Rehoboama ena tamana Solomona, be Israela dekenai lagani 40 ia lohia. (1 Kin. 11:42) Solomona be 997 B.C.E. ai ia mase. Bena Rehoboama be Ierusalema ena not kahana, Sekema dekenai ia lao king ai do idia halaoa totona. (2 Siv. 10:1) Rehoboama be aonega bada tauna Solomona ena gabu do ia abia dainai ia gari, a? Edena dala ai Rehoboama do ia diba sibona ena aonega amo hekwakwanai do ia hamaoromaoroa?

Reana Rehoboama ia mamia Israela ai unai gaukara ia karaia be auka. Gabeai, gwaukau taudia be ia dekenai idia mai bona ia vairanai edia lalohadai idia gwauraia: “Oiemu tamana ese aiemai gaukara ia hametaua auka herea. Unai dainai harihari oiemu tamana ena hesiai gaukara auka bona metauna ai dekena amo do oi kokia sisina, vadaeni unai neganai ai ese oiemu hesiai gaukara do ai karaia.”​—⁠2 Siv. 10:3, 4.

Rehoboama be abia hidi badana do ia karaia! Bema taunimanima edia ura ia badinaia, ia, ena ruma bese, bona ia totona idia gaukara taudia be reana kohu momo tahua karana do idia hamaragia bona taunimanima edia ura do ia karaia. To, bema unai ia dadaraia, taunimanima do idia gwau-edeede. Dahaka ia karaia? Inai king matamatana be Solomona ena sisiba henia tatau badadia ia hereva henidia guna. To, Rehoboama ese tatau matamatadia, iena uru tamona taudia edia sisiba ia kamonai. Unai dainai, taunimanima ia kara auka henidia. Ia gwau: “Lau ese emui maduna metauna do lau habadaia. Egu tamana ese kwadia varo amo umui ia panisia, to lau ese kwadia varo mai ginigini amo umui do lau panisia.”​—⁠2 Siv. 10:6-14.

Unai sivarai amo dahaka ita dibaia? Ia hedinarai goevagoeva, do ita aonega bema lo buruka taudia ita kamonai henidia. Idia be gau momo idia diba, reana ita do idia durua abia hidi maorodia ita karaia bona sisiba namodia idia henia diba.​—⁠Iobu 12:12.

Rehoboama ena disisen dainai taunimanima idia dagedage. So Rehoboama be ena ami ia haboua. To Iehova be peroveta tauna Semaia ia gaukaralaia Rehoboama ia hereva henia totona. Ia gwau: “Do umui lao lasi tuari totona, umui emui varavara, Israela taudia do umui tuari henia lasi. Umui ta ta emui ruma dekenai do umui giroa lou, badina be idia vara gaudia be lauegu ura dekena amo.”​—⁠1 Ki. 12:21-24. *

Do idia tuari lasi, a? Ita diba Rehoboama ia lalohekwarahi bada! Taunimanima be dahaka do idia laloa edia king matamatana dekenai, badina idia ia hagaria “kwadia auna amo” do ia panisidia, to unai gwau-edeede karana ia karaia lasi? (2 Sivarai 13:7 hahegeregerea.) To, king bona ena tuari taudia be “Lohiabada [Iehova NWT] ena hereva idia kamonai henia, edia ruma ta ta dekenai idia lou lao.”

Unai sivarai amo dahaka ita dibaia? Dirava ita kamonai henia be aonega karana ena be ita do idia kirikirilaia. Dirava oi kamonai henia neganai iena lalonamo bona hahenamo do oi abia.​—⁠Deu. 28:2.

Rehoboama be dahaka ia karaia? Mai kamonai ida bese matamatana tuari henia totona ia karaia palani ia dadaraia, to ia lohiaia noho tanodia Iuda bona Beniamina edia teritori ai hanua matamatadia ia haginia. Bona siti momo “ia hagoadaia momokani.” (2 Siv. 11:5-12) Mai anina bada gauna be, Iehova ena taravatu be nega sisina lalonai ia badinadia. Ieroboama ese ia lohiaia Israela ena iduhu 10 basileiana be kaivakuku idia tomadiho henia matamaia, unai dainai momo ese “Rehoboama idia durua” bona Ierusalema dekenai idia lao tomadiho momokanina hagoadaia totona. (2 Siv. 11:16, 17 NWT) Rehoboama ena kamonai karana dainai ena basileia ia goada.

