1, 2. Dahaka dainai idia taitai noho taudia hagoadaia karana ita herevalaia be namo? (Laulau ginigunana herevalaia.)

SUSI ia gwau: “Aiemai natuna mero ia mase murinai, kahirakahira lagani ta lalonai emai lalona ia hisihisi bada.” Tadikaka ma ta ena adavana ia mase neganai, ia gwau “lau mamia hisihisina be lau gwauraia hedinarai diba lasi.” Madi, taunimanima momo be unai idia mamia danu. Keristani kongrigeisen lalonai, reana momo idia laloa edia lalokau taudia be do idia mase lasi, to Aramagedono do idia itaia. Reana emu lalokau tauna ta ia mase eiava ia lalohisihisi noho tauna ta oi diba, to reana do oi henanadai: ‘Edena dala ai idia taitai noho taudia ita hagoadaia diba?’

² Reana oi kamonai taunimanima idia gwau, nega ia hanaia lalonai emu lalometau danu be do ia ore ia lao. To, oi laloa unai sibona ese ta ena lalohisihisi ia haorea diba, a? Vabu ta ia gwau, “lau laloa ta ese ena nega ia gaukaralaia dalana amo ena lalohisihisi ia haheaukalaia diba.” Hegeregere, bema oi ura emu toto ia ore, namona be muramura oi atoa bona nega oi henia ia namo totona, ta ena lalona ai ia mamia hisihisina danu be unai bamona. Vadaeni dahaka ese idia lalohisihisi bada taudia ia durua diba  idia mamia noho hisihisina idia haheaukalaia totona?

3, 4. Dahaka dainai ita gwau diba Iehova be ia taitai noho tauna ese ia mamia hisihisina ia lalopararalaia?

³ Ita abia dae momokani, iseda hebogahisi guba Tamana, Iehova, ese ita dekenai lalogoada do ia henia. (2 Korinto 1:3, 4 duahia.) Hebogahisi karana dekenai Iehova be haheitalai hereadaena, ia ese ena taunimanima ia hamaoroa: “Lau Lohiabada inai, lau ese umui lau hagoadaia noho.”​—Isa. 51:12; Sal. 119:50, 52, 76.

⁴ Iseda hebogahisi Tamana ena lalokau taudia danu be idia mase vadaeni, hegeregere Aberahamo, Isako, Iakobo, Mose, bona King Davida. (Num. 12:6-8; Mat. 22:31, 32; Kara 13:22) Baibel ese ia hahedinaraia Iehova be ia ura dikadika mase taudia ia hatorea isi lou, bona ia be unai nega ia naria noho. (Iobu 14:14, 15, NWT) Idia toreisi lou taudia be do idia moale bona edia tauanina be do ia goada. Mani oi laloa, Dirava ena lalokau Natuna​—“Dirava be [ia] dekenai ia moale” tauna unai​—⁠be hisihisi bada ia mamia ela bona ia mase. (Aon. 8:22, 30) Iehova ese unai nega ai ia mamia hisihisina be ta ese ia gwauraia diba lasi.​—Ioa. 5:20; 10:17.

5, 6. Iehova ese edena dala ai ita ia hagoadaia diba?

⁵ Ita abia dae momokani Iehova be ita do ia durua. Unai dainai guriguri amo ia dekenai ita mamia hisihisina ita gwauraia hedinarai. Ita moale badina Iehova be iseda hemami ia lalopararalaia bona ita do ia hagoadaia! To edena bamona unai ia karaia?

⁶ Dirava ese ita ia durua dalana ta be ena “lauma helaga” amo ita ia hagoadaia. (Kara 9:31) Dirava ena gaukara siahuna ena goada be bada herea bona ita ia hagoadaia diba. Iesu ia gwauhamata iseda guba Tamana ese “lauma helaga be idia noinoi taudia dekenai do ia henia!” (Luka 11:13) Taihu Susi ia gwau: “Nega momo ai tui diho bona Iehova ai noia goadagoada ai ia hagoadaia totona. Unai nega ta ta ai, Dirava ena maino ese emai kudouna bona lalona ia gimaia.”​—Filipi 4:6, 7 duahia.

