1, 2. (a) Edena dala ai tanobada ai bese hapararaia karana ia bada noho? (b) Inai stadi ai edena henanadai toi do ita herevalaia?

EUROPE ai, taihu ta be ena mauri gunana ia laloa lou bena ia gwau: “Lau maragi negana amo kara gageva sibona lau itaia. Unai dainai, egu tano ena politikol dalana lau ura henia lasi, bona gavamani senisia heboudia dekenai lau lao. Bona lagani momo lalonai, egu boifren be terorist karadia ia durua.” Africa ai tadikaka ta danu be guna dagedage karadia ia durua. Ia gwau: “Lau laloa egu iduhu ese iduhu ibounai ia hereaia, bona politikol pati ta lalonai lau vareai. Idia ese ai idia hadibaia emai inai taudia be peva amo ai aladia be namo​—⁠danu, emai iduhu tauna ta be politikol orea idauna ta ia sapot neganai, ia ai alaia mase be namo.” Europe ai ia noho taihu ma ta ia gwau: “Bema ta be egu bese tauna lasi eiava egu dubu tauna lasi, vadaeni ia lau inai henia.”

² Hari inai negai, taunimanima momo edia laloa dalana be ita herevalaia taudia toi bamona. Dagedage oreadia idia bada noho, politikol oreadia idia lalotamona lasi, bona tano momo ai, foreigners o idau taudia be idia noho tanodia ai taunimanima ese idia inai henidia. Baibel ia peroveta, inai nega dokona ai taunimanima idauidau “do idia ura lasi gwauhamata idia karaia” o do idia lalotamona lasi.  (2 Tim. 3:1, 3) To edena dala ai Keristani taudia ese edia lalotamona karana idia gimaia diba? Aposetolo edia negai, taunimanima be politikol karadia dainai idia parara. Iesu ese unai hekwakwanai ia hamaoromaoroa daladia ita stadilaia karana amo diba do ita abia. Mani inai henanadai badadia toi ita herevalaia: Dahaka dainai Iesu be politikol oreadia ta lalonai ia vareai lasi? Edena dala ai Iesu ia hahedinaraia Dirava ena hesiai taudia be politikol karadia lalonai idia vareai lasi be namo? Bona edena dala ai Iesu be ita ia hadibaia haida dagedage henia karana be maoro lasi?

3, 4. (a) Iesu ena negai Iuda taudia idia laloa politikol taudia be dahaka idia karaia diba? (b) Unai lalohadai dainai, Iesu ena hahediba taudia be dahaka idia laloa?

³ Iesu ese ia haroro henia Iuda taudia momo be idia ura bada Roma amo idia parara. Gwau-edeede Iuda taudia, o bese ladana abia isi oreana, be taunimanima idia hagoadaia Roma idia dadaraia totona. Idia momo be Galilea tauna Iuda ena lalohadai idia badinaia. Ia be mesia koikoina badina aposetolo edia negai momo ia hakaudia kerere. Histori ia torea Iuda tauna Josephus ia gwau, inai Iuda “ese ena tano taudia ia doria Roma idia tuari henia totona, bona Roma taudia dekenai takisi idia henia taudia ia gwauraia kavakava taudia.” Gabeai, Roma taudia ese Iuda idia hamasea. (Kara 5:37) To Iuda taudia haida be edia palani dikadia idia hagugurua totona idia dagedage.

