IESU be Mose Ena Taravatu ia ura henia. Ita hoa lasi, badina unai Taravatu be ena Tamana, Iehova, ese ia henia, bona Iesu be ena Tamana ia lalokau henia. Salamo 40:8 ese ia hahedinaraia, Iesu be Dirava ena taravatu ia ura henia bada. Ia gwau: “Lauegu Dirava e, lau ura dikadika oiemu ura do lau karaia. Oiemu taravatu be lauegu kudouna lalonai ia noho.” Iena hereva bona kara amo ia hamomokania, Dirava ena Taravatu be goevadae, mai ena namo, bona do ia guguru.​—Mat. 5:17-19.

1, 2. (a) Iesu ese Dirava ena Taravatu be edena bamona ia laloa? (b) Edena dala ai taravatu hadibaia taudia bona Farisea taudia ese Taravatu idia hakererea?

² Unai dainai taravatu hadibaia taudia bona Farisea taudia ese ena Tamana ena Taravatu idia hakererea neganai, Iesu ia lalohisihisi bada! Idia ese taravatu ena hereva maragimaragi ibounai idia badinaia namonamo dainai, Iesu ia gwau: “Umui ese minti, dili bona kamini edia kahana 10 amo kahana ta umui henia.” To edia kerere be dahaka? Ma ia gwau: “To Taravatu ena hereva badadia, hegeregere hahemaoro goeva, hebogahisi bona abidadama umui laloa lasi.” (Mat. 23:23) Iesu be Farisea taudia bamona lasi, ia ese unai Taravatu ia noho ena badina, bona unai hahegani ta ta ese Dirava ena kara idia hahedinaraia dalana ia lalopararalaia.

3. Inai stadi ai dahaka do ita herevalaia?

³ Ita Keristani taudia be Taravatu kontrakana henunai ita noho lasi. (Roma 7:6) To Iehova ese unai Taravatu be Baibel lalonai ia atoa. Badina ia ura ita ese “Taravatu ena hereva badadia” o ena hakaua herevadia ita lalopararalaia bona badinaia. Hegeregere, heau mauri hanuadia dekenai edena hakaua herevana ia noho? Vanegai stadi ai, ita be ia heau tauna ese ia karaia gaudia haida ita dibaia. To heau mauri hanuadia amo ita ese Iehova bona ena kara ita tohotohoa dalana ita dibaia. Bona inai stadi ese inai henanadai toi do ia haerelaia: Heau mauri hanuadia ese edena dala ai Iehova ena hebogahisi idia hahedinaraia? Ia ese mauri ia laloa dalana dekenai dahaka ita dibaia? Bona edena dala ai iena hahemaoro goeva karana idia hahedinaraia? Unai ita herevalaia neganai, namona be emu guba Tamana oi tohotohoa diba daladia oi laloa.​—⁠Efeso 5:1 duahia.

4, 5. (a) Heau mauri hanuadia idia abia hidi neganai, dahaka idia karaia bona dahaka dainai? (b) Bona Iehova dekenai dahaka ita dibaia?

⁴ Heau mauri hanuadia 6 dekenai ta ia lao be auka lasi. Iehova ese Israela taudia ia hagania, Ioridane Sinavaina ena kahana kahana amo hanua toi do idia abia hidi. Dahaka dainai? Unai amo ia heau tauna be unai heau mauri hanuadia dekenai ia lao haraga diba. (Num. 35:11-14) Heau mauri hanuadia edia dala be idia namo. (Deu. 19:3) Iuda taudia edia kastom hegeregerena, dala badinai saini idia atodia, unai amo ia heau tauna be hanua maorona dekenai ia lao diba. Heau mauri hanuadia idia noho dainai, aksiden amo ta ia alaia tauna be tano idauna dekenai ia lao lasi, dika unuseniai tomadiho koikoi ia badinaia.

⁵ Mani oi laloa: Iehova sibona ese hahegani ia henia ala-ala taudia idia hamasea totona. To danu, dala ia karaia aksiden amo ta ia alaia tauna ia hebogahisi henia bona gimaia totona! Baibel ia herevalaia tauna ta ia gwau: “Gau ibounai be auka lasi dalanai ia karaia. Unai be Dirava ena hebogahisi karana.” Iehova be diadi namona, bona ia ura lasi ena hesiai taudia ia panisia. To, “ena hebogahisi be bada herea.”​—Efe. 2:4.

