TANOBADA dikana ai ita noho dainai, namona be ita gaukara goada maino ai ita noho totona. Herevana iseda huanai maino ia noho, to nega haida ia auka maino karadia ita hahedinaraia totona. Dirava ena Hereva ese edena dala ai ita ia durua maino ai ita noho totona? Bona edena dala ai ma haida ita durua diba maino idia davaria totona?

Maino ai ita noho diba, bema ita gari lasi bona gau ta dainai ita lalohekwarahi lasi. Danu, ma haida ida iseda hetura karana ia goada be namo. Gau badana be, maino ai ita noho totona, Dirava ena turana ai ita lao. Edena dala ai unai do ita karaia?

Iehova ena taravatu bona hakaua herevadia ita badinaia neganai, ita hahedinaraia ia ita abidadama henia bona ita ura ia bona ita huanai maino ia noho. (Ier. 17:7, 8; Iam. 2:22, 23) Unai dainai ita kahirakahira ia mai bona ita dekenai lalomaino ia henia. Isaia 32:17 ai, Baibel ia gwau: “Taunimanima ibounai ese kara maoromaoro sibona idia karaia dainai, idia ese, mai maino bona mauri namona do idia noho hanaihanai.” Mai kudouna ida Iehova ita badinaia neganai, lalomaino ita abia diba.​—⁠Isa. 48:18, 19.

Danu, iseda guba Tamana be ena harihari gauna​—⁠lauma helaga​—⁠amo ita ia durua maino ita davaria totona.​—⁠Kara 9:31.

Aposetolo Paulo ese ia hahedinaraia maino be “lauma helaga ena huahua” ihatoina. (Gal. 5:22, 23) Dirava ena lauma ese maino ia havaraia dainai, namona be lauma helaga ese ita ia hakaua unai kara ita hahedinaraia totona. Dirava ena lauma ese dala rua ai ita ia durua maino ita hahedinaraia totona. Mani ita herevalaia.

Ginigunana be, hanaihanai Dirava ena Hereva duahia karana ese ita ia durua maino ita abia totona. (Sal. 1:2, 3) Baibel ena hereva ita laloa dobu neganai, Dirava ena lauma ese ita ia durua Iehova ena lalohadai hekwakwanai  idauidau hamaoromaoroa dalana dekenai do ita lalopararalaia. Hegeregere, maino ia hahedinaraia dalana bona ia dekenai maino be mai anina bada ena badina ita dibaia. Bema Baibel amo Dirava ena haheitalai ita dibaia bona iseda mauri ai ita tohotohoa, maino ai do ita noho.​—⁠Aon. 3:1, 2.

Iharuana be, Dirava ena lauma helaga totona ita guriguri be namo. (Luka 11:13) Iehova ia gwauhamata, bema ena heduru ita tahua, “Dirava ena maino, laloparara ibounai ia hereaia gauna, ese [iseda] kudouna bona lalona do ia gimaia, Keriso Iesu amo.” (Fili. 4:6, 7) Iehova ena lauma totona hanaihanai ita guriguri neganai, iseda Dirava ese ita dekenai lalomaino do ia henia​—⁠unai maino be ia idia tura henia taudia sibona dekenai ia henia.​—⁠Roma 15:13.

Edena dala ai, haida be unai Baibel ena sisiba idia badinaia bona edia mauri ai gau haida idia haidaua unai amo​—⁠Iehova ida, idia sibona dekenai, bona ma haida ida maino ai idia noho?

Hari Keristani kongrigeisen lalonai, haida be guna “badu” taudia, to hari idia laloa maoromaoro, idia hebogahisi, idia haheauka, bona ma haida ida maino ai idia noho. * (Aon. 29:22) Mani tadikaka ta bona taihu ta dekenai ia vara gauna ita laloa. Heduru idia abia, edia badu karana idia hanaia bona ma haida ida maino ai idia noho totona.

David ena badu karana ese ena hereva karana ia hadikaia. Dirava dekenai ena mauri ia do gwauhamatalaia lasi neganai, ia be nega momo haida ia kara auka henia bona ena tama sina bona tadidia dekenai hereva dikadia ia gwauraia. Gabeai, David ia itaia badu karana ia rakatania bona mai maino ida ia kara be namo. Edena dala ai maino karadia ia hahedinaraia? Ia gwau, “Egu mauri ai Baibel ena sisiba lau badinaia matamaia dainai, lau bona egu ruma bese huanai hemataurai karana ai hahedinaraia.”

Rachel ena ruma bese maurina ese ena kara ia haidaua. Ia gwau, “Hari, lau hekwarahi badu karana lau biagua totona badina lau be badu momo ruma besena amo lau tubu daekau.” Dahaka ese ia durua maino ai ia noho totona? Ia gwau, “Hanaihanai Iehova dekenai lau guriguri.”

