1-2. (a) Iesu ena mauri bona haroro gaukara ita laloa neganai, iseda hemami be edena bamona? (b) Inai stadi lalonai dahaka do ita herevalaia?

 ISEDA lalokau tauna ta ia mase neganai, ia do ita reaia bada! Matamanai, ia do mase lasi neganai ia mamia hisihisi ita laloa neganai, ita lalohisihisi. To, ita ia hadibaia herevana ta, ia karaia gauna ta, eiava ena hagoadaia, o hevaseha herevana ta ita laloatao neganai, ita kiri.

² Unai hegeregerena, Iesu ese ia mamia hisihisina bona ena mase sivaraina ita duahia neganai, ita hebogahisi bada. Memorial negana ai, nega ita atoa Iesu ena boubou gauna ena anina ita laloa dobu totona. (1 Kor. 11:24, 25) To, Iesu be tanobada ai ia noho neganai, ia gwauraia bona karaia gaudia ita laloatao neganai, ita moale bada. Danu, hari ita totona ia karaia noho gaudia bona vaira nega ai do ia karaia gaudia ita laloa neganai, ita ia hagoadaia bada. Unai gaudia bona Iesu ena lalokau karana ita totona ita laloa dobu neganai, ita ia durua iseda tanikiu karana ita hahedinaraia totona. Inai stadi ai unai gaudia do ita herevalaia.

3. Dahaka dainai Iesu ena boubou gauna ita laloa bada?

³ Iesu ena mauri bona mase sivaraina ita laloa dobu neganai, ia karaia karana ita laloa bada. Iesu ena haroro gaukara lalonai, Dirava ena Basileia ese taunimanima totona do ia mailaia hahenamo ia harorolaia. Iesu ena boubou gauna bona do ia havaraia hahenamo idauidau edia hahediba herevadia ita lalodia bada. Iesu ena boubou gauna dainai ita tanikiu bada, badina unai ese dala ia kehoa Iehova bona Iesu ita tura henidia totona. Iesu idia abidadama henia taudia edia helaro be mauri hanaihanai do idia abia bona edia lalokau mase taudia do idia itaia lou. (Ioa. 5:28, 29; Roma 6:23) Ita be gau ta ita karaia lasi  unai hahenamo ita abia totona, bona Dirava bona Keriso ese ita totona idia karaia gauna ena davana ita haloua diba lasi. (Roma 5:8, 20, 21) To, edena dala ai iseda tanikiu karana ita hahedinaraia diba?

4. Edena dala ai Maria Magadala ese ena tanikiu karana ia hahedinaraia? (Laulau itaia.)

⁴ Mani Iuda hahinena Maria Magadala ena sivarai ita laloa. Ia be demoni 7 ese idia hahisia bada. Reana ia laloa tau ta ese do ia durua diba lasi. Unai dainai, Iesu ese ia amo unai demoni ia luludia neganai, ia moale bada herea! Ia be Iesu murinai ia raka bona ena nega, goada bona kohu ia gaukaralaia Iesu ena haroro gaukara ia durua totona. Oibe, unai dala amo Maria ese ena tanikiu karana ia hahedinaraia. (Luka 8:1-3) Maria be Iesu ese ia karaia gauna ia laloa bada, to reana ia laloparara lasi gabeai Iesu be ia totona kara badana ta do ia karaia. Ia ese taunimanima ibounai totona ena mauri do ia bouboulaia, bona “unai amo ia idia abidadama henia taudia ibounai” be mauri hanaihanai do idia moalelaia diba. (Ioa. 3:16) Ena be Maria be unai ia diba lasi, to Iesu ia badinaia noho, bona unai amo ia hahedinaraia Iesu ese ia totona ia karaia gauna ia laloa bada. Iesu be hisihisi auna ai hisihisi ia mamia noho neganai, Maria be ia badinai ia gini, badinai ia ura Iesu bona ma haida ia hagoadaia. (Ioa. 19:25) Iesu ia mase murinai, Maria bona ma hahine rua ese guria gabuna dekenai bonana namo muramura idia abia lao. (Mar. 16:1, 2) Maria be Iesu ia badinaia dainai Iehova ese ia hanamoa bada. Maria ia moale bada, badina Iesu be mase amo ia toreisi lou murinai, ia hedavari henia bona idia herevahereva. Hahediba taudia momo be unai hahenamo idia abia lasi.​—Ioa. 20:11-18.

