1-2. (a) Dahaka dainai ita daradara lasi bema gavamani ese iseda tomadiho karana ia taravatua? (b) Inai stadi atikol ai dahaka do ita herevalaia?

LAGANI 2018 ena hesiai lagani ai, pablisa taudia 223,000 mai kahana idia noho tanodia ai, gavamani ese edia tomadiho karana bona haroro gaukara ia taravatua eiava gau haida idia koua. Unai ita daradaralaia lasi. Stadi atikol 27 ai ita herevalaia bamona, ita diba momokani Iehova idia tomadiho henia taudia be dagedage do idia davaria. (2 Tim. 3:12) Herevana edeseniai ita noho, to ita diba lasi negana ta ai gavamani ese iseda lalokau Diravana, Iehova tomadiho henia karana do ia taravatua.

² Bema oi noho gabuna ai gavamani ese Iehova tomadiho henia karana ia taravatua, reana sibona dekenai inai henanadai do oi henia: Dagedage ita davaria ena anina be Iehova be ita dekenai ia moale lasi, a? Gavamani ese Iehova tomadiho henia karana do ia koua momokani, a? Idia taravatua lasi tano ta dekenai lau lao be namo, a? Inai stadi atikol ai unai henanadai do ita herevalaia. Bona danu dahaka do ita karaia Iehova ita tomadiho henia noho herevana gavamani ese taravatu ia atoa bona dahaka gaudia dainai do ita naria namonamo, unai do ita herevalaia.

3. Korinto Iharuana 11:23-27 ena hereva bamona, Paulo dekenai dahaka ia vara bona ena haheitalai amo dahaka ita diba?

³ Bema gavamani ese iseda tomadiho karana ia taravatua, reana do ita laloa Dirava be ita dekenai ia moale lasi. To unai be lalohadai kererena. Mani aposetolo Paulo ena haheitalai ita  laloa. Ia diba Dirava be ia dekenai ia moale. Ia ese Keristani Grik Toretoredia lalonai buka 14 ia torea bona ia be idau bese taudia edia aposetolo tauna ai ia lao. To, ia be dagedage bada ia davaria. (2 Korinto 11:23-27 duahia.) Aposetolo Paulo ena haheitalai amo ita diba, Iehova ena hesiai taudia be dagedage idia davaria neganai, Iehova be unai ia koua lasi.

4. Dahaka dainai taunimanima ese ita idia inai henia?

⁴ Dagedage do ita davaria ena badina be Iesu ese ia hahedinaraia. Ia gwau, taunimanima ese ita do idia inai henia badina ita be tanobada ena lasi. (Ioa. 15:18, 19) Dagedage ita davaria ese ia hahedinaraia lasi ita be Iehova ena hahenamo ita abia lasi. To, kara maorodia ita karaia dainai dagedage ita davaria!

5. Taunimanima ese Iehova tomadiho henia karana do idia koua momokani, a? Gwauraia hedinarai.

⁵ Taunimanima ese iseda siahu ibounai Diravana, Iehova tomadiho henia karana idia koua diba lasi. Guna momo be unai idia karaia toho to idia kwalimu lasi. Tanobada Tuarina Iharuana ai ia vara gauna mani ita laloa. Unai nega ai, tano momo edia gavamani ese Dirava ena taunimanima idia dagedage henia bada. Germany ai Nazi oreana ese Iehova ena Witnes taudia edia gaukara ia taravatua sibona lasi, to Australia, Canada bona tano ma haida edia gavamani be unai idia karaia danu. Mani ia vara gauna ita laloa. Lagani 1939 ai, tanobada hegegemadai ai pablisa ena namba be 72,475. Ripoti ese idia hahedinaraia lagani 1945 tuarina ia ore neganai, Iehova ese tadikaka taihu edia gaukara ia hanamoa dainai, pablisa ena namba ia daekau 156,299. Pablisa ena namba be nega rua amo ia bada daekau!

6. Dagedage karadia dainai dahaka ia vara diba? Haheitalai ta gwauraia.

⁶ Dagedage karadia ese ita idia hagoadaia diba mai gari lasi ida Iehova ita hesiai henia noho totona. Hegeregere, gavamani ese iseda tomadiho karana ia taravatua tano ta ai, headava tau bona hahine ta mai edia natuna mero maragina idia noho. Idia be mai gari lasi ida regula painia gaukara idia karaia matamaia. Unai tadikaka ena adavana be ena moni gaukara ia rakatania bona ia painia. Tadikaka ia gwau gavamani ese iseda gaukara ia taravatua dainai taunimanima momo be Iehova ena Witnes taudia totona henanadai momo idia henia. Unai ese dala ia kehoa Baibel stadi momo ia hamatamaia totona. Gavamani ese iseda gaukara ia taravatua, to gau namodia ma haida idia vara danu. Unai tano ai ia noho elda ta ia gwau,  idia manoka tadikaka taihu momo be hebou dekenai idia lao matamaia bona idia goada lou.