 David bona Rachel edia haheitalai ese ia hahedinaraia, bema Baibel ena sisiba ita badinaia bona hanaihanai Dirava ena lauma ena heduru totona ita guriguri, maino ai do ita noho. Momokani, herevana dagedage tanobadana ai ita noho, to lalomaino ita abia diba unai amo iseda ruma bese bona Keristani tadikaka taihu ida maino ai ita noho. To, Iehova ese ita ia hagoadaia, namona be “taunimanima ibounai ida maino ai do [ita] noho.” (Roma 12:18) Unai ia vara diba, a? Bona dahaka namo do ita abia bema ma haida ida maino ai ita noho?

Iseda haroro gaukara amo, taunimanima ita durua Dirava ena Basileia ena maino sivaraina idia kamonai totona. (Isa. 9:6, 7; Mat. 24:14) Moale gauna be, momo ese unai sivarai idia abia dae. Unai dainai, idia dekenai idia vara gaudia o idia itaia gaudia dekenai idia lalohisihisi o badu momo lasi. To, hari idia be mai edia helaro korikorina vaira nega totona, bona idia ia durua “maino do [idia] tahua, bona maino kara do [idia] karaia noho.”​—⁠Sal. 34:14.

Momo be matamanai ita harorolaia sivaraina idia kamonai lasi. (Ioa. 3:19) Herevana unai ia vara, to Dirava ena lauma ese ita ia durua dainai, sivarai namona be mai maino bona hemataurai ida idia dekenai ita harorolaia. Unai dala amo, ita be Iesu ena hadibaia herevana, Mataio 10: 11-13 dekenai ita badinaia, ia gwau: “Ruma dekenai umui vareai neganai, ruma taudia dekenai hanamoa hereva umui gwauraia. Bema ruma taudia idia kamonai, emui maino be idia latanai do ia noho, to bema idia kamonai lasi, emui maino do umui abia lou.” Bema Iesu ena sisiba ita badinaia, mai maino ida do ita raka siri bona do ita abia dae, reana nega ma ta ai iseda hereva do ia abia dae.

Danu, gavamani taudia dekenai mai hemataurai ida ita hereva neganai, maino ita havaraia​—⁠iseda haroro gaukara idia koua toho taudia dekenai danu. Hegeregere, Africa tano ta ena gavamani be inai heheni karana dainai, Kingdom Hall haginia gaukaradia ena gwaumaoro abia dalana idia koua. Unai hekwakwanai be maino dalanai idia hamaoromaoroa totona, guna Africa tano ai misinari gaukara ia karaia tadikaka ta idia abia hidi, bona Africa ena Embaseda, England dekenai idia siaia lao, ia do ia hereva henia totona. Embaseda dekenai, Africa ai, Iehova ena Witnes taudia edia gaukara do ia herevalaia. Ena vadivadi ese dahaka namo ia havaraia?

Ia gwau: “Risepsen dekenai lau ginidae neganai, unuseniai ia helai hahinena ese ia hahedokilaia dabua ena sitaelo amo lau laloparara ia be lau dibaia gado ta ena iduhu amo ia mai. So ena gado ai ia lau hanamoa. Ia hoa bona lau ia nanadaia, ia gwau; ‘Emu vadivadi ena badina be dahaka?’ Mai hemataurai ida ia lau hamaoroa lau ura Embaseda lau hereva henia. Ia ese Embaseda ia hadibaia bona ia mai neganai, edia gado dekenai lau ia hanamoa. Unai murinai, ia dekenai Witnes taudia ese idia karaia gaukara namodia lau herevalaia neganai, ia kamonai namonamo.”

Tadikaka be mai hemataurai ida ia hereva dainai, Embaseda ena lalohadai kererena iseda gaukara dekenai, ia hamaoromaoroa. Daudau lasi murinai, unai Africa tano ena gavamani ese gwaumaoro ia henia haginia gaukarana idia hamatamaia totona. Tadikaka be unai haere namona dainai, idia moale bada! Momokani, mai hemataurai ida ma haida ita kara henia neganai, namo do ita davaria​—⁠maino danu.

Hari, Iehova ena taunimanima huanai maino korikori idia moalelaia. Oi danu do oi moale, bema emu mauri lalonai oi gaukara goada lauma ena huahua, maino karadia unai, oi hahedinaraia totona. Mai anina bada gauna be, Iehova ena lalonamo do oi abia bona Dirava ena tanobada matamatana lalonai mai maino ida do oi noho ela bona hanaihanai.​—⁠2 Pet. 3:13, 14.