RENEÉ, ena mauri lagani be 35 bamona, iena famili be Witnes taudia bona Australia ai idia noho. Ia gwau: “Ai be nega momo pablisa momo lasi gabudia dekenai ai lao. Emai tama sina be gau idauidau idia karaia ai idia hamoalea totona! Egu natudia rua idia vara neganai, lau ura idia danu be unai bamona mauri idia moalelaia.”

 Reneé ena adavana, Shane, ena mauri lagani be 38 bamona, ena tahua gauna be ena adavana ida ia hegeregere. Ia gwau: “Emai natuna iharuana ia vara murinai, Gima Kohorona ai Witnes famili ta ena sivarai ai duahia, idia be edia bouti amo Pacific ena sautwest kahanai ia noho motumotu ladana Tonga dekenai idia lao haroro totona. * Unai murinai, Iehova ena Witnes taudia edia brens ofesi, Australia bona New Zealand dekenai revareva ai siaia, pablisa momo lasi gabuna ta dekenai ai lao totona. * Vadaeni Tonga dekenai ai idia siaia—atikol dekenai ai duahia gabuna unai!”

Shane, Reneé, bona edia natudia, Jacob bona Skye, be lagani tamona Tonga ai idia noho murinai, dagedage dainai Australia dekenai idia giroa lou, to idia ura edia hesiai gaukara idia habadaia dainai, lagani 2011 ai, Norfolk Motumotu dekenai idia lao. Unai Pacific motumotu maragina be Australia ena ist kahanai ia noho bona ia be kilomita 1,500 bamona. Unai gabu idia moalelaia, a? Jacob, ena mauri lagani be 14, ia gwau: “Ai moale badina Iehova ese ai ia naria bona emai hesiai gaukara ai moalelaia!”

Shane, Reneé, bona edia natudia hegeregere, Witnes famili momo be idia ura pablisa momo lasi gabudia dekenai idia lao. Dahaka dainai?

Burnett bona Simone, edia mauri lagani be 35 bamona, bona edia natudia, Eston bona Caleb, edia mauri lagani be 12 bona 9, be Burketown dekenai idia lao, unai taoni be Queensland, Australia dekenai ia noho. Burnett ia gwau: “Witnes taudia be lagani toi o foa sibona lalonai unai gabu ai idia haroro. Bona taunimanima momo idia kamonai. Bona ai ura idia ida Baibel ai stadilaia.”

Mark bona Karen, edia mauri lagani be 50 bamona, be Sydney, Australia, kahirakahira idia noho kongrigeisen idia bamoa. To gabeai idia bona edia natudia Jessica, Jim, bona Jack be Nhulunbuy dekenai idia lao. Unai be Northern Territory dekenai ia noho. Mark ia gwau: “Lau be taunimanima lau lalokau henia dainai, lau ura kongrigeisen bona haroro gaukara lau durua.” To, Karen ia ura lasi ia lao. Ia gwau: “Mark bona ma haida ese lau idia hagoadaia murinai, egu lalona lau hadaia do lau lao. Unai lau karaia dainai, lau moale!”

Lagani 2011 ai, Benjamin bona Carolyn, bona edia natudia rua, Jade bona Bria, be Queensland, Australia, amo Timor-Leste, Indonesia, dekenai idia lao. Ben ia gwau: “Lau bona Carolyn be guna Timo-Leste dekenai ai spesel painia. Taunimanima momo idia kamonai, bona tadikaka ese ai idia durua bada. Unai gabu ai rakatania neganai, ai lalohisihisi bada. Bona ai ura ai giroa. To emai natudia idia vara neganai, emai palani ai haidaua, to emai ura ia idau lasi.” Carolyn ia gwau: “Ai ura emai natudia ese misinari taudia, Betele taudia, bona spesel painia taudia idia bamoa bona Iehova idia hesiai henia.”

Iesu ese ena murinai idia raka taudia ia hamaoroa: “Bema umui ta ia ura kohoro ta ia haginia, do ia helai guna bona ena davana do ia laloa.” (Luka 14:28) Unai hegeregerena, famili ta be gabu ma ta dekenai idia ura lao neganai, idia palani namonamo be mai anina bada. Dahaka idia laloa be namo?

