ITA abia dae inai “dina gabediai” Iehova be ena taunimanima ia hakaua bona durua ia kahirakahira idia noho totona. (2 Tim. 3:1) Momokani, ita ta ta ese Iehova ita kamonai henia bona badinaia be namo. Hari iseda nega be tano gagaena ai idia noho Israela taudia edia nega bamona. Idia ese kibi ena regena idia kamonai neganai kara ta idia karaia be namo.

Iehova ese Mose ia hamaoroa, hama dekenai idia botaia siliva amo kibi rua do ia karaia. Unai amo ‘taunimanima do idia haboudia gwauraia, bona kamepa do idia kokia neganai,’ unai kibi idia hiriria diba. (Num. 10:2) Hahelaga taudia ese kibi be dala idauidau ai idia hiriria diba, unai amo taunimanima idia diba dahaka do idia karaia. (Num. 10:3-8) Hari, Dirava ena taunimanima be dala idauidau ai hakaua herevadia idia abia. Mani unai dala toi ita herevalaia, unai ese ita do idia durua Israela taudia ese kibi regena idia badinaia dalana ita tohotohoa totona. Hari, Dirava ena taunimanima be hebou badadia dekenai idia haboua, elda taudia be treinini idia abia, bona kongrigeisen ibounai edia tiokratik gaukara idauidau idia hanamoa noho.

Iehova ia ura “Israela taudia ibounai” be palai dubu ena iduara ena ist kahana dekenai idia haboua neganai, kibi be nega rua idia hiriria. (Num. 10:3) Iduhu ibounai be palai dubu idia hagegea bona kahana foa ai edia kamepa idia karaia, bona idia ese kibi ena regena idia kamonai. Toana be palai dubu kahirakahira idia kamepa taudia be miniti haida lalonai kibi ena regena idia kamonai. Ma haida be daudau sisina idia noho dainai do idia hekwarahi bona nega taina do ia hanaia gabeai idia ginidae. Herevana idia be kahirakahira eiava daudau, to Iehova ia ura Israela taudia ibounai idia haboua bona iena hakaua herevadia idia kamonai be namo.

Hari, ita be palai dubu dekenai ita haboua lasi, to Dirava ena taunimanima edia hebou dekenai ita idia boiria. Hegeregere, rijinol hebouhebou bona spesel hebou ma haida dekenai, mai anina bada heduru herevadia bona hakaua herevadia ita abia. Tanobada hegegemadai tano ta ta ai Iehova ena taunimanima be unai program tamona idia moalelaia. Unai hebou dekenai idia lao taudia be idia moale bada. Haida be gabu daudau amo to haida be gabu kahirakahira amo idia mai. To, unai hebou dekenai idia lao taudia idia abia dae edia hekwarahi ese anina namona ia havaraia.

To, unai hebou badadia gabudia amo idia noho daudau grup maragidia be edena bamona? Ita moale badina teknoloji dainai idia momo be unai program tamona idia kamonai diba, bona idia mamia idia be hebou badana dekenai idia noho bamona. Hegeregere, hedikwota tadikaka ena vadivadi ta ai, Benin brens taudia be dala idia karaia Sahara Desert ai ia noho maini taoni maragina ta ladana Arlit, Niger ese program idia kamonai  totona. Tadikaka, taihu bona kamonai taudia ibounai 21 idia hebou. Herevana idia be gabu daudau ai idia noho, to idia mamia idia be mai lalotamona ida unai hebou dekenai idia lao taudia 44,131 ida idia hebou. Tadikaka ta ia gwau: “Ai tanikiu bada herea badina dala umui karaia unai program ai kamonai totona. Unai ese emui lalokau ai dekenai ia hahedinaraia.”

Israela hahelaga taudia be kibi tamona idia hiriria neganai, “Israela gunalaia taudia, iduhu edia lohia taudia sibona” be palai dubu vairanai do idia haboua. (Num. 10:4) Unuseniai idia be Mose amo heduru herevadia bona treinini idia abia. Unai ese idia ia durua edia iduhu ena gaukara idauidau idia karaia totona. Bema oi be gunalaia tauna ta, dala do oi karaia unuseniai oi noho bona diba oi abia totona, a?

