1. Dahaka dainai taunimanima dekenai dika gwauatao karana ena anina be idauidau?

 “EMU DIKA LAU GWAUATAO.” Emu hereva eiava kara amo ta ena lalona oi hahisia, bona oi dekenai unai hereva ia gwauraia neganai do oi moale! To inai hereva “emu dika lau gwauatao” ena anina be dahaka? Anina be oi hahisia tauna ia gwau emui hetura karana be hari ia namo lou, a? Eiava ia ura lasi ia vara gauna ia herevalaia, a? Taunimanima dekenai dika gwauatao karana ena anina be idauidau.

 2. Baibel ese Iehova ena dika gwauatao karana be edena bamona ia herevalaia? (Futnout itaia danu.)

² Iehova ese iseda dika ia gwauatao karana be ita ta ta eda dika ita gwauatao karana amo ia idau momokani. Bona taunimanima be hegeregere lasi Iehova ena dika gwauatao dalana idia tohotohoa totona. Salamo torea tauna ese Iehova be inai bamona ia gwauraia: “Oi be mai momokani ida taunimanima edia dika oi gwauatao, unai amo oi idia matauraia bada.” a (Sal. 130:4) Oibe, Iehova be “mai momokani ida taunimanima edia dika ia gwauatao.” Ia ese ita dekenai dika gwauatao karana ena anina ia hahedinaraia. Heberu toretoredia edia siri haida ai, Baibel torea taudia ese hereva ta idia gaukaralaia, Iehova ena dika gwauatao karana idia herevalaia totona, bona unai hereva be taunimanima totona idia gaukaralaia lasi.

 3. Edena dala ai Iehova ena dika gwauatao karana be taunimanima edia amo ia idau? (Isaia 55:6, 7)

³ Iehova ese ta ena dika ia gwauatao neganai, ena kara dika  ia kokia momokani. Bona iseda hetura karana Iehova ida ia namo lou. Ita moale badina Iehova ese kara dika ibounai ia gwauatao momokani.—Isaia 55:6, 7 duahia.

 4. Edena dala ai Iehova ese ita ia durua dika gwauatao karana ena anina ita lalopararalaia totona?

⁴ Bema Iehova ena dika gwauatao karana be iseda amo ia idau, edena dala ai dika gwauatao karana ena anina ita lalopararalaia diba? Iehova ese haheitalai namodia ia gaukaralaia, ena dika gwauatao karana ita lalopararalaia totona. Inai atikol ai, unai haheitalai haida do ita herevalaia. Unai ese do ia hahedinaraia ita helalo-kerehai neganai Iehova ese iseda kara dika ia kokia bona ia ida iseda hetura karana ia namo lou. Unai haheitalai ita herevalaia neganai, iseda hebogahisi Tamana, dala idauidau ai iseda dika ia gwauatao Diravana dekenai, iseda lalokau bona tanikiu karana do ita habadaia.

IEHOVA ESE KARA DIKA IA KOKIA

 5. Iehova ese iseda kara dika ia gwauatao neganai dahaka ia vara?

⁵ Baibel ese nega momo, kara dika be metau badana ta ida ia hahegeregerea. King Davida ese sibona ena kara dika be inai bamona ia gwauraia: “Lau mamia lau karaia kereredia ese lau idia hadikaia noho. Idia be metau badana ta bamona, lau huaia diba lasi.” (Sal. 38:4) To Iehova ese helalo-kerehai taudia edia kara dika ia gwauatao. (Sal. 25:18; 32:5) Inai siri ai idia gaukaralaia Heberu herevana “gwauatao,” ena anina be “abia isi” eiava “huaia.” Unai dainai Iehova ese iseda dika ia gwauatao neganai, ita abia hemami dikana ia kokia. Unai be hegeregere, iseda pagana amo metau gauna ia abia isi bona ia huaia lao.