TOMADIHO KARADIA: Ben ia gwau: “Ai ura ma haida ai durua, to ai ura lasi idia ai hahekwarahia. Unai dainai, ai do lao lasi neganai, emai tomadiho karadia ai goadalaia. Danu, emai haroro gaukara ai habadaia bona kongrigeisen ena gaukara idauidau ai durua.”

Jacob ia gwau: “Norfolk Motumotu dekenai ai do lao lasi neganai, Gima Kohorona bona Awake! ai mauri sivaraidia ai duahia. Pablisa be momo lasi gabudia dekenai idia lao famili ese idia davaria hekwakwanai bona Iehova ese idia ia naria dalana ai dibaia.” Iena taihuna, Skye, ena mauri lagani be 11,  ia gwau: “Lau sibona bona egu tama sina ida lau guriguri momo.”

HEMAMI: Reneé ia gwau: “Ai noho gabuna lau ura henia, bona emai bese bona turadia kahirakahira ai noho dainai, lau ura lasi lau lao. Unai lau laloa momo lasi, to emai famili ese do idia davaria hahenamo lau laloa.”

NOHO DALANA: Famili momo be gabu matamata dekenai idia do lao lasi neganai, tahua gaukarana idia karaia. Mark ia gwau: “Nhulunbuy ena sivarai momo ai duahia. Unuseni idia noho tadikaka ese ai dekenai unai taoni ena niuspepa idia siaia, unai amo unai taoni taudia bona edia noho dalana ai dibaia.”

Shane, ia gwau: “Lau ura Keristani kara namodia lau hahedinaraia. Lau diba bema lau kara momokani, lau manau, bona gaukara goada, tano idauidau dekenai lau noho diba.”

Pablisa momo lasi gabudia dekenai idia lao taudia be hekwakwanai idia davaria neganai, idia kara auka lasi bona lalohadai maorona idia abia. Mani ita itaia.

Reneé ia gwau: “Lau ese heduru dala idauidau lau dibaia. Hegeregere, Norfolk Motumotu ai, hurehure bada negadiai, sisima be haba dekenai idia kamokau lasi dainai, aniani davadia idia daekau. Unai dainai aniani lau hegaegaelaia neganai, aniani bada lau nadua lasi.” Iena adavana, Shane, ia gwau: “Danu, wiki ta ta ai emai moni ai gaukaralaia namonamo.”

Edia natuna, Jacob, ena hekwakwanai be idau. Ia gwau: “Emai kongrigeisen ai idia noho taudia be 7 sibona. Lauegu uru tamona taudia be lasi! To haroro gaukara ai buruka taudia lau bamoa neganai, tura namodia ai ai lao.”

Jim, ena mauri lagani be 21, be unai ia mamia danu. Nhulunbuy kahirakahira ia noho kongrigeisen be kilomita 725 bamona, bona unuseniai emai hebouhebou ai karadia. Ai ginidae haraga bona tadikaka taihu ai hedavari henidia. Lagani ta ta ai unai negadia ai moalelaia bada!”

Baibel ia gwau: “Lohiabada ena hanamoa sibona ese, kohu momo oi dekenai ia henia noho.” (Aon. 10:22) Tanobada hegegemadai, pablisa momo lasi gabudia idia lao taudia be unai siri ena hereva idia mamia.

Mark ia gwau: “Ai moale badina ai itaia emai natudia idia moale. Emai natudia badadia rua be idia abia dae momokani, Iehova ese Basileia idia atoa guna taudia ia naria. Moni amo unai oi hoia diba lasi.”

Shane ia gwau: “Lauegu hetura karana egu adavana bona natudia ida ia goada. Iehova ese idia ia hanamoa dalana idia herevalaia neganai, lau moale bada.” Iena natuna, Jacob, ia gwau: “Lau ese unai nega lau moalelaia. Lau moale iniseni ai mai.”