1, 2. Lagani 2018 ai, edena hebou ese taunimanima milioni momo do ia hatamonaia, bona dahaka dainai? (Laulau ginigunana herevalaia.)

MARCH 31, 2018 ai, dina ia diho lalonai, Dirava ena taunimanima bona kamonai taudia momo be Lohiabada Ena Anibou dekenai do idia lao. Tanobada hegegemadai, taunimanima milioni momo be do idia haboua Keriso ena mase idia laloatao totona. Lagani ta ta ai, unai hebou ese dala idauna ai taunimanima ia hatamonaia, tanobada ena hebou ma ta be unai bamona lasi!

² Tanobada hegegemadai, taunimanima milioni momo be unai mai anina bada hebouna dekenai idia lao neganai, Iehova bona Iesu be idia moale. Baibel ia peroveta, “hutuma bada . . . bese ibounai, iduhu ibounai, kopina bona gado idauidau amo” be do idia boiboi, idia gwau: “Emai hahemauri be emai Dirava, terona ai ia helai tauna amo bona Mamoe Natuna amo.” (Apok. 7:9, 10) Oibe, lagani ta ta ai Memorial hebouna ita lao neganai, ita ese Iehova bona Iesu ita hanamoa!

3. Inai stadi ese edena henanadai do ia haerelaidia?

 ³ Inai stadi ese inai henanadai do ia haerelaidia: (1) Edena dala ai Memorial totona ita hegaegae bona ita lao ena namo be dahaka? (2) Edena dala ai Memorial ese Dirava ena taunimanima ia hatamonaia? (3) Edena bamona unai lalotamona karana ita hagoadaia diba? (4) Nega ta Memorial dokona do ita karaia, a? Bema oibe, edena negai?

4. Dahaka dainai Memorial dekenai ita lao be mai anina bada?

⁴ Namona be Memorial dekenai ita lao ena badina ita lalohadailaia. Laloatao, kongrigeisen heboudia lao henia karana be iseda tomadiho karana ta. Unai dainai do ita abia dae Iehova bona Iesu ese unai mai anina bada hebouna dekenai idia lao taudia ibounai idia laloa bada. Ita ura Iehova bona Iesu idia itaia ita be Memorial dekenai ita lao, bona bema ita hegeregere lasi momokani, idia be unai do idia itaia danu. Bema iseda kara amo ita hahedinaraia kongrigeisen heboudia be mai anina bada, Iehova ese iseda ladana be “buka ta”​—⁠“mauri bukana”​—⁠lalonai do ia torea. Unai buka lalonai mauri hanaihanai do idia abia taudia edia ladadia idia noho.​—⁠Mal. 3:16; Apok. 20:15.

5. Memorial dinana ia kahirakahira neganai, edena bamona do ita ‘tahua noho bema iseda abidadama ita dogoatao noho eiava lasi’?

⁵ Memorial dinana ia kahirakahira neganai, namona be nega ita atoa ita guriguri bona iseda hetura karana Iehova ida ita laloa namonamo totona. (2 Korinto 13:5 duahia.) Edena bamona unai do ita karaia? Namona be ‘ita tahua noho bema ita be iseda abidadama ita dogoatao noho eiava lasi.’ Unai ita karaia totona, sibona ita nanadaia: ‘Lau abia dae momokani Iehova ese inai orea ia abia hidi iena ura ia hagugurua totona, a? Basileia ena sivarai namona harorolaia bona hahediba gaukarana lau goadalaia, a? Egu kara amo lau hahedinaraia inai be nega dokona bona Satani ena lohia negana be kahirakahira do ia ore, a? Iehova Dirava dekenai egu mauri lau gwauhamatalaia negana amo Iehova bona Iesu dekenai lau abia abidadama lau dogoatao noho, a? (Mat. 24:14; 2 Tim. 3:1; Heb. 3:14) Unai henanadai edia haere laloa dobu karana ese ita do ia durua bada.

6. (a) Mauri abia dala tamona sibona be dahaka? (b) Lagani ta ta ai, elda ta be dahaka ia karaia, bona oi danu be dahaka oi karaia diba?

