PHILIPPINES ai, kekeni rua be Baguio Siti ai idia loaloa. Idia ese pablik haroro ena troli ta idia itaia, to idia lao henia lasi. Helen, unai troli badinai ia gini taihu be idia dekenai ia kiri. Unai kekeni be idia raka hanaia sibona, to Helen ena kiri toana idia laloaboio lasi.

Gabeai, unai kekeni be basi ai edia ruma dekenai idia giroa lou lalonai, Kingdom Hall ta ai jw.org ena saini badana idia itaia. Idia laloatao daba kahanai, unai saini be haroro troli ai idia itaia. Idia ruaosi idia diho bona geiti ai kongrigeisen idauidau edia hebou dinadia bona horadia idia sekea.

Unai kekeni rua be hebou ta dekenai idia lao. Bona Kingdom Hall ai idia raka vareai neganai, daika idia itaia? Helen! Idia laloatao ia be idia dekenai ia kiri hahinena. Helen ia gwau, “Lau dekenai idia raka mai neganai, lau gari sisina. Lau laloa reana lau be kerere ta lau karaia.” To unai kekeni ese Helen idia hamaoroa troli haroro ia karaia neganai ia idia itaia.

Unai kekeni rua be hebou bona tadikaka taihu bamoa karana idia moalelaia. Idia itaia hebou murinai haida be Kingdom Hall idia hagoevaia neganai, idia henanadai bema idia heduru diba. Kekeni ta be Philippines ia rakatania, to kekeni ma ta be hebou ia mai matamaia bona Baibel stadi ia abia​—Helen ena kiri toana dainai!