Lagani ta murinai Betele famili idia hamaoroa, South Africa brens dekenai volantia haida do idia lao be namo, printa masini matamatana idia atoa totona. Egu ladana lau henia, bona lau moale badina lau idia abia hidi. Betele taudia toi idia abia hidi danu​—Dennis Leech, Bill McLellan, bona Ken Nordin. Ai idia hamaoroa ai lao ena tiketi sibona do idia henia!

Egu sinana lau rini henia: “Sinagu e, lau ura sivarai ta lau gwauraia. South Africa dekenai do lau lao!” Egu sinana be hereva momo lasi hahinena to Iehova ia abidadama henia. Hereva momo ia gwauraia lasi, to lau diba ia moale. Ena be ia bona egu tamana be idia hebogahisi badina gabu daudau do lau lao, to egu abia hidi idia maumauraia lasi.

Brooklyn Betele dekenai ai lao guna, bona hua toi lalonai tadikaka ese ai dekenai printa matamatana gaukaralaia dalana idia hadibaia. Unai murinai kago sisima ta ai guia bona Cape Town, South Africa dekenai ai lao. Unai neganai egu mauri lagani be 20. Hanuaboi ai, Cape Town amo trein ai guia bona Johannesburg dekenai ai lao, ia be daudau momokani. Daba rere ai, hanua maragina Karoo dekenai ai ginidae, ia be kahu bona siahu bada gabuna. Ai be trein amo ai roha lasi bona ai laloa, “Inai be edena bamona gabu? Bona emai asainmen matamatana be edena bamona?” Lagani haida murinai, unai gabu dekenai ai giroa lou bona ai itaia unai hanua maragidia ai taunimanima edia kara be namo bona maino ai idia noho.

Lagani haida lalonai, egu asainmen be Linotype masini amo leta lau hegaegaelaidia bona unai amo Gima Kohorona bona Noga! magasin idia printaia. Ai be South Africa totona sibona lasi, to Africa tanodia momo edia gado ai magasin ai printaia danu. Ai moale badina tano daudau amo ai mai rotary printing press matamatana ai atoa totona be idia gaukaralaia momo!

Gabeai, trensleisen, buka bona magasin printaia bona siaia ofesi dekenai lau gaukara. Lau bisi momokani bona lau moale.

Lagani 1968 ai painia taihu ladana, Laura Bowen lau adavaia, ia be Betele kahirakahira ia noho. Ia danu be Trensleisen Dipatmen dekenai ia gaukara. Unai nega ai, headava matamata taudia be Betele dekenai do idia gaukara lasi dainai, brens ese ai idia siaia spesel painia gaukara ai karaia totona. Lau lalohekwarahi sisina badina Betele dekenai lagani 10 lau gaukara neganai, aniani bona noho gabuna be hegeregere. To do ai spesel painia neganai, moni be do ia hegeregere tauanina durua gaudia ai hoia totona, eiava? Hua ta ta ai be 25 rand (unai be K124.00 bamona) ai abia, bema idia gwauraia hora ai hagugurua, lou henia ai karaia bona pablikeisen ai hariharilaia. Unai moni amo, ruma, aniani, loaloa, medikol bona ma gau haida edia davana ai karaia.

Durban siti ena grup maragina ta dekenai ai idia siaia, unai be Indian Ocean kahirakahira. Unuseniai India taudia momo herea idia noho, edia tubudia be lagani 1875 bamona ai idia mai tohu plenteisini dekenai leiba gaukara idia karaia totona. Hari gaukara ma haida idia karaia, to edia kastom bona aniani idia haidaua lasi, hegeregere kari aniani namodia. Bona English gado idia diba dainai, idia ai haroro henia be auka lasi.

Hua ta ta ai, spesel painia taudia be hora 150 lalonai idia haroro, unai dainai lau bona Laura be sediual ai karaia dina ginigunana ai hora 6 do ai haroro. Unai nega ai dina ena siahu be bada herea. Ai be lou henia bona Baibel stadi lasi dainai, hora 6 lalonai ruma-ta-ruma-ta dekenai ai haroro sibona. Nega sisina ai haroro murinai, egu dina gauna lau itaia neganai, ai be miniti 40 sibona ai haroro vadaeni! Lau laloa, edena bamona spesel painia ena hora do ai abia diba?

Unai murinai, sediual namona ai karaia. Hegeregere, dina ta ta, sanwis ai karaia bona temos lalonai vasiahu o kofi ai atoa. Ai laga-ani neganai, emai motuka maragina be au henunai ai atoa, bona nega haida India natu hairaidia be emai motuka idia hagegea bona ai idia raraia badina emai toana be idau! Dina haida murinai ai itaia, hora rua o toi murinai, dina be ia heau haraga.