Hari, kongrigeisen elda taudia be “Israela gunalaia taudia” lasi, bona idia be Dirava ena mamoe idia biagua auka lasi. (1 Pet. 5:1-3) To, idia gaukara goada mamoe serina idia hakaua totona. Unai dainai, treinini ma haida, hegeregere Basileia Evanelia Sikuli totona idia boiridia neganai, mai ura ida unai boiboi idia abia dae. Unai sikuli ai, elda taudia be kongrigeisen naria namonamo daladia ma haida idia dibaia. Unai amo kongrigeisen taudia idia durua edia hetura karana Iehova ida idia hagoadaia totona. Herevana unai sikuli ta dekenai oi do lao lasi, unai sikuli dekenai idia lao taudia amo heduru oi abia diba.

Nega haida Israela hahelaga taudia be kibi idia hiriria kwadogi bona regena ia bada. Unai ese ia hahedinaraia Iehova ia ura kamepa ibounai idia kokia bona gabu ma ta dekenai idia lao. (Num. 10:5, 6) Israela taudia ese kamepa kokia gaukarana be idia karaia namonamo, to ia be mai ena hekwarahi. Nega haida Israela taudia haida idia hesiku gabu ma ta dekenai idia lao totona. Dahaka dainai?

Reana idia haida idia laloa, kamepa kokia ena kibi be idia hiriria loulou bona idia hegaegae lasi negadiai idia hiriria. ‘Nega haida ori be adorahi negana ai ia noho ela bona dabai.’ Ma nega haida ai ori be “dina rua, o hua ta, . . . o nega daudau” ia noho. (Num. 9:21, 22) Bona kamepa be nega hida idia kokia bona gabu ta dekenai idia lao? Numera karoa 33 ese Israela taudia idia kamepa gabudia 40 ia gwauraia.

Nega haida, idia be keruma gabudia ai idia kamepa. Unai be heduru gauna badina idia be “taunimanima idia noho lasi tano dikana bona mai garina” dekenai idia noho. (Deu. 1:19) Unai dainai reana idia laloa kamepa idia kokia bona do idia lao gabuna be gabu dikana.

Iduhu haida idia lao matamaia neganai, iduhu ma haida be idia naria daudau dainai idia hesiku. Ena be idia ibounai ese kibi regena idia kamonai, to ibounai be nega tamona idia lao lasi. Kibi idia hiriria kwadogi bona ena regena badana ese ia hahedinaraia, ist kahana dekenai idia kamepa iduhu hegeregere Iuda, Isakara bona Sebuluno do idia lao. (Num. 2:3-7; 10:5, 6) Gabeai, hahelaga taudia ese nega iharuana kibi idia hiriria kwadogi bona regena ia bada neganai, unai be saut kahana ai idia kamepa iduhu toi edia nega. Hahelaga taudia be unai bamona idia karaia ela bona kamepa taudia ibounai idia lao.

Reana, orea lalonai idia haidaua gaudia haida oi abia dae be auka. Senisi momo be nega tamona lalonai idia vara dainai reana oi laloa daradara. Eiava reana dala gunadia oi ura henia bona oi ura lasi idia haidaua. Herevana ena badina be dahaka, oi mamia unai ese emu haheauka karana ia tohoa, bona metairametaira unai senisi oi abia dae. To, bema ita haheauka bona unai senisi ita abia dae, do ita laloparara Dirava be ita ia hanamoa noho.

Mose ena negai, Iehova ese tatau, hahine, bona natudia milioni momo be tano gagaena ai ia hakaudia. Bema idia ia naria bona hakaua lasi, do idia mase. Hari, Iehova ese dina gabedia lalonai ita ia hakaua noho. Danu, ita ia durua ia kahirakahira ita noho bona iseda abidadama ia hagoadaia. Unai dainai, namona be ita ibounai ese iseda lalona ita hadaia, abidadama Israela taudia ese kibi ena regena idia badinaia hegeregerena do ita karaia!