1, 2. Dahaka ese ia hahedinaraia aposetolo Paulo be Dirava ena hebogahisi hereadaena dainai ia moale?

APOSETOLO PAULO be mai momokani ida ia gwau: “[Dirava ese] lau dekenai ia hahedinaraia hebogahisi hereadaena be ia hahedinaraia kava lasi.” (1 Korinto. 15:9, 10 duahia.) Paulo be guna Keristani taudia ia dagedage henia dainai, ia laloa Dirava ese ia hebogahisi henia be anina lasi.

² Paulo be ia do mase lasi neganai, ia ese Timoteo ia torea henia ia gwau: “Lau be iseda Lohiabada Keriso Iesu lau tanikiu henia, ia ese lau dekenai siahu ia henia, badina ia laloa lau be ia lau badinaia dainai, lau dekenai inai hesiai gaukarana ia henia.” (1 Tim. 1:12-14) Unai hesiai gaukarana be dahaka? Paulo ese Efeso kongrigeisen ena elda taudia ia hamaoroa, ia gwau: “Lau laloa egu mauri be gau badana lasi, to namona be egu heau helulu bona Lohiabada Iesu amo lau abia hesiai gaukarana lau haorea, bona Dirava ena hebogahisi  hereadaena ena sivarai namona, do lau gwauraia guguru.”​—Kara 20:24.

3. Paulo be dahaka maduna ia abia? (Laulau ginigunana herevalaia.)

³ Paulo ese edena “sivarai namona” ia harorolaia, bona unai ese Iehova ena hebogahisi hereadaena ia hahedinaraia? Ia ese Efeso Keristani taudia ia hamaorodia, ia gwau: “Umui kamonai vadaeni, lau ese maduna lau abia umui do lau durua Dirava ena hebogahisi hereadaena amo namo umui abia totona.” (Efe. 3:1, 2) Paulo ese ia abia maduna be Iuda lasi taudia dekenai sivarai namona do ia gwauraia. Unai amo idia be Mesia Basileiana lalonai Keriso ida idia lohia diba. (Efeso 3:5-8 duahia.) Paulo be unai sivarai namona ia harorolaia goadagoada, bona ia hahedinaraia Dirava ese ia dekenai ia hahedinaraia hebogahisi hereadaena be ia hahedinaraia “kava lasi,” ita dekenai ia be haheitalai namona.

4, 5. Dahaka dainai ita gwau diba “Basileia ena sivarai namona” bona “Dirava ena hebogahisi hereadaena ena sivarai namona” be hegeregere?

⁴ Inai nega dokona ai, Iehova ena taunimanima edia maduna be “Basileia ena sivarai namona be tanobada ibounai dekenai do idia harorolaia.” (Mat. 24:14) Ita gwauraia sivaraina be “Dirava ena hebogahisi hereadaena ena sivarai namona” danu, badina Basileia ena lohia henunai do ita abia hahenamo ibounai be Keriso amo Iehova ese ita dekenai iena hebogahisi ia hahedinaraia. (Efe. 1:3) Paulo hegeregerena, mai moale ida Iehova ena hebogahisi hereadaena dainai ita haroro goadagoada, a?​—Roma 1:14-16 duahia.

⁵ Vanegai stadi ese ia hahedinaraia, ena be ita be goevadae lasi taudia, to Iehova ena hebogahisi hereadaena dainai namo ita davaria. Unai dainai ita ura taunimanima ibounai dekenai Iehova ese iena lalokau ia hahedinaraia dalana bona namo do idia davaria dalana ita gwauraia. Dirava ese edena dala haida ai iena hebogahisi hereadaena ia hahedinaraia?

6, 7. Taunimanima dekenai mauri davalaia boubouna ita herevalaia neganai, edena dala ai ita be Dirava ena hebogahisi hereadaena ena sivarai namona ita gwauraia?