⁶ Memorial ita karaia ena badina idia herevalaia atikol idauidau oi duahia bona laloa dobu. (Ioane 3:16; 17:3 duahia.) Mauri hanaihanai ita abia dalana tamona be Iehova ita “diba,” bona ena natuna korikorina, Iesu, ita “abidadama henia.” Memorial totona ita hegaegae neganai, stadi sediual namona ita karaia diba, unai amo Iehova bona Iesu kahirakahira do ita lao. Lagani momo lalonai elda maduna ia huaia tadikakana mani ita laloa. Idia hanaia laganidia lalonai, ia ese Memorial bona Iehova bona Iesu ese idia hahedinaraia lalokauna idia herevalaia atikol idauidau ia gogoa. Memorial dinana ia kahirakahira neganai, unai atikol ia duahidia lou bona Memorial ita karaia ena badina ia laloa dobu. Nega haida, atikol matamata ta o rua ia duahia danu. Tadikaka ia davaria inai atikol ia duahidia lou bona Memorial ena Baibel duahiduahi ia laloa dobu karana amo gau matamatadia ia dibaia. Bona lagani ta ta ai, ia mamia iena lalokau Iehova bona Iesu dekenai be ia goada. Unai bamona stadi karana ese emu lalokau Iehova bona Iesu dekenai do ia hagoadaia bona Memorial amo namo do oi davaria.

7. (a) Lohiabada Ena Anibou hanuaboina ai, Iesu be dahaka totona ia guriguri? (b) Dahaka ese ia hahedinaraia Iehova ese Iesu ena guriguri ia haerelaia?

⁷ Lohiabada Ena Anibou hanuaboina ai, Iesu ia noinoi ia murinai idia raka taudia ibounai be do idia tamona, ia be ena Tamana ida ia hakapua hegeregerena. (Ioane 17:20, 21 duahia.) Iehova ese iena lalokau Natuna ena guriguri ia haerelaia, bona hari taunimanima milioni momo idia abia dae Iehova ese iena Natuna ia siaia. Dirava ena taunimanima ese idia abia hebou idauidau amo, Memorial be hebou idauna, badina unai hebou ese Iehova ena Witnes taudia ia hatamonaia. Tanobada hegegemadai, bese bona kopi idauidau taudia momo be hebou gabudia dekenai idia hebou. Gabu haida dekenai, bese bona kopi idauidau taudia be idia hebou tamona lasi, eiava bema unai idia karaia ma haida ese do idia gwauraidia dika. To, Iehova bona Iesu ese unai bamona lalotamona karana idia moalelaia!

8. Iehova be Esekiela dekenai dahaka ia gwau?

⁸ Ita be Iehova ena taunimanima dainai, ita huanai ia noho lalotamona be hoa gauna lasi. Iehova ese idaunegai unai ia perovetalaia vadaeni. Mani peroveta tauna Esekiela dekenai ia henia herevana ita laloa. Ia ese Esekiela ia hamaoroa au rua do ia atoa hebou, unai be “Iuda basileia ena au” bona “Israela basileia ena au.” (Esekiela 37:15-17 duahia.) July 2016 Gima Kohorona ena atikol ladana “Duahia Taudia Edia Henanadai” ia gwau: “Iehova ese Esekiela dekenai ia gwauhamata, Israela besena be gwauhamata tanona dekenai idia giroa lou murinai, unai bese do ia hatamonaia. Unai sivarai ese inai dina dokodia lalonai Dirava ena taunimanima idia noho hebou karana ia perovetalaia danu.”

9. Lagani ta ta ena Memorial ai, Esekiela ena peroveta herevana be edena bamona ia guguru?

⁹ Lagani 1919 amo, Iehova be metairametaira horoa taudia ia hatamonaia guna, laulau dalanai idia be “Iuda basileia ena au” bamona. Bona tanobada ena helaro do idia abia taudia momo​—⁠laulau dalanai idia be “Israela basileia ena au”​—⁠be horoa taudia idia bamoa matamaia neganai, idia be “mamoe serina tamona ai . . . idia lao.” (Ioa. 10:16; Sek. 8:23) Iehova ia gwauhamata iena imana dekenai unai au rua do ia hakapua hebou. (Ese. 37:19) Bona unai orea rua be mai lalotamona ida King tamona henunai idia gaukara, unai be Iesu Keriso, Baibel ia gwau ia be Dirava ena “hesiai tauna Davida bamona.” (Ese. 37:24, 25) Esekiela ese ia gwauraia lalotamona karana be lagani ta ta ai ita itaia. Oibe, horoa taudia bona “mamoe ma haida” be Keriso ena mase laloatao ena Memorial totona idia hebou neganai unai ita itaia! To ita ta ta be dahaka ita karaia diba, unai lalotamona karana ita gimaia bona hahedinaraia totona?