Unai teritori ai, heabidae taudia dekenai hereva momokani ai hadibaia dainai, ai moale bada! Ai itaia India taudia be hemataurai, kara namo, bona Dirava idia gari henia. Hindu taudia momo be sivarai namona idia abia dae. Idia ura dikadika Iehova, Iesu, Baibel, tanobada matamata mai ena maino, bona toreisi lou helarona idia dibaia. Lagani ta murinai, emai Baibel stadi be 20. Dina ta ta iboudiai, ai stadi henia ruma besena ta ida dina tubua aniani ai ania hebou. Unai ai moalelaia bada.

To daudau lasi murinai, asainmen ma ta ai abia. Ai idia siaia Indian Ocean hairaina ena kone hanuadia dekenai sekit gaukara do ai karaia. Wiki ta ta ai, kongrigeisen idauidau ai vadivadi totona ruma bese ta ida ai noho bona pablisa taudia ida ai gaukara hebou bona hagoadaia. Ai be edia ruma bese taudia ai ai lao, edia natudia bona ubua animal ai tura henia danu. Lagani rua ai moalelaia murinai, brens tadikaka ese lau ia rini henia, ia gwau: “Ai ura Betele dekenai umui giroa mai.” Lau haere: “To, emai asainmen iniseniai ai moalelaia.” To momokani, herevana edeseniai ai idia siaia, mai moale ida do ai lao.

Betele ai Haroro Naria Dipatmen dekenai lau gaukara, bona ekspiriens tadikaka momo ida lau gaukara be hahenamo badana. Unai negai, sekit naria taudia be kongrigeisen ta ta idia vadivadi henia murinai, brens dekenai ripoti idia siaia. Bena unai ripoti hegeregerena, Haroro Naria Dipatmen be kongrigeisen ta ta dekenai hagoadaia herevadia bona hakaua herevadia ena revareva idia siaia. Sekit naria taudia edia ripoti be Xhosa, Zulu bona gado ma haida ai idia torea. Unai dainai, emai seketere taudia ese unai ripoti be English gado dekenai idia hahanaia, bena ai torea English gado revareva be Africa gadodia dekenai idia hahanaia. Unai be gaukara  badana. Hahanaia gaukara idia karaia tadikaka lau lalodia bada, badina lau idia durua kopi korema Africa tadikaka bona taihu ese idia davaria metau lau lalopararalaia totona.

Unai nega ai, South Africa taudia be Apartheid gavamani henunai idia noho. Kopi korema taudia be gabu ta dekenai idia noho bona kurokuro taudia be ma gabu ta ai idia noho, bona idia hebamo heheni lasi. Iseda kopi korema tadikaka taihu be sibodia edia gado ai idia hereva, sibodia edia gado ai idia haroro, bona sibodia edia gado kongrigeisen ai idia hebou.

Kopi korema Africa tadikaka momo lau diba lasi, badina nega momo English gado kongrigeisen dekenai lau idia siaia. To hari, kopi korema Africa taudia edia kastom bona kara idauidau do lau dibaia. Lau itaia iseda tadikaka be edia hanua edia kastom bona tomadiho koikoi herevadia dainai, hekwakwanai momo idia davaria. Ena be edia famili bona hanua taudia ese idia dagedage henidia, to idia gari lasi bona Baibel ese ia taravatua karadia bona babalau karadia idia dadaraia! Hanua dekenai momo be idia ogogami bona idia sikuli lasi, to Baibel idia matauraia.

Tadikaka be edia tomadiho karana bona politikol karadia amo idia gini siri dainai, kota vairanai idia gini neganai idia lau durua. Lau itaia Witnes natudia be sikuli dekenai idia guriguri lasi bona tomadiho anedia idia abia lasi dainai sikuli amo idia kokia, to edia gini goada karana ese lau ia hagoadaia bada.

Africa ena tano maragina ta, guna idia gwauraia Swaziland dekenai, iseda tadikaka be hekwakwanai ma ta idia davaria. King Sobhuza II ia mase neganai, idia gwau taunimanima ese lalohisihisi toana idia hahedinaraia totona kastom karadia haida do idia badinaia. Tatau be edia huina do idia sevia, bona hahine be edia huina do idia utua kwadogi. Iseda tadikaka taihu momo be unai bamona idia karaia lasi dainai idia dagedage henidia. Iehova idia badinaia dainai ai moale bada! Iseda Africa tadikaka amo Dirava badinaia karana bona haheauka karana ai dibaia, unai ese emai abidadama ia hagoadaia.

