1. Ita ibounai dekenai dahaka ura ia noho, bona ita ura ma haida ese dahaka idia karaia danu?

EMU hemami be edena bamona, bema oi diba namonamo bona matauraia tauna ta be emu ladana ia laloaboio bona ia gwau oi ia laloatao lasi? Unai bamona negadiai, reana do oi lalohisihisi. Dahaka dainai? Badina ita ibounai ita ura ma haida ese ita idia abia dae. To unai sibona be hegeregere lasi, ita ura idia diba ita be edena bamona taudia, bona ita hagugurua gaudia dainai ita idia hanamoa be namo.​—Num. 11:16; Iobu 31:6.

2, 3. Edena dala ai, hanamoa karana dekenai lalohadai kererena ita abia diba? (Laulau ginigunana herevalaia.)

² Iseda ura be idauidau, to ita ura ma haida ese ita idia laloa bada o hanamoa. Ita be goevadae lasi taudia dainai, unai kara dekenai ita naria namonamo be namo. Danu, unai kara dainai dala kererena ai, ma haida edia hanamoa herevadia ita abia diba. Satani ena tanobada ese taunimanima edia lalona ia veria, dagi bona ladana bada idia tahua totona, unai dainai iseda guba  Tamana, Iehova Dirava idia hanamoa lasi bona idia tomadiho henia lasi.​—Apok. 4:11.

³ Iesu ena negai, dubu gunalaia taudia haida be hanamoa karana dekenai lalohadai kererena idia abia. Iesu ese ena murinai idia raka taudia ia sisiba henidia, ia gwau: “Taravatu hadibaia taudia dainai do umui naria namonamo, idia ura dabua latadia idia hahedokilaia bona taunimanima momo gabudiai idia loaloa, taunimanima ese idia hanamoa totona. Bona sinagoga lalonai, vaira kahanai idia helai bona aria negadiai gabu namodia dekenai idia helai.” Ma ia gwau: “Idia be hahemaoro metauna do idia abia.” (Luka 20:46, 47) To, Iesu be vabu ta ia itaia ena kontribusen ia udaia neganai, ia hanamoa, ena be haida ese unai vabu ia udaia moni idia laloa bada lasi. (Luka 21:1-4) Iesu ese ta hanamoa karana ia laloa dalana be haida ese idia laloa dalana amo ia idau. Inai stadi ese ita do ia durua, Iehova Dirava ese ia abia dae lalohadai maorona ita abia totona.

4. Hanamoa kara hereadaena be dahaka, bona edena dala ai ita abia diba?

⁴ Hanamoa kara hereadaena be dahaka, bona edena dala ai ita abia diba? Unai hanamoa karana be taunimanima ese sikuli ai, gaukara gabudiai bona moale karadia ai idia tahua gauna lasi. To, ia be Paulo ese ia herevalaia bamona. Ia gwau: “To hari Dirava umui diba, bona danu Dirava be umui ia diba, dahaka dainai manoka bona anina lasi hahediba hereva ginigunadia dekenai umui giroa bona umui ura edia igui hesiai gaukarana umui karaia lou?” (Gal. 4:9) Tanobada bona guba ena Atai Herea Lohiana, ena “Dirava be [ita] ia diba” be hahenamo badana! Ia ura ita be ena tura namodia ai ita lao. Diba bada tauna ta ia gwau: Dirava be “taunimanima ia laloa bada.” Iehova be ita ia gwauraia iena turadia neganai, ita mauri ena badina ita lalopararalaia.​—Had. 12:13, 14.

5. Iehova be iseda ladana ia diba totona, dahaka ita karaia be namo?

⁵ Mose ese unai hahenamo ia mamia. Iehova ia noia ia ura Iena kara do ia diba namonamo neganai, Iehova ia haere, ia gwau: “Lau ese oi noia gauna do lau karaia danu, badina egu lalonamo oi abia bona oi lau diba namonamo.” (Eso. 33:12-17) Ita danu, bema Iehova be ita ia diba namonamo, hahenamo momo ita abia diba. To Iehova be iseda ladana ia diba totona, dahaka ita karaia be namo? Namona be, ia ita lalokau henia bona iseda mauri ita gwauhamatalaia.​—1 Korinto 8:3 duahia.

