1. Kara dika dainai, Dirava ena hesiai taudia momo be dahaka idia laloa?

APOSETOLO PAULO ia gwau: “Lau madi o!” (Roma 7:24) Dirava ena hesiai taudia momo be unai bamona idia hereva danu. Ita ibounai be goevadae lasi dainai, iseda kara amo Iehova ena lalona ita hahisia neganai, ita lalohisihisi. Keristani taudia haida be idia kara dika murinai, idia mamia Dirava be edia dika do ia gwauatao lasi.

2. (a) Salamo 34:22 ese edena bamona ia hahedinaraia Dirava ena hesiai taudia idia lalohisihisi lasi be namo? (b) Inai stadi ai dahaka do ita herevalaia? (Maua ladana “ Ita Dibaia Gauna o Laulau Herevana?” itaia.)

² Baibel ia gwau, Iehova dekenai idia heau mauri taudia be do idia lalohisihisi lasi. (Salamo 34:22 duahia.) Iehova dekenai heau mauri karana ena anina be dahaka? Iehova ese ita ia hebogahisi henia bona iseda dika ia gwauatao totona, dahaka ita karaia be namo? Unai henanadai edia haere abia totona, mani idaunega Israela ai idia noho heau mauri hanuadia ita laloa. Momokani, Taravatu kontrakana dainai unai hanua idia abia hidi, to unai Taravatu be Pentekoste 33 C.E. ai idia haidaua. Laloatao, unai taravatu be Iehova ese ia henia. Unai dainai unai heau mauri hanuadia amo ita be Iehova ena lalohadai kara dika, kara dika taudia, bona helalo-kerehai  karana dekenai ita diba. Mani unai hanuadia idia noho ena badina ita herevalaia guna.

3. Israela taudia ese ia ala-ala tauna dekenai dahaka idia karaia?

³ Iehova ese ala-ala karadia ibounai ia laloa bada. Bema Israela tauna ese ta ia alaia mase, ia mase tauna ena varavara ese ia do ia alaia mase. (Num. 35:19) Unai amo ala-ala tauna ese kerere lasi tauna ena rara davana ia henia diba. Unai bamona idia karaia haraga dainai, Gwauhamata Tanona be ia goeva, badina Iehova ia gwau: “Bema unai moni umui abia neganai, umui ese umui noho tanona umui hamiroa noho.”​—Num. 35:33, 34.

4. Israela ai, aksiden amo ta ia alaia mase tauna be dahaka ia karaia?

⁴ To bema tau ta ese aksiden amo ta ia hamasea, Israela taudia be dahaka idia karaia? Ena be aksiden amo ta ia hamasea, to ia be ia kerere, badina kerere lasi tauna ia hamasea. (Gen. 9:5) To, ia be mase tauna ena varavara amo ia heau bona heau mauri hanuadia ta dekenai ia lao diba. Unuseniai ia dekenai dika ta do ia vara lasi. Bona ia be unai hanua dekenai do ia noho ela bona hahelaga tauna badana ia mase.​—⁠Num. 35:15, 28.

5. Edena dala ai heau mauri hanuadia amo Iehova ena kara ita dibaia diba?

⁵ Unai heau mauri hanuadia abia hidi karana be taunimanima ta ena lalohadai lasi. Iehova sibona ese Iosua ia hagania, ia gwau: “Israela taudia do oi hamaoroa, heau mauri hanua haida do idia abia hidi.” Bena hanua 6 idia abia hidi bona idia hahelagaia. (Ios. 20:1, 2, 7, 8) Iehova sibona ese unai hanua ia abidia hidi dainai, reana ita henanadai: Unai kara amo edena dala ai Iehova ena hebogahisi ita lalopararalaia diba? Bona Iehova be iseda heau mauri gabuna ai ita halaoa karana amo dahaka ita dibaia?

6, 7. (a) Hanua ena tatau badadia ese aksiden amo ta ia hamasea tauna idia hahemaoro henia dalana herevalaia. (Laulau ginigunana herevalaia.) (b) Dahaka dainai ia heau tauna ese hanua ena tatau badadia ia itaia be namo?