 6. Iehova ese iseda kara dika ia huaia lao ena daudau be edena bamona?

⁶ Haheitalai ma ta ai, Iehova ese iseda kara dika ia huaia bona ia abia lao ena daudau ia herevalaia. Salamo 103:12 ia gwau: “Dina ia daekau kahana be dina ia diho kahana amo ia daudau hegeregerena, Ia ese iseda kara dika be ita amo ia kokia lao daudau.” Ist kahana be west kahana amo ia daudau. Unai hegeregerena, Iehova ese iseda kara dika ia kokia neganai, ita amo ia abia lao daudau. Unai amo ita diba, Iehova ese iseda kara dika ia gwauatao momokani!

 7. Iehova ese iseda dika ia gwauatao dalana be Baibel ese edena bamona ia herevalaia? (Mika 7:18, 19)

⁷ Ena be laulau dalanai Iehova ese iseda kara dika ia abia lao daudau, to unai dika ia laloatao noho, a? Lasi. King Hesekaia be Iehova totona inai bamona ia gwau: “Emu vairana amo egu kara dika ibounai oi kokia vadaeni.” (Isa. 38:9, 17) Danu, buka ta ese unai siri be inai bamona ia herevalaia: “Oi ese [egu kara dika] oi kokia bona unai lau karaia lasi bamona.” Unai ena anina be, Iehova ese idia helalo-kerehai taudia edia kara dika ia negea bona ia itaia lou lasi. Baibel ese haheitalai ma ta amo, unai bamona point ia herevalaia, unai be Mika 7:18, 19 ai ia noho. (Duahia.) Unai siri ese idia hahedinaraia Iehova ese iseda kara dika be davara dekenai ia negea diho. Baibel negadiai, gau ta be davara ena dobu momokani gabuna dekenai idia negea neganai, ta ia hegeregere lasi unai gauna ia abia lou totona.

 8. Ita dibaia gaudia haida be dahaka?

⁸ Baibel ese ia hahedinaraia, Iehova ese ita ia gwauatao neganai, iseda kara dika ia kokia momokani, unai dainai ita lalohisihisi lasi be namo. Davida ia hereva bamona, “Dirava ese taravatu idia utua taudia edia kerere bona edia kara dika ia gwauatao neganai, unai taudia idia moale. Iehova ese ta ena kara dika ia laloatao noho lasi neganai, unai tauna  ia moale.” (Roma 4:7, 8) Oibe, Iehova ese mai momokani ida iseda kara dika ia gwauatao!

IEHOVA ESE KARA DIKA IA DAHUA OHO

 9. Iehova ese edena haheitalai haida ia gaukaralaia dika gwauatao karana ia herevalaia totona?

⁹ Mauri davalaia boubouna amo, Iehova ese idia helalo-kerehai taudia edia kara dika ia dahua oho, unai ita laloa bada totona Ia ese haheitalai ma haida ia gaukaralaia. Baibel ia gwau, Iehova ese iseda kara dika ia huria bona dahua oho. Unai ese kara dika tauna ia hagoevaia. (Sal. 51:7; Isa. 4:4; Ier. 33:8) Bona Iehova ese unai ia herevalaia, ia gwau: “Ena be emui kara dika be kakakaka momokani, to do ia kurokuro momokani, sinou bamona, eiava emui kara dika be dabua kakakakana bamona, to wulu goevana bamona do ia lao.” (Isa. 1:18) Dabua ta dekenai ia kamokau miro kakakakana be do oi kokia diba lasi. To, Iehova ese unai haheitalai amo ita ia hadibaia, ia ese iseda kara dika ia huria diba, bona ia hagoevaia namonamo unai amo do ia hedinarai lasi.

10. Iehova ese edena haheitalai ma haida amo ena dika gwauatao karana ia herevalaia?

¹⁰ Atikol 6 ese ia hahedinaraia bamona, kara dika be abitorehai ida ia hahegeregerea. (Mat. 6:12, ftn; Luka 11:4, ftn.) Unai dainai, nega ibounai kara dika ita karaia neganai, iseda abitorehai be ia bada ia lao noho. Oibe, Iehova dekenai abitorehai badana do ita henia! To, Iehova ese iseda kara dika ia gwauatao neganai, unai be hegeregere iseda abitorehai ia gwauatao. Iseda kara dika ia gwauatao neganai, ita ia doria lasi iena davana ita haloua totona. Ita moale badina ita diba, Iehova ese iseda kara dika ia gwauatao neganai, unai be hegeregere kara dika ita karaia lasi!