5. Edena dala ai Iehova bona Iesu dekenai iseda tanikiu karana ita hahedinaraia diba?

⁵ Ita ese Iehova bona Iesu dekenai iseda tanikiu karana ita hahedinaraia totona, namona be iseda nega, goada, bona moni ita gaukaralaia Basileia ena gaukara ita durua totona.  Hegeregere, ita volantia diba Iehova tomadiho henia rumadia ita haginia bona hanamoa gaukarana ita durua totona.

6. Dahaka dainai ita gwau diba Iesu ena boubou gauna be ita ta ta eda harihari gauna?

⁶ Iehova bona Iesu be ita idia lalokau henia bada. Oibe, unai ita laloa dobu neganai, do ita ura ita lalokau henidia danu. (1 Ioa. 4:10, 19) Ita laloparara Iesu be ita ta ta totona ia mase neganai, iseda lalokau idia totona do ia bada ia lao. Aposetolo Paulo be Iesu ena mase ia laloa bada bona Galatia tadikaka taihu ia tore henidia neganai, ena hemami ia gwauraia. Ia gwau: “Dirava ena Natuna . . . ese lau ia lalokau henia bona lau totona sibona ia henia.” (Gal. 2:20) Iesu ena boubou dainai, Iehova ese ia kahirakahira dekenai oi ia veria lao, bona iena turana ai oi lao diba. (Ioa. 6:44) Iehova be oi dekenai gau namona ta ia itaia dainai, gau hereadaena ta ia henia, unai amo oi be iena turana ai oi lao diba. Unai kara ese emu kudouna ia hamarerea, a? Unai ese emu lalokau Iehova bona Iesu totona ia hagoadaia, a? Namona be sibona ita nanadaia, ‘Unai lalokau karana ese lau do ia veria dahaka lau karaia totona?’

7. Edena dala ai Iehova bona Iesu dekenai iseda lalokau ita hahedinaraia diba? (2 Korinto 5:14, 15; 6:1, 2)

⁷ Iehova bona Iesu lalokau henia karana ese ita ia hagoadaia ma haida ita lalokau henia totona. (2 Korinto 5:14, 15; 6:1, 2 duahia.) Iseda lalokau ita hahedinaraia dalana ta be haroro gaukara do ita goadalaia. Ita davaria taudia ibounai, ena be idia be bese o gado idau taudia, bona idia be taga o ogogami, sikuli bada o lasi, to ibounai ita haroro henidia be namo. Unai amo ita be Iehova ena ura hegeregerena ita gaukara, iena ura be “taunimanima idauidau do ia hamauria bona hereva momokani ena diba maoromaoro do idia abia.”​—1 Tim. 2:4.

8. Edena dala ai iseda tadikaka taihu dekenai lalokau ita hahedinaraia diba?

 ⁸ Iseda lalokau Iehova bona Iesu dekenai ita hamomokania dalana ma ta be iseda tadikaka taihu do ita lalokau henidia. (1 Ioa. 4:21) Namona be edia dabu gaudia ita henia bona hekwakwanai negadiai ita durudia. Edia lalokau tauna ta ia mase neganai idia ita hagoadaia, idia gorere neganai ita vadivadi, bona idia lalomanoka neganai idia ita hagoadaia. (2 Kor. 1:3-7; 1 Tes. 5:11, 14) Hanaihanai idia totona do ita guriguri, badina ita diba “kara maoromaoro tauna ena noinoi be mai ena siahu.”​—Iam. 5:16.

9. Iseda tadikaka taihu lalokau henia dalana ma ta be dahaka?

⁹ Iseda tadikaka ita lalokau henia dalana ma ta be, do ita gaukara goada idia ida maino ai do ita noho. Oibe, dika gwauatao karana dekenai Iehova ita tohotohoa be namo. Bema Iehova be mai ena ura ibounai ida ena Natuna ia henia ita totona ia mase, vadaeni namona be ita danu be mai iseda kudouna ibounai ida tadikaka taihu edia dika ita gwauatao, ani? Namo lasi Iesu ena parabole ai ia gwauraia hesiai tauna dikana ena haheitalai ita tohotohoa. Ena be ena biaguna ese ena abitorehai badana ia gwauatao, to unai hesiai tauna be ena tadikakana ena abitorehai maragina ia gwauatao lasi. (Mat. 18:23-35) Bema kongrigeisen lalonai ta ida oi hepapahuahu, Memorial hebouna oi do lao lasi neganai ia ida maino oi karaia diba, a? (Mat. 5:23, 24) Maino oi karaia neganai, oi hahedinaraia Iehova bona Iesu oi lalokau henidia bada.

