Unai siri ese Keristani kara namodia nain ia herevalaia: “Lauma helaga ena huahua be lalokau, moale, maino, boga-auka, hebogahisi, kara namo, abidadama, manau, bona sibona biagua karana.” Namo lasi ita laloa Dirava ena lauma helaga ese ita do ia durua unai kara namodia sibona ita hahedinaraia totona.

Mani aposetolo Paulo ese badina siridia ai ia torea karadia haida ita itaia: “Tauanina ena kara dikadia be . . . matabodaga karadia, miro karadia, gwau-edeede hemarai karadia, kaivakuku tomadiho henia karana, meamea karadia, inai heheni karadia, heai, mama, badu momo, heiriheiri, hapararaia karana, taunimanima badinaia karana, laloa dikadia, kekero, regerege bada pati karadia, bona unai bamona karadia.” (Ga 5:19-21) Unai dainai Paulo ese Kolose 3:5 ai ia herevalaia gaudia be “tauanina ena kara” bamona ia gwauraidia diba. Unai hegeregerena, kara namodia nain ia gwauraia murinai, ia gwau: “Unai gaudia dekenai taravatu be lasi.” Paulo be lauma helaga ena heduru amo do ita hahedinaraia kara namodia ibounai ia gwauraia lasi.

Paulo ese Efeso kongrigeisen ia tore henia neganai unai lista ia hedinarai namonamo, ia gwau: “Diari ese namo gaudia idauidau, bona kara maoromaoro bona hereva momokani ia havaraia.” (Efe. 5:8, 9) Oibe, “kara namo,” kara maoromaoro bona hereva momokani be “diari” ena kara, to danu idia be “lauma helaga ena huahua.”

Unai hegeregerena, Paulo ese Timoteo ia hagoadaia inai kara siks ia hahedinaraia totona: “Kara maoromaoro, Dirava badinaia karana, abidadama, lalokau, haheauka, bona lalomanau.” (1 Tim. 6:11) Paulo ese kara toi (abidadama, lalokau, bona lalomanau) sibona ia gwauraia “lauma helaga ena huahua.” To, Timoteo be kara namodia ma haida hegeregere, kara maoromaoro, Dirava badinaia karana, bona haheauka ia habadaia totona, lauma helaga ena heduru ia abia be namo.​—Kolose 3:12; 2 Petero 1:5-7 hahegeregerea.

Unai dainai, Galatia 5:22, 23 ese Keristani kara namodia ibounai ia gwauraia lasi. Dirava ena lauma helaga ese ita ia durua diba “lauma helaga ena huahua” nain ita hahedinaraia totona. To, lo Keristani taudia ai ita lao totona, namona be kara namodia ma haida ita hahedinaraia bona ‘kara matamata ita atoa, unai be Dirava ena ura hegeregerena ia vara, ia be maoromaoro momokani bona abidadama dalana ia badinaia.’​—Efe. 4:24.