11. Baibel ia gwau Iehova ese iseda kara dika ia “kokia,” unai ena anina be dahaka? (Kara 3:19)

¹¹ Iehova ese iseda abitorehai eiava kara dika ia gwauatao sibona lasi, to ia kokia danu. (Kara 3:19 duahia.) Mani inai haheitalai ita laloa, oi ese ta ena abitorehai oi haloua dainai, ia ese abitorehai ena lista dekenai oi abia moni ia makaia. To, taunimanima ese unai maka henunai namba idia itaia diba. To maka ta kokia karana be idau. Unai haheitalai ita lalopararalaia totona, namona be ita laloatao Baibel negadiai, taunimanima ese idia gaukaralaia inka be ranu amo idia dahua oho diba. Ta ese dabua paripari amo toretore ia dahua oho diba. Unai dainai, abitorehai ta idia “kokia” neganai, ia boio momokani. Bona pepa ai ia noho gauna be taunimanima ese idia itaia lou lasi. Unai be hegeregere, abitorehai ta ia noho lasi. Ita moale badina Iehova ese iseda kara dika ia gwauatao sibona lasi, to ia kokia momokani!—Sal. 51:9.

12. Ori koremana ena haheitalai amo dahaka ita dibaia?

¹² Iehova ese unai bamona haheitalai ia gaukaralaia, kara dika ia kokia dalana ia herevalaia totona. Ia gwau: “Emu kara dikadia do lau kokia, ori koremana lalonai lau hunia bamona.” (Isa. 44:22) Iehova ese iseda kara dika ia gwauatao neganai, unai be hegeregere ori koremana ia gaukaralaia iseda kara dika ia hunia totona, unai amo ia hedinarai lou lasi.

13. Iehova ese iseda kara dika ia gwauatao neganai, iseda hemami be edena bamona?

¹³ Unai haheitalai idauidau amo dahaka ita dibaia? Iehova ese iseda kara dika ia gwauatao neganai, namo lasi iseda mauri ibounai lalonai iseda kara dika dainai ita lalohisihisi. Iesu ena boubou gauna ese iseda kara dika ia kokia momokani. Iehova ese iseda kara dika ia gwauatao neganai, unai be hegeregere kara  dika ta ita karaia lasi. Oibe, ita helalo-kerehai neganai, Iehova be mai momokani ida iseda kara dika ia gwauatao.

IEHOVA ESE ITA IA TURA HENIA LOU

14. Dahaka dainai ita abia dae diba Iehova ese dika ia gwauatao momokani? (Laulau itaia danu.)

¹⁴ Iehova ese iseda kara dika ia gwauatao neganai, ita diba ia do ita tura henia lou. Bona unai ese ita ia durua, iseda kerere gunadia dainai ita lalohisihisi lasi. Namo lasi ita laloa Iehova be ita dekenai ia badu noho, bona dala ia tahua ita ia panisia totona. Ia be unai bamona do ia karaia lasi. Iehova ia gwau iseda kara dika ia gwauatao, dahaka dainai unai ita abia dae diba? Iehova ese peroveta tauna Ieremia ia hamaoroa: “Lau ese edia kerere do lau gwauatao, bona edia kara dika do lau laloatao lou lasi.” (Ier. 31:34) Paulo ese unai hereva ia gaukaralaia lou, ia gwau: “Edia kara dika do lau laloatao lou lasi.” (Heb. 8:12) To unai ena anina be dahaka?

15. Iehova ese iseda kara dika ia laloatao lou lasi, ena anina be dahaka?

¹⁵ Baibel ai, inai hereva “laloatao” be ta ese guna ia vara gauna ia laloa lou karana sibona ia herevalaia lasi. To, ta ese gau ta ia karaia karana ia herevalaia danu. Iesu badinai idia tauadae kara dika tauna ese Iesu ia noia: “Iesu e, emu Basileia lalonai oi vareai neganai mani lau oi laloa.” (Luka 23:42, 43) Ia be Iesu ia noia, ia totona gau ta do ia karaia. Iesu ena haere ese ia hahedinaraia, unai kara dika tauna do ia hatorea isi lou. Unai dainai Iehova ia gwau iseda kara dika ia laloatao lou lasi neganai, anina be ita ia gwauatao bona vaira negai, iseda kara dika gunadia dainai ita do ia panisia lasi.

16. Baibel ese ita be dahaka ida ia hahegeregerea?

¹⁶ Baibel be haheitalai ma ta ia gaukaralaia unai ese ita do ia durua, Iehova ena dika gwauatao karana amo ita abia ura kwalimu ita lalopararalaia totona. Ia gwau ita be goevadae lasi dainai, ita be “kara dika ena igui  hesiai taudia.” To Iehova ese ita ia gwauatao neganai, ita be igui hesiai taudia bamona “kara dika amo ia ruhaia.” (Roma 6:17, 18; Apok. 1:5) Iehova ese iseda dika ia gwauatao karana ita dibaia neganai, ita be idia ruhaia igui hesiai tauna bamona ita moale.

17. Edena dala ai Iehova ena gwauatao karana ese iseda hetura karana ia hanamoa? (Isaia 53:5)

¹⁷ Isaia 53:5 duahia. Haheitalai dokona ese ita be gorere dikana idia abia taudia ida ia hahegeregerea. Iehova ese ena Natuna ena mauri davalaia boubouna amo, laulau dalanai iseda gorere ia hanamoa. (1 Pet. 2:24) Ita kara dika neganai, Iehova ida iseda hetura karana ita hadikaia. To mauri davana dainai, iseda dika ia gwauatao diba bona ia ida iseda hetura karana ita hanamoa lou. Gorere dikana ia abia tauna be ia namo lou neganai ia moale, unai hegeregerena Iehova ida iseda hetura karana ia namo lou bona ena lalonamo ita abia neganai, ita moale bada.

IEHOVA ENA GWAUATAO KARANA ENA NAMO

18. Baibel ai ita herevalaia haheitalai idauidau amo Iehova ena gwauatao karana dekenai dahaka ita dibaia? (Maua ladana, “Iehova ese Iseda Dika Ia Gwauatao Dalana” itaia danu.)

¹⁸ Baibel ai ita herevalaia haheitalai amo, Iehova ena dika gwauatao karana dekenai dahaka ita dibaia? Iehova ese ita ia gwauatao neganai, iseda kara dika ia laloaboio momokani. Unai dainai, iseda guba Tamana ida hetura karana namona ita moalelaia diba. Danu, ita laloatao Iehova ese mai momokani ida iseda dika ia gwauatao karana be harihari gauna. Unai be kara dika taudia dekenai iena lalokau bona hebogahisi hereadaena ia hahedinaraia. To, ita be maoro lasi Iehova ita doria unai ia karaia totona.—Roma 3:24.

19. (a) Dahaka dainai ita moale be namo? (Roma 4:8) (b) Atikol 8 ai dahaka do ita herevalaia?

¹⁹ Roma 4:8 duahia. Iehova ese iseda kara dika ia gwauatao dainai ita moale bada! (Sal. 130:4) To, bema ita ura Iehova ese iseda kara dika ia gwauatao, mai anina bada gauna ta ita karaia be namo. Iesu ia gwau: “Bema taunimanima edia kara dika umui gwauatao lasi, emui guba Tamana ese emui kara dika danu do ia gwauatao lasi.” (Mat. 6:14, 15) Unai dainai, namona be Iehova ita tohotohoa bona ma haida edia dika ita gwauatao. Atikol 8 ai, unai ita karaia dalana do ita herevalaia.