia idia rakatania murinai, idia guriguri bona Revareva Helagadia duahia totona idia haboua bona idia lao gabudia ibounai dekenai sinagoga idia haginia.

Aposetolo taudia edia negai, sinagoga be Mediterranean ia lao bona Middle East ai idia noho tanodia bona Israela tanodia ai idia noho. Taunimanima be Iuda tomadiho bona mauri ai idia vara gaudia idia herevalaia totona unuseniai idia hebou. The Hebrew University of Jerusalem ena Profesa ta, Lee Levine ia gwau: “[Sinagoga] ai sikuli idia abia, aria helagadia idia karaia, kota idia karaia, taunimanima edia boubou moni idia haboua, bona politikol bona taunimanima edia mauri dalana idia herevalaia. Bona mai anina bada tomadiho heboudia be unuseniai idia karaia.” Unai ese ia hahedinaraia ita diba dahaka dainai Iesu be sinagoga dekenai ia lao. (Mar. 1:21; 6:2; Luka 4:16) Unuseniai idia lao taudia ia hadibaia bona hagoadaia. Keristani kongrigeisen idia matamaia murinai, aposetolo Paulo danu be nega momo sinagoga ai ia haroro. Dirava idia laloa bada taudia be hanaihanai sinagoga dekenai idia lao, unai dainai Paulo be siti ta dekenai ia ginidae neganai maoromaoro sinagoga dekenai ia lao bona unuseniai ia haroro.​—Kara 17:1, 2; 18:4.