1. Dahaka ese ia hahedinaraia ita be “dina gabediai” ita noho?

OI BE Lagani 1914 murinai oi vara, a? Bema oibe, unai nega amo ema bona hari oi be inai nega oromana ena “dina gabediai” oi noho. (2 Tim. 3:1) Hari iseda negai ita itaia bona kamonai gaudia be Iesu ese idaunegai ia perovetalaia. Unai gaudia haida be tuari, hitolo bada, tano mareremarere, daihanai goreredia, kara dika be bada, bona Iehova ena taunimanima idia dagedage henia noho. (Mat. 24:3, 7-9, 12; Luka 21:10-12) Danu, ita itaia taunimanima edia mauri dalana be ia idau noho, aposetolo Paulo ese ia herevalaia bamona. (Maua ladana “Taunimanima Edia Kara Hari” itaia.) Ita be Iehova ita tomadiho henia dainai ita abia dae ita be ‘nega gabedia’ ai ita noho.​—Mika 4:1.

2. Edena henanadai edia haere ita tahua be namo?

² Lagani 1914 amo lagani momo idia hanaia dainai, toana be ita be ‘dina gabedia’ ena dokona kahana ai ita noho. Inai nega oromana ena dokona be ia kahirakahira noho dainai, mai anina bada henanadai edia haere ita tahua be namo: ‘Dina gabedia’ ena dokona ai dahaka gaudia haida do idia vara? Bona unai gaudia ita naria noho lalonai Iehova ia ura dahaka do ita karaia?

3. Tesalonika Ginigunana 5:1-3 ena hereva bamona, tanobada besedia be edena hadibaia hereva do idia gwauraia?

³ Tesalonika Ginigunana 5:1-3 duahia. Paulo ese “Iehova ena dina” ia herevalaia. Unai siri ai  ia hahedinaraia unai dina be “Babulonia Badana,” tomadiho koikoi ibounai orea unai, do idia tuari henia negana ai do ia matamaia bona unai dina be Aramagedono ai do ia ore. (Apok. 16:14, 16; 17:5) “Iehova ena dina” ia do matamaia lasi neganai, tanobada besedia be “maino bona noho namo” ena hadibaia hereva do idia gwauraia. Politikol oreadia be nega haida unai bamona hereva idia gwauraia, edia hetura karana bese ma haida ida idia hanamoa totona. * To, Baibel ese ia gwauraia “maino bona noho namo” ena hadibaia hereva be idau. Dahaka dainai? Badina unai bamona hereva idia gwauraia neganai, taunimanima momo do idia laloa politikol oreadia ese tanobada dekenai maino bona noho namo idia havaraia vadaeni. To, unai nega ai “hisihisi badana” do ia matamaia bona “karaharaga dika bada herea” do ia vara.​—⁠Mat. 24:21.

4. (a) “Maino bona noho namo” ena hadibaia hereva dekenai dahaka ita do diba lasi? (b) Dahaka ita diba vadaeni?

⁴ Ita be “maino bona noho namo” ena hadibaia hereva dekenai gau haida ita diba. To, gau ma haida be ita diba lasi. Danu ita diba lasi dahaka dainai unai hadibaia hereva do idia gwauraia. Bona ita diba lasi hadibaia hereva ma haida do idia gwauraia eiava unai hadibaia hereva tamona sibona. Herevana dahaka ia vara, to inai ita diba: Tanobada ena lohia taudia ese maino idia havaraia diba lasi. To, Baibel amo ita dibaia hadibaia hereva sibona do ita naria. Unai ese do ia hahedinaraia “Iehova ena dina” be kahirakahira do ia matamaia!

5. Tesalonika Ginigunana 5:4-6 ese edena dala ai ita ia durua “Iehova ena dina” ita naria noho totona?

⁵ Tesalonika Ginigunana 5:4-6 duahia. Paulo ena hagoadaia hereva ese ita ia hadibaia dahaka ita karaia be namo “Iehova ena dina” ita naria noho totona. Namo lasi “ita mahuta noho, haida idia mahuta bamona,” to “ita noga noho” be namo. Hegeregere, namona be politikol karadia amo ita gini siri. Bema politikol karadia lalonai ita vareai, ita be “tanobada ena” ura do ita badinaia. (Ioa. 15:19) Ita diba Dirava ena Basileia sibona ese tanobada dekenai maino do ia mailaia.