6, 7. Dahaka dainai eda hetura karana Iehova ida ita gimaia be namo?

⁶ To, eda hetura karana iseda guba Tamana ida ita gimaia be namo. Paulo ese Galatia Keristani taudia ia hadibaia hegeregerena, namo lasi ita danu be inai tanobada ena “manoka bona anina lasi hahediba hereva ginigunadia” bona ena hanamoa karana ita tahua. (Gal. 4:9) Unai Keristani taudia ginigunadia be idia goada idia lao bona Dirava be idia ia diba. To, Paulo ia gwau, gabeai idia be anina lasi gaudia dekenai idia “giroa” lou. Paulo ena hereva ena anina be inai: “Dahaka dainai umui giroa bona anina lasi gaudia edia igui hesiai gaukarana umui karaia noho?”

⁷ Hari, ita dekenai unai ia vara diba, a? Oibe. Iehova ita dibaia matamaia neganai, Paulo bamona, ita danu be Satani ena tanobada ai, hanamoa abia karana ita rakatania vadaeni. (Filipi 3:7, 8 duahia.) Reana sikuli bada o moni gaukara ai dagi bada tahua karana ita rakatania, eiava inai tanobada ai moni habadaia karana ita dadaraia. Bona iseda diba miusiki gadaralaia dekenai eiava spot gadara ta ita diba momo karana ese ita  ia veria diba lada bada bona taga taudia ai ita lao totona, to unai gaudia ibounai ita dadaraia. (Heb. 11:24-27) Namo lasi unai gaudia ita dadaraia eiava rakatania dainai ita lalohisihisi. Badina ita abia dae idia be “manoka bona anina lasi * hahediba hereva ginigunadia” bona unai ese inai tanobada ena lalona veria gaudia dekenai ita ia veria lao diba.

8. Dahaka ese ita do ia durua Iehova ena hanamoa ita abia totona?

⁸ Dahaka ita karaia be namo unai amo Iehova ena hanamoa ita abia diba, to inai tanobada ena lasi? Unai ita karaia totona, namona be mai anina bada gaudia rua ita laloa. Ginigunana be, Iehova ese hanaihanai mai abidadama ida ia idia hesiai henia taudia ia hanamoa. (Heberu 6:10 duahia; 11:6) Iena hesiai taudia ibounai ia diba, bona ia mamia bema idia ta ia dadaraia, unai be kara “gageva.” Iehova be “ena taunimanima ia diba.” (2 Tim. 2:19) “Kara maoromaoro taudia be, [‘Iehova,’ NWT] ese ia hakaudia bona ia naridia” bona ia diba edena dala ai hahetoho amo idia do ia durudia.​—Sal. 1:6; 2 Pet. 2:9.

9. Edena dala ai Iehova ese ena taunimanima ia hamauria? Haheitalai gwauraia.

⁹ Nega haida, Iehova be dala idauidau ai ia hahedinaraia ena taunimanima ia laloa bada. (2 Siv. 20:20, 29) Hegeregere, Farao ena ami goadana ese Davara Kakakakana ai Iehova ena taunimanima idia lulua neganai Ia ese idia ia hamauria. (Eso. 14:21-30; Sal. 106:9-11) Unai nega ai taunimanima be idia hoa bada, unai dainai lagani 40 lalonai unai sivarai idia laloatao. (Ios. 2:9-11) Iehova ese ena lalokau bona siahu amo ia hahedinaraia karana ese ita ia hagoadaia, badina idia perovetalaia Magoga tauna Goga ena dagedage karana be kahirakahira do ia vara! (Ese. 38:8-12) Unai negai, do ita moale badina iseda Dirava ena lalonamo ita abia, to inai tanobada ena lasi.

10. Iehova ese ita ia hanamoa karana dekenai, dahaka mai anina bada gauna ita laloa be namo?

¹⁰ Namona be mai anina bada gauna iharuana ita laloa: Iehova be ita laloa lasi daladia ai, ita ia hanamoa diba. Taunimanima vairanai kara namodia idia ura hahedinaraia taudia be Iehova ese do ia hanamodia lasi. Dahaka dainai? Badina unai bamona taudia be taunimanima ese idia hanamodia dainai edia davana idia abia vadaeni. (Mataio 6:1-5 duahia.) Iesu ese ia hahedinaraia, herevana haida be kara namodia idia hahedinaraia bona taunimanima ese idia itaia lasi, to ena Tamana ese ‘hehuni dekenai ia itaia’ vadaeni. Unai kara namodia idia hahedinaraia taudia do ia hanamoa. To, nega haida Iehova be ita laloa lasi dalanai ita ia hanamoa. Haheitalai haida mani ita laloa.