6. Farisea tauna ese Dirava ena hebogahisi karana ia tohotohoa, a?

⁶ To, Farisea taudia be idia ura lasi ma haida idia hebogahisi henia. Hegeregere, sivarai haida ese idia hahedinaraia, Farisea taudia ese ta ena dika idia gwauatao lasi, bema ia be nega toi unai kerere tamona ia karaia. Idia ese kerere taudia idia laloa dalana hahedinaraia totona, Iesu ese parabole ta ia gwauraia. Unai parabole ai Farisea tauna be ia guriguri, ia gwau: “Dirava e, oi lau tanikiu henia badina lau be taunimanima ma haida bamona lasi, idia be henaohenao taudia, kara maoromaoro lasi taudia, heudahanai taudia, danu lau be inai takisi gogoa tauna bamona lasi”​—⁠takisi gogoa tauna be mai manau ida Dirava ia noia  ia do ia hebogahisi henia. Dahaka dainai Farisea taudia be idia ura lasi hebogahisi idia hahedinaraia? Baibel ia gwau idia dekenai “ma haida be anina lasi.”​—Luka 18:9-14.

7, 8. (a) Ta be emu lalona ia hahisia neganai, edena dala ai Iehova oi tohotohoa diba? (b) Ma ta ena dika gwauatao totona, dahaka dainai ita manau be namo?

⁷ Namo lasi Farisea taudia ita tohotohoa, to Iehova ita tohotohoa be namo bona hebogahisi ita hahedinaraia. (Kolose 3:13 duahia.) Unai oi karaia diba bema mai manau ida ma haida edia dika oi gwauatao. (Luka 17:3, 4) Sibona oi nanadaia: ‘Ena be nega momo haida ese egu lalona idia hahisia, to edia dika lau gwauatao, a? Lau ura dikadika lau ia hahisia tauna ida maino lau karaia, a?’

⁸ Bema ta ia manau, ia be ma ta ena dika ia gwauatao diba. Farisea taudia be unai idia karaia lasi, badina idia laloa idia ese ma haida idia hereaia. To ita be Keristani taudia dainai, namona be ‘mai manau ida do ita laloa ma haida ese ita idia hereaia,’ bona edia dika ita gwauatao. (Fili. 2:3) Iehova do oi tohotohoa bona oi manau, a? Bema ita manau, do ia auka lasi ma haida edia dika ita gwauatao totona. Hebogahisi oi hahedinaraia haraga, to oi badu haraga lasi.​—Had. 7:8, 9.

9. Iehova ese edena bamona ia hahedinaraia taunimanima edia mauri be helaga?

⁹ Heau mauri hanuadia ese Israela taudia idia gimaia, unai amo idia be rara dekenai idia kerere lasi. (Deu. 19:10) Iehova be mauri ia ura henia, bona “kerere lasi taudia alaia karana” ia inai henia. (Aon. 6:16, 17) Ia be kara maoromaoro bona helaga Diravana dainai, aksiden amo ta alaia karana ia laloa bada danu. Momokani, aksiden amo ta ia alaia tauna ia hebogahisi henia. To ia karaia karana be tatau badadia vairanai do ia gwauraia, bema aksiden amo unai tauna ia hamasea, ia be heau mauri hanuana dekenai do ia noho ela bona hahelaga tauna badana ia mase. Anina be ena mauri dinadia ibounai lalonai ia be unuseni do ia noho. Unai amo Israela taudia idia diba mauri be helaga. Edia Mauri Ia Henia Tauna idia hanamoa totona, namona be idia naria namonamo dika ta ena mauri idia hadikaia kava.

10. Taravatu hadibaia taudia bona Farisea taudia be edena bamona idia hahedinaraia idia be mauri idia matauraia lasi?

¹⁰ Taravatu hadibaia taudia bona Farisea taudia be idau, idia be mauri idia matauraia lasi. Edena dala ai? Iesu ese idia ia hamaoroa: “Umui ese diba ena ki umui kokia. Bona umui be umui vareai lasi bona idia ura vareai taudia umui koua!” (Luka 11:52) Idia ese Dirava ena Hereva do idia gwauraia hedinarai, bona ma haida do idia durua mauri hanaihanai idia abia totona. To idia ese taunimanima be Iesu, “mauri Gunalaia Tauna,” amo idia hakaua siri, bona dika ia lao henia dalana dekenai idia hakaudia. (Kara 3:15) Taravatu hadibaia taudia bona Farisea taudia be idia hekokoroku bona ma haida edia namo idia laloa lasi. Idia be hebogahisi lasi taudia!

11. (a) Edena dala ai Paulo ia hahedinaraia ia be mauri ia laloa bada? (b) Edena dala ai Paulo ena kara ita tohotohoa diba?