⁶ Inai tanobada dikana ai, momo be hemarai lasi ida kara dikadia idia karaia noho, unai dainai ta ese idia ia ruhaia be namo lalohadaina be idia laloa bada lasi. Danu, taunimanima momo idia laloparara hari idia noholaia mauri dalana ese moale korikori ia havaraia lasi. To, Iehova ena Witnes taudia idia hereva henidia murinai, kara dika bona ita ia hakaua dalana idia lalopararalaia, bona kara dika ena igui amo ita roho mauri dalana idia diba. Bona kudou-maoro taudia idia moale, badina idia laloparara Iehova ena lalokau bona hebogahisi hereadaena dainai, ia ese ena Natuna be tanobada dekenai ia siaia mai bona kara dika bona mase amo ita ia hoia lou.​—1 Ioa. 4:9, 10.

⁷ Paulo ese Iehova ena lalokau Natuna ia herevalaia ia gwau: “Unai lalokau natuna ese mauri davana ia karaia bona ena rara amo ita ia ruhaia. Unai dainai Dirava ese iseda kerere ia gwauatao, iena hebogahisi hereadaena hegeregerena.” (Efe. 1:7) Keriso ena mauri davalaia boubouna ese ia hamomokania Dirava be ita ia lalokau henia bona Iena hebogahisi hereadaena be bada herea. Unai dainai bema Iesu ese ia bubua rarana ita abidadama henia, Dirava ese iseda kara dika do ia gwauatao bona iseda  lalomamina be do ia goeva! (Heb. 9:14) Unai be sivarai namona ma haida dekenai ita gwauraia totona!

8. Dahaka dainai kara dika taudia be Dirava ida maino idia karaia be namo?

⁸ Iseda maduna be taunimanima ita hadibaia idia be edia Havaraia Tauna idia tura henia diba. Taunimanima ese Iesu ena boubou gauna idia do abidadama henia lasi neganai, Dirava dekenai idia be ena inai taudia. Aposetolo Ioane ia gwau: “Natuna ia abidadama henia tauna be mauri hanaihanai do ia abia, to Natuna ia kamonai henia lasi tauna be mauri do ia itaia lasi, to Dirava ena badu be ia latanai ia noho.” (Ioa. 3:36) Ita moale, badina Keriso ena boubou gauna dainai, Dirava ida maino ita karaia diba. Paulo ia gwau: “Guna umui be Dirava ena inai taudia bona ia amo umui daudau, badina gau dikadia umui laloa. To unai tauna ena mase amo Dirava ese maino ia karaia, bona unai tauna ena tauanina amo unai ia karaia.”​—Kol. 1:21, 22.

9, 10. (a) Keriso ese ena horoa tadikaka dekenai dahaka maduna ia henia? (b) “Mamoe ma haida” ese edena dala ai edia horoa tadikaka idia durua?

⁹ Paulo ia gwau Keriso ese tanobada ai ena horoa tadikaka dekenai “maino ena hesiai gaukara” ia henia. Unai hahedinaraia totona, Paulo be horoa Keristani taudia ginigunadia ia torea henia, ia gwau: “Unai ibounai be Dirava amo, ia be Keriso amo ita ida maino ia karaia, bona maino ena hesiai gaukara be ita dekenai ia henia. Unai be: Keriso amo Dirava be tanobada ida maino ia karaia, bona edia kara dika ia laloa lasi, bona unai maino herevana harorolaia gaukarana be ai dekenai ia henia. Unai dainai ai be gwaukau taudia bamona Keriso ena gabu ai abia, unai be hegeregere Dirava be ai amo taunimanima ia boiria. Ai be Keriso ena gabu ai abia dainai, ai noinoi: ‘Dirava ida maino umui karaia.’”​—2 Kor. 5:18-20.

¹⁰ “Mamoe ma haida” idia moale unai hesiai gaukara lalonai edia horoa tadikaka idia durua totona. (Ioa. 10:16) Idia be Keriso ena gwaukau taudia bamona, taunimanima dekenai hereva momokani idia hadibaia bona idia durudia Iehova idia tura henia totona. Dirava ena hebogahisi hereadaena ena sivarai namona dekenai unai be mai anina bada gaukarana.

11, 12. Dahaka dainai taunimanima ese Iehova idia guriguri henia diba karana idia dibaia be moale gauna?