Rehoboama ena basileia ia goada neganai, ia laloa lasi karana ta ia karaia. Iehova ena taravatu ia dadaraia bona dirava koikoidia ia tomadiho henia! Dahaka dainai? Ena sinana Amono hahinena ena laloani karadia dainai unai bamona ia karaia, a? (1 Kin. 14:21) Unai ena badina ita diba lasi, to bese ibounai ese ia idia badinaia. Unai dainai Iehova ese Aigupito ena King Sisaka ia koua lasi Iuda ena taoni ibounai ia hadikaia totona, ena be Rehoboama ese hanua ena magu aukadia ia haginia!​—⁠1 Kin. 14:22-25; 2 Siv. 12:1-4.

Sisaka be Ierusalema​—⁠Rehoboama ia lohiaia hanuana ai​—⁠ia ginidae neganai, hekwakwanai badana ia vara. Unai neganai, Peroveta tauna Semaia ese Dirava ena hereva be Rehoboama bona ena iduhu kwarana taudia dekenai ia gwauraia, ia gwau: “Umui ese lau umui rakatania, unai dainai lau ese umui danu be Sisaka ena imana ai lau atoa.” Unai sisiba dainai Rehoboama be dahaka ia karaia? Ia moale! Baibel ia gwau: “Israela ena iduhu kwarana taudia bona king idia manau bona idia gwau: ‘Iehova be kara maoromaoro ia karaia.’” Unai dainai, Iehova ese Rehoboama ia hamauria bona Ierusalema ia hadikaia lasi.​—⁠2 Siv. 12:5-7, 12 NWT.

Gabeai, Rehoboama ese Iuda basileia ena saut kahana ia lohiaia. Ia do mase lasi neganai, harihari gaudia be ena natuna tau edia huanai ia haria, unai amo idia bona edia tadikakana Abaisa, iena gabu ia abia tauna, huanai hepapahuahu do ia vara lasi. (2 Siv. 11:20-23) Unai negai, Rehoboama be aonega karana ia hahedinaraia, guna bamona lasi.

Ena be Rehoboama ese kara namodia ia karaia, to Iehova ena lalonamo ia abia lasi. Baibel ese ena lohia dalana ia herevalaia, ia gwau: “Rehoboama ese kara dika ia karaia.” Dahaka dainai? Badina “mai ena kudouna ibounai danu [Iehova] ia tahua lasi.”​—⁠2 Siv. 12:14.

Rehoboama ena sivarai mani ita laloa lou: Ia be nega haida Dirava ia kamonai henia. Bona Iehova ena bese totona gau namodia haida ia karaia. To Iehova tura henia karana ia goadalaia lasi o Ia hamoalea  karana ia karaia lasi. Oibe, kara kereredia ia karaia bona dirava koikoidia ia tomadiho henia. Reana do oi laloa: ‘Rehoboama be Iehova ena sisiba ia abia dae, badina haida edia hereva ia kamonai dainai eiava ia helalo-kerehai bona ia ura Dirava ia hamoalea, a?’ (2 Siv. 11:3, 4; 12:6) Gabeai kara dika ma ia karaia lou. Ia be ena tubuna King Davida amo ia idau. Oibe, Davida be kerere ia karaia danu, to ena mauri ai Iehova ia lalokau henia bada, tomadiho momokani sibona ia laloa bada, bona ena kara dika amo ia helalo-kerehai momokani.​—⁠1 Kin. 14:8; Sal. 51:1, 17; 63:1.

Rehoboama ena sivarai amo gau ta ita dibaia diba. Taunimanima ese edia famili idia ubua o naria bona idia hekwarahi gaukara idia hagugurua neganai idia ita hanamoa. To Dirava ena lalonamo ita moalelaia totona, gau badana be tomadiho momokani ita durua bona badinaia.

Unai bamona ita karaia diba bema hanaihanai Iehova ita lalokau henia bada. Lai ia bodo lasi totona au ma haida ita atoa hegeregerena, Dirava ita lalokau henia noho totona, namona be Baibel ita stadilaia hanaihanai, ita duahia gaudia ita laloa dobu bona guriguri ita hadokoa lasi. (Sal. 1:2; Roma 12:12) Iehova ita lalokau henia dainai, ita ura ita karaia gaudia ibounai dekenai ia ita hamoalea. Danu ita do ia durua ita helalo-kerehai totona. Bona Rehoboama do ita tohotohoa lasi, to tomadiho momokanina do ita goadalaia noho.​—⁠Iuda 20, 21.