¹¹ Edena dala ai taravatu hadibaia taudia  bona Farisea taudia edia kara do ita dadaraia bona Iehova do ita tohotohoa? Namona be mauri ita matauraia bona laloa bada. Aposetolo Paulo be taunimanima momo dekenai Basileia ena sivarai namona ia harorolaia. Unai dainai ia gwau diba: “Lau be taunimanima ibounai edia rara amo lau goeva.” (Kara 20:26, 27 duahia.) To namo lasi ita laloa Paulo ia haroro, badina ia ura lasi ia kerere eiava unai be iena maduna. Ia ese taunimanima ia lalokau henia, bona edia mauri ia laloa bada. (1 Kor. 9:19-23) Namona be Iehova hegeregerena, mauri ita laloa bada. Iehova “ia ura taunimanima ibounai idia helalo-kerehai.” (2 Pet. 3:9) Unai oi ura danu, a? Bema ma haida ita hebogahisi henia, mai ura bada ida do ita haroro bona unai ita karaia dainai do ita moale.

12. Dahaka dainai Dirava ena taunimanima dekenai seifti be mai anina bada?

¹² Ita hahedinaraia ita ese Iehova ena lalohadai mauri dekenai ita abia dae bema seifti karana dekenai lalohadai maorona ita dogoatao. Motuka ita taria, ita gaukara, ruma ita haginia, hanamoa, o tomadiho gabuna ta dekenai ita lao neganai, seifti ita laloa be gau badana. Taunimanima, seifti, bona helt be mai anina bada gaudia, to nega bona moni be gau badadia lasi. Iseda Dirava be hanaihanai kara maorona ia karaia, bona ita ura iena kara ita tohotohoa. Gau badana be elda taudia ese idia sibodia bona ma haida edia seifti idia laloa. (Aon. 22:3) Bema elda ta be oi dekenai seifti ena taravatu ia gwauraia, namona be iena sisiba oi abia dae. (Gal. 6:1) Bema Iehova ena lalohadai mauri dekenai ita abia dae, “kerere lasi tauna ena rarana do [ita] bubua lasi.”

13, 14. Israela ena tatau badadia ese edena dala ai Iehova ena hahemaoro goevana idia tohotohoa diba?

¹³ Iehova ese Israela ena tatau badadia ia hagania iena hahemaoro goeva idia tohotohoa totona. Tatau badadia ese ia vara gauna do idia tahua namonamo guna. Bena ala-ala tauna ese unai ia karaia ena badina, ena lalohadai, bona kara gunadia do idia tahua, unai murinai abia hidi do idia karaia bema ia do idia hebogahisi henia eiava lasi. Dirava ena hahemaoro goevana idia hahedinaraia totona, do idia tahua bema ia heau tauna be ia mase tauna ia “badu henia” eiava lasi. (Numera 35:20-24 duahia.) Bona bema hereva hamomokania taudia rua idia noho, ala-ala tauna idia hamasea diba.​—⁠Num. 35:30.

¹⁴ Ia vara gauna idia diba murinai, tatau badadia ese kerere tauna ena kara sibona lasi, to ia idia laloa be namo. Idia laloa maoromaoro be namo, unai amo ia vara gauna ena badina idia lalohadailaia namonamo diba. To gau badana be lauma helaga ena heduru idia noia, unai amo Iehova ena lalohadai, hebogahisi, bona hahemaoro goevana idia tohotohoa diba.​—⁠Eso. 34:6, 7.

15. Iesu bona Farisea taudia ese taunimanima idia laloa dalana ena idau herevalaia.

¹⁵ Farisea taudia be kara dika tauna ese ia karaia kererena sibona idia laloa bada, to ia idia laloa bada lasi. Farisea taudia idia itaia Iesu be Mataio ena ruma dekenai ia lao neganai, iena hahediba taudia idia nanadaia: “Dahaka dainai emui hadibaia tauna be takisi gogoa taudia bona kara dika taudia ida ia aniani?” Iesu ia haere: “Idia gorere lasi taudia be doketa idia tahua lasi, to idia gorere taudia sibona ese idia tahua. Umui lao bona inai hereva ena anina do umui tahua: ‘Hebogahisi lau ura, to boubou gauna lasi.’ Badina kara maoromaoro taudia boiria totona lau mai lasi, to kara dika taudia boiria totona lau mai.” (Mat. 9:9-13) Iesu be kara dika taudia dainai, ekskius herevadia ia gwauraia, a? Lasi. To ia ura idia helalo-kerehai. Bona ia ese unai ia harorolaia. (Mat. 4:17) Danu, Iesu ia diba “takisi gogoa taudia bona kara dika taudia” haida be idia ura edia kara idia haidaua. Idia be aniani sibona totona Mataio ena ruma dekenai idia lao lasi. Momokani,  “idia momo be unai nega amo Iesu murinai idia raka matamaia.” (Mar. 2:15) Madi, Farisea taudia momo ese taunimanima be Iesu ese ia lalodia hegeregerena idia laloa lasi. Idia ese taunimanima be kara dika taudia bamona idia laloa, bona idia dekenai idia be anina lasi. To Iehova be idau, ia be mai maoromaoro bona hebogahisi ida taunimanima ia kara henia.