7, 8. Dahaka dainai ita diba momokani Iesu ese ita do ia hagoadaia?

⁷ Iesu be tanobada ai ia noho neganai, ia ese ena Tamana, Iehova, ena hebogahisi karana be ena hereva bona kara amo ia hahedinaraia goevagoeva. (Ioa. 5:19) Dirava ese Iesu ia siaia, “kudouna idia makohia taudia” bona “taitai taudia ibounai” ia hagoadaia totona. (Isa. 61:1, 2; Luka 4:17-21) Taunimanima dekenai hebogahisi bada ia hahedinaraia​—⁠edia hisihisi ia lalopararalaia bona ia ura dikadika idia ia durua.​—Heb. 2:17.

⁸ Iesu ia matamata neganai, iena famili taudia bona tura namodia haida idia mase danu. Toana be unai negai danu, iena tanobada tamana, Iosepa, ia mase. * Mani oi laloa, unai nega aukana lalonai Iesu ese ia sibona, iena sinana, tadikaka, bona taihudia ia hagoadaia danu be namo.

9. Lasaro ia mase neganai, edena dala ai Iesu ese ena hebogahisi karana ia hahedinaraia?

⁹ Iesu be ena haroro gaukara ia hamatamaia neganai, ia ese taunimanima edia hisihisi ia lalopararalaia bona idia ia hebogahisi  henia. Hegeregere, iena tura namona Lasaro ia mase negana mani ita laloa. Ena be Iesu ia diba ia ese Lasaro do ia hatorea isi lou, to Maria bona Mareta ese idia mamia hisihisina ia mamia danu. Idia ruaosi ia hebogahisi henia bada dainai, ia tai matamaia.​—Ioa. 11:33-36.

10. Dahaka dainai ita diba momokani Iesu be ita mamia hisihisina ia lalopararalaia?

¹⁰ Iesu ese taunimanima edia hisihisi ia laloa karana ese edena bamona ita ia hagoadaia? Baibel ia gwau, “Iesu Keriso be ia idau lasi, varani, hari, bona ela bona hanaihanai.” (Heb. 13:8) “Mauri Gunalaia Tauna” be taunimanima edia hisihisi ia lalopararalaia dainai, ia ese “hahetoho idia davaria taudia ia durua diba.” (Kara 3:15; Heb. 2:10, 18) Unai dainai, ita diba momokani ma haida be hisihisi idia mamia neganai, Keriso be idia mamia hisihisina ia lalopararalaia, bona “nega maorona ai” idia dekenai lalogoada do ia henia.​—Heberu 4:15, 16 duahia.

11. Edena siri ese oi idia hagoadaia?

¹¹ Dirava ena Hereva lalonai, hagoadaia siri momo idia noho, Lasaro ia mase negana ai Iesu ese ia mamia hisihisina be idia ta. Momokani, “guna Toretore Helagadia dekenai idia torea herevadia ibounai be ita hadibaia totona idia torea. Bona unai hereva ese ita idia durua ita haheauka totona, bona Toretore Helagadia ese ita dekenai goada ia henia, unai amo helaro ita abia.” (Roma 15:4) Bema oi be oi taitai noho, henunai idia noho siri amo goada oi abia diba:

• “Lohiabada be lalohisihisi taudia kahirakahira ia noho, bona ia ese edia lalona ia ore taudia ia hamauria noho.”​—Sal. 34:18, 19.

• “Egu lalona ia hekwarahi momo neganai, oi ese lau oi hagoadaia, bona egu lauma oi hamoalea noho.”​—Sal. 94:19.