10-11. Edena dala ai elda taudia ese idia hahedinaraia Iehova bona Iesu idia lalokau henia? (1 Petero 5:1, 2)

¹⁰ Edena dala ai elda taudia ese idia hahedinaraia diba Iehova bona Iesu idia lalokau henia? Dala badana ta be Iesu ena mamoe do idia naria namonamo. (1 Petero 5:1, 2 duahia.) Iesu ese aposetolo Petero dekenai unai point ia gwauraia. Nega toi Iesu ia gorea murinai, Petero ia ura dikadika ia hahedinaraia ia be Iesu ia lalokau henia bada. Iesu ia toreisi lou murinai, Petero ia nanadaia: “Simona, Ioane ena natuna e, lau oi lalokau henia, a?” Ita diba Petero be gau ibounai do ia karaia ena Biaguna dekenai ena lalokau ia hamomokania totona. Iesu be Petero ia hamaoroa: “Lauegu mamoe natudia oi naria.” (Ioa. 21:15-17) Bona Petero be ena mauri ibounai lalonai, Lohiabada ena mamoe ia naria namonamo. Unai kara amo iena lalokau Iesu totona ia hamomokania.

¹¹ Elda taudia e, Memorial hebouna ena vaira wiki bona ena murina wiki lalodiai, edena dala ai do umui hahedinaraia Iesu ena hereva Petero dekenai umui laloa bada? Oiemu lalokau Iehova bona Iesu dekenai oi hamomokania totona, namona be hanaihanai mamoe vadivadi gaukara umui karaia, bona unai nega ai manoka taudia umui hagoadaia Iehova dekenai idia giroa lou totona. (Ese. 34:11, 12) Danu, Memorial dekenai idia mai Baibel stadi bona kamonai taudia matamatadia umui hagoadaia. Idia umui welkam henia badina ita ura gabeai idia danu be Iesu ena hahediba taudia ai do idia lao.

12. Dahaka dainai Iesu ena hanuaboi ginigabena ai ia gwauraia herevadia ita laloa dobu karana ese ita do ia hagoadaia? (Ioane 16:32, 33)

¹² Iesu do ia mase hanuaboina ai, ena hahediba taudia dekenai ia gwau: “Tanobada ai hisihisi do umui davaria, to umui lalogoada! Badina lau be tanobada lau halusia vadaeni.” (Ioane 16:32, 33 duahia.) Iesu be ena inai taudia ese idia hagaria neganai, dahaka ese ia durua ia gari lasi totona? Ia be Iehova dekenai  ia tabekau. Iesu ia diba ena murinai idia raka taudia danu be unai bamona hahetoho do idia davaria, unai dainai Iehova ia noia idia do ia naria. (Ioa. 17:11) Dahaka dainai unai ese ita ia hagoadaia? Badina Iehova ena goada ese iseda inai taudia edia goada ia hanaia. (1 Ioa. 4:4) Iehova be gau ibounai ia itaia. Unai dainai, ita abia dae momokani Iehova dekenai ita tabekau neganai, ita do ia durua ita gari lasi totona.

13. Edena dala ai Arimatea tauna Iosepa be gari lasi karana ia hahedinaraia?

¹³ Arimatea tauna Iosepa ena sivarai mani ita laloa. Iuda taudia ese idia matauraia bada, bona ia be Iuda taudia ena kota badana, Sanhedrin, ena memba ta. To, Iesu be tanobada ai ia noho neganai, Iosepa be gari tauna. Ioane ia gwau, Iosepa be “Iesu ena hahediba tauna ta, to Iuda taudia dekenai ia gari dainai, unai ia gwauraia hedinarai lasi.” (Ioa. 19:38) Ena be Iosepa be Basileia sivaraina ia ura henia, to haida dekenai ia hahedinaraia lasi ia be Iesu ia abidadama henia. Reana ia gari badina taunimanima ese ia do idia matauraia lasi bema idia davaria ia be Iesu ena hahediba tauna ta. To, Baibel ia gwau Iesu ia mase murinai, Iosepa be “mai gari lasi ida Pilato dekenai ia lao bona Iesu ena tauanina totona ia noia.” (Mar. 15:42, 43) Iosepa ia hunia lasi, to ia hahedinaraia ia be Iesu ena hahediba tauna ta.