11. Edena dala ai Iehova ese Maria ia hanamoa?

¹¹ Dirava ena Natuna be taunimanima ta bamona do ia vara, unai dainai Iehova ese ia manau rami hebou kekenina, Maria, ia abia hidi ena natuna hereadaena do ia havaraia totona. Maria be Nasareta taoni ai ia noho, unai taoni be Ierusalema dubu helaga mai hairaina amo ia daudau. (Luka 1:26-33 duahia.) Dahaka dainai Dirava ese Maria ia abia hidi? Aneru Gabriela ese ia hamaoroa, ia be ‘Dirava ese ia lalonamo henia.’ Unai murinai, Maria ese ena varavara hahinena Elisabeta dekenai, ena abidadama ia gwauraia hedinarai. (Luka 1:46-55) Oibe, Iehova be Maria ia diba namonamo, bona  ena abidadama karana dainai ia dekenai unai hahenamo badana ia henia.

12, 13. Iesu ia vara negana ai bona dina 40 murinai dubu helaga dekenai idia abia lao neganai, Iehova ese edena dala ai ia hanamoa?

¹² Maria ese Iesu ia havaraia neganai, Iehova be Ierusalema bona Betelehema ena lohia taudia ia hadibaia lasi. To, mamoe naria taudia be Betelehema murimuri ai edia mamoe idia naria noho lalonai, aneru be idia dekenai idia hedinarai. (Luka 2:8-14) Unai dainai, mamoe naria taudia be ia vara beibi matamatana idia vadivadi henia. (Luka 2:15-17) Maria bona Iosepa be, Dirava ese Iesu ia hanamoa dalana idia itaia neganai, idia moale bada! Iehova ia karaia gaudia edia idau bona Diabolo ese ia karaia gaudia edia idau mani oi laloa. Satani ese hisiu stadilaia babalau taudia ia siaia Iesu bona ena tama sina idia vadivadi henidia. Danu, Ierusalema taudia ibounai be Iesu ia vara sivaraina idia kamonai neganai, hekwakwanai momo idia havaraia. (Mat. 2:3) Unai sivarai dainai, kerere lasi natu maragidia momo idia hamasedia.​—Mat. 2:16.

¹³ Iesu ia vara bona dina 40 murinai, Taravatu hegeregerena, Maria be Ierusalema ena dubu helaga ai do ia lao bona Iehova dekenai boubou gaudia ia henia. Betelehema amo, ena daudau be kilomita 9 bamona. (Luka 2:22-24) Maria be Iosepa bona Iesu ida idia lao noho lalonai, reana ia lalohekwarahi, bema boubou ia karaia hahelaga tauna ese Iesu ena vaira negana do ia gwauraia hedinarai eiava. Iesu idia hanamoa, to Maria ese ia laloa dalanai ia vara lasi. To, Iehova ese “kara maoromaoro tauna bona Dirava ia gari henia” tauna Simeona, bona vabu ta ena mauri lagani 84, peroveta hahinena Ana, ia gaukaralaia. Idia rua ese idia hamomokania, Iesu be gwauhamata Mesia o Keriso ai do ia lao.​—Luka 2:25-38.

14. Maria be Iehova amo dahaka hahenamo idauidau ia abia?

¹⁴ To, Maria be edena bamona? Mai abidadama ida Dirava ena Natuna ia havaraia bona ia naria dainai, Iehova ese ia hanamoa, a? Oibe, Dirava ese ia hanamoa. Maria ena kara bona ia gwauraia herevadia haida be Baibel lalonai idia noho. Iesu ena lagani toi mai kahana haroro gaukarana lalonai, Maria be ia hegeregere lasi ia ida ia lao totona. Reana Maria be vabu dainai, Nasareta dekenai sibona ia noho. Herevana unai hahenamo momo ia reaia, to Iesu ia mase dinana ai Maria be ia ida ia noho. (Ioa. 19:26) To, Pentekoste dinana ia kahirakahira neganai, Maria bona Iesu ena hahediba taudia be Ierusalema ai idia noho bona unai nega ai lauma helaga be idia latanai ia diho. (Kara 1:13, 14) Dirava ese ia bona ma haida ia horodia. Vadaeni, unai ese ia hahedinaraia ia be guba ai Iesu ida do ia noho ela bona hanaihanai. Momokani, mai abidadama ida Dirava ia hesiai henia dainai, hahenamo hereadaena ia abia!