Lagani 1981 ai, lau be Printa dipatmen ai lau gaukara lou, bona printa masini ese idia  gaukaralaia kompiuta program ai hegaegaelaia. Unai be moale negana, badina pablikeisen printaia dalana ia idau ia lao! Kampani ta ese brens dekenai phototypesetter masini matamata ta ia henia, davana lasi, ai tohoa totona. Unai amo, phototypsetter masini matamatadia 5 ai hoia, bona Linotype masini 9 ai kokia. Rotary offset printing press matamatana ta ai atoa danu. Pablikeisen momo herea ai printaia diba!

Printa masini be mai edia kompiuta program dainai, unai ese ai ia durua program matamatana ladana MEPS (Multilanguage Electronic Publishing System) ai karaia totona. MEPS ese rau ta ta dekenai toretore idia hedinarai dalana ia hegaegaelaia. Ai Betele tadikaka 4 be Canada amo South Africa dekenai ai ginidae negana amo ema bona hari teknoloji be ia idau momokani! (Isa. 60:17) Ai 4 be Iehova idia lalokau henia painia taihu goadadia ai adavaia. Lau bona Bill be Betele dekenai ai gaukara noho. To, Ken bona Dennis be mai edia ruma bese bona Betele kahirakahira idia noho.

Brens ena gaukara ia bada ia lao. Baibel pablikeisen be ma gado idauidau ai ai hahanaia bona printaia, bena brens ma haida dekenai ai siaia. Unai dainai, Betele matamata ai haginia be namo. Tadikaka ese Johannesburg ena west kahana ai, gabu hairaina ta dekenai Betele matamata idia haginia, bona lagani 1987 dekenai unai brens ai hahelagaia. Lau moale badina unai gaukara lau durua diba, bona lagani momo lalonai South Africa ena Brens Komiti gaukara lau karaia be hahenamo badana ta.

Lagani 2001 ai, ai hoa maragi lasi badina lau idia boiria United States ena Brens Komiti matamata ena memba ta ai lau lao totona. Ena be emai gaukara bona turadia South Africa dekenai ai rakatania dainai ai lalohisihisi, to ai moale United States Betele dekenai do ai lao.

To, Laura ena sinana burukana ai rakatania dainai ai lalohekwarahi. New York amo ena sinana ai durua diba lasi, to Laura ena tadidia toi idia gwau ia do idia naria. Idia gwau, “Ai be ful-taim hesiai gaukara ai karaia diba lasi, to bema sinana ai naria, unai ese umui do ia durua emui hesiai gaukara umui karaia noho totona.” Idia ai tanikiu henia bada.

Unai hegeregerena, egu kakana bona ena adavana, idia be Canada dekenai idia noho, ese egu sinana idia naria, ia be vabu. Lagani 20 idia hanaia vadaeni, ia be edia ruma bese ida ia noho. Idia ese egu sinana idia lalokau henia bona naria dainai, idia ai tanikiu henia bada. To madi, New York dekenai ai ginidae bona nega sisina murinai egu sinana ia mase. Emai famili taudia be hahenamo badana ai dekenai, badina idia gaukara hebou unai maduna idia huaia totona, ena be nega haida unai be mai ena hekwarahi!

United States ai egu asainmen ginigunana be pablikeisen printaia dipatmen dekenai lau gaukara, bona hari kompiuta program idia gaukaralaia dainai ia auka lasi. Hari, lau be Purchasing Dipatmen dekenai lau gaukara. Lagani 20 idia hanaia vadaeni iniseniai ai gaukara be hahenamo badana. Hari Betele famili taudia be 5,000 bamona bona komiuta taudia be 2,000 bamona!

Lagani 60 gunanai, lau laloa lasi lau be inai bamona Iehova do lau hesiai henia noho. Lagani momo lalodiai Laura be mai kudouna ibounai ida lau ia durua. Egu mauri lau moalelaia bada! Ai abia asainmen idauidau bona ai gaukara hebou tadikaka taihu ai laloa bada, bona ai vadivadi henia brens idauidau dekenai idia noho tadikaka taihu ai laloa bada danu. Hari egu mauri lagani be 80 ia hanaia dainai egu gaukara idia hamaragia, bona tadikaka matamatadia momo idia hegeregere inai gaukara idia karaia totona.

Salamo torea tauna ia gwau: “Bema bese ta ena Dirava be Iehova, unai bese be ia moale.” (Sal. 33:12) Unai be momokani! Lau moale bada badina Iehova ena moale besena ida Ia lau hesiai henia.