¹¹ Taunimanima momo idia guriguri, badina unai ese edia lalona ia hamoalea, to idia abia dae lasi Dirava ese edia guriguri ia kamonai. Namona be idia diba Iehova be “guriguri [ia] kamonai” Diravana. Davida ia gwau: “Badina be oi ese aiemai guriguri oi kamonai. Taunimanima ibounai be oi dekenai do idia mai, edia dika do oi gwauatao totona. Aiemai kerere ese ai idia halusia neganai, oi ese unai dika oi gwauatao noho.”​—Sal. 65:2, 3.

¹² Iesu be ena hahediba taudia dekenai ia gwau: “Bema egu ladanai gau ta umui noia, do lau karaia.” (Ioa. 14:14) Momokani, inai hereva “gau ta” be Iehova ena ura ida ia hegeregere gauna ta ia herevalaia. Ioane ia gwau: “Ita diba momokani, herevana dahaka ita gurigurilaia, bema unai be Dirava ena ura hegeregerena, ia ese ita do ia kamonai henia.” (1 Ioa. 5:14) Mai moale ida ma haida ita hadibaia, guriguri be dala namona Iehova ena “hebogahisi hereadaena ena terona” kahirakahira ita lao totona. (Heb. 4:16) Idia dekenai guriguri dala maorona  ita hadibaia, Dirava sibona do idia guriguri henia, bona gau maorodia totona do idia guriguri, bema unai ita karaia, idia be Iehova kahirakahira do idia lao bona hekwakwanai negadia maino do idia davaria.​—Sal. 4:1; 145:18.

13, 14. (a) Vaira nega ai, horoa taudia be dahaka hahenamo do idia abia? (b) Horoa taudia ese taunimanima totona dahaka gaukara do idia karaia?

¹³ Iehova ese iena hebogahisi hereadaena do ia hahedinaraia ela bona inai tanobada ena dokona bona unai murinai danu. Paulo ese Keriso ida guba Basileia ai do idia lohia taudia​—144,000 taudia​—dekenai Dirava ese ia henia hahenamo ia herevalaia, ia gwau: “Dirava ena hebogahisi be bada herea, bona ita ia lalokau henia bada dainai, Keriso ida ita ia hamauria hebou, ena be ita be kerere lalonai ita mase. (Hebogahisi hereadaena dainai hahemauri umui abia). Danu Keriso Iesu ida ita hakapua dainai, Dirava ese ia ida ita ia hatorea isi lou hebou bona guba dekenai ita ia hahelaia hebou. Vadaeni do ia mai nega oromana lalonai, Dirava ese ena hebogahisi hereadaena do ia hahedinaraia, unai be gau namodia amo idia honu momokani. Bona ita, Keriso Iesu ida ita hakapua taudia dekenai, ena hariharibada ia hahedinaraia karana amo unai do ia karaia.”​—Efe. 2:4-7.

¹⁴ Guba ai horoa Keristani taudia be Keriso ida terona ai do idia helai bona lohia neganai, Iehova ese idia dekenai do ia henia maduna ita lalohadailaia be auka. (Luka 22:28-30; Fili. 3:20, 21; 1 Ioa. 3:2) Idia dekenai Iehova “ese ena hebogahisi hereadaena do ia hahedinaraia.” Oibe, idia be “Ierusalema matamatana,” Keriso ena headava matamata kekenina unai. (Apok. 3:12; 17:14; 21:2, 9, 10) Idia be Iesu ida do idia gaukara hebou “bese idauidau hanamoa totona,” kamonai taudia be kara dika bona mase amo do idia ruhaia, bona do idia durudia ela bona goevadae maurina do idia abia.​—Apokalupo 22:1, 2, 17 duahia.

15, 16. Vaira nega ai, Iehova ese edena dala ai “mamoe ma haida” dekenai ena hebogahisi hereadaena do ia hahedinaraia?