15. Iesu be tanobada ai ia noho neganai, Iehova be edena dala ai ia hahedinaraia ena Natuna ia lalonamo henia?

¹⁵ Iesu be ia ura lasi ena nega ai idia noho tomadiho gunalaia taudia o gavamani taudia ese ia idia hanamoa. To, nega idauidau toi ai, Iehova ese guba amo Iesu ia hanamoa bona unai ese Iesu ia hagoadaia bada. Ioridane Sinavaina ai, Iesu ia bapatiso murinai, Iehova be inai hereva ia gwauraia, ia gwau: “Inai be egu Natuna, egu lalokau, ia lau lalonamo henia.” (Mat. 3:17) Ioane Bapatiso danu be unai hereva ia kamonai. Iesu ia do mase lasi bona lagani ta ia do noho lalonai, ena aposetolo taudia toi idia kamonai Iehova be Iesu ia herevalaia, ia gwau: “Inai be egu Natuna, egu lalokau, ia lau lalonamo  henia, iena hereva umui kamonai.” (Mat. 17:5) Dokonai, Iesu ena mase dinana be ia kahirakahira neganai, Iehova be guba amo ena Natuna ia hereva henia.​—Ioa. 12:28.

16, 17. Edena dala idauna ai Iehova ese Iesu ia hanamoa?

¹⁶ Herevana Iesu ia diba, kota ai ia do idia gwauraia koikoi, bona do idia hamasea, to ia guriguri Iehova ena ura do ia guguru totona, to ena ura lasi. (Mat. 26:39, 42) Iesu be “hisihisi auna ia haheaukalaia, bona do ia abia hemaraina ia laloa lasi,” bona inai tanobada ena hanamoa ia tahua lasi, to ena Tamana ena hanamoa karana ia laloa bada. (Heb. 12:2) Iehova be edena dala ai ia hahedinaraia, Iesu ia hanamoa?

¹⁷ Iesu be tanobada ai ia noho neganai, ia hahedinaraia ia ura guba dekenai do ia giroa bona Tamana ida guna ia abia hairaina ia abia lou. (Ioa. 17:5) Baibel ia gwau lasi Iesu be ma gau haida ia tahua. Ia be guba ai dagi bada eiava ladana bada ia tahua lasi. To, Iehova be dahaka ia karaia? Ia ese dala idauna ai Iesu ia hanamoa, bona unai be mase amo ia hatorea isi lou bona “dagi hereadaena” ia henia, bona unai nega ai, ta be unai bamona dagi ia abia lasi​—mase diba lasi maurina! * (Fili. 2:9; 1 Tim. 6:16) Iesu be mai haheauka ida Dirava ia hesiai henia dainai ia be haheitalai namona!

18. Dahaka ese ita do ia durua inai tanobada amo hanamoa tahua karana ita dadaraia totona?

¹⁸ Dahaka ese ita do ia durua inai tanobada amo hanamoa tahua karana ita dadaraia totona? Namona be ita laloatao, Iehova be hanaihanai ena abidadama hesiai taudia ia lalodia, bona nega haida idia diba lasi dalanai ia hanamodia. Vaira negai dahaka hahenamo do ita abia be ita diba lasi, ani? To hari, inai kara dika tanobadana ai, hekwakwanai idauidau bona hahetoho ita haheaukalaia noho lalonai, namona be ita laloatao inai tanobada, bona ena hanamoa karadia idauidau be kahirakahira do idia ore. (1 Ioa. 2:17) Iseda lalokau Tamana, Iehova ena ‘kara be ia gageva lasi, ia ese iseda gaukara bona iena ladana totona ita hahedinaraia lalokauna, do ia laloaboio lasi.’ (Heb. 6:10) Oibe, vaira negai ita do ia lalonamo henia bona ita laloa lasi dalanai unai do ia karaia!