• “Dirava iseda Tamana ese ita ia lalokau henia. Bona iena hebogahisi hereadaena amo ita ia hagoadaia hanaihanai bona ita dekenai helaro namona ia henia. Namona be Ia bona iseda Lohiabada Iesu Keriso ese emui kudouna idia hagoadaia, vadaeni . . . do umui gini goada.”​—2 Tes. 2:16, 17. *

12. Edena mai anina bada dalana ta ai ma haida ita hagoadaia diba?

¹² Idia lalohisihisi taudia ese Keristani kongrigeisen lalonai goada idia abia diba danu. (1 Tesalonika 5:11 duahia.) Edena dala ai ia “laloa metau tauna” oi hagoadaia diba? (Aon. 17:22) Laloatao, “regerege lasi dekenai ita noho be mai ena nega, bona do ita herevahereva danu be mai ena nega.” (Had. 3:7) Vabu ta ladana Dalene ia gwau: “Idia lalohisihisi taudia ese edia lalohadai bona hemami idia gwauraia hedinarai be namo. Unai dainai idia hereva neganai, oi kamonai sibona be mai anina bada​—bona edia hereva oi utua lasi.” Junia ena tadikaka be sibona ia hamasea, ia gwau: “Ena be idia lalohisihisilaia gauna oi lalopararalaia lasi, to mai anina bada gauna be oi ura edia hemami oi lalopararalaia.”

13. Lalohisihisi karana dekenai dahaka ita laloatao be namo?

¹³ Laloatao danu, taunimanima ese edia lalona ai idia mamia hisihisina be dala idauidau ai idia hahedinaraia. Nega haida do ia auka ta ese ia mamia hisihisina be ma ta dekenai ia gwauraia hedinarai totona. Baibel  ia gwau: “Oiemu moale be oi sibona oiemu. Oiemu lalohisihisi be oi sibona oiemu. Idau tauna ta ese oi danu umui abia hebou diba lasi.” (Aon. 14:10) Ena be ta ese ia mamia hisihisina be ma ta dekenai ia gwauraia, to reana do ia auka ia gwauraia herevana be ma haida ese idia lalopararalaia totona.

14. Idia lalohisihisi taudia be edena bamona ita hagoadaia diba?

¹⁴ Momokani, nega haida do ita diba lasi dahaka hereva do ita gwauraia ia lalohisihisi tauna dekenai. To Baibel ia gwau, “aonega tauna ena hereva ese, taunimanima idia hamauria diba.” (Aon. 12:18) Momo be inai buklet, Oiemu Lalokau Tauna ta Ia Mase Neganai, idia gaukaralaia ma ta idia hagoadaia totona. * To nega momo ita karaia diba gauna be “idia taitai taudia ida [ita] taitai.” (Roma 12:15) Gaby, ena adavana ia mase, ia gwau: “Nega haida lau tai sibona, unai dala amo egu hemami lau hahedinaraia diba. Unai dainai egu turadia be lau ida idia tai neganai, goada lau abia. Unai nega ai lau mamia haida danu be lau mamia hisihisina idia mamia.”

15. Bema emu hereva amo ia lalohisihisi tauna oi hagoadaia diba lasi, dahaka oi karaia diba? (Maua ladana “ Hagoadaia Hereva Namodia” itaia danu.)

¹⁵ Bema ia auka ia lalohisihisi tauna dekenai hagoadaia herevana oi gwauraia, reana emu hagoadaia herevana be kadi ta, email, teks, o revareva ta ai oi torea diba bona oi siaia. Reana hagoadaia sirina ta, eiava mase tauna ena kara namona ta, eiava ia ida oi karaia hebou gauna ta oi herevalaia diba. Junia ia gwau: “Hagoadaia hereva kwadogina lau abia eiava taihu ma ta bamoa karana ese lau ia durua bada. Unai amo lau mamia idia ese lau idia lalokau henia bona laloa bada.”