⁶ Aksiden amo ta ia alaia murinai, ia heau tauna be “ia dekenai ia vara kerere ena sivarai be hanua tau badadia dekenai do ia gwauraia” guna, unai be heau mauri hanuana ena geiti vairanai do ia karaia. Unai murinai hanua lalonai ia do idia abia dae. (Ios. 20:4) Nega sisina murinai, ala-ala tauna be kerere ia vara hanuana ena tatau badadia dekenai do idia siaia giroa, bona idia ese ia do idia hahemaoro henia. (Numera 35:24, 25 duahia.) Bema idia lalotamona unai ala-ala karana be aksiden amo ia vara, ia heau tauna be heau mauri hanuana dekenai do idia siaia giroa.

⁷ To dahaka dainai ia ese tatau badadia ia itaia? Unai amo Israela ena kongrigeisen be do ia goeva bona Iehova ese ia do ia hebogahisi henia. Baibel ia diba bada tauna ta ia gwau, bema ia heau tauna be hanua ena tatau badadia ia itaia lasi, “ia be dika ia davaria diba.” Ma ia gwau: “Iena rara be sibona ena imana dekenai, badina Dirava ese ia hegaegaelaia dalana ia badinaia lasi.” Aksiden amo ta ia hamasea tauna durua dalana ia noho, to ia sibona ese unai heduru ia tahua bona abia be namo. Bema Iehova ese ia abia hidi heau mauri hanuana ta dekenai ia lao lasi, ia hamasea tauna ena varavara ese ia idia hamasea diba.

8, 9. Dahaka dainai kerere badana ia karaia Keristani tauna be elda taudia ia itaia be namo?

⁸ Hari danu, bema Keristani tauna ta ia kara dika, namona be kongrigeisen ena elda taudia ia itaia, bona idia ese ia do idia durua. Dahaka dainai unai be mai anina bada? Gau ginigunana be, Iehova ese elda taudia ia abia hidi, unai amo ia kara dika tauna be Iena Hereva hegeregerena idia durua diba.  (Iam. 5:14-16) Bona iharuana be, idia ese ia helalo-kerehai tauna do idia durua, unai amo Dirava ena henari henunai do ia noho bona kara dika ia dadaraia diba. (Gal. 6:1; Heb. 12:11) Ihatoina be, elda taudia idia abia hidi bona treinia, unai amo idia helalo-kerehai taudia do idia durua bona edia hisihisi do idia hamaragia. Iehova ese unai elda taudia ia gwauraia, “guba bada ia toa neganai hunia gabudia namodia hegeregere.” (Isa. 32:1, 2) Unai dala amo Dirava ese ita dekenai ena hebogahisi ia hahedinaraia.

⁹ Dirava ena hesiai taudia momo be elda taudia amo heduru idia abia dainai, namo idia davaria. Hegeregere, tadikaka ta ladana Daniel be kerere badana ta ia karaia, to hua momo lalonai elda taudia ia itaia lasi. Ia gwau: “Nega bada ia hanaia murinai, lau laloa elda taudia be lau totona gau ta idia karaia diba lasi. To nega momo lau gari, badina dika ta be lau karaia kererena ena sivarai ia kamonai. Bona Iehova dekenai lau guriguri neganai, nega momo lau karaia kererena dainai sori herevana lau gwauraia.” Gabeai, Daniel be elda taudia edia heduru ia noia. Ia gwau: “Matamanai, lau gari elda taudia lau hereva henia totona. To gabeai egu hemami ia namo, unai be hegeregere ta ese egu pagana amo metau gauna ta ia kokia. Hari, Iehova lau guriguri henia diba bona gau ta ese unai ia koua lasi.” Daniel ena lalomamina be hari ia goeva, bona vanegai sibona hesiai tauna ena maduna ia abia.

10. Tatau badadia ese aksiden amo ta ia hamasea tauna idia hebogahisi henia totona, ia be dahaka ia karaia be namo?

¹⁰ Tatau badadia ese aksiden amo ta ia hamasea tauna idia hebogahisi henia totona, ia be kahirakahira ia noho heau mauri hanuana dekenai ia heau lao be namo. (Iosua 20:4 duahia.) Sibona ia hamauria totona, heau mauri hanuana dekenai ia heau lao haraga be namo bona unuseni do ia noho! Anina be iena moni gaukara bona ruma namona do ia rakatania, bona do ia loa kava lasi ela bona hahelaga tauna badana ia mase. *  (Num. 35:25) To unai ia karaia be mai ena namo. Bema unai heau mauri hanuana ia rakatania, ia hahedinaraia ia karaia ala-ala karana ia laloa bada lasi, bona iena mauri ia haboioa diba.