⁴ To Iuda taudia ma haida be politikol Mesia ta idia naria noho. Idia laloa Mesia ia mai neganai, ia ese Israela besena be edia bese goadana ai do ia halaoa bona idia be Roma amo do ia hamauridia. (Luka 2:38; 3:15) Momo idia laloa Mesia be tanobada ai Israela ena basileia o gavamani ta do ia haginia. Unai amo Iuda taudia milioni momo be tano idauidau amo do idia giroa, bona Israela ai do idia noho. Reana oi laloatao, nega ta Ioane Bapatiso be Iesu ia nanadaia: “Oi be Do Ia Mai Tauna, eiava idau tauna ta do ai naria?” (Mat. 11:2, 3) Reana Ioane ia laloa idau tauna ta do ia mai, Iuda taudia hamauria totona. Danu Emausa ena dala ai hahediba taudia rua be Iesu​—⁠ia toreisi lou vadaeni tauna​—⁠idia hedavari henia, bona idia laloa Mesia ese Israela do ia hamauria. (Luka 24:21 duahia.) Gabeai, aposetolo taudia ese Iesu idia nanadaia: “Lohiabada e, inai nega ai oi ese Israela dekenai basileia do oi henia lou, a?”​—⁠Kara 1:6.

5. (a) Dahaka dainai Galilea taudia idia ura Iesu be edia king ai do ia lao? (b) Edena dala ai Iesu ese edia lalohadai ia hamaoromaoroa?

⁵ Reana Iuda taudia idia laloa Mesia ese edia hekwakwanai do ia hamaoromaoroa dainai, Galilea taudia idia ura Iesu be king ai ia lao be namo. Idia laloa Iesu be lohia tauna hereadaena badina: Ia be hereva namodia ia gwauraia tauna, gorere taudia ia hanamoa diba, o hitolo taudia dekenai aniani ia henia diba. Iesu be hutuma 5,000 ia ubua murinai, ia itaia taunimanima idia hoa. Danu, “Iesu ia diba taunimanima be do idia mai ia idia dogoatao bona king ai do idia halaoa dainai, ia be sibona ororo ta dekenai ia daekau lou.” (Ioa. 6:10-15) Dina iharuana ai, reana Galilea Gohuna ena kahana ma ta ai idia noho taudia be dina ginigunana ai ia vara gauna idia laloaboio vadaeni. Unai dainai, Iesu ese ena gaukara korikorina be hutuma dekenai ia gwauraia hedinarai. Ia be aniani o tauanina gaudia totona ia mai lasi, to Dirava ena Basileia sivaraina gwauraia hedinarai totona ia mai. Idia dekenai ia gwau: “Ia bodaga diba aniani totona umui gaukara lasi, to ia bodaga diba lasi aniani, mauri hanaihanai ia henia gauna totona do umui gaukara.”​—⁠Ioa. 6:25-27.

6. Edena dala ai Iesu ia hahedinaraia ia be tanobada ena politikol dagi ia tahua lasi? (Laulau ginigunana itaia.)

⁶ Iesu ena mase dinana ia kahirakahira neganai, ia itaia ena murinai idia raka taudia haida idia laloa ia ese tanobada basileiana ta be  Ierusalema ai do ia haginia. Unai lalohadai ia hamaoromaoroa totona, Iesu ese idia dekenai mina parabolena ia herevalaia. Unai parabole ese ia hahedinaraia, “Lohia tauna” Iesu be do ia lao neganai, do ia mai haraga lasi. (Luka 19:11-13, 15) Danu, Iesu ia hahedinaraia ia be Roma ena politikol taudia amo ia gini siri. Pontio Pilato ese Iesu ia nanadaia: “Oi be Iuda taudia edia King, a?” (Ioa. 18:33) Reana gavana ia gari, dika Iesu ese taunimanima do ia doria bena Roma do idia tuari henia. Iesu ia haere: “Lauegu basileia be inai tanobada ena lasi.” (Ioa. 18:36) Iesu ia ura lasi politikol karadia lalonai ia vareai, badina iena Basileia be guba ai do ia gini. Ia ese Pilato ia hamaoroa, ia be “hereva momokani gwauraia hedinarai totona” tanobada dekenai ia mai.​—⁠Ioane 18:37 duahia.