16. Edena dala ma ta ai ia lalometau tauna ita hagoadaia diba?

 ¹⁶ Iseda guriguri ese idia lalohisihisi noho tadikaka taihu ia hagoadaia diba danu. Ena be ia auka unai oi karaia totona, badina oi laloa dika oi tai, to mai kudouna ibounai ida oi gwauraia gurigurina ese ia lalometau tauna ia hagoadaia diba. Dalene ia gwau: “Nega haida taihu haida be lau hagoadaia totona idia mai neganai, idia lau noia guriguri kwadogina do idia gwauraia. Idia guriguri matamaia neganai, nega haida ia auka idia hereva totona, to hereva haida idia gwauraia murinai, goada idia abia lou bena edia guriguri idia haorea. Edia abidadama goadana, edia lalokau, bona lau idia laloa bada karana ese egu abidadama ia hagoadaia momokani.”

17-19. Dahaka dainai ta ita hagoadaia noho be namo?

¹⁷ Taunimanima be idauidau dainai, idia lalohisihisi ena daudau danu be idauidau. Momokani, ta ia mase neganai, turadia bona varavara be momo, to mase idia guria murinai momo be edia ruma dekenai idia giroa lou, unai bamona negadiai idia lalohisihisi noho taudia ita hagoadaia noho be namo. “Tau ta ena turana ese ia lalokau henia noho, nega ibounai, bona nega dika ia vara neganai, oiemu tadikakana ese iena lalokau ia hedinaraia noho.” (Aon. 17:17) Namona be idia lalohisihisi noho taudia ita hagoadaia noho, ela bona edia lalona ia goada momokani.​—1 Tesalonika 3:7 duahia.

¹⁸ Laloatao, gau haida ese idia taitai noho taudia edia lalona ia hahisia diba. Reana badina edia headava dinana idia laloa, mase tauna ese ia ura henia bada miusiki ta idia kamonai, foto haida idia itaia, idia karaia hebou gaukara haida idia laloa, eiava gau ta ena bonana o regerege ta idia laloa lou. Bema ia do lalohisihisi noho vabu o dogae be nega ginigunana gau ta ia karaia, hegeregere ia sibona be hebouhebou ta, eiava memorial dekenai ia lao, do ia lalohisihisi bada. Tadikaka ta ia gwau: “Egu adavana ia mase murinai, lau laloa emai headava dinana laloatao negana ai do lau lalohisihisi bada, to unai nega ia ginidae neganai, tadikaka taihu haida ese egu tura haida idia boiria bona ai moale hebou.”

¹⁹ Laloatao, idia lalohisihisi noho taudia ita hagoadaia noho be namo, spesel negadiai sibona lasi. Junia ia gwau: “Headava dinana laloatao negana sibona lasi, to nega ma haida ai ia lalometau tauna ita hagoadaia neganai, namo bada ia vara diba. Unai bamona hahegoada karana be mai anina bada bona ta ia hagoadaia bada.” Momokani, ta ena lalokau tauna ta ena mase ese ia havaraia hisihisina do ita haorea diba lasi, to gau haida ita karaia diba ia lalometau tauna ita hagoadaia totona. (1 Ioa. 3:18) Gaby ia gwau: “Elda taudia edia heduru dainai, Iehova lau tanikiu henia, badina unai nega aukana lalonai idia ese lau idia durua bada. Edia kara amo Iehova ena lalokau lau mamia momokani.”

20. Dahaka dainai Iehova ena gwauhamata ese ia lalometau tauna ia hagoadaia diba?

²⁰ Ita moale badina Iehova, lalogoada ibounai ia henia Diravana, ese lalometau ibounai do ia haorea, unai nega ai “guria gabuna lalonai idia noho taudia ibounai ese [Keriso ena] gadona do idia kamonai, bona do idia raka-lasi”! (Ioa. 5:28, 29) Dirava ia gwauhamata “ia ese danu mase do ia haorea momokani ela bona hanaihanai. Siahu Ibounai Lohiabada danu ese tai ena ranu be taunimanima ibounai edia matadia dekena amo do ia dahua ore.” (Isa. 25:8) Bena taunimanima ibounai be “idia taitai taudia ida [do idia] taitai” lasi, to “idia moale taudia ida [do idia] moale.”​—Roma 12:15.