11. Ia helalo-kerehai Keristani tauna be dahaka do ia karaia, unai amo ia hahedinaraia Dirava ena hebogahisi karana ia laloa bada?

¹¹ Hari danu, Dirava ese ia helalo-kerehai tauna ia hebogahisi henia totona, namona be ia ese ia karaia noho kara kererena ia rakatania. To unai sibona lasi, kara kerere maragidia ia dadaraia danu be namo, badina idia ese ta idia veria diba kerere badana ia karaia totona. Aposetolo Paulo ese idia helalo-kerehai Korinto Keristani taudia ese idia karaia karana ia gwauraia. Ia gwau: “Dirava ena ura hegeregerena emui lalohisihisi karana ese ia havaraia huahua mani umui laloa: Umui gaukara goada, umui ese emui ladana umui hanamoa lou, kerere umui moalelaia lasi, Dirava umui gari henia, umui ura bada do umui helalo-kerehai, ura goadana umui hahedinaraia, bona kerere umui hamaoromaoroa!” (2 Kor. 7:10, 11) Bema ta be ia gaukara goada ia karaia noho kara kererena ia rakatania totona, ia hahedinaraia ia be ia karaia karana dainai ia sori bona ia ura Iehova ese ia do ia hebogahisi henia.

12. Bema Keristani tauna ta ia ura Iehova ena hebogahisi ia mamia, dahaka ia karaia be namo?

¹² Dirava ese Keristani tauna ta ia hebogahisi henia noho totona, dahaka ia karaia be namo? Bema ia ura henia gaudia ese ia idia hahekwakwanaia, unai gaudia do ia dadaraia. (Mat. 18:8, 9) Hegeregere, bema emu turadia haida ese oi idia veria Iehova ia moalelaia lasi karadia oi karaia totona, idia do oi bamoa noho, a? Bema oi hekwarahi noho inuinu kekero karana oi dadaraia totona, kekero muramura idia inua gabudia do oi dadaraia, a? Bema oi hekwarahi noho matabodaga urana oi dadaraia totona, unai kara idia hahedinaraia muvi, websait, o moale karadia oi dadaraia, a? Laloatao, bema ita gaukara goada Iehova ena taravatu ita badinaia totona, ia ese ita do ia hanamoa. To bema Iehova ese ita ia rakatania, do ita lalohisihisi bada. Bona bema Iehova be hanaihanai ita dekenai iena lalokau ia hahedinaraia, do ita moale bada.​—Isa. 54:7, 8.

13. Dahaka dainai heau mauri hanuana dekenai ia lao tauna be do ia gari lasi, to do ia moale?

¹³ Ia heau tauna be unai heau mauri hanuana dekenai ia vareai neganai, dika ta do ia davaria lasi. Unai hanuadia dainai Iehova ia gwau: “Unai gabu dekenai mase tauna ena varavara, davana henia tauna, ese unai heau tauna ia alaia diba lasi.” (Ios. 20:2, 3) Iehova ia gwau lasi unai ala-ala tauna be ia karaia kerere dainai do idia hahemaoro henia lou. Danu, mase tauna ena varavara be unai hanua dekenai do ia vareai lasi ala-ala tauna ia hamasea totona. Ia heau tauna be dika ta dainai do ia gari lasi. Ia be unai heau mauri hanuana dekenai ia noho neganai, Iehova ese ia do ia gimaia. Unai hanua be dibura ruma ta bamona lasi. Unuseni ia lao tauna be ia gaukara diba, ma haida ia durua, bona mai maino ida Iehova ia hesiai henia diba. Oibe, unuseniai iena mauri do ia moalelaia!

