Mary bona ena adavana, John, a idia noho tanona ai, sivarai namona be Philippines amo idia mai gaukara taudia momo dekenai idia harorolaia diba. COVID-19 negana ai, Mary be Baibel stadi momo ia hamatamaia, ena tano sibona ai lasi, to tano ma haida dekenai danu. Edena dala ai unai ia karaia?

Mary be ena Baibel stiuden taudia do ia nanadaia, “Baibel idia ura stadilaia taudia ma haida oi diba, a?” Bema idia gwau oibe, idia do ia noia unai taudia idia hamaoroa totona. Unai bamona auka lasi henanadai ese anina namona ia havaraia. Dahaka dainai? Badina Dirava ena Hereva idia laloa bada taudia idia ura, idia dibaia gaudia be edia famili bona turadia dekenai idia herevalaia. Unai auka lasi henanadai dainai dahaka ia vara?

Mary ena Baibel stiuden Jasmin ese ia dekenai Baibel stiuden matamata foa ia hadibaia. Idia ta be Kristine, ia be stadi karana ia moalelaia dainai, Mary ia nanadaia wiki ta ai nega rua do idia stadi totona. Mary ese ia nanadaia bema ma haida idia ura stadi danu, Kristine ia gwau, “Oibe, egu turadia be oi dekenai do lau hadibaia.” Wiki haida sibona lalonai, Kristine ese Mary dekenai turadia foa ia hadibaia. Gabeai, Kristine ese Mary dekenai ena turadia ma haida ia hadibaia bona unai turadia ese ma haida be Mary dekenai idia hadibaia danu.

Bona Kristine ia ura Philippines ai ena famili ese Baibel do idia dibaia danu. Unai dainai ena natuna kekeni, Andrea ia hereva henia. Matamanai, Andrea ia laloa, ‘Witnes taudia be sibona idia hapararaia orea maragina (cult), idia be Iesu idia abia dae lasi bona Taravatu Gunana sibona idia gaukaralaia.’ To nega tamona ia stadi murinai, ia laloparara Witnes taudia totona ia abia lalohadai be kerere. Ena stadi negadiai, do ia gwau, “Unai be Baibel lalonai ia noho, reana inai be momokani!”

Gabeai, Andrea ese Mary dekenai ena turadia rua bona gaukara turana ta ia hadibaia, idia danu be stadi idia hamatamaia. Danu, Mary ese Andrea ena stadi ia karaia negadiai, Mary ia diba lasi Andrea ena lalana be edia hereva ia kamonai noho, ia be matakepulu hahine. Bena nega ta, Angela ese Andrea ia noia Mary do ia hadibaia, ia danu ia ura Baibel ia stadilaia. Angela be ia dibaia gaudia ia ura henia. Hua ta lalonai, Baibel siri momo ia laloatao bona ia ura wiki ta lalonai dina foa do ia stadi! Bona Andrea ena heduru amo zoom amo hebou ia kamonai matamaia.

Mary ia itaia Kristine ena adavana, Joshua, be stadi negadiai do ia kamonai sisina, unai  dainai Mary ese ia nanadaia bema ia ura idia ida do ia helai diba. Joshua ia gwau: “Lau ura kamonai sibona, to lau dekenai henanadai oi henia lasi; bema unai bamona oi karaia, umui ida do lau helai lasi.” Idia stadi noho bona miniti 5 lalonai, ia be henanadai momo ia henia, to Kristine be henanadai haida sibona ia henia, unai tau ia ura Baibel do ia stadilaia danu.

Mary ena auka lasi henanadai dainai Baibel stadi momo ia karaia. Bona ia ese dala ia karaia idia haida be tadikaka bona taihu ma haida ese idia stadi henia totona. Mary be unai auka lasi henanadai ia henia dainai taunimanima 28 ese Baibel idia stadilaia matamaia. Bona unai stadi taudia be tano idauidau foa dekenai idia noho.

Jasmin be matamanai ita herevalaia bona stadi ia abia dae tauna ginigunana, ia be April 2021 ai bapatiso ia abia. Kristine be May 2022 ai ia bapatiso bona Philippines dekenai ia giroa lou, ena famili ida ia noho totona. Bona Kristine ese Mary dekenai ia hadibaia taudia rua danu be bapatiso idia abia. Angela be hua haida murinai ia bapatiso bona hari regula painia ia karaia noho. Kristine ena adavana, Joshua, bona ena natuna kekeni Andrea, bona stadi idia abia dae taudia ma haida be edia stadi karana idia goadalaia noho.

Iesu bona aposetolo taudia edia negai, taunimanima momo be Iesu ena sivarai namona idia kamonai neganai, edia ruma bese bona turadia dekenai idia gwauraia. (Ioa. 1:41, 42a; Kara 10:24, 27, 48; 16:25-33) Emu Baibel stiuden bona kamonai taudia oi nanadaia diba, “Baibel idia ura stadilaia taudia haida oi diba, a?” Bema unai auka lasi henanadai oi gaukaralaia, reana oi danu be Baibel idia ura stadilaia taudia momo do oi davaria.