7. Dahaka dainai politikol oreana ta ita sapot lasi eiava herevalaia lasi totona be mai ena hekwarahi?

⁷ Iesu bamona, eda asainmen eiava gaukara ita lalopararalaia neganai, ita be politikol oreana ta do ita sapot lasi eiava herevalaia lasi. Reana unai be auka. Sekit naria tauna ta ia gwau: “Emai gabu ai idia noho taudia idia ura gavamani idia senisia. Edia bese ladana idia abia isi, bona momo idia laloa edia bese sibona ese edia mauri do ia hanamoa. To, tadikaka taihu be edia Keristani lalotamona karana gimaia totona, Basileia ena sivarai namona harorolaia gaukarana idia laloa bada. Idia diba Dirava sibona ese kara gageva bona ita davaria hekwakwanai ibounai do ia hamaoromaoroa.”

8. Iesu ena negai Iuda taudia be dahaka metau idia davaria?

⁸ Kara gageva dainai, nega momo politikol taudia idia hepapahuahu. Iesu ena negai, politikol taudia be takisi henia karana idia hepapahuahulaia bona momo idia parara. Bona matamanai ita herevalaia Galilea tauna Iuda be Roma gavamani ia gwau-edeede henia, badina Roma idia ura taunimanima ese edia ladana idia rejista, unai amo takisi idia henia diba. Roma taudia bona Iesu ena hereva idia kamonai taudia danu idia hamaoroa kohu, tano, ruma, bona gau idauidau totona takisi momo idia henia. Bona takisi gogoa taudia momo be idia koikoi bona henaohenao, unai ese metau ia habadaia. Nega haida idia ese gavamani ena siahu taudia dekenai moni idia henia, dagi idia hoia totona, bena unai dagi idia gaukaralaia moni bada idia gogoa totona. Ieriko edia takisi gogoa tauna badana, Sakaio be taga tauna ai ia lao badina koikoi dalanai taunimanima amo moni ia abia. (Luka 19:2, 8) Hari, momo be Sakaio bamona idia kara.

9, 10. (a) Edena dala ai Iesu ena inai taudia be ia idia tohoa politikol hepapahuahu ta lalonai ia vareai totona? (b) Iesu ena haere amo dahaka ita dibaia? (Laulau ginigunana herevalaia.)

⁹ Iesu ena inai taudia be Iesu idia tohoa  takisi henia karana ena hepapahuahu lalonai ia vareai totona. Idia be takisi moni henia karana idia henanadailaia, badina Roma henunai idia noho taudia ese takisi monina denario ta idia henia be namo. (Mataio 22:16-18 duahia.) Iuda taudia idia ura lasi takisi idia henia. Badina unai ese idia ia hadibaia idia be Roma ese ia biagudia noho. Reana “Heroda ena orea taudia” idia laloa, bema Iesu ia gwau takisi ita henia be maoro lasi, vadaeni ita samania, ita gwau diba ia be Roma ena gavamani ia gwau-edeede henia. To bema Iesu ia gwau takisi ita henia be maoro, reana taunimanima be ia do idia rakatania vaitani.

¹⁰ Iesu be takisi henia karana ena hepapahuahu lalonai ia vareai lasi. Ia gwau: “Kaisara ena gaudia be Kaisara dekenai umui henia, to Dirava ena gaudia be Dirava dekenai umui henia.” (Mat. 22:16-18) Oibe, Iesu ia diba takisi gogoa taudia momo be idia koikoi bona henaohenao. To Iesu be unai ia laloa momo lasi, badina ia diba Dirava ena Basileia ese taunimanima edia hekwakwanai do ia haorea. Unai dainai, Iesu ena haheitalai ita tohotohoa. Namona be politikol ena hepapahuahu idauidau lalodiai ita vareai lasi, herevana ita itaia daika be ia maoro bona daika be ia kerere. Keristani taudia be Dirava ena Basileia bona ena kara maoromaoro idia tahua guna. Unai dainai, idia ese politikol oreadia edia gaukara daladia idia maumauraia lasi o hepapahuahulaia lasi.​—⁠Mat. 6:33.