7. (a) Levitiko 26:36, 37 ena hereva amo dahaka ita dibaia? (b) Bema gavamani ese iseda tomadiho karana ia taravatua, dahaka do oi karaia?

⁷ Bema iseda inai taudia ese iseda tomadiho karana idia taravatua, idia ura ita idia hagaria bona Iehova do ita hesiai henia lasi. Unai sibona lasi, to hereva koikoidia idia halasia, gavamani amo haida idia siaia iseda ruma idia sekea, ita do idia doria kota dekenai ita lao, eiava dibura ruma ai ita idia atoa. Idia laloa do ita gari badina iseda tadikaka haida be dibura ruma dekenai idia atoa. Bema ita dekenai do idia karaia gaudia dainai ita gari, iseda hesiai gaukara do ita laloa maragi eiava Iehova hesiai henia karana do ita hadokoa. Ita ura lasi Levitiko 26:36, 37 ese ia herevalaia taudia bamona ita karaia. (Duahia.) Namo lasi iseda hesiai gaukara ita laloa maragi eiava Iehova hesiai henia karana ita hadokoa. Iehova ita abidadama henia momokani bona ita gari lasi. (Isa. 28:16) Guriguri amo Iehova ena heduru ita noia. Ita diba Dirava ese ita ia durua dainai, siahu bada gavamani ta ese Dirava tomadiho henia karana do ia koua diba lasi.​—⁠Heb. 13:6.

8-9. (a) Keristani tauna ta be ena ruma bese totona dahaka abia hidi do ia karaia? (b) Dahaka ese ta do ia durua mai aonega ida abia hidi ta ia karaia totona?

⁸ Bema oi noho gabuna dekenai gavamani ese iseda tomadiho karana ia taravatua, reana do oi laloa idia taravatua lasi tano ta dekenai oi lao unai amo Iehova oi hesiai henia diba. Unai abia hidi be ta ese do ia karaia lasi, to oi sibona ese do oi karaia. Abia hidi oi do karaia lasi neganai, namona be Keristani taudia ginigunadia edia haheitalai oi stadilaia, reana haida be unai bamona idia karaia diba. Stefano idia inai henia taudia ese ia be nadi amo idia hodoa mase murinai, Ierusalema ai idia noho hahediba taudia be Iudea bona Samaria ena gabu ibounai dekenai idia lao bona Poinikia, Kupro, bona Antioka dekenai idia lao danu. (Mat. 10:23; Kara 8:1; 11:19) To tadikaka taihu haida be edia stadi amo idia diba, dagedage negadia ai aposetolo Paulo be abia hidi ia karaia haroro gaukara idia taravatua gabudia dekenai ia noho totona. Paulo be sivarai namona ia harorolaia bona Keristani tadikaka taihu ia hagoadaia.​—Kara 14:19-23.

⁹ Unai sivarai amo dahaka ita dibaia? Ruma bese lalonai tama ese abia hidi do ia karaia idia taravatua lasi tano ta dekenai idia lao eiava lasi. Unai abia hidi ia do karaia lasi neganai, ia guriguri guna bona ruma bese be unai gabu dekenai idia lao bona idia noho ena namo bona dika ia lalohadailaia be namo. Unai bamona negadiai Keristani taudia ta ta be “sibona ena maduna do ia huaia.” (Gal. 6:5) Namo lasi ma haida ese idia karaia abia hidi ita maumauraia.

10. Brens ofesi ese kongrigeisen elda taudia dekenai dahaka hakaua daladia do idia henia?

¹⁰ Edena dala ai Iehova oi tomadiho henia noho diba ena be gavamani ese taravatu ia atoa? Brens ofesi ese kongrigeisen ena elda taudia dekenai hadibaia herevadia do idia henia bona edena dala ai Baibel pablikeisen idia abia, tadikaka taihu edia hebou daladia, bona haroro karaia daladia be tadikaka taihu dekenai do idia gwauraia. Bema brens ofesi be kongrigeisen ena elda taudia dekenai hadibaia hereva ta idia henia lasi, elda taudia be oi bona kongrigeisen taudia do idia hadibaia Iehova tomadiho henia karana umui karaia noho totona. Elda taudia ese Baibel bona Baibel pablikeisen edia heduru amo hakaua daladia do idia henia.​—Mat. 28:19, 20; Kara 5:29; Heb. 10:24, 25.

11. Dahaka dainai oi diba momokani emu abidadama ia hagoadaia gaudia do oi abia, bona dahaka oi karaia unai amo emu Baibel bona Baibel pablikeisen oi gimaia totona?

