ALLEN * ia gwau: “Matamanai, lau gari sisina inai kongrigeisen matamata lau bamoa totona. Bona lau daradara bema unuseniai tura namodia do lau davaria eiava lau do idia abia dae.” Allen be ia ura iena kongrigeisen matamata taudia ia diba namonamo. Iena hanua amo unai kongrigeisen be kilomita 1,400 mai kahana bamona.

Bema oi be kongrigeisen matamata dekenai oi lao, reana do oi laloa momo. To oi moale totona, dahaka oi karaia diba? Bema ia auka unai kongrigeisen taudia oi diba namonamo totona, dahaka do oi karaia? Danu, bema emu kongrigeisen oi haidaua lasi, emu kongrigeisen idia bamoa matamaia taudia be edena bamona do oi durua?

Inai haheitalai mani oi laloa: Bema au be iena gabu amo idia kokia bona gabu ma ta dekenai idia hadoa, do ia tubu namonamo lasi. Au be ena gabu korikori amo idia kokia neganai, nega momo ena ramuna idia utudia, unai amo gabu ma ta dekenai idia hadoa diba. Idia hadoa neganai, au be ramuna matamatadia ia atoa be namo. Unai hegeregere, kongrigeisen matamata do oi bamoa dainai oi lalohekwarahi diba. Reana oi be emu kongrigeisen gunana dekenai “ramuna” oi atoa vadaeni, hegeregere tura namodia oi davaria bona Iehova hesiai henia karana oi moalelaia. Hari, emu kongrigeisen matamata dekenai ramuna matamata oi atoa. Vadaeni dahaka ese oi ia durua diba? Baibel ena hakaua herevadia badinaia. Mani idia haida ita herevalaia.

Dina ta ta ai Dirava ena Hereva ia duahia tauna be “sinavai badinai idia hadoa audia bamona, edia huahua atoa neganai, idia ese anina idia atoa bada herea. Edia raurau danu do idia kakoro lasi. Edia gaukara ibounai be ena anina ia vara, bona mai edia kwalimu danu.”​—⁠Sal. 1:1-3.

Au ta be ia tubu namonamo totona ranu ia abia be namo. Unai hegeregerena Keristani tauna ena abidadama ia goada totona, Dirava ena Hereva ia duahia hanaihanai be namo. Unai dainai dina ta ta ai Baibel oi duahia, bona hanaihanai kongrigeisen heboudia dekenai oi lao. Sibona emu stadi bona ruma bese tomadihona oi goadalaia. Emu kongrigeisen gunana dekenai oi karaia gaudia be emu kongrigeisen matamata dekenai oi karaia danu.

“Taunimanima haida do oi durua, vadaeni haida ese oi do idia durua.”​—⁠Aon. 11:25.

Bema hanaihanai haroro gaukara oi karaia, oi be do oi goada bona emu kongrigeisen matamata do oi moalelaia. Keristani elda ta ladana Kevin ia gwau: “Lau bona egu adavana be kongrigeisen matamata ai bamoa matamaia neganai, maoromaoro ai heduru painia. Unai amo tadikaka taihu, painia taudia, bona emai teritori ai dibaia.” Roger be ena gabu ia rakatania bona kilomita 1,600 bamona ai ia noho gabuna dekenai ia lao, ia gwau: “Emu kongrigeisen matamata oi moalelaia totona, namona be hanaihanai oi haroro. Danu, elda taudia oi hadibaia oi noho hegaegae heduru oi henia totona, hegeregere Kingdom Hall oi hagoevaia, hebou ena kahana ta oi volantia, eiava emu motuka amo hebou dekenai ma ta oi abia lao. Bema tadikaka taihu be unai idia itaia, oi do idia abia dae.”

“Emui lalokau umui habadaia.”​—⁠2 Kor. 6:13.

Tadikaka lalokau henia karana oi habadaia. Melissa bona ena ruma bese be kongrigeisen matamata dekenai idia lao murinai, tura matamatadia  idia karaia. Ia gwau: “Kingdom Hall ai, hebou ia do matamaia lasi bona hebou murinai, tadikaka taihu ida ai herevahereva. Unai amo hanamoa hereva sibona ai gwauraia lasi, to idia ida ai herevahereva diba.” Unai ese ai ia durua tadikaka taihu edia ladadia ai dibaia haraga totona. Ma danu, heabidae karana idia hahedinaraia, bona unai ese edia hetura karana ia hagoadaia. Ma ia gwau: “Emai fon namba be idia dekenai ai henia bona edia ai abia, unai amo kongrigeisen eiava gaukara ma haida dekenai heduru ai henia diba.”

Bema oi ura taunimanima matamata oi hedavari henia, gau haida oi karaia diba. Hegeregere, kiri toana oi hahedinaraia, herevana oi ura lasi unai oi karaia. Oi kiri dainai taunimanima do idia ura oi idia hereva henia. Baibel ia gwau: “Iena vairana be mai kiri tauna ese, oi ia hamoalea noho.” (Aon. 15:30) Rachel be gabu daudau ta dekenai ia lao, ia gwau: “Lau be hemarai momo kekenina. Nega haida sibona lau doria egu kongrigeisen matamata ai idia noho tadikaka taihu lau hereva henia totona. Kingdom Hall ai, sibona ia helai tauna lau tahua bona hereva henia. Reana unai tauna be hemarai tauna danu.” Hebou ia do matamaia lasi eiava hebou murinai, ta ida herevahereva karana be tahua gauna ai oi halaoa, a?