11. Dahaka ita karaia kara gageva ita kokia totona?

¹¹ Iehova ena Witnes taudia momo be guna idia abia politikol lalohadai ibounai idia dadaraia. Hegeregere, Great Britain ai taihu ta ia gwau, “Iunivesiti dekenai society (taunimanima edia mauri stadilaia) kosi lau abia murinai, lau laloa politikol taudia ese senisi badadia haida idia karaia be namo. So pablik o taunimanima vairadiai, lau ese korema taudia edia rights o maoro lau herevalaia badina be lagani momo lalodiai politikol taudia ese ai idia hahisia. Ena be unai hepapahuahu karana dekenai lau kwalimu, to lau moale lasi. Gabeai lau laloparara, taunimanima ese edia kudouna ai idau bese inai henia kava urana idia kokia be namo. Oibe, Baibel lau stadilaia matamaia neganai, lau laloparara sibona egu kudouna ai unai ura dikana lau kokia guna be namo. Bona kurokuro taihu ta be mai haheauka ida lau ia durua unai senisi lau karaia totona. Hari lau be taia kudima taudia edia kongrigeisen ai regula painia gaukara lau karaia, bona taunimanima idauidau durua karana lau manadalaia noho.”

12. Iesu ese ena aposetolo taudia ia hamaoroa edena “hatubua muramura” idia dadaraia be namo?

¹² Iesu ena negai, tomadiho be politikol karadia lalonai idia vareai momo. Buka ta (Daily Life in Palestine at the Time of Christ) ia gwau, “Iuda taudia ese tomadiho be orea ta ta ai idia hapararaia, politikol pati idia parara bamona.” Unai dainai, Iesu ese ena aposetolo taudia ia hadibadia: “Emui matana umui kehoa noho, bona Heroda bona Farisea taudia edia hatubua muramura dainai do umui naria namonamo.” (Mar. 8:15) Iesu ese Heroda ia gwauraia neganai, reana Heroda ena orea taudia ia herevalaia. Orea ma ta, Farisea taudia unai, idia ura Iuda taudia be Roma amo idia parara. Mataio bukana ese ia hahedinaraia, Iesu ese ena aposetolo taudia ia hadibaia, namona be Sadukea taudia dekenai idia naria namonamo danu. Sadukea taudia be idia ura Roma ia lohia noho. Badina be, edia memba taudia momo be Roma gavamani henunai politikol dagi idia abia. Iesu ese ena aposetolo taudia ia hadibaia, namona be unai orea toi​—⁠Heroda ena orea taudia, Farisea taudia, Sadukea taudia​—⁠edia hadibaia herevadia, eiava hatubua muramura idia dadaraia. (Mat. 16:6, 12) Ita itaia, taunimanima ese Iesu be king ai idia halaoa gwauraia murinai, Iesu ese unai sisiba  o hadibaia herevana be ena aposetolo taudia dekenai ia gwauraia.

13, 14. (a) Edena dala ai politikol bona tomadiho ese dagedage bona kara gageva idia havaraia diba? (b) Dahaka dainai dagedage amo kara gageva karana ita hamaoromaoroa be namo lasi? (Laulau ginigunana herevalaia.)

¹³ Tomadiho be politikol karadia lalonai idia vareai neganai, dagedage idia vara diba. Iesu ese ena aposetolo taudia ia hamaoroa, unai hepapahuahu amo idia gini siri be namo. Unai bamona hereva dainai, hahelaga taudia bona Farisea taudia idia ura Iesu idia hamasea. Idia laloa Iesu be idia ia tuari henia, ia ura edia politikol dagi bona dubu ena dagi ia kokia. Idia gwau, “Bema ia dekenai gau ta ita karaia lasi, idia ibounai ese ia do idia abidadama henia, bona Roma taudia do idia mai bona iseda gabu bona iseda bese do idia abia.” (Ioa. 11:48) Unai dainai, Hahelaga Tauna Badana Kaiapa ese Iesu hamasea ena palani ia gunalaia.​—⁠Ioa. 11:49-53; 18:14.