¹¹ Iehova ia gwauhamata iena hesiai taudia be  edia abidadama hagoadaia gaudia do idia abia. (Isa. 65:13, 14; Luka 12:42-44) Unai dainai, namona be oi diba iena orea ese emu abidadama hagoadaia gaudia ibounai do ia henia. To dahaka do oi karaia? Bema gavamani ese iseda gaukara ia taravatua namona be gabu ta oi tahua emu Baibel bona Baibel pablikeisen oi hunia totona. Idia printaia gaudia eiava tablet o fon ai ia noho gauna be taunimanima ese idia davaria haraga diba gabudia ai oi atoa lasi be namo. Namona be ita ta ta ese dala idauidau ita tahua iseda abidadama ita hagoadaia totona.

12. Elda taudia be edena bamona hadibaia herevadia do idia henia?

¹² Wiki lalonai ita abia heboudia be edena bamona? Elda taudia ese hebou lao henia daladia be oi dekenai do idia hadibaia, unai amo taunimanima be do idia diba lasi oi be hebou totona oi lao. Reana idia ese grup maragidia dekenai oi bona ma haida do idia haboua, bona hebou negadia bona gabudia do idia haidaua loulou. Hebou gabudia dekenai oi lao bona hebou gabudia oi rakatania neganai oi hereva badabada lasi, unai amo emu tadikaka bona taihu oi gimaia diba. Bona reana elda taudia ese oi do idia hadibaia, hebou eiava haroro totona oi hahedokilaia dabua oi hahedokilaia lasi.

13. Guna idia gwauraia Soviet Union ai idia noho tadikaka taihu edia ekspiriens amo dahaka ita dibaia?

¹³ Danu, gabu ta ta ai haroro daladia do idia idau. To, ita be Iehova ita lalokau henia bona ena Basileia ena sivarai namona be ma haida dekenai ita harorolaia dainai, dala do ita tahua ita haroro totona. (Luka 8:1; Kara 4:29) Histori ia torea hahine Emily B. Baran ese guna idia gwauraia Soviet Union ai Iehova ena Witnes taudia edia haroro gaukara ia herevalaia neganai, ia gwau: “Gavamani ese Iehova ena Witnes taudia edia haroro gaukara ia taravatua neganai, Witnes taudia be dala ia kehoa negadiai edia dekena taudia, gaukara turadia bona edia turadia idia hereva henidia diba. Unai idia karaia dainai Witnes taudia be dibura ruma dekenai idia atodia, to idia ese dibura ruma ai idia noho taudia haida idia haroro henia diba.” Ena be guna idia gwauraia Soviet Union ai iseda haroro gaukara idia taravatua, to iseda tadikaka taihu be edia haroro gaukara idia hadokoa lasi. Bema oi noho gabuna ai haroro gaukara idia taravatua, unai tadikaka taihu edia haheitalai oi tohotohoa!

14. Salamo 39:1 ena hereva ese ita ia durua dahaka ita karaia lasi totona?

¹⁴ Ma haida dekenai gau haida oi gwauraia lasi. Gavamani ese iseda gaukara idia taravatua neganai, namona be ita diba edena bamona negadia ai hereva ta ita gwauraia lasi. (Had. 3:7) Namona be ita naria namonamo. Namo lasi iseda tadikaka taihu edia ladana, ita hebou gabudia, ita haroro daladia, bona iseda pablikeisen ita abia daladia ita gwauraia hedinarai. Unai gaudia ibounai be gavamani ese ia siaia taravatu atoa taudia, bona iseda tano eiava tano ma  haida ai idia noho turadia eiava varavara taudia dekenai do ita gwauraia lasi. Bema unai hakaua daladia ita badinaia lasi, iseda tadikaka taihu be dika idia davaria diba.​—Salamo 39:1 duahia.

15. Satani ia ura dahaka ia karaia ita dekenai, to edena dala ai unai do ita dadaraia?

¹⁵ Namo lasi hekwakwanai maragidia dainai emu tadikaka taihu amo oi parara. Satani ia diba bema ruma bese ta ia parara do idia noho hebou diba lasi. (Mar. 3:24, 25) Do ia hekwarahi iseda noho hebou karana ia hapararaia totona. Ia ura ita huanai ia noho maino ia hadikaia unai amo ita tuari heheni.