10. Dahaka ita karaia diba Dirava ena taunimanima huanai lalotamona ia noho totona?

¹⁰ Dirava ena taunimanima huanai lalotamona ia noho diba bema ita manau. Iesu be tanobada dekenai ia noho neganai, ia ese ena hahediba taudia ia hagania idia manau totona. (Mat. 23:12) Bema ita manau, inai tanobada taudia hegeregerena do ita hekokoroku lasi. Ita manau dainai, ita idia hakaua taudia henunai do ita noho, bona unai ese kongrigeisen lalonai lalotamona ia havaraia diba. Danu, bema ita manau, Dirava be do ia moale, badina ia ese “hekokoroku taudia ia dadaraia, to manau taudia dekenai hebogahisi hereadaena ia henia.”​—⁠1 Pet. 5:5.

11. Edena dala ai paraoa bona wain edia anina laloa dobu karana ese ita ia hatamonaia?

¹¹ Lalotamona ita hahedinaraia dalana  iharuana be Memorial ai idia gaukaralaia paraoa bona wain edia anina ita laloa dobu. Memorial negana ia do ginidae lasi bona Memorial hanuaboina ai danu, hatubua lasi paraoana bona wain kakakana edia anina ita laloa dobu be namo. (1 Kor. 11:23-25) Paraoa be Iesu ese ia bouboulaia goevadae tauanina ia laulaulaia, bona wain ese ia bubua rarana ia laulaulaia. To, unai paraoa bona wain edia anina sibona ita diba be hegeregere lasi. Laloatao, Keriso ena mauri davalaia boubouna ese dala rua ai lalokau hereadaena ia hahedinaraia​—⁠Iehova ese ia hahedinaraia lalokauna, unai be ena lalokau Natuna be ita totona ia henia, bona Iesu ese ia hahedinaraia lalokauna, ia be mai ura ida sibona ena mauri ia henia ita totona. Namona be unai ese ita ia doria idia ita lalokau henia totona. Iehova lalokau henia karana ese ita bona iseda tadikaka ia hatamonaia bona hagoadaia.

12. Iesu ena haheitalai lalonai, edena bamona ia hahedinaraia Iehova be ia ura dika ita gwauatao?

¹² Lalotamona do ita hahedinaraia dalana ihatoina be ma haida edia dika ita gwauatao. Ita idia hahisia taudia ita gwauatao neganai, ita hahedinaraia Keriso ena mauri davalaia boubouna amo iseda dika ia gwauatao karana ita abia dae. Iesu ena haheitalai Mataio 18:23-34 dekenai mani ita laloa. Bona sibona oi nanadaia: ‘Egu lalona lau hadaia Iesu ena hereva lau badinaia totona, a? Egu tadikaka edia kara lau haheaukalaia bona lalopararalaia, a? Lau noho hegaegae lau idia hahisia taudia edia dika lau gwauatao totona, a?’ Momokani, kara dika haida be bada bona ma haida be maragi, bona kara dika haida be ita goevadae lasi taudia ese ita gwauatao diba lasi. To, Iesu ena haheitalai ese ia hahedinaraia Iehova be ia ura dika ita gwauatao. (Mataio 18:35 duahia.) Iesu ese ia hahedinaraia, Iehova be iseda dika do ia gwauatao lasi bema iseda tadikaka edia dika ita gwauatao lasi. Unai be hereva aukana! Iesu ena hereva hegeregerena ma haida edia dika ita gwauatao neganai, ita huanai lalotamona do ia noho.