Ma danu, wiki ginigunadia lalonai do oi moale taunimanima matamatadia oi hedavari henia totona. To nega ia hanaia lalonai, unai kara oi rakatania diba. Bema unai ia vara, namona be oi hekwarahi noho tura matamatadia oi davaria totona.

Au haida be gabu matamatana ai idia hadoa neganai, ia be do ia tubu haraga lasi. Unai hegeregerena, ta be kongrigeisen matamata do ia moalelaia haraga lasi. Bema nega daudau vadaeni kongrigeisen matamata oi bamoa, to oi do hekwarahi noho, inai Baibel ena hakaua herevadia badinaia karana ese oi ia durua diba:

“Ita hesiku lasi kara namodia ita karaia totona, badina bema ita hesiku lasi, nega korikori ai ita ese huahua do ita abia.”​—⁠Gal. 6:9.

Kongrigeisen matamata oi moalelaia totona, nega oi henia. Hegeregere, Gilead sikuli idia lao misinari taudia momo be lagani momo edia asainmen matamata dekenai idia noho murinai, holidei totona edia hanua dekenai idia giroa. Unai idia karaia dainai, tadikaka taihu idia tura henia bona edia mauri dala idia manadalaia diba.

Alejandro be gabu idauidau dekenai ia lao, bona ia diba iena lalohadai gabu ta dekenai be do ia idau haraga lasi. Ia gwau: “Lau bona egu adavana be gabu idauna dekenai ai lao murinai, egu adavana ia gwau, ‘Egu turadia ibounai be iseda kongrigeisen gunana dekenai idia noho!’” Iena adavana ia hadibaia unai hereva tamona be lagani rua gunana ia gwauraia danu. To unai lagani rua lalonai, ia hahedinaraia ia be ma haida ia laloa bada bona idia be tura namodia ai idia lao.

“Do oi hereva lasi inai bamona, ‘Badina dahaka nega gunadia be namo, to inai nega be ia dika noho?’ Badina inai bamona henanadai be aonega lasi.”​—⁠Had. 7:10.

Emu kongrigeisen matamata be gunana ida oi hahegeregerea lasi. Reana oi laloa emu kongrigeisen matamata tadikaka taihu be idia herevahereva momo lasi o idia herevahereva momo. Edia kara namodia sibona oi laloa, oi ura oi dekenai idia  karaia bamona. Kongrigeisen matamatana dekenai idia lao taudia haida be sibona idia nanadaia, ‘Lau be “tadikaka oreana ibounai” lau lalokau henia, a?’​—⁠1 Pet. 2:17.

“Umui noinoi noho, bona umui dekenai do idia henia.”​—⁠Luka 11:9.

Heduru totona oi guriguri noho. Elda ta ladana David ia gwau: “Namo lasi oi laloa oi be hegeregere. Iehova ena heduru amo gau momo ita hagugurua diba. Emu hekwakwanai oi gurigurilaia!” Matamanai ita herevalaia taihu, Rachel, be unai hereva dekenai ia lalotamona. Ia gwau: “Lau bona egu adavana ai mamia ai be kongrigeisen amo ai daudau neganai, Iehova ai guriguri henia, ai gwau, ‘Iehova bema emai kara dainai ma haida be ai idia tura henia lasi, mani ai oi hadibaia.’ Bena emai nega bada ai atoa tadikaka taihu ai bamoa totona.”

Tama sina e, bema emu natudia be edia kongrigeisen matamata idia moalelaia lasi, nega oi atoa idia ida unai oi gurigurilaia totona. Dala umui hegaegaelaia, unai amo edia tura matamatadia ida idia hebamo diba.

Emu kongrigeisen idia bamoa matamaia taudia be edena bamona do oi durudia? Oi hekwarahi idia oi tura henia totona. Unai ia vara totona, oi ura ma haida ese oi dekenai idia karaia karadia oi laloa, bena unai hegeregerena oi kara. (Mat. 7:12) Idia oi boiria umui ida ruma bese tomadihona o JW Broadcasting umui itaia hebou totona, a? Haroro gaukara ai idia oi bamoa, a? Bema idia ida oi aniani hebou, unai do idia laloaboio lasi. Emu kongrigeisen idia bamoa matamaia taudia be edena dala ma haida ai oi durudia diba?

Carlos ia gwau: “Nega ginigunana emai kongrigeisen matamata dekenai ai ginidae neganai, taihu ta ese ai dekenai davana maragi sitoa haida ia hadibaia. Unai ese ai ia durua bada.” Tano idauna amo idia mai taudia haida be do idia ura diba edena bamona dabua be siahu, paraka, eiava medu negana ai idia hahedokilaia diba. Danu, idia dekenai komiuniti ta ta edia noho dalana eiava tomadiho momo ese idia abia dae gaudia oi herevalaia diba, unai amo edia haroro gaukara do idia hanamoa.

Matamanai ita herevalaia tadikaka, Allen, be lagani ta bamona lalonai ena kongrigeisen matamata dekenai ia noho. Ia gwau: “Sibona lau doria tadikaka taihu lau dibaia namonamo totona. To hari, idia be egu famili bamona bona lau moale.” Allen ia moale badina tura matamatadia ia davaria. Bona ena mauri ibounai lalonai idia do ia tura henia.