14. Bema taunimanima dekenai oi gari dahaka oi karaia be namo?

¹⁴ Oi be Iosepa bamona taunimanima dekenai oi gari, a? Nega haida sikuli o gaukara gabuna ai oi hemarai dainai oi ura lasi hahedinaraia oi be Iehova ena Witnes tauna ta, a? Oi ura lasi pablisa ai oi lao o bapatiso oi abia badina taunimanima dekenai oi gari, a? Namo lasi unai bamona hemami ese oi ia koua kara maorona oi karaia totona. Iehova dekenai oi guriguri, bona oi noia oi dekenai goada ia henia ena ura oi karaia totona. Iehova ese emu guriguri ia haerelaia dalana oi itaia neganai, unai ese oi do ia hagoadaia bona do oi gari lasi.​—Isa. 41:10, 13.

15. Iesu be ena hahediba taudia dekenai ia hedinarai murinai, dahaka idia karaia? (Luka 24:52, 53)

¹⁵ Iesu ia mase neganai iena hahediba taudia be idia lalohisihisi bada. Mani oi laloa oi be idia huanai oi noho. Idia be edia turana lalokauna ia mase sibona lasi, to idia mamia edia helaro ia ore danu. (Luka 24:17-21) To, Iesu be idia dekenai ia hedinarai neganai, ia durudia unai amo idia laloparara Baibel ena peroveta herevadia be ia dekenai idia guguru.  Danu idia dekenai mai anina bada gaukarana ta ia henia. (Luka 24:26, 27, 45-48) Dina 40 murinai, Iesu be guba dekenai ia daekau neganai, hahediba taudia be idia lalohisihisi lasi to idia moale bada. Idia moale badina idia diba edia Biaguna be ia mauri noho bona ia hegaegae idia ia durua edia gaukara matamatana idia hagugurua totona. Oibe, unai moale dainai Iehova hanamoa karana idia hadokoa lasi.​—Luka 24:52, 53 duahia; Kara 5:42.

16. Edena dala ai Iesu ena hahediba taudia ita tohotohoa diba?

¹⁶ Edena dala ai Iesu ena hahediba taudia ita tohotohoa diba? Memorial negana sibona lasi, to lagani ibounai lalonai Iehova tomadiho henia karana ita moalelaia be namo. Ita moale totona Dirava ena Basileia be iseda mauri ai do ita atoa guna. Hegeregere, momo be moni gaukara ena nega idia haidaua, unai amo idia haroro, hebou idia lao bona famili tomadiho idia karaia totona. Haida be disisen idia karaia kohu momo idia hoia lasi totona, unai amo idia be kongrigeisen idia durua diba eiava pablisa be lasi gabuna ai idia lao diba. Iehova ita hesiai henia noho totona haheauka be gau badana, to ia gwauhamata bema iseda mauri ai Basileia ena gaukara ita atoa guna, ita do ia hanamoa bada.​—Aon. 10:22; Mat. 6:32, 33.

17. Inai Memorial negana ai dahaka do oi karaia? (Laulau itaia.)

¹⁷ Ita moale badina Tuesday, April 4 ai Memorial hebouna do ita karaia. To, namo lasi ita naria ela bona unai nega, bena Iesu ena mauri, ena mase bona ia bona Iehova ese idia hahedinaraia lalokauna ita laloa dobu. Namona be nega ita atoa Memorial ena hua lalonai unai ita laloa dobu totona. Hegeregere, Nega Matamata Trensleisen ena Apendiks B12 ena maua ladana, “Iesu Ena Wiki Ginigabena Tanobada Ai,” oi duahia bona oi laloa dobu. Unai oi karaia lalonai, emu tanikiu karana, lalokau, gari lasi bona moale karana idia habadaia Baibel siridia oi tahua. Bena emu tanikiu karana do oi hahedinaraia dalana oi laloa. Oibe, Iesu ese inai Memorial negana ai iena mase oi laloatao totona oi karaia gaudia ibounai do ia laloa bada.​—Apok. 2:19.