16. Hahemaoro komiti be dahaka idia karaia be namo?

¹⁶ Namona be elda taudia ese Iehova idia tohotohoa, ia be “kara maoromaoro ia ura henia.” (Sal. 37:28) Gau ginigunana be idia kamonai sivaraina idia “tahua namonamo,” unai amo do idia hamomokania bema kerere ia vara. Bema unai ia vara, Baibel ena hakaua herevadia hegeregerena unai kerere do idia hamaoromaoroa. (Deu. 13:12-14) Bona bema idia be hahemaoro komiti ai idia noho, namona be idia tahua namonamo bema ia kara dika Keristani tauna be ia helalo-kerehai momokani eiava lasi. Nega momo do ia auka unai idia itaia totona. Bema ta be ia helalo-kerehai, ia karaia kara dikana ia laloa dalana bona ena kudouna ai ia noho gauna amo unai do ia hedinarai. (Apok. 3:3) Namona be kara dika tauna ia helalo-kerehai, bema ia ura idia hebogahisi henia. *

17, 18. Elda taudia be edena bamona do idia diba ta be mai kudouna ibounai ida ia helalo-kerehai? (Laulau ginigunana herevalaia.)

¹⁷ Iehova bona Iesu be ta ena kudouna idia itaia diba, to elda taudia be unai idia karaia diba lasi. Bema oi be elda ta, edena bamona do oi diba ta be mai kudouna ibounai ida ia helalo-kerehai? Gau ginigunana be aonega bona laloa kehoa totona oi guriguri. (1 Kin. 3:9) Gau iharuana be Dirava ena Hereva bona igui hesiai tauna amo ita abia pablikeisen idauidau oi stadilaia, unai amo “tanobada ena lalohisihisi” bona “Dirava ena ura hegeregerena ia lalohisihisi” karana ena idau do oi diba, unai be helalo-kerehai momokani ena toana. (2 Kor. 7:10, 11) Baibel ese idia helalo-kerehai bona helalo-kerehai lasi taudia ia herevalaia dalana itaia. Baibel ese edia hemami, lalohadai, bona kara be edena bamona ia herevalaia?

¹⁸ Gau ihatoina be ia kerere tauna oi laloa​—⁠iena ruma bese, lalohadai, bona iena goada ena hetoana. Baibel ese Keristani kongrigeisen ena kwarana, Iesu, ia perovetalaia, ia gwau: “Iena kota biaguna kara, be do ia maoromaoro momokani, taunimanima edia toana dekenai lasi, bona ia kamonai hereva sibona lasi. To ogogami taudia be mai maoromaoro danu, do ia kota henidia. Bona manoka taudia idia hisihisi henia taudia, be ia ese do ia panisidia.” (Isa. 11:3, 4) Elda taudia e, Iesu ese umui ia abia hidi iena kongrigeisen do umui naria, bona ia ese umui do ia durua hahemaoro goevana umui karaia totona. (Mat. 18:18-20) Ita moale badina elda taudia be ita idia laloa bada. Danu, ita idia durua iseda kongrigeisen taudia dekenai hahemaoro goeva bona hebogahisi ita hahedinaraia totona!

19. Heau mauri hanuadia amo dahaka ita dibaia bona oi ura badinaia?

¹⁹ Mose Ena Taravatu amo “oi be diba bona hereva momokani edia toana oi diba.” Danu, Iehova bona ena hakaua herevadia oi diba. (Roma 2:20) Hegeregere, heau mauri hanuadia ese elda taudia dekenai “kota maoromaoro” karaia dalana idia hadibaia, bona ita ibounai dekenai “kara namo bona bogahisihisi” hahedinaraia dalana idia hadibaia. (Sek. 7:9) Ena be ita be unai taravatu henunai ita noho lasi, to Iehova be ia idau lasi. Ia dekenai hahemaoro goeva bona hebogahisi karana be do mai anina bada. Unai bamona Dirava ita tomadiho henia be hahenamo badana. Namona be iena kara ita tohotohoa bona ia be iseda heau mauri gabuna ai ita halaoa!