¹⁴ Hanuaboi ai, Kaiapa ese soldia taudia ia siaia Iesu idia dogoatao totona. Iesu be ia do idia hamasea ena palani ia diba dainai, aposetolo taudia ida ena aniani ginigabena ai, idia ia noia kaia rua idia abia be namo. Unai ena badina be, ia ura idia dekenai gau ta do ia hadibaia. (Luka 22:36-38) Bona unai hanuaboi ai, soldia idia mai neganai, Petero be kaia amo idia ta ena taiana ia utua. Toana be Petero be unai hanuaboi ai ia vara kara gageva dekenai ia moale lasi. (Ioa. 18:10) To Iesu be Petero ia hamaoroa: “Emu tuari kaia be ena gabu dekenai oi atoa lou, badina tuari kaia idia gaukaralaia taudia ibounai be tuari kaia amo do idia mase.” (Mat. 26:52, 53) Unai sivarai be Iesu ese unai hanuaboi ai ia gwauraia gurigurina hegeregerena​—⁠idia be tanobada ena lasi be namo. (Ioane 17:16 duahia.) Dirava sibona ese kara gageva ia hamaoromaoroa be namo.

15, 16. (a) Edena dala ai Dirava ena Hereva ese Keristani taudia ia durua dagedage karadia idia dadaraia totona? (b) Iehova be inai tanobada ia itaia sibona lasi, to dahaka ia itaia danu?

¹⁵ Matamanai ita herevalaia Europe taihuna be unai bamona ia hereva danu. Ia gwau, “Lau itaia dagedage karana amo kara gageva ita hamaoromaoroa diba lasi. Lau itaia, dagedage taudia momo be idia mase. Bona momo be idia moale lasi. To lau moale badina Baibel amo lau davaria Dirava sibona ese tanobada ai kara maoromaoro ia havaraia diba. Lagani 25 lalodiai, unai sivarai namona lau harorolaia.” Africa tadikakana ese ena io (spear) ena gabunai be “lauma helaga ena tuari kaia,” Dirava ena Hereva unai, ia atoa, badina ia ese maino sivaraina be ena neiba dekenai ia harorolaia, herevana idia be edena iduhu taudia. (Efe. 6:17) Bona Europe taihuna be Iehova ena Witnes ta ai ia lao murinai, ia be tadikaka ta ia adavaia​—⁠ena be guna unai tadikaka ena iduhu ia inai henia. Inai stadi ai ita herevalaia taudia toi be senisi idia karaia badina idia ura Keriso idia tohotohoa.

¹⁶ Unai bamona senisi ita karaia be gau badana! Taunimanima be maino karaia dalana idia diba lasi dainai, Baibel ia gwau idia be davara ena hurehure badadia o dikadia bamona. (Isa. 17:12; 57:20, 21; Apo. 13:1) Ena be politikol dainai taunimanima idia badu, idia parara, bona dagedage karadia idia havaraia, to ita be maino bona lalotamona ita havaraia. Bona Iehova be inai heiriheiri tanobadana ia itaia sibona lasi, to ia moale badina iena taunimanima huanai maino ia noho.​—⁠Sepanaia 3:17 duahia.

17. (a) Edena dala toi ai lalotamona ita hahedinaraia diba? (b) Vaira wiki ena stadi ai dahaka do ita herevalaia?

¹⁷ Inai stadi ai ita itaia Keristani lalotamona be inai dala toi ai ita hahedinaraia diba: (1) Ita abia dae momokani Dirava ena guba Basileiana ese kara gageva do ia hamaoromaoroa, (2) ita ura lasi politikol oreadia edia hepapahuahu lalona ita vareai, bona (3) ita ura lasi dagedage. To nega haida, ta inai henia kava karana ese iseda lalotamona ia hadikaia diba. Vaira wiki ena stadi ai inai bamona hekwakwanai ita hanaia diba daladia do ita herevalaia, aposetolo edia negai idia noho Keristani taudia idia karaia bamona.