¹⁵ Efeso 2:7 ia gwau, “do ia mai nega oromana lalonai” Dirava ese ena hebogahisi hereadaena do ia hahedinaraia. Ita daradara lasi, Iehova ena tanobada matamata ai, ia “ese ena hebogahisi hereadaena do ia hahedinaraia, unai be gau namodia amo idia honu momokani.” (Luka 18:29, 30) Tanobada ai Iehova ese ena hebogahisi do ia hahedinaraia dalana badana ta be, ia ese “mase gabuna” amo mase taudia do ia hatorea isi lou. (Iobu 14:13-15; Ioa. 5:28, 29) Keriso ia do mase lasi neganai, idia mase abidadama tatau bona hahine, bona dina gabedia ai idia mase “mamoe ma haida” be do idia toreisi lou bona Iehova do idia hesiai henia noho.

¹⁶ Dirava idia dibaia lasi bona idia mase taudia milioni momo danu do idia toreisi lou. Bona Iehova ena lohia siahuna do idia badinaia. Ioane ia gwau: “Mase taudia lau itaia, ladana bada bona ladana maragi taudia, idia be terona vairanai idia gini bona Dirava ese lokua toretoredia ia kehoa. To lokua toretore ma ta danu be unuseniai ia noho bona ia kehoa, unai be mauri bukana. Bona terona latanai ia helai tauna ese mase taudia edia kara, mauri bukana lalonai idia torea gaudia hegeregerena, ia hahemaoro henidia. Bona davara ese ia lalonai idia mase taudia ia henia daekau, bona mase bona Mase Gurina ese idia lalonai idia noho taudia idia henia daekau bona terona ai ia helai tauna ese edia kara hegeregerena idia ta ta ia hahemaoro henia.” (Apok. 20:12, 13) Oibe, idia toreisi lou taudia ese Baibel ai idia noho hakaua herevadia idia badinaia dalana idia dibaia be namo. Danu, idia ese “lokua  toretoredia” lalonai idia noho hakaua hereva matamatadia do idia badinaia be namo, unai be Iehova ena taravatu tanobada matamata totona. Unai lokua toretoredia ai idia noho gaudia hahedinaraia karana ese Iehova ena hebogahisi hereadaena ia hahedinaraia.

17. Ita haroro neganai, dahaka ita laloa be namo?

¹⁷ Dokona ia kahirakahira lalonai, namona be Basileia ena sivarai namona ita harorolaia! (Mar. 13:10) Unai sivarai namona ese Iehova ena hebogahisi hereadaena ia hahedinaraia. Ita haroro neganai, unai ita laloa be namo. Oibe, ita haroro neganai, ita ura Iehova ita hanamoa. Unai ita karaia diba, bema taunimanima ita hadibaia tanobada matamata ai do ita abia hahenamodia be Iehova ena hebogahisi ena toana.

18, 19. Edena dala ai Iehova ena hebogahisi hereadaena ita hanamoa?

¹⁸ Ma haida ita haroro henia neganai, namona be ita hahedinaraia Keriso ena Basileia ena lohia henunai, taunimanima ibounai be mauri davalaia boubouna amo namo do idia davaria, bona goevadae taudia ai do idia lao. Baibel ia gwau: “Dirava ese ia havaraia gaudia ibounai be dika ena igui amo do ia ruhadia, bona Dirava ena natudia edia ura kwalimu hereadaena do idia abia.” (Roma 8:21) Iehova ena hebogahisi hereadaena dainai unai do ia vara.

¹⁹ Ita ura idia kamonai taudia dekenai Apokalupo 21:4, 5 ai ia noho gwauhamata ita gwauraia, ia gwau: “[Dirava] ese mata ranu ibounai be edia matana amo do ia dahua oho, bona mase be do ia ore, bona lalohisihisi, taitai, bona hisihisi danu be do idia ore. Gau gunadia be idia ore vadaeni.” Bona terona latanai ia helai Tauna ia gwau: “Lau ese gau ibounai lau hamatamataia noho.” Danu, ia gwau: “Inai hereva oi torea, badina idia be taunimanima ese idia abia dae diba bona idia be momokani.” Ma haida dekenai unai sivarai namona ita harorolaia neganai, ita ese Iehova ena hebogahisi hereadaena ita hanamoa!