14. Ia helalo-kerehai Keristani tauna be dahaka ia abia dae be namo?

¹⁴ Dirava ena taunimanima haida be kerere badana idia karaia, to idia helalo-kerehai murinai, idia be idia karaia kererena dainai idia do lalohisihisi. Idia laloa Iehova be edia kerere do ia laloaboio diba lasi. Bema unai bamona oi laloa, namona be oi laloatao, Iehova ese emu dika ia gwauatao neganai, ia ese oi karaia kererena ia laloaboio momokani! Matamanai ita herevalaia tadikakana, Daniel, be unai ia mamia. Elda taudia ese ia idia durua bona lalomamina goevana ia abia lou murinai, ia gwau: “Hari lau hahodi namonamo diba. Bona lau karaia kererena dainai  lau lalohisihisi noho lasi. Lau diba Dirava ese kara dika ia gwauatao murinai, unai dika ia laloaboio momokani. Iehova ia gwau bamona, ia ese emu kara dika be oi amo do ia kokidia momokani. Bona unai dika ena hisihisi do oi mamia lou lasi.” Ala-ala tauna be heau mauri hanuana dekenai ia noho neganai, ia be mase tauna ena varavara dainai do ia gari lasi. Unai hegeregerena, Iehova ese iseda kara dika ia gwauatao murinai, namo lasi ita gari bona laloa ia ese ita karaia karana dainai ita do ia hahemaoro henia.​—⁠Salamo 103:8-12 duahia.

15, 16. Iesu be Mauri Davana Karaia Tauna bona Hahelaga Tauna Badana dainai, unai ese edena bamona emu abidadama ia hagoadaia?

¹⁵ Momokani, hari ita be Iehova ena hebogahisi karana ita abia dae momokani diba, Israela taudia bamona lasi. Paulo be Iehova ia kamonai henia lasi neganai, ia lalohisihisi bada, to gabeai ia gwau: “Iesu Keriso, iseda Lohiabada amo Dirava lau tanikiu henia!” (Roma 7:25) Ena be Paulo ia hekwarahi kara dika ia dadaraia bona guna ia karaia kererena amo ia helalo-kerehai, to ia diba momokani Dirava ese Iesu amo ena dika do ia gwauatao. Iesu be iseda Mauri Davana Karaia Tauna dainai, ia ese iseda lalomamina ia hagoevaia bona ita dekenai lalomaino ia henia. (Heb. 9:13, 14) Bona ia be iseda Hahelaga Tauna Badana dainai, “ia amo Dirava kahirakahira idia lao taudia do ia hamauridia momokani, badina ia noho hanaihanai bona idia totona Dirava do ia noinoi henia.” (Heb. 7:24, 25) Hahelaga tauna badana ena gaukara amo Israela taudia idia diba edia kara dika be Dirava ese ia gwauatao, unai hegeregerena iseda Hahelaga Tauna Badana, Iesu, amo ita diba “hebogahisi do ita davaria bona iena hebogahisi hereadaena amo, heduru be nega maorona ai do ita abia.”​—⁠Heb. 4:15, 16.

¹⁶ Iehova be iseda heau mauri gabuna ai ita halaoa totona, namona be Iesu ena boubou gauna ita abidadama henia. Namo lasi oi laloa mauri davalaia boubouna be taunimanima ibounai sibona totona. To namona be oi abia dae oi danu be unai boubou gauna amo namo do oi abia. (Gal. 2:20, 21) Bona mauri davalaia boubouna dainai, Iehova be emu dika ia gwauatao diba. Danu, unai boubou gauna dainai, do oi mauri hanaihanai. Iesu ena boubou gauna be Iehova ese oi dekenai ia henia harihari gauna.

17. Dahaka dainai oi ura Iehova be emu heau mauri gabuna ai oi halaoa?

¹⁷ Heau mauri hanuadia ese Iehova ena hebogahisi karana idia hahedinaraia. Oibe, Dirava ese unai hanua ia abidia hidi karana amo ia hahedinaraia iseda mauri be helaga. Danu, elda taudia ese ita idia durua dalana, helalo-kerehai momokani ena toana, bona Iehova ese iseda dika ia gwauatao bona laloaboio karana ia hahedinaraia. Iehova be emui heau mauri gabuna ai oi halaoa, a? Hunia gabuna ma ta be lasi! (Sal. 91:1, 2) Vaira wiki ena stadi ai, do ita itaia edena bamona heau mauri hanuadia ese ita idia durua Iehova ena hahemaoro goeva bona hebogahisi ita tohotohoa totona.