6. Ma haida ita durua dahaka idia dibaia totona, bona dahaka dainai?

⁶ Namona be ita gima sibona lasi, to ma haida ita durua Baibel ese ia perovetalaia gaudia idia dibaia totona. Namona be ita laloatao, hisihisi badana ia matamaia neganai, do ia auka taunimanima ese Iehova idia hesiai henia matamaia totona. Unai dainai iseda haroro gaukara be mai anina bada! *

7. Iehova ia ura dahaka do ita karaia?

⁷ “Iehova ena dina” ia kahirakahira noho lalonai, ia ura haroro gaukara ita goadalaia. Namona be ‘nega ibounai Lohiabada ena gaukara idauidau lalonai ita bisi.’ (1 Kor. 15:58) Iesu ese do ita karaia gaukara ia perovetalaia vadaeni. Bona, dina gabedia ai do idia vara gaudia ia herevalaia neganai, ia gwau: “Danu, bese ibounai dekenai sivarai namona do idia harorolaia guna be namo.” (Mar. 13:4, 8, 10; Mat. 24:14) Mani oi laloa: Haroro gaukara oi karaia neganai, oi be unai Baibel ena peroveta herevana oi hagugurua noho!

8. Edena dala ai ita diba Basileia harorolaia gaukarana ese anina namona ia havaraia noho?

⁸ Edena dala ai Basileia harorolaia gaukarana ese anina namona ia havaraia noho? Lagani ta ta ai taunimanima momo be Basileia ena sivarai namona idia kamonai. Hegeregere, inai dina gabedia ai Basileia harorolaia taudia edia namba be ia bada ia lao noho. Lagani 1914 ai, tano 43 dekenai pablisa ibounai be 5,155. Hari, tano 240 dekenai pablisa ibounai be 8.5 milioni bamona! To, unai ese ia hahedinaraia lasi iseda gaukara be ia ore. Namona be ma haida ita hadibaia noho, Dirava ena Basileia sibona ese taunimanima edia hekwakwanai idauidau do ia haorea.​—⁠Sal. 145:11-13.

9. Dahaka dainai Basileia sivaraina ita harorolaia noho?

⁹ Iseda Basileia harorolaia gaukarana be do ita karaia noho ela bona Iehova ia gwau ia ore. Nega ia do noho taunimanima ese Iehova Dirava bona Iesu Keriso idia dibaia totona, a? (Ioa. 17:3) Ita diba lasi. To, ita dibaia gauna be inai, hisihisi badana ia do matamaia lasi lalonai, “mauri hanaihanai idia ura kudou-maoro taudia” ese sivarai namona idia abia dae diba. (Kara 13:48) Edena dala ai nega ia do noho lalonai idia ita durua diba?

10. Iehova ese dahaka gaudia ia henia, taunimanima ita durua hereva momokani idia dibaia totona?

¹⁰ Iehova be ena orea amo ita dekenai gau momo ia henia taunimanima ita durua hereva momokani idia dibaia totona. Hegeregere, ita be midwik hebouna amo treinini ita abia. Unai hebou amo ita ese vadivadi ginigunana bona lou henia ai do ita gwauraia gaudia ita dibaia. Bona, Baibel stadi ita karaia dalana ita dibaia. Iehova ena orea ese ita dekenai Hadibaia  Gaukara Ena Tulu Idauidau ia henia. Unai tulu idauidau ese ita idia durua . . .

• herevahereva ita hamatamaia totona,

• lalona veria dalanai ita hereva,

• taunimanima edia ura ita habadaia Baibel idia dibaia totona,

• Baibel stadi negadia ai hereva momokani ita hadibaia, bona

• kamonai taudia ita hadibaia iseda websait idia gaukaralaia bona iseda Kingdom Hall dekenai idia mai totona.