16. Edena dala ai taihu Gertrud Poetzinger ena ekspiriens be haheitalai namona?

¹⁶ Namona be lagani momo lalonai Iehova idia hesiai henia taudia be inai kara dekenai idia naria namonamo. Mani horoa taihu rua, Gertrud Poetzinger bona Elfriede Löhr edia ekspiriens ita laloa. Idia ruaosi bona taihu ma haida be Nazi ena dibura kamepa dekenai idia noho. Elfriede be dibura dekenai idia noho taihu haida ia hagoadaia neganai, Gertrud ia mama. Gabeai Gertrud be ia karaia karana dainai ia hemarai bona Iehova ena heduru ia noia. Ia gwau: “Bema ma haida edia diba be bada bona gaukara ma haida idia karaia diba, namo lasi idia ita maumauraia.” Dahaka ese ia ia durua maumau karana ia hanaia totona? Gertrud ese Elfriede ena kara namodia bona ma haida laloa karana ia laloa bada. Unai amo Elfriede ida ena hetura karana ia hanamoa lou. Idia ruaosi be dibura kamepa ai mai abidadama ida Iehova idia hesiai henia ela bona edia tanobada maurina idia rakatania. Bema ita gaukara goada ita bona iseda tadikaka huanai idia noho hekwakwanai ita hamaoromaoroa, gau ta ese iseda lalotamona karana do ia hadikaia lasi.​—Kol. 3:13, 14.

17. Dahaka dainai hanaihanai Iehova ena orea amo idia mai hakaua daladia ita badinaia be mai anina bada?

¹⁷ Hanaihanai hakaua daladia oi badinaia. Bema Dirava ese ia abia hidi taudia edia hakaua daladia ita badinaia, hekwakwanai ita hanaia diba. (1 Pet. 5:5) Hegeregere, iseda gaukara idia taravatua tanodia ai, elda taudia ese pablisa taudia idia hadibaia idia haroro neganai taunimanima dekenai idia printaia Baibel pablikeisen idia hariharilaia lasi. To, painia tadikaka ta be unai hakaua dalana ia badinaia lasi. Dahaka ia vara? Ia bona ma haida be dala haida ai haroro gaukara idia karaia murinai, pulisi taudia ese idia itaia bona idia nanadaia. Gabeai pulisi taudia be edia murinai idia lao ela bona tadikaka ese idia hariharilaia pablikeisen ibounai idia abia. Unai ekspiriens amo dahaka ita dibaia? Namona be hakaua daladia ita badinaia ena be unai hakaua daladia haida dekenai ita lalotamona lasi. Iehova do ia moale bema Ia ese ia abia hidi tadikaka ida ita gaukara hebou.​—⁠Heb. 13:7, 17.

18. Dahaka dainai ita be maoro lasi iseda tadikaka edia abia hidi ita karaia totona?

 ¹⁸ Namo lasi oi sibona emu hakaua dalana oi gwauraia. Bema elda taudia be sibona edia hakaua daladia idia gwauraia, tadikaka taihu dekenai hekwakwanai do ia havaraia. Tadikaka Juraj Kaminský be guna Czechoslovakia dekenai gavamani ese iseda gaukara ia taravatua neganai ia vara gauna ia herevalaia, ia gwau: “Tadikaka bona elda taudia momo be pulisi ese idia abidia neganai, tadikaka ma haida be kongrigeisen momo ai idia noho pablisa taudia dekenai, sibodia edia hakaua daladia idia gwauraia bona pablisa taudia idia hamaoroa dahaka do idia karaia bona dahaka do idia karaia lasi.” Momokani, Iehova be ita dekenai maoro ia henia lasi iseda tadikaka edia abia hidi ita karaia totona. Bema ta be ena tadikaka totona sibona ena hakaua dalana ia gwauraia, iena tadikaka be kerere dekenai ia atoa diba. Unai be hegeregere iena tadikaka edia abidadama ia biagua.​—2 Kor. 1:24.

19. Sivarai Iharuana 32:7, 8 ena hereva bamona, ena be Satani ia ura Iehova tomadiho henia karana ia taravatua, dahaka dainai ita gari lasi be namo?

¹⁹ Ita ia inai henia tauna, Satani Diabolo ese Iehova idia hesiai henia taudia dagedage henia karana do ia hadokoa lasi. (1 Pet. 5:8; Apok. 2:10) Satani bona ena taunimanima be dala idauidau do idia gaukaralaia Iehova tomadiho henia karana idia koua momokani totona. To namo lasi ita gari dainai Iehova hesiai henia karana ita hadokoa! (Deu. 7:21) Iehova be ita do ia durua noho ena be iseda gaukara idia taravatua.​—2 Sivarai 32:7, 8 duahia.

20. Emu lalona oi hadaia dahaka do oi karaia totona?

²⁰ Aposetolo taudia edia negai ai idia noho tadikaka taihu edia haheitalai ita tohotohoa diba, badina idia ese edia lohia taudia dekenai inai hereva idia gwauraia idia gwau: “Bema umui laloa Dirava vairanai ia maoro umui ai kamonai henia to Dirava ai kamonai henia lasi, unai be umui sibona. To ai be ai itaia bona kamonai gaudia do ai herevalaia noho.”​—Kara 4:19, 20.