13. Edena dala ai ita hamomokania ita be maino karaia taudia?

¹³ Ma haida edia dika ita gwauatao neganai, ita hamomokania ita be maino karaia  taudia. Aposetolo Paulo ena sisiba ita laloa, ia gwau: “Do umui gaukara goada lauma helaga ese ia henia lalotamona karana umui badinaia totona, bona maino ese umui do ia hatamonaia.” (Efe. 4:3) Memorial negana bona Memorial hanuaboina ai, ma haida do oi kara henia dalana oi laloa dobu. Sibona oi nanadaia: ‘Egu kara amo lau hahedinaraia lau be ma haida lau badu henia lasi, a? Taunimanima idia itaia lau be maino bona lalotamona karana lau ura henia, a?’ Inai lagani ai unai henanadai ita lalodia dobu be namo.

14. Edena bamona ta ta eda kara ita haheaukalaia noho diba?

¹⁴ Lalotamona ita hahedinaraia dalana namba 4 be lalokau ita hahedinaraia, unai dala amo lalokau Diravana, Iehova, ita tohotohoa. (1 Ioa. 4:8) Namo lasi ita gwau, “egu tadikaka lau lalokau henia, to idia lau ura henia lasi”! Bema unai bamona ita laloa, ita be Paulo ena sisiba ita badinaia lasi, ia gwau: “Mai lalokau ida umui ta ta emui kara do umui haheaukalaia.” (Efe. 4:2) Paulo ia gwau “ta ta emui kara do umui haheaukalaia” sibona lasi. To, ia gwau “mai lalokau” ida unai do ita karaia. Momokani, iseda kongrigeisen ai Iehova ese ia veria mai taudia idauidau idia noho. (Ioa. 6:44) Iehova ese unai ia karaia dainai, ia hahedinaraia ia be idia ia lalokau henia. Bema Iehova ese idia ia lalokau henia, dahaka dainai idia ita lalokau henia lasi? Namona be Iehova ena hahegani ita badinaia bona lalokau ita hahedinaraia!​—⁠1 Ioa. 4:20, 21.

15. Edena bamona ita diba nega ta Memorial dokona do ita karaia?

¹⁵ Nega ta ai, Memorial dokona do ita karaia. Edena bamona unai ita diba? Paulo ese Korinto taudia dekenai ia siaia revareva ginigunana lalonai, ia ese horoa Keristani taudia ia hamaoroa lagani ta ta ai Iesu ena mase do idia laloatao, bema unai idia karaia idia ese ‘Lohiabada ena mase idia gwauraia hedinarai noho, ela bona ia ginidae.’  (1 Kor. 11:26) Iesu be nega dokona ai do ia “mai” karana ia perovetalaia danu. Ia ese hisihisi badana ia herevalaia neganai, ia gwau: “Taunimanima ena Natuna ena toa be guba ai do ia hedinarai bena tanobada ena iduhu ibounai be mai taitai danu edia kemena do idia botaia, bona do idia itaia taunimanima ena Natuna be mai ena siahu bona hairai bada ida guba ena ori latanai do ia mai.  [Iesu] be kibi regena bada ida ena aneru do ia siaia, bona idia ese not, saut, ist, bona west amo Dirava ena abia hidi taudia do idia haboua, guba ena kahana ta amo ela bona ena kahana ma ta dekenai.” (Mat. 24:29-31) “Dirava ena abia hidi taudia do idia haboua” negana be tanobada ai idia noho horoa taudia ibounai ese edia guba ahuna do idia abia negana ia herevalaia. Hisihisi badana ia matamaia murinai, to Aramagedono tuarina ia do vara lasi neganai, unai do ia vara. Bena 144,000 taudia ibounai be Iesu ida tanobada ena king taudia do idia tuari henia. (Apok. 17:12-14) Horoa taudia be guba dekenai idia do daekau lasi negana ai do ita karaia Memorial be dokona, badina unai nega ai Iesu be ia “mai” vadaeni.

16. Dahaka dainai oi ura inai lagani ena Memorial dekenai oi lao?

¹⁶ Namona be iseda lalona ita hadaia March 31, 2018 ena Memorial dekenai ita lao totona. Bona Iehova ita noia ita do ia durua, unai amo iena taunimanima ida lalotamona ai do ita noho! (Salamo 133:1 duahia.) Laloatao, nega ta Memorial dokona do ita karaia. Unai dainai, lagani ta ta ai ita karaia Memorial dekenai ita lao be namo, bona ita huanai ia noho lalotamona ita moalelaia.