IESU ia peroveta, inai nega dokona ai ia murinai idia raka taudia ese gogoa gaukara badana do idia moalelaia. (Mat. 9:37; 24:14) Iesu ese ia gwauraia herevana ia guguru dalana mani ita itaia. Taoni ta ladana Transcarpathia Ukraine ai, be taoni maragidia toi sibona idia noho. Unuseniai idia noho kongrigeisen ibounai be 50 bona pablisa be 5, 400 mai kahana. * Inai taoni toi lalonai idia noho taudia foa foa amo, tamona be Iehova ena Witnes!

Unai gabu ai haroro dalana be edena bamona? Tadikaka ta ladana Vasile, ia gwau: “Taunimanima be Baibel idia matauraia, hahemaoro goeva idia laloa bada, famili idia atoa guna, bona idia ura ma haida idia durua. Ita abia dae herevadia be nega haida idia ese idia abia dae lasi. To, Baibel oi herevalaia neganai idia kamonai namonamo.”

Momokani, iseda tadikaka taihu be teritori ta ai idia haroro neganai, idia davaria pablisa be momo to haroro teritori ai idia noho ruma be momo lasi. Hegeregere, kongrigeisen ta lalonai pablisa ibounai 134 idia noho, bona idia karaia teritori ai idia noho ruma ibounai be 50 sibona! Edena dala ai tadikaka taihu be edia haroro gaukara idia karaia?

Tadikaka bona taihu momo be edia nega idia gaukaralaia pablisa lasi gabudia ai idia haroro totona. Tadikaka burukana ta ladana Ionash, ena mauri lagani be 90 ia gwau: “Emai kongrigeisen ena teritori ai ruma be momo to pablisa be momo lasi. Lau be hanua dekenai sibona lau haroro, to vanegai sibona egu gorere ia bada. Nega haida, daudau teritori ta dekenai lau lao, ena daudau be kilomita 160 bamona, bona unuseniai Hungarian gado ai lau haroro.” Namona be pablisa idia gaukara goada teritori ma haida dekenai idia haroro totona. Ionash ma ia gwau: “Trein lau abia totona daba 4 oklok lau noga. Haroro gaukara lau karaia ela bona adorahi 6 oklok lau ore bona ruma dekenai lau giroa lou totona, trein ai lau guia. Wiki ta lalonai dina rua o toi lalonai unai lau karaia.” Dahaka hahenamo ia davaria? Ia gwau: “Lau moalelaia bada. Bona lau moale badina gabu daudau ai ia noho ruma bese ta lau durua hereva momokani idia dibaia totona.”

Momokani, unai taoni ai idia noho kongrigeisen ta ta lalonai haida sibona be daudau teritori dekenai idia haroro diba. To pablisa ibounai, burukadia danu, be idia gaukara goada edia kongrigeisen ena teritori ibounai ai idia haroro totona. Unai dainai, lagani 2017 ai, unai taoni toi idia haboua bona Memorial idia abia neganai, edia namba ese pablisa ena namba ia hanaia. Momokani, herevana edeseniai iseda haroro gaukara ita karaia, to “Lohiabada ena gaukara idauidau lalonai do [ita] bisi” be namo.​—⁠1 Kor. 15:58.