Momokani, unai tulu idauidau ita abia sibona be hegeregere lasi. Namona be ita gaukaralaidia. * Hegeregere, kamonai tauna ta ida oi herevahereva murinai, ia dekenai pepapepa ta eiava magasin ta oi henia, unai amo ia duahia diba ela bona nega ma ta umui hedavari lou. Bona, ita gaukara goada hua ta ta ai Basileia harorolaia gaukarana ita karaia totona.

11. Dahaka dainai Online Bible Study Lessons idia karaia?

¹¹ Iehova ese taunimanima ia durua hereva momokani idia dibaia dalana ta be iseda websait jw.org^® dekenai ia noho kahana ladana Online Bible Study Lessons. (Oi lao BIBLE TEACHINGS > ONLINE LESSONS.) Dahaka dainai unai kahana idia karaia? Hua ta ta ai, taunimanima tausen momo be Intanet dekenai Baibel leseni idia tahua. Iseda websait ai idia noho leseni ese unai taudia do ia durua Baibel ena hereva momokani idia dibaia totona. Ita hereva henia taudia haida be do idia ura lasi Baibel stadi idia abia dae. Bema unai bamona, namona be iseda websait amo unai kahana oi hahedinaraia eiava idia lalopararalaia gado ena link oi siaia diba. *

12. Ta be Online Bible Study Lessons amo dahaka do ia dibaia?

¹² Iseda Online Bible Study Lessons be inai kahadia ia herevalaia: “The Bible and Its Author,” “The Bible’s Main Characters,” bona “The Bible’s Message of Hope.” Ta be unai kahadia amo inai gaudia do ia diba:

• Baibel ese ta ia durua diba dalana

• Iehova, Iesu bona aneru

• Dirava ese taunimanima ia karaia ena badina

• Hisihisi bona kara dika ia vara noho ena badina

Danu, unai leseni ai Iehova ese do ia karaia gaudia ia herevalaia, hegeregere . . .

• hisihisi bona mase do ia haorea,

• mase taudia do ia hatorea isi lou, bona

• Dirava ena Basileia ese taunimanima edia gavamani edia gabu do ia abia.

13. Online lessons ese Baibel stadi karaia dalana ena gabu ia abia, a? Herevalaia.

¹³ Online lessons ese Baibel stadi karaia dalana ena gabu ia abia lasi. Iesu be ita dekenai hahediba taudia halaoa gaukarana ia henia. Ita ura kamonai taudia ese online lessons do idia duahia, idia dibaia gaudia idia ura henia, bona do idia ura diba ma haida idia abia. Bema unai bamona idia karaia, Baibel stadi do idia abia dae. Leseni ta ta edia dokonai, Baibel stadi idia noia diba. Dina ta ta ai, tanobada hegegemadai taunimanima 230 mai kahana be iseda websait amo Baibel stadi idia noia! Ta ida Baibel stadilaia karana be mai anina bada!

14. Mataio 28:19, 20 ena hereva bamona, dahaka ita karaia be namo, bona dahaka dainai?

¹⁴ Mataio 28:19, 20 duahia. Baibel stadi ita karaia neganai, namona be ita gaukara goada ma haida be ‘hahediba taudia ai ita halaoa’  bona idia ita hadibaia, Iesu ia gwauraia gaudia ibounai idia badinaia totona. Namona be taunimanima ita durua idia laloparara Iehova bona ena Basileia idia badinaia be mai anina bada. Unai ena anina be idia ita hagoadaia hereva momokani amo idia dibaia gaudia idia badinaia, Iehova dekenai edia mauri idia gwauhamatalaia bona bapatiso idia abia. Unai amo Iehova ena dina ai idia roho mauri diba.​—1 Pet. 3:21.

15. Iseda nega be edena bamona ita gaukaralaia, bona dahaka dainai?

¹⁵ Matamanai ita herevalaia bamona, hari inai nega ia lao bona nega oromana ena dokonai, nega be lasi. Unai dainai namo lasi Keriso ena hahediba taudia ai idia ura lasi lao taudia dekenai iseda nega ita haorea idia ita stadi henia totona. (1 Kor. 9:26) Iseda gaukara be mai anina bada! Taunimanima momo ese Basileia ena sivarai idia do kamonai lasi dainai, nega ia noho lalonai idia ita durua be namo.

16. Apokalupo 18:2, 4, 5, 8 ena hereva bamona, dahaka ita karaia be namo? (Futnout itaia.)

¹⁶ Apokalupo 18:2, 4, 5, 8 duahia. Inai siri ai Iehova ia ura ena hesiai taudia ese do idia karaia gauna ia herevalaia. Namona be Keristani taudia korikoridia ese idia hahedinaraia idia be Babulonia Badana amo idia idau. Baibel stiuden ta be hereva momokani ia do dibaia lasi neganai, reana ia be tomadiho koikoi ena memba ta. Danu, unai tomadiho ena gaukara idauidau lalonai ia vareai, bona moni dalanai heduru ia henia. Baibel stiuden be bapatiso lasi pablisa ai ia lao totona, tomadiho koikoi amo ia raka siri be namo. Ia ese revareva ta amo ena dubu gunana do ia hadibaia ia be dubu ena memba ta lasi, eiava Babulonia Badana * ida ia gaukara hebou oreadia amo ia raka siri momokani.

17. Keristani tauna ese edena bamona moni gaukara ia dadaraia be namo, bona dahaka dainai?

¹⁷ Namona be Keristani tauna korikorina ia hahedinaraia, ena moni gaukara ese dala ma ta ai Babulonia Badana ia durua lasi. (2 Kor. 6:14-17) Hegeregere, ia be dubu ta dekenai do ia gaukara lasi. Danu, bisinesi ta dekenai ia gaukara Keristani tauna ese tomadiho koikoi totona idia gaukaralaia rumadia dekenai gaukara momo ia karaia lasi be namo. Bona bema ia be mai ena bisinesi, namo lasi Babulonia Badana ia durua oreana ta ena gaukara ia karaia. Dahaka dainai tomadiho koikoi ita durua lasi be namo? Badina ita ura lasi Dirava vairanai idia goeva lasi tomadiho koikoi oreadia  edia gaukara bona kara mirodia ita durua.​—Isa. 52:11. *

18. Edena dala ai tadikaka ta be moni gaukara dekenai Baibel ena hakaua herevadia ia badinaia?

¹⁸ Lagani momo gunanai, mai ena bisinesi elda ta be contractor ta ese ia noia ia noho taoni ena dubu ta ai kapenta gaukara ia karaia totona. Contractor tauna ia diba tadikaka be hanaihanai ia ura lasi dubu edia gaukara ia karaia. To, hari contractor tauna ia ura dikadika ta ese dubu dekenai gaukara ta ia karaia totona. To, tadikaka be Baibel ena hakaua herevadia ia badinaia bona unai gaukara ia abia dae lasi. Vaira wiki ai, niuspepa ta lalonai kapenta ma ta be unai dubu dekenai korosi ta ia atoa ena laulau ia hahedinaraia. Bema tadikaka be unai gaukara ia abia dae, reana niuspepa dekenai iena laulau do ia hedinarai. Unai ese iena ladana namona tadikaka bona taihu huanai ia hadikaia diba! Danu, Iehova ena hemami mani oi laloa.

19-20. (a) Dahaka ita dibaia? (b) Dahaka gau ma haida ita dibaia be namo?

¹⁹ Baibel ena peroveta herevana hegeregerena, kahirakahira do ia guguru gauna ta be tanobada besedia ese “maino bona noho namo” ena hadibaia hereva do idia gwauraia. Iehova ese ita ia hadibaia dainai, ita diba tanobada besedia ese maino korikori idia havaraia diba lasi. Unai hadibaia herevana bona dika bada herea idia do vara lasi lalonai, dahaka ita karaia be namo? Iehova ia ura Basileia sivaraina ita harorolaia goadagoada bona taunimanima momo be hahediba taudia ai ita halaoa. Danu, tomadiho koikoi ibounai amo ita raka siri be namo. Anina be Babulonia Badana idia durua moni gaukara ta ita abia hidi lasi bona ena memba ta ai ita lao lasi.

²⁰ Inai “dina gabediai” kara badadia ma haida do idia vara. Danu, Iehova ia ura gau ma haida ita karaia be namo. Unai gaudia be dahaka, bona edena dala ai vaira negai do idia vara gaudia dainai ita hegaegae? Stadi atikol 41